♥ تعمل أية لمن تيجي (بنت حلوة) تقابل أبنك في البيت لوحدوا ؟

[Y a r i s]

تعمل أية لمن تيجي (بنت حلوة) تقابل أبنك في البيت لوحدوا ؟

تعمل أية ؟؟

والموضوع باختصار اني كنت مسافر انا والمدام ورجعت للبيت بدري ... ويادوبك لسه داخل البيت ولسة هغير هدومي ... لقيت الباب بيرن طبعاً في البداية طنشت ومرديتش ... وقلت اكيد بتاع فواتير الكهربا. ولا المية هو انا ناقص ده انا لسه جي وبقول يا هادي ... دخلت خدت دوش ولبست علشان كان حماية وحماتي عزمنا على الغدى وساكنين جمبنا والمدام عندهم والعيال عند خالتهم هيحصلونا على هناك المهم وانا خلاص بلبس فردة الشراب في رجلي رجع جرس الباب يرن تاني ...

قمت قلت لا مبدهاش بقة ... ده مين الرزل الي بيخبط على الباب عالظهر كده قمت فاتح الباب وإذ. ببيت ( حتت بنت ) يعني بجد تبارك الخلاق فيما خلق وسبحانههههههه من اسمع وابصر .... أأييييه ده يا أخي ... أيه الحلاوة والطعامة والشياكة والشقاوة والازازة دي. !!
البت الخالق الناطق ( مي عز الدين ) بتاعت عمرُ وسلمى توو ... بس على صغير كدة حاجة كده بالقشطة وعنيها ملونه تقريباً لونهم كده تريكيواااااز او لبني عارفين البحر بتاع شرم الشيخ ساعت الضهرية ههههه اهو ده لون عنيها :)
طبعاً علشان محدش يفهمني غلط البت في منزلة عيالي ... بس بسم الله مشاء الله على جمالها ويحميها. لاهلها ويجحمها بجحيم قادر يا كريم هههههه

المهم :

أنا : ( وأنا مزبهل كده! ) وبقول في عز الصمت الانتخابي بتاعي أيووه نعمم مين ؟ .
هيا : ( وهيا مرتبكة ) لقيتها بتقولي بكل ثقة وارتباك هو لو سمحت ياعمو جميلة ابو أسماعيل موجودة !!!
أنا رحت رادد عليها : جميلة ابو اسماعيل مين يا حبيبتي مفيش حد بالاسم ده هنا ( رغم ان الاسم مش غريب عليا ) فافتكرت بنت حد من الجيران اسمها كده رغم ان مفيش حد من الجيران اسموا ابو اسماعيل ولا في حد عندوا عيل اسموا اسماعيل اساساً بس الاسم مش غريب عليا ) ههههههه . فقلتلها مفيش حد بالاسم ده يا حبيبتي .

المهم لقيتها بتقولي شكراً ياعموا ولقيتها بتسحب رجليها شوية شوية ويادوبك نازلة على اول سلمة وقامت مدورة ورجعة تاني !!!

هيا : طب لو سمحت ياعموا مش ده بيت ( فلانة وقالت اسم بنتي ) !!
انا استغربت : وقلتلها فلانة مين ياحببتي قصدك على مين بالزبط .
(هيا ) : فلانة اخت تركي ( الواد أبني ) !!

استغربت جداً : وقلت في سري وهيا بنتي دي ملهاش اسم أب. بتستعر منوا مثلاً ... طيب بلاش اسم الاب ملهاش اسم جد ملهاش اسم عيلة ... ده قبليتنا واسم عليتنا مالي الارض من شرقها لغربها ... وبقه اسم بنتي دلوقتي فلانة أخت فلان !!

وقلت يالله مش مشكلة بس استغربت البت ( مي عز الدين دي كبيرة وطويلة ) وبنتي لسه كتكوته كده في ابتدائي معقولة بنتي بتعرف بنات اكبر منها في السن ... وبعدين قلت ماهو البت بنتي عسولة وكل الناس بتحبها ... بس ايه حكاية اخت تركي وايش عرفها بتركي !!

