نستلة علت العبوة 19 لتر

[شريف]

السلام عليكم

شركة نستلة للمياة من سنين بتجيب المياة لحد البيت و فجاة و مع الشوطة اللي ماشية في البلد غلوا العبوة 10% يعني بقت ب 22 بدل 20
و البنزين مزدش و العبوات بتتبدل و اساسا اساسا مش مدي مياة محلاة

اية رايكم و امبارح كمان كنت بشتري اجهزة كهربائية و اية كلة بيشتري و كلة بيغلي
طب انا لما اشتري و التاجر يجيلة فلوس زيادة عايز يحولها دولارات علشان يشتري بضاعة جديدة و الطلب علي الدولار يزيد فيغلي فالناس تتخض تاني و تنزل تشتري و التاجر ..............................................انا دخت اية العك اللي احنا فية دة !!!!!!!!!!!!!!!!!!!!!!!!!!!!!

[Imhotep]

اسوأ ما فى مشاكلنا..... هو العشوائية فى التصرف..... و ده اللى بيؤدى لنتائج اسوأ من المشكلة الاساسية نفسها..... خد عندك المثل ده..... ناس موجودة مع بعض فى سينما...... عدد الناس 200 او 300 واحد...... فجأة حصلت حريقة صغيرة فى الشاشة...... كل الناس فجأة قامت من اماكنها و طلعت تجرى على المخارج..... و نتيجة للتدافع بقوا يدوسوا بعضيهم...... قوم ايه؟ قوم الناس اللى ماتت من التدافع بقت اضعاف اضعاف الناس اللى كان ممكن تموت من الحريقة نفسها.......

نربط المثل ده بالواقع التعبان بتاعنا اللى تملى بيبقى اسوأ بسبب الجهل و العشوائية فى التصرفات..... فى ظل اللى بيحصل من رفع عشوائى للاسعار من التجار بسبب و بدون سبب و الحجج مش هتخلص..... الناس المفروض تعمل ايه؟ عكس اللى انت قلته بالظبط...... يعنى بدل ما الناس تتهبل على الشراء خوفا من ارتفاع الاسعار..... فمجرد تسابقهم ده للشراء فى حد ذاته هيخلى التجار يرفعوا الاسعار جايز اكتر بكتير مما لو كانت السلع دى حصل عليها نفس مستوى الطلب القديم...... الادهى و الامر من كده...... ان الناس المفروض على العكس..... تبطل شراء و ترشد استهلاكها و تزود ركود السلع عند التجار و ده هيخلى دورة راس المال عند التاجر ابطأ و هيخليه اما يفكر فى حرق البضاعة او عمل عروض او لدرجة تقليل هامش ربحه الكبير عشان يبيع و تجيله سيولة يشترى بيها تانى و يبيع بسرعة و هلم جرا...... للاسف فى حالة شعبنا اللى ينفع يتقال ان من الجهل ما قتل و هذا هو ما يحدث فعلا لان التصرقات الرعناء دى بيتساوى فيها المتعلم و الغير متعلم لان الكل غيرررررررر مثقف...... فى بريطانيا العظمى بناسها مش بحاجة تانى..... لما سلعة بتتملعن فى سعرها بيجيبوا مناخيرها الارض بسلاح المقاطعة...... و تعالى شوف عندنا احنا..... هل حملة خليها تصدى و موديلها يعدى جابت اى نتيجة؟ و لا عمرها هتجيب لان نفسنا قصير و مفيش وعى من الناس

[Imhotep]

حاجة تانى بتجننى..... تيجى تحاول تفهم الناس و تنشر الوعى بينهم..... عشان نحاول مجرد محاولة ان الناس تفهم يعنى ايه ان مصلحتى الشخصية ممكن تتحقق من خلال تحقيق المصلحة الجماعية للبلد عموما و الشعب كله...... تيجى تعمل كده..... تلاقى دعاة التصرفات العشوائية و الانانية بل و كمان الجاهلة..... يدخلوا يقولولك يعنى انا يعنى اللى هعدل المايلة..... و يعنى انا اللى بتصرفى ده هصلح الحال..... و يعنى و يعنى و 100 يعنى لتبرير التصرفات الانانية العشوائية الجاهلة..... و النتيجة بتكون ايه؟ النتيجة بتكون ان نتائج المشكلة الاساسية بيتضاعف تأثيرها كذا مرة نتيجة تصرفات الناس..... طب كأجابة على التساؤلات التعبانة اياها يعنى