مشكلة وظيفة

[moody_687]

ياجماعة انا بشتغل ف احدى المصالح الحكومية وشغلي بيخلص الساعة 2 وبوصل بيتي ع الساعة 3 العصر عشان محل سكني بعيد عن منطقة عملي
المهم دلوقتى انا جالي وظيفة لتوسيع رزقي عشان انتم عارفين مرتبات الحكومة شكلها عامل ازاى والوظيفة دي بعيدة برده عن سكني
المشكلة بقى ان الوظيفة دى ميعادها الساعة 5 لحد 10 بليل
انا لو روحت البيت من الساعة 2 هوصل ع 3 وعشان انزل الشغل بتاع الساعة 5 المطلوب منى انزل ع 3.5 او 4 يعني هقعد ف بيتي نص ساعة فقط
دلوقتى انا اقضي 3 ساعات الفرق دوول ازاى من 2 ل 5 الفترة مابين الشغلنتين اعمل فيهم ايه لو روحت البيت هروح هسلم ع اهلى وانزل ولو قعدت ف الشارع هقعد فين
ارجوكم ساعدونى بافكاركم

[S O P H O S]

مفيش احسن من الصلاة فالوقت ده
راي تخش جامع تصلي الظهر والعصر وتقري قران
ووقتك يعدي فعبادة ربنا وفاحسن مكان
والله اعلم ..

[BESO516]

مفيش احسن من الصلاة فالوقت ده
راي تخش جامع تصلي الظهر والعصر وتقري قران
ووقتك يعدي فعبادة ربنا وفاحسن مكان
والله اعلم ..

+111111111111111111

[wallace]

تطلع تصلي العصر وتتغدي في اي مكان وتتوكل علي الله علي شغلك الثاني وربنا يوفقك

[zadgo]

ربنا يوفقك ويوسع رزقك ان شاء الله
متهيألى هيبقى صعب تمشى على نفس الوتيرة بشكل يومى
يعنى ممكن ايام تروح وايام تانيه لو عندك مصلحة تقضيها
وهتلاقيها ظبطت معاك ان شاء الله
او ممكن لو تروح الشغل التانى بدرى شويه وتمشى بدرى بالليل

[svneleven]

اطلب من الشغل يحرك الميعاد ل 4 أو 6. لو 4 تصلي و تتغدي و تطلع علي الشغل و لو 6 يبقي تروح البيت تشوف العيال و تصلي و تتغدي و تطلع علي الشغل و ربنا يوفقك و يوسع عليك.

[moody_687]

ياجماعة من الصعب انى امشي ع نفس الوتيرة كل يوم اني اروح الجامع وكمان مش كل شوية اكل برة يعني ع كده هنسى حاجة اسمها طبيخ
انا اللى فكرت فيه انى اروح وانزل ع 4 الا ربع ع الاقل هتغدى واشربلي كوباية شاي
بس اللى غايظني ف الحوار ان حياتي كلها هتقف بسبب الوظيفة دي خروجاتى مع اصدقائي والماتشات اللي كنا بنشوفها بليل مع بعض بس الفايدة انى لما اتجوز ان شاء الله مش هشوف مراتي كتير عشان متنكدش عليا

[S O P H O S]

ههههههههههه
يا باشا الشغل مهم عن الخروج
هتفضل تخرج طب وايه الفايدة صدقني هتزهق ..

[beshomilan]

نصيحة من حد كان عايش فى قرف شغرنتين مده كبيره..بلاش تتسرع وتنزل شغلين مفيش وقت راحة مابينهم والا هتضيع حياتك فى الشغل وبس وبعد مده هتحس انك مش بنى ادم
انا كنت بشتغل 3 شغلانات
من 7 الصبح ل 8 الصبح ومن 9 الصبح ل 5 ومن 7 ل 11 بليل وبروح 12 اموت على السرير
النتيجه:
نسيت شكل اصحابى
مبقتش احس ان فيه عيد او اجازة ولا دريان بالايام
بقيت مبهدل ومعنديش وقت اشترى لبس
بقيت استخسر اشترى اى حاجه نظرا للدخل الكبير فبالتالى تحويش الفلوس واستخسارها فى النفس
الحسره لما اسمع صحابى رايحيين يلعبوا كوره وانا مش قادر عشان الشغل
الاقى ماتش ريال وبرشلونه شغال وكله متجمع وبيتفرج وانا مطحون فى الشغل زى العبيد عشان شوية ورق بحوشه عشان اصرفه على غيرى وعشان غيرى يستمتع بيه وانا بتحرق
مفيش رحلات ولا اجازات رسميه ولا انتخابات ولا اى حاجه ابدا وفعز ما البلد كلها اجازة انت ماشى لوحدك فى الشارع رايح الشغل