المهم قلتلها : حبيبتي هيا في المدرسة. دلوقتي ولسه مرجعيتش انتي مييين !
قالتلي : انا زميلتها
قلتلها : زميلتها ازي انتي سنة كاام ؟
هيا : اولى ثنوي
انا : طيب عرفتي بنتي منين !! وانتي ليه مش في مدرستك النهردة ؟
هيا : لا اصل النهاردة اجازة وانا عارفه توته اصل بنلعب مع بعض

المهم قصرت معاها وعلشان مطولش عليكم ... بالليل بقول للمدام حصل كزا كزا كزا ورحنا ندهين على توتة ( بنتي ) علشان نستفهم منها أية حكاية البت دي ! ... لقيتها بتقول لا يا بابا معرفش بت اسمها لمياه ( بس ممكن تكون صحبت تركي ) ألللللللللللله طيب ما تركي في اعدادي لسه ... معقولة راح يتعرفلي على بت في اولى ثنوي وانا نفوووخي هيتجنننننننننننن .

لقيت المدام بتقولي : انو الواد قلها مره وهو بيدحك معاها انوا بيحب يصاحب بنات اكبر منوا. قال ايه علشان يستفيد من خبراتهم في الحياة وتجاربهم وبيحس ان عقلهم ناضج اكتر .. !!
وانا : وانا هتجنن قلتلها اهلااااااااااااً خبرات ميييين الي عاوز يستفيد منها ابن التيييييييييت ده ... وقمت جي انده عليه وانا بغلي والدم ضاااارب في نفوخي وعنيا بتطلع شرار وعاوز انده على الواد ابو خبرات ده لمن اشوف خبراتوا وصلت لحد فيييييين !!!
بس لقيت المدام بتهديني وبتقولي علشان خاطري سيبوا دلوقتي اصلوا بيزاكر وامتحناتوا قربت

بيني وبينكم مبقيتش عارف اعمل ايه ... من جوايا ( فرحة ) ان ابني الصغير كبر وبقى راجل وزوقوا حلو في اختيار البنات طالع لابووه الواد ... ومن ناحية تانية جوايا صرخة وغضب أب ... أنوا أزاي وأزاي يتجرء الزفت ده انوا يتعرفلي على بنات في الثانوية وهو لسه في اعدادي معنى كده انو مش بعيد بيسيب مدرستوا وبيروح يمضي حضور وانصراف قدام مدرسة بنات الثانوية العامة ومش بعيد يكون الواد بيضيع فلوسوا ومصروفوا على البنات وحتى لو حرمتوا من المصروف مش بعيد يتعرفلي على عيل فاشل من ولاد الاغنية اصحابوا ( ونظام ظبطني وازبطك ) ما احنا كنا شباب وعارفين

طيب لو ضربتوا وشمطوا شمطتين بسلك الكيسة بتاعت الكمبيوتر... طيب الضرب مش هو الحل ولو زودت العيار شوية عليه مش بعيد يطلع الواد بعد كده متعقد وزي الشباب الخايبة الي بنشوفهم اليومين دول الي بيتكسفوا من خيالهم ... ثم ازاي وازاي بت تجيلوا البيييت ودي جايه تزاكرلوا ان شاء الله ولا جيه تديلوا دروس تقوية !!

وبقيت محتار ومش عارف اعمل ايه ياربي ! اكون أب مودرن وأصاحب ابني ونطلع نزبط سوى ... ولا اكون حازم معاه وقاسي ولا اعمل نفسي اني ممعيش خبرررر !

مش عارف اعمل ايه ياربي لان كل اب فينا مخلفش قبل كده ولا احنا خبراء تربية واساتزة في التربية ... احنا كل واحد فينا بيخلف وبيجرب في ابنوا وسائل التربية ويا يطلع الواد معقد وخايف من الجنس الاخر وخايب كدة ... يا يطلع فلتان وبيبص بص على الجنس الاخر ... يا هو وظروفوا بقه ... والي عرفتوا بعد كده ان الواد كان بيحب بت اسمها (منة ) واظاهر البت كانت ؤولعبان والواد خارج من تجربت حب فاشلة و قاسية وقلبوا انفطر وانكسر يا عيني ... وانا بغني يا سلام سلم ياسلام سلم .

وانا كأب جوايا كوكتيل مشاعر او فخفخينة مشاعر متضاربة ما بين الغضب والفرح . ومش عارف اعمل ايه اروح اطب طب عليه واقولوا معليش يابني بكرة تنسى منة وربنا يعوضك بالي احسن منها ... ههههه طب ماهو الواد أهو مبيضيعش وقتوا يامشالله ولسه ملحقش ينسى منة راح اتعرفلي على لمية وياعالم عارف مين كمان ؟ و يا ما في الجراب يا حاوووي ... اعمل أيه يا اولاد الحلال في الواد ابن التييييت ده !

