عربيه حمايا اتسرقت من تحت بيتى

[M.ABDOU]

السلام عليكم

حصل النهارده موقف تقريبا مش حنساه ابدااا

امبارح انا راجع من عند حمايا بالليل الساعه 11 بالليل وطبعا الجو كان برد جداا وبتمطر فخدت عربيته علشان بنتى الصغيره وابنى كان اصلا عندهم برد وتعبانين هوا ساكن فى المتميز فى اكتوبر وانا ساكن جوا اكتوبر مسافه تقريبا 15 كيلو تقريبا المهم وصلت تحت البيت عندى وركنت العربيه وطلعت وكذا مره اصلا مش اول مره اخدها منه خصوصا انا جاى من سفر ومعنديش عربيه بقضى اجازتى فى مصر شهر وبرجع المهم تزلت انا ومراتى النهارده الساعه 2 الضهر علشان نروحلهم واوديلهم العربيه فمراتى سبقانى ومعاها الاولاد وانا متعود ادوس على الريموت افتح ليها العربيه قبل ما اوصلها بدوس مش سامع صوت اللوك بتاع العربيه

ابص يمين ابص شمااال مش شايفها

بتقولى امال العربيه فين يا محمد تنحت كده وبصتلها وانا ببتسسسسسسسسم

بقولها العربيه تقريبا اتسرقت

والله يا جماعه انا بجد بجد اول مره احس بموضوع ان فى فعلا هم يضحك وهم يبكى انا مزبهل زى ما بيقولوا ومش قادر اجمع وكل اللى عليا ببتسم وببص حوليا

طيب ااقول للراجل ايه؟؟؟؟؟؟

بالساهل كده عربيتك اتسرقتك
هيا النترا اوتوماتيك وتقريبا جديده 2010
المهم اتصلت بيه وقولتله بس براااااااحه طبعا ولاقيت والله الراجل هادى وتفهم الامر وقالى طيب حجيلك نعمل محضر

انا بقى مستغرب من حاجه لما سألت الناس اللى تحت البيت والجيران كذا واحد اكدوا انهم اخر مره شافو العربيه تقريبا الساعه 10 صباحا يعنى متسرقتتش بالليل والعربيه فيها انذار

انا عارف ان المفتاح بتاعها مش امبوليزر مش مشفر يعنى بس العربيه اوتوماتيك حيحتاج يفك اللوك بتاع الفتيس والظابط بيقولى ان العربيه دى علشان يعمل قفله ويشغلها محتاج تقريبا 20 دقيقه على الاقل والفتيس كل ده ازااى تم صباحا وكمان قدام البيت

حتجنن والله مش فاهم؟؟؟؟؟؟؟؟

ثانيا انا عاوز اسألكوا سؤال هوا فى الظروف اللى زى دى ان العربيه كانت معايا انا واتسرقت من تحت بيتى انا حيكون ازاى مثلا ايه هوا المفروض يتعمل مع حمايا وهل انا غلطان او عليا جزء من المسؤليه ولا هوا قضاء وقدر ارجوا فعلا تفيدونى

[Land_Cruiser]

لو حماك مأمن عليها لازم يعمل المحضر ان العربيه اتسرقت منه و حضرتك ما تظهرش فى الصوره يعنى العربيه اتسرقت عندكم بس و هو كان موجود مثلا .طبعا الموضوع قضاء و قدر و ربنا يرد إليك ضالتك

[alrabeh]

الطريقة الجديدة للسرقة هو شد العربية وسرقتها بونش
ياريت سيادتك تبلغ فى مديرية الأمن قسم مكافحة السيارات وما تكتفيش بمحضر فى القسم
وان شاء الله تفرحنا بعودتها قريبا

[M.ABDOU]

لو حماك مأمن عليها لازم يعمل المحضر ان العربيه اتسرقت منه و حضرتك ما تظهرش فى الصوره يعنى العربيه اتسرقت عندكم بس و هو كان موجود مثلا .طبعا الموضوع قضاء و قدر و ربنا يرد إليك ضالتك

فعلا عملنا اللى حضرتك بتقول عليه ده لان العربيه مأمن عليها فعلا

رحنا القسم عملنا محضر وذكرنا انه كان بايت عندنا بس هوا التأمين تقريبا بيديله تقريبا كاام وبعد مده قد ايه؟؟؟

[Mahmoud Saloum]

