شكر خاص وحار لاستاذ مينا استشاري قسم الديزل

[Karim_Monir]

السلام عليكم ورحمه الله
الحكاية ببساطة اني مش لاقي كلمة شكر اعبر بيها عن امتناني للشخص ده
امانه وذوق واخلاق واحترام ووعي عالي جدا
احساس يقظ باللي حواليه
عايزين تعرفو بشكره ليه
في جمعية خيرية اللي بنتعامل معاها في اسوان ولسه باعتين لها جزء من بطاطين حملة المنتدي
الجمعية عندها ميكروباص كيا بتنقل بيه مرض الكلي 3 مرات في الاسبوع عشان يعملو غسيل كلوي في المستشفي
الموتور بتاع الميكروباص باظ
اتعمر مرة واتنين وبقلة خبرة او قلة ضمير العمرتين بايظين واتكلفو كتير
كلمتني مديرة الجمعية اشوفلها حل بحكم اني ليا في العربيات
طبعا انا لا افقه شيئ عن الديزل مطلقا
مكانش اني كلمت الخبير الوحيد اللي بثق فيه
مينا انور
الراجل الجدع اللي عمرك ما تسند عليه ويخذلك
مينا قاللي ابعت الميكروباص ومالكش دعوة
اتصرفو في ميكروباص ايجار بديل للمرضي
وبعتو الميكروباص بونش لغاية القاهرة
وبدات الرحلة الطويلة قوي واللي متخيلناش انها تطول كدة
اسبوع ورا التاني
ومينا سايب الماستر اللي بيحضرة وبيلف ورا الميكروباص
من الهرم لبلبيس للمحلة لبورسعيد
المشوار ده بالمناسبة في يوم واحد
موتور ورا موتور مايعجبوش
واختارنا موتور بنزين عشان ندرة الجاز في اسوان والطوابير
ايام ورا ايام وتفاصيل تطول وتقصر
مينا لا كل ولا مل ومتابعة وتحركات وتليفونات وايام يسيب شغلة ويروح معاهم
الموضوع دخل في شهر ونص تقريبا
وخلص الحوار بالكامل النهاردة بس وهايسافروا بلدهم بكرة الفجر
تكلفة شراء موتور كامل تويوتا بنزين وتسقيطة وتغيير ضفيرة وفتيس وعفشة وشوية تفاصيل كتير قوي
اقل بشوية من تمن الموتور المتوقع شرائه
الناس مش مصدقة
مينا بيوفر مصاريف غريبة على الناس
من اول شراء الموتور للمصنعيات لكافة التفاصيل
بيفاصل فصال مميت على كل قرش
اكتر ما تكون فلوسه
حقيقي مش لاقي كلمة شكر اقولها
واحمد اللي نازل مع الميكروباص بيكلمني من شويه بيقولي هو في بني ادمين كدة
بطيبة اهل اسوان بيقولي احنا لو بطولنا كنا اتاكلنا صاحيين في بلدكم
هو مينا ده كدة عادي ؟
مش لاقي كلام يشكره بيه على وقته وجهدة وفلوسة والاحساس العالي اللي حس بيه بالمسئوليه تجاه مرضي الجمعية دي
حقيقي حبيت اقولك يا مينا

M!NA
الف شكر بجد
خالص تحياتي

[w-m-a]

بصراحه من ردوده انا انبهرت بيه فى مجال الديزل والجيب
ميبخلش بمعلومه ولا نصيحه لحد من غير ما يعرفه
ربنا يكرمه

[kimokaim]

انا كمان بشكره شكرا جزيلا يامينا باشا !!

وشكرا ليك ياكريم واكيد حتاخذ اجر الناس ديه عشان انت سعيت اك توصلهم لمينا

[Samah AbdAllah]

كلمات الشكر فعلا ما تديلوش حقه
ربنا يجازيك خير على كل الخير اللى عملته وبتعمله يا M!NA

[hussein]

شكرا مينا وربنا يقدرك على فعل الخير

[alfath8]

والله مينا بجد شخصية محترمة جدا وطموحة و كان نفسى استمتع بالقعاد معاه شوية يو م ما اجه بورسعيد
بس والله غصب عنى ومقدرتش اضبطه فى اكله جمبرى ولا سيبيا ههههههههههه وهاتعوض ان شاء الله فى مرات تانية بس انتا تنورنا بس تانى
وسلامك وصل يا كريم باشا فى ساعتها وانتا بتكلم مينا
ربنا يديم المحبة بينا كلنا

[speed demon666]

الراجل ده من أرجل الشخصيات اللي تعاملت معاها و أكثرهم رقيا ... ربنا يحميه لأهله

[AlGazar2]

بجد كلمه شكر متكفيهوش حقه فى الى عمله ده و فعلا انسان خدوم جدا و باين من ردوده على كل سؤال او استفسار فى قسم الديزيل ربنا يباركله و يوفقه فى الماستر بتاعه

[Mohyeldin1974]

ولا يعرفنى ولا اعرفه
بس روح ربنا يباركلك ويكتر من امثالك

[ahmedeihab]

ولا اعرفه ولا عمرى اتعاملت معاه

بس روح يا باشا ربنا يكرمك زى ما بتكرم الناس و يزيدك من وسع

^_^

[drmsadek1979]

ونعم الاخلاق

[M!NA]

ليه بس كدا يا عم كريم الفضايح ديه .... كدا ضيعت عليا أجري؟ :)

والله انا معملتش حاجة غير اللي ممكن اي حد يعمله

و مفيش داعي لأي شيء أو شكر ...

و انا مهما قلت مش هقدر اشكركم جميعا على مشاعركم الطيبة جدا ... و كلامكم الكبير عليا و اللي انا فعلا مستاهلوش....

[Y a r i s]

بارك الله فيك يا عم مينا
واشكرك من صميم صميم اعماق قلبي على ثقتك الغالية في تويوتا :)

[Qmax]

اذا كان مينا وحد القطرين فا مش صعب على مينا يوحد قلوب نايل موتورز عليه تحياتي لك يا استاذ مينا وجزاك الله كل خير

[S O P H O S]

شوفت امبارح مشاركة ليه وبصراحة عجبني جدا الاسلوب والكلام
لك كل التقدير منا ..