ثم الواد لسه في اعدادي اومال لو دخل ثنوي هيعمل ايه ولا لمن يوصل الجامعة هيتنيل على عين اهلوا هيعمل ايه ! ولو سكت مش بعيد ده بكرة لمن يخش الجامعة يتعرفلي على وحدة متجوزة ولا مطلقة او ارملة ويقولي بحبها يابابا والعيال عيلها اول مايشوفوني بيجروا عليا ويقولوا اونكل كمال جه اونكال كمال جة ويحبلي وحده اسمها سونة !!! ( مسرحية العيال كبرت ) فأزاي الحال ساعتها ؟؟

وطيب لو جيت بت بجحة فيما بعد من البنات اصحابوا للبيت عندوا هعملهم ايه هقولها اتفضلي ويا اهلاً وسهلاً واطلبلهم اتنين لمون ( وامثل دور الاب المودرن ) ولا اقولوا انزل كلمها تحت في الشارع يا فاشل واخر مره اشوفك بتكلم بنات

انتا كأب تتصرف ازاي لو كنت مكاني ... وانتا كشاب كنت تتمنى ابوك يعمل ايه ويتصرف معاك ازاي لمن يعرف انك مصاحب بنات اكبر منك علشان تستمد منهم الخبرات قال .

عيال عاوزة الحررررررق .... وتجيب المرارة ... ده انا لسه راجع البيت طب استنى ياتركي لمن ابوك يا خود نفسوا. على طول كده تصدمني يا تركي الزفت. صبرك عليا. بس انا بجد مش عارف اعمل ايه او اتصرف ازاي في موضوع زي كدة ايه رايكم في الموضوع ده يا شباب

@@@@@@@@

وتحياتي

[/color][/size]

[mr_vampire]

ههههههههههههههههههههه...... بس كدة عشان بطني وجعتني وبؤي وسع من الضحك.

[ahmedbasto]

ههههههههههههههههههههه...... بس كدة عشان بطني وجعتني وبؤي وسع من الضحك.

+111111111111111

[Khaled Online]

قول يابني ورايا: غزالٌ...يهبلٌ
الله يرحمك يا عبد المنعم يا مدبولي ههههههههههههههههههههههههه

[blazer]

بسيطة خالص :d
عرفنى علية ياعمو
ههههههههههههههههههههههههه

بص هو مبدئيا لازم تكلمة بس خد بالك دا يعتبر عيل لسه فمتحسسهوش انه ارتكب جريمة كبيره

واعتقد هو مش هيفهم كلام من نوعية حرام تصاحب البنات :d

[speed_magnum]

هههههههههههههههههههههههه
والنبي انت برنس
...
...
انا يا باشا والدي كان عارف كل قصص حبي الفاشله بس عمره ما يوم كلمني ولا فاتحني في اي حاجه علشان ما اتجراش واعمل الغلط قدامه
والدي. ... وعرفت الكلام ده بالصدفه. ... كان بيقول لواحد صديقه عزيز على قلبي جدا والله يرحمه هو توفى. .. كان بيقوله انصح ابني وقله كذا وكذا والراجل عمره ما قصر وكان بييجي يحكيلي على تجاربه وخبراته وفي الاخر يقولي النسوان يا ابني مالهمش امان. .. اطيب واحده فيهم ممكن توديك في داهيه. وانا كنت بستجيب لكلامه جدا وهي مرحلة المراهقهةكده. بس المهم لو البت جامده خليه يعيش يا ريس

[nab!l]

واضح ان تركى اختياره صح لان البنت خبره جدا
واضح من رد فعلها لما حضرتك فتحتلها الباب :)
الموضوع حساس بصراحة
كنا عيال غلابه اوى ياخال

[Y a r i s]

ههههههههه
فعلاً وهو ده الي بقول عليه .... اغلب ابهاتنا عارفين كل بلاويين ومع ذالك كانو بيعملوا نفسهم انهم ممعهمش خبررر ... ومع ذلك في عيال بتلم نفسها وتتلم وفي عيال تسوء فيها. ويتمادا في اخطائوا ويقولك انا بعمل وبعمل وابوويه عارف ومتكلمش .

بس الي مجنني اكتر البت. الزفته الي اسمها لمية دي فين التربية لمن تروح لشب لبيتوا ... بفكر افاتح تركي في الموضوع واعرف رقم تيلفونها او عنوان بيتها علشان اروح ابهدل اهلها انوا سايبين بنتهم بالشكل ده. ... واهوا بالمرة. اشوف مامتها وعلى قولت عم مولدي اكيد ماما نحلة علشان تجيب العسل ده كلوا ههههه لا بجد انا عاوز اجتمع باهلها واقولهم خلوا بنتكم. تبعد عن ابني ... واقول للبينت عيب اختشي ده قد اخوكي الصغير انتي ايه معندكيش اخوات صغيريين ... ومرات بقول يمكن كل الي في دماغي مجرد اوهام ... ودي صداقة بريئة ... وفي نفس الوقت لو قلتلوا يا ابني حرام وميصحش هيقول في نفسوا اااااه بابا لسه جي سخن من العمرة. وهيعملي فيها شيخ بقه ( ويقول كلمة الشباب بتاعت اليومين دول ياعم نفض ) ويسمعني من هنا ويطلع من هنا بجد محتار ... ثم الواد لسه في اعدادي عارفين يعني ايه اعدادي يعني لسه مفقسش من بيضة. اومال لوفقس بقه هيعملي ايه هيجبلي كتاكيت صغيرين ويقلي بابا دول عيالي احفادك يابابا ههههه انى لله وانى اليه راجعون توووب علينا يارب تووب علينا يارب من الغلب ده

محدش يريحني وياخود ابني. ويديني بدالوا سامسونج اس ثري ميني. او حتى مروحة ههههه

[nab!l]

طب والله فكره
عليك وعلى بيت اهلها

[Y a r i s]

ماهو انا علشان اعرف بيت اهلها يبقى لازم يكون عندي ردت فعل من تركي. وامسكوا ابهدلوا او اصاحبوا على حسب ما تنصحوني بيه

ثم انا لو رحت بيت اهلها بت زي كده مش متربية. اكيد اهلها منفصلين واكيد مامتها فرررري. .... وكوني اني اروح لبيتها ساعتها مش هسلم من الشبهات ومن مراتي هتقولي اااااااه تعاله هنا يا حلوووو ايه الي وداك لام البت. عجبتك ام البت قوووي ... واكيد هتقول في سرها : اااه هلاقيها من الواد ابني ولا ابوه ياربي ... وتحصلي مشكلة ملهاش اول من اخررررر وعلى قولت المثل يعملوها الصغار ويوقعوا فيها الكبار !

[blazer]

لو البت كانت كبيرة شوية كنت اتجوزتهالك مخصوص عشان احللك المشكلة العويصة دى هههههههههههههه
انا مش عارف ايه حظك مع البنات الصغيرين الحلوين دول
نسيت موضوع خطوبة صاحبك ولا اايه :d

[youssef_u]

بص لو ضربته او بهدلته هيتمادى فيها ، انتا روح اقعد معاه و في نص الكلام قوله هي مين لمية دي ؟ و لو رد عليك برااحه و هدوء وقالك كل حاجه يبقا اشطه لكن لو ارتبك و خاف و كلامه بقا ملخبط اعرف انه بيعمل حاجه غلط و برده قوله مين منة و كده و قوله عيب اللي انتا بتعمله ده و ترضى كده لاختك و حبة كلام كده
و لو عنده اكاونت عالفيس افتحه شوف هو بيكلم مين و بيقول ايه و كده و لو عرفت تراقبه من بعيد لبعيد كده و كمان روح اسال في مدرسته في اي يوم و اسال هو بيغيب ولا بيزوغ من وراك ولا لا
و ياسلاام بقا لو تعرفني على لمية دي خصوصا اني في اولى ثانوي ابقا شاكر ليك جددا

وانا عارف كل البلاوي وبعمل منها كتير اي فضيحه او استفسار انا موجود

[ganash]

انت مختفى الفتره دى كلها بتفكر فى المشكله دى ولا ايه ههههههههههه اكيد يعنى الواد طالع لابوه d:

[Kareem.ElAraby]

انا قعدت أضحك لغايه ما عيني دمعت !

يا عم كلمه و اتأكد بس انه ماشي صح مش بيغلط و فهمه كل حاجه و سيبه

وسيبه يعيش انت هتبصله في رزقه :]

عاش يا تركي والله

[abogharib]

ههههههههههههههههههه مش معقول طريقه كتابتك للموضوع مش مخليانى ابطل ضحك
المهم سمحو يا حج طالما البنت طلعت حلوه و طعمه كده ..أأحبيبى أأتركى
المهم بقى انت لازم تفكر بعقل كده و تتصرف اصل تركى لسه فى اعدادى و البنت جايلو لحد البيت طب لما يكبر شويه هتلاقى مثلا الباب بيخبط و عيل بيقولك جدو جدو جدو
انت صاحبو و فهمو و عرفو الصح من الغلط علشان لما يكبر ميدبس فى حاجه و يجى يقولك انت مقلتليش ...وبعدين سيبك انت من اب مودرن و الحاجات الفكسانه دى اهم حاجه التربيه