جرب كام يوم وشوف حياتك هتروح لفين
ربنا يعينك

[ahmed_m_ashraf]

باشا أنا كنت زيك بالضبط قبل الزواج. بس من شغل حكومة. زي الناس ماقالتلك، قعدت سنه بشوف أختي المتزوجة وأخويا كل فين وفين صحابي مبقتش أشوفهم غير صدف أو في الأجازات الطويلة زي الأعياد بس.

بس معلش العيشة صعبة ولازم تضحي، زي النا ماقالتلك أيام تطلع برهبره وتقضي وقت في الجامع، وأيام تغير الروتين وتروح تتغدي وتنزل تاني وأيام ممكن يكون وراك مصلحة تقضيها بين الشغلين. بس إتحمل شوية الروتين والإرهاق إللي هتشوفة بس عن تجربة شهر وهتتعود عليه وهتلاقي نفسك ماشي بقوة الدفع الذاتي هههه.

لا تيأس ومتكسلش وتستلم بسرعة أصبر وإن شاء الله ربنا هيعوض تعبك خير، أنا بعد الدوخة دي لمدة سنة كاملة تزوجت وسيبت شغلانة من الإثنين وكملت في الثانية يوم كامل بضعف المرتب وساعتها كان أكتر من إللي بيدخلي من الشغلانتين سوا، وبعد حوالي ٤ سنين تركت شغلي الثاني والآن أعمل حر والعيشة رضا والحمد لله.

متعرفش ربنا شايلك إيه كمان شهور قدام، يمكن خير، بس إنت إسعى وإجتهد في الفرصة إللي أمامك، ممكن الفرصة دي تفتحلك آفاق جديده مكانتش تخطرلك على بال ويجي من وراها خير. ممكن مثلا - لو مكنتش متزوج - تلاقي زوجة المستقبل في شغلك الجديد والله أعلم! أو يجيلك من وراه شغل أو وظيفة أحسن.

بإختصار، متفكرش إنك هتقعد على المنوال ده طول العمر، إجتهد ومكن يكون ربنا شايللك الأفضل قريب.

[samyyousef]

ربنا يعينك و يباركلك في وقتك
سؤال
هل أنت مضطر لهذا العمل الثاني؟
لو لم تكن كذلك او كان المبلغ الذي ستحصل عليه لن يحدث طفرة في حالتك المادية...فلا أنصحك به..اما لو كنت مضطر او أن العمل الثاني سيحدث طفرة في امكانياتك المالية فربنا معاك

[A.Saad]

اتعب وانت صغير
الاصحاب والكورة مش كل الدنيا
ممكن تشوفهم يوم الاجازة

[moody_687]

والله هو نفس مرتبي ف الحكومة يعنى يعتبر انى هاخد الضعف طبعا ف اشغال بتكون فترة واحدة واعلى من المرتب برده اللي هاخده انا عايز اشتغل شغلانة تانية عشان اكون نفسي واوضب شقتي الحمدلله ع كل شىء
واكيد ياستاذي لازم اتعب وانا صغير عشان كده اخذت قرار اني اشتغل الشغلانة دي ان شاء الله وربنا يقويني بأذن الله دعواتكم

[Ahmed_selmy]

ربنا يوفقك.

[mado83]

ياسيدى الفاضل
احمد ربنا انك لقيت حاجه زى دى
ويوم تروح ويوم تروح الشغل التانى بدرى
واهى هتمشى وممكن حاجه حلوه برضو
اشترك فى جيم بحيث انك تخلص شغلك تروح الجيم تلعبلك ساعه او اتنين وتاخد دش وتروح على شغلك التانى اولا مش هتحس بتعب الشغل التانى ومش هتبقى كسلان ولا خملان ودول هيبقو يومين او تلاته فى الاسبوع
وباقى الاسبوع روح البيت