H s b c

[Khaled Online]

مبدأيا .................. على الأدمغة الـ........

لتالت مرة ............... الـ HSBC يضيغوا الكريدت ويلغوه ويطلعولي غيره بسبب إن فيه 6 غيري في الشركة اسمهم خالد زيي واتنين منهم اسمهم شبه اسمي بالضبط وكله على حسابي

مدير الحسابات بسأله بالتليفون الداخلي الgross بتاع المرتب كام يقوللي تعالالي أحسن أروحله يقوم باصصلي كأنه أول مرة يشوفني في حياته وبعد ما أفكره يقولي المرتب قدام بقية الناس في المكتب دون أدنى مراعاة للسرية لا ويكررها مرتين

تناحة واستغباء من الناس اللي واقفة بتبيع في محلات

تكشيرة عامة في وشوش الناس عبوهم كلهم

استظراف من معتوه في الشغل المفروض إنه مدير ولو الواحد كشر بس في وشه بيجري على مديري عشان متصاحبين ويعيطله زي الولايا

اتأكدنا من رفع الدعم اللي ذالين أنفاس أهالينا بيه

شغال في شركة المفروض هي أكبر الشركات في مجالها في مصر بس مفيش ترقيات واللي عاجبه وآخرك العشرة في المية زيادة وتبوس ايدك وش وضهر وقفا اه وشغالين يوم السبت كمان

كندا أعلنت أخيرا نظام الهجرة الجديد وعقدوها أكتر من الأول

لا جوا البلد نافع ولا براها نافع وساكتين ومستحملين بس 2013 بداياتها غم ليه كده مش عارف

اللي عنده بلد حلوة نديلها الجنسية المصرية وناخد الجديدة وندفع الفرق يقولي أو يبعتلي عالخاص أحسن مرارتي رجعت تتفقع تاني أهو

وختاما ................ عالأدمغة الـ........


.................................................. ............... الحمدلله
يرجى مراعاة الاداب العامه
ومراجعه قوانين المنتدى
مشرف 9 ب
14/01/2013
11.37 am

[Land_Cruiser]

اعمل شكوى فيهم يا باشا بس حط فيها كل المعلومات بالتواريخ و الأحداث و ان شاء الله هتجيب نتيجه معاهم و هيلموا الموضوع بس المهم تتابع الشكوى برقمها حتى لا يتم حفظها . انا حصل معايا حاجه شبه كده و عملت فيهم شكوى و من بعدها اتعدلوا بس فضلت متابعها ييجى شهر و نصف مثلا. hSBC دى يعد من ارحم البنوك مقارنه بالاهلى و بنك مصر مثلا لا حتى CIB
بخصوص الشركات كله دلوقتى بيقولك احنا بنفكر نكمل و لا نمشى فمش متوقع ان يبقى فيه تعديل و لا زيادات عدله. معلش هى حاله البلد كلها كده و ليس امامنا إلا الصبر لحد ما نعرف الدنيا رايحه على فين

[S O P H O S]

.معلش
ربنا ما يجيب وقف ولا حاجة
حضرتك بتتكلم بحريتك مع اخواتك ..

[eslamrace]

الوضع فى البلد بقى من سئ لاسوأ والمشكله ان المسؤلين والحزب الحاكم بيقولك ان فى بارقه امل بس المواطنين مش حاسين بده فواضح ان فى حاجه غلط احنا مش فاهمينها...........
وبعدين على فكره موضوع الهجره بقى صعب جدا والشغل بره عند" اخواننا العرب" بقت حاجه صعبه بيديك فلوس ويحسسك انه اشتراك بيها حتى الواحد لما حب يعمل مشروع خاص لقينا التجار زودوا الاسعار وقللوا الشغل بالاجل وكل اللى فى السوق بينصحك تخللى فلوسك معاك احسن .
بس والنبى لو لقيت هجره سهله لدوله اوروبيه يا ريت تعملنا بيها موضوع هنا فى المنتدى وساهم فى رحمه اخوانك المصريين هههههههههههههههههههه.

[Khaled Online]

شكرا يا باشا لردك بس أنا زهقت وتعبت وقرفت خلاص hsbc دي أقل المنغصات
حتى العربية اللي قلت هجيبها تحط عازل بيني وبين التحف الدولار اتعفرت من غير سبب كده وغلوها ألفين والله أعلم هيزودوها كمان ولا لأ واما نشوف أخرتها
وجوه مكتئبة في كل حتة وربنا يخفف عن الكل بس هنفضل لامتى كده؟
أنا كنت من أشد المؤيدين للقعاد في مصر وأقنع صحابي اللي ينجح بره ينجح هنا أحسن لكن بدأت أشك بصراحة
والوضع في النازل ومش باينلها عدله ولا قومه واللي ليه معارف تقال أو هو شخصيا من المعارف هو اللي قادر يعيش زي ما المفروض كلنا نعيش غير كده كلنا بنشرب من نفس الكاس
الواحد بيبص لوشوش الناس حواليه ويشوف فيهم الانكسار كده استغفر الله العظيم أنا مش عايز أكبر أبقى زي دول أنا مكملتش التلاتين وساعات بحس عندي ستين من اللي بشوفه سوري بس أنا معبعب

[Land_Cruiser]

فى ظل الأحداث السياسيه الحاليه ده شئ طبيعى و المستغلين للحاله المتدنيه دى كتير و بقينا عاملين زى فى الأفلام العربى القديمه ابن الناس لما يتبهدل. كلنا فى هذا الوضع السئ و مضطرين نقدم تنازلات علشان العجله تستمر. الناس كلها فى هذا الوضع مش حضرتك بس و متابعه برامج التوك شو بقت أساسيه لمحاوله استنتاج ما قد يحدث نظرا لتأثيره على حياتنا اليوميه و مستقبلنا مش زى الاول . للاسف الحلول مش كتير و تتلخص فى الانتظار و البحث عن اى فرصه فى اى بلد تانى. لازم بس نرضى بقضاء الله و نطمئن الى ان الأرزاق بيد الله و مهما حصل الإنسان يجب ان يحافظ على كرامته و لا يطلب العون و الفرج إلا من خالقه و البعد عن اى شخصيه او بلد تحاول استغلال الفرصه للنيل من كرامتنا

[Sehsss]

والله العظيم بقت حاجة تقرف

[Khaled Online]

كان يوم فقر بس عدى الحمد لله
أنا هولع في مدير الحسابات وفي المعتوه وفي hsbc
حد يحب يضيف على القايمة؟