أخى الفاضل ربنا يهون عليك مصيبتك وميكتبهاش على حد من السامعين. بالنسبة لحماك وموقفك معاه للاسف انت اخدت منه العربية وبالتالى تعتبر العربية امانة فى عنقك حتى تسليمها له مرة اخرى كما استلمتها منه وبالتالى لابد ان تؤدى الامانات الى اهلها ولازم ترجعله امانته او ثمنها ومينفعش انه يكون عزومة مراكبية تنتهى بتنازله حياءا منه تجاهك ولكن اذا تنازل هو عن حقه فى استرداد امانته فله الأجر عند الله واذا استرد امانته او سعرها فهذا حقه والله أعلم

[Y a r i s]

هو تقريباً العربية اتسرقت الفجرية زي ما بيسرقوا فيوزات الكهربا. واسلاك التيلفونات المدفونة في الارض الي قولي هيا عملية السرقة تمت في انهي حي في اكتوبر
لان حصل قبل كده في البشاير صف عربيات بالكامل اتشال بالوينش ومحدش يقدر يجبهالك غير عرب الفيوم تقريباً

[د.أبونضال]

ربنا يرد عليكم ضالتكم ... حاجة تقلق بجد ربنا يستر على الجميع

[drmsadek1979]

خلاصة القول انك مسؤل ترجع العربية
أو تدفع قيمتها لو مرجعتش

[i_Am_Legend]

لا حول ولا قوة الا بالله

[youssef_u]

لا حول ولا قوة الا بالله ربنا يصبرك بس ياريت تقولي اتسرقت من الحي الكام و لونها ايه و لوحتها عشان لو شفتها ابلغك

[Lada2013]

بصراحه انت في موقف محرج جدا
ربنا يكون في عونك
ان شاء الله ترجع وتنتهي المشكله

[alexaway]

ايه الحلاوة دي البشاير واكتوبر فيهم سرقات امال نسكن فين بقي علشان نحس بالامان

[midooo_119]

ايه الحلاوة دي البشاير واكتوبر فيهم سرقات امال نسكن فين بقي علشان نحس بالامان

فوق قسم شرطة

[Land_Cruiser]

فعلا عملنا اللى حضرتك بتقول عليه ده لان العربيه مأمن عليها فعلا

رحنا القسم عملنا محضر وذكرنا انه كان بايت عندنا بس هوا التأمين تقريبا بيديله تقريبا كاام وبعد مده قد ايه؟؟؟

المفروض بيديله المبلغ اللى مكتوب فى الوثيقة لان ده زى الtotal loss و بخصوص المده هى حسب شركه التأمين و نظامها بس مش هتقل عن ٦ شهور .و لو اللى سرقها اتصل يطلب فلوس و هو يرجعها احيانا التأمين بيوافق يدفع مبلغ الفديه. هو اكيد موقف محرج اللى حضرتك فيه و خاصه ان الموضوع هيقعد فتره و لذلك حضرتك ممكن تكلم شركه التأمين دى كأنك عايز تأمن معاهم و تعرف فى الحاله دى بيرجعوا الفلوس بعد قد ايه و تحاول توفر لحماك سياره فى خلال المده دى بالايجار مثلا لحد ما التأمين يصرف له الفلوس او العربيه ترجع و ده حل مؤقت للفتره دى بس علشان ما يتعطلش و فى نفس الوقت مش هينفع يجيب واحده تانيه على حسابه علشان كام شهر و ممكن حل تانى ان حضرتك تديله الفلوس يشترى عربيه تانيه بدالها و لما ياخد فلوس التامين يبقى يعطيهم لحضرتك او تشترى واحده بالتقسيط بس هتبقى موديل أحدث و تدفع الاقساط لحد ما يستلم العربيه و بعد كده هو يكمل إذا كان عنده رغبه فى كده. حل الإيجار ده هيبقى اغلى حل لكن هيعطى حضرتك ميزه فى المرونة لان لو العربيه ظهرت فى اى وقت حضرتك هترجع العربيه الإيجار وخلاص لكن البدائل التانيه هتدفع مبلغ كبير و لو العربيه رجعت هتبقى محتاج تبيع العربيه المؤقتة اللى اشترتها علشان تسترد فلوسك . المهم حضرتك بس تتصل بشركه التأمين كأنك واحد بيستفسر عن الشروط و اسأل فى موضوع لو العربيه اتسرقت ده و بناء على الرد تقدر تقرر

[M.ABDOU]

بصراحه انت في موقف محرج جدا
ربنا يكون في عونك
ان شاء الله ترجع وتنتهي المشكله

امييين يا رب نلاقيها وترجع سالمه لانى فعلا فى موقف لا يحسد عليه