استثمار عقارى (شاركنى برأيك)

[mastr_n]

السلام عليكم ورحمة اللة وبركاتة
الموضوع باختصار وبما ان حال البلد مايطمنش والبنوك بقت مش مضمونة قررت ان اشترى شقة فى المدن الجديدة زى العبور او الشروق أو التجمعات والأحياء الجديدة ودة بغرض الأستسمار او حاجة تكون لأبنى فى المستقبل وبفاضل بين العبور والشروق علشان قربين من محل سكنى

بالنسبة للعبور جميلة جدا وقريبة من مكان سكنى بحوالى ساعة بالعربية بس تحس أن الأسعار غليت خلاص يعنى فرص الأستسمار فيها بقت ضعيفة يعنى متوسط سعر المتر فى الأحياء النضيفة حوالى 2000 جنية +تقسيط لمدة لا تتجاوز ال 24 شهر

بالنسبة للشروق اعتقد انها لسة فى الأول وفرصتك ان قيمة العقار هاتزيد اكيد
مميزاتها سعر المتر المميز حوالى 1500 جنية ومدة تقسيط حوالى 5 سنين

وفى كمان قدام كارفور المعادى حاجات كتير جدا بس احساسى انها فيها نصب كتير

ياريت تشاركونى برأيكو وتنصحونى بأية ولو حد يرشحلى اماكن تانية تكون فى محيط الدائرى وياريت ايضا لو فية شركات محترمة اقدر اتعامل معاها بردة

[drmsadek1979]

ركز في العبور مدينه رائعه

[midooo_119]

القاهرة الجديدة بلا منازع انا شقتى زادت 15 الف فسنه و نص

[mastr_n]

القاهرة الجديدة بلا منازع انا شقتى زادت 15 الف فسنه و نص

ان شاء اللة تزيد اكتر وربنا يباركلك فيها ان شاء الله طيب تنصحنى فين فى القاهرة الجديدة واتعامل مع مين؟

[mastr_n]

القاهرة الجديدة بلا منازع انا شقتى زادت 15 الف فسنه و نص

ربنا يباركلك فيها وتزيد اكتر ياريت توضحلى فى بالظبط واشتريت ازاى؟

[midooo_119]

ربنا يخليك ياباشا .. انا اشتريت عن طريق النت و انصحك بلاش سماسرة و دور من عالنت و الافضل مايكونش فيها توكيلات او يعمل تنازل فى جهاز القاهرة الجديدة و طبعا يكون دافع لاخر قسط و اسال السماسرة عالاسعار عشان تعرف برضه .. بالنسبه للمكان انا واخد فالتجمع الثالث و هى الاسعار بتزيد فالقاهرة الجديدة عمتا بسرعه هناك

[Ahmed_Adham]

القاهرة الجديدة بلا منازع انا شقتى زادت 15 الف فسنه و نص

مساحتها كام متر وكنت شاريها بكام؟

[Lada2013]

ربنا يخليك ياباشا .. انا اشتريت عن طريق النت و انصحك بلاش سماسرة و دور من عالنت و الافضل مايكونش فيها توكيلات او يعمل تنازل فى جهاز القاهرة الجديدة و طبعا يكون دافع لاخر قسط و اسال السماسرة عالاسعار عشان تعرف برضه .. بالنسبه للمكان انا واخد فالتجمع الثالث و هى الاسعار بتزيد فالقاهرة الجديدة عمتا بسرعه هناك

بعد اذن صاحب الموضوع
ممكن اعرف الشقه ال 100 متر في التجمع الثالث تعملها كام؟

[midooo_119]

مساحتها كام متر وكنت شاريها بكام؟

شقتى 70 متر اشتريتها ب120 الف

بعد اذن صاحب الموضوع
ممكن اعرف الشقه ال 100 متر في التجمع الثالث تعملها كام؟

الشقه ال 100 متر تعمل حوالى 265 الف

[Lada2013]

شقتى 70 متر اشتريتها ب120 الف


الشقه ال 100 متر تعمل حوالى 265 الف

ربنا يبارك لك فيها
الشقق دي عليها اقساط فترة طويله؟
ممكن الاقي شقه 70 متر في حدود 130 الف حاليا ولا صعب؟
شكرا

[sherifahmed]

120 فى البنك فى متوسط 10%
يعنى 12 الف
و كمان نص سنة عشان هو بيقول سنة و نص
يعنى 6 الاف
يعنى 18 الف زيادة فى البنك
الاستثمار العقارى دا كان ايام ما المغربى مسك و ولع الدنيا
دلوقتى الشقق على ففا من يشيل
لفة و احدة عالدائرى و بص هاتلاقى الاف العمارات و الشقق مبنية

[Ahmed_Adham]

120 فى البنك فى متوسط 10%
يعنى 12 الف
و كمان نص سنة عشان هو بيقول سنة و نص
يعنى 6 الاف
يعنى 18 الف زيادة فى البنك
الاستثمار العقارى دا كان ايام ما المغربى مسك و ولع الدنيا
دلوقتى الشقق على ففا من يشيل
لفة و احدة عالدائرى و بص هاتلاقى الاف العمارات و الشقق مبنية

الزياده في العقارات مش بتبقى ثابته ولكن طفرات يعني ممكن الشقه تقعد سنتين تلاته متزيدش أو تزيد حاجه بسيطه بس في سنه تزيد زياده كبيره تعوضك عن المده اللي فاتت كلها عشان كده العقارات استثمار طويل الاجل مش بتشوف العائد الحقيقي منه غير بعد فتره لكن لو عايز عائد سريع من العقارات يبقى تشتري وتشطب وتأجر ولو ان الموضوع ده أنا مش بحبه خالص عشان بتحتاج ييجي 3-4 سنين عشان تجيب مصاريف التشطيب يبقى الواحد يسيبها الاربع سنين دول على المحاره ويبيعها على حالتها ويوفر وجع الدماغ في التدوير على مستأجر وبعدين الجري وراه في تحصيل الايجار كل شهر.

[sherifahmed]

طفرات

ما مافيش طفرات متوقعة خالص
لية؟
لان الطفرة حصلت و انتهينا
الماركت وصل لحالة تشبع جامدة
زى المحمول كدا
الشركات معندهاش جديد و كل الناس شايلة محمول

[Ahmed_selmy]

طيب اللى يحب يعمل استثمار , يعمل فى ايه؟؟
انا كنت بفكر فى موضوع العقارات بردوا,و فكرت انى اجيب دهب بالمبلغ اللى معايا بس عرفت ان محدش بيشتريه لما الاسعار تزيد ولو حد اشترى بيكون بسعر اقل.

[egyptawy2010]

المشكلة انى الفلوس فى البنك قيمتها بتقل