بخصوص الشهادة البلاتينية فى البنك الاهلى

[egyptawy2010]

السلام عليكم

انا كنت عامل شهادة بلاتينية فى البنك الاهلى ودلوقتى عايز استردها فقريت انى تاريخ الاسترداد لازم يعدى 6 شهور من السهر التالى للشراء


هل معنى كده لازم يعدى 7 شهور من تاريخ الشراء ولا 6 شهور

يعنى انا جبتها 12-9 كده اقدر استردها امتى


وهل فيه طريقة اقدر استرد بيها الفلوس فى الشهر الخامس لانى محتاج الفلوس


وياترى هاخسر فيها كام


شكرا

[mohamed_selim]

اسهل حاجه كلم الاهلى فون و اسالهم 19623

[mohamedrabia]

انا عامل شهادة بالبنك الاهلي بس بصراحة معرفش ان فيه ميعاد لاسترداد المبلغ بس الي اعرفه انك ممكن تسترد المبلغ بعد خصم كل الفوائد واكيد ومصاريف اخري حسب المده . بس في كل الاحوال هتخسر كتير في حاله انهاء الشهادة

[Ahmed_selmy]

انا بصراحه معرفش المدة قد ايه , بس والدى عنده شهدات وكنا عايزين نفكها قالى انها حتخسر علشان فوائد الشهدات بتكون اعلا من الفوائد العاديه فهما بيقوموا حسبين فرق الفوائد اللى انت اخدته ويخصموه من المبلغ , يعنى من الاخر بيحسبلك المبلغ كانه كان محطوط فى حساب ادخار عادى مش شهادات.
وبردوا الافضل انك تسال فى البنك نفسه.

[Khaled Online]

السلام عليكم
هل معنى كده لازم يعدى 7 شهور من تاريخ الشراء ولا 6 شهور
يعنى انا جبتها 12-9 كده اقدر استردها امتى
شكرا

وعليكم السلام
نظام البنوك كالآتي: المعاملة على الفلوس المودعة من العميل يتم احتسابها بدءًا من بداية الشهر التالي للإيداع
يعني شهر الإيداع = 12 من سبتمبر (ولا 9 من ديسمبر؟)
الشهر التالي للإيداع = أكتوبر (أو يناير)
يبقى الست أشهر = أكتوبر>مارس (أو يناير>يونيو)
وتتفك الشهادة = أبريل (أو يوليو)
غرامة فك الشهادة قبل معادها بتختلف من بنك للتاني. لازم تسأل هناك

نصيحة لوجه الله تعالى: حاول تشوف بنك تعاملاته إسلامية وربنا يكرمك عامة

[beshomilan]

بيحسبوا 40 % فى الميه من المبلغ فايده

[egyptawy2010]

بيحسبوا 40 % فى الميه من المبلغ فايده

حضرتك بتكلم جد يعنى لو حاطط 1000 جنيه هاخدهم 600

ياريت حضتك تاكد المعلومة ضرورى

[Khaled Online]

أنا آسف للتعليق اللي جاي بس فيه ستة زمايل تقريبا دخلوا وجاوبو حضرتك وحضرتك مكلفتش نفسك تقول شكرا حتى. فيه سبب؟

[egyptawy2010]

أنا آسف للتعليق اللي جاي بس فيه ستة زمايل تقريبا دخلوا وجاوبو حضرتك وحضرتك مكلفتش نفسك تقول شكرا حتى. فيه سبب؟

لا يافندم طبعا الشكر لحضرتك ولكل الناس الا ردت لكن الموضوع لسة ما خلصش ولسة مفتوح واكيد فى الاخر هاشكر كل الناس


عموما الف شكر

[egyptawy2010]

وعلى فكرة انا فعلا مش باعرف استخدم خاصية الشكر يعنى بلاقى عندى ناس عملالى شكر لكن مش عارف ازاى اعمل شكر للناس

ويريت الاخخ الا بيقول بيخصموا 40 % ياكدلى المعلومة

[KemozTanta]

تقدر تستردها بعد6 شهور ع الاقل وبيتم خصم 20 جنية لكل الف جنية
يعني لو الشهادة ب عشرة لالاف جنية
هيتم خصم 200 جنية فقط ومش هيتخصم الفوائد اللي نزلتلك ال 6 شهور دول
مش عارف النظام اتغير بقي ولا اية

[alexaway]

لو حتفك شهادة حتخسر طبعا بس حتخسر زي ما قالك الاخ كأنك كنت حاطط فلوسك وديعه مش شهادة يعني لو بيحسبلك الشهادة مثلا علي 11 % ممكن يحسبهالك علي 7% والفرق دا يعتبر هو الخسارة بتاعك بمعني اصح خسارتك حتبقي فى فرق الفايدة مش فى اصل الفلوس .

[egyptawy2010]

شكرا يارجالة
جزاكم الله كل خير

[Khaled Online]

لا يافندم طبعا الشكر لحضرتك ولكل الناس الا ردت لكن الموضوع لسة ما خلصش ولسة مفتوح واكيد فى الاخر هاشكر كل الناس
عموما الف شكر

العفو وحصل خير. ده الرابط الرسمي بتاع الشهادة البلاتينية عندهم
البنك الأهلي المصري
ورقمهم 19623 طبعا الاتصال بيهم أحسن

[bekatcho]

بص انا كل تعاملاتى بنك اهلى
جيت من مدة لما رفعو نسبة الارباح من 9.5 ل11.5 رحت فكيت كل شهاداتى
الفك فعلا لازم بعد 6 شهور
وبيتم خصم مبلغ بسيط بيبقى اقل بحاجات بسيطة متيهالى من الارباح الى خدها
يعنى لو انت مثلا حاطط شهادة ب 1000 هتاخدهم مثلا 950 وممكن اعلى حاجات بسيطة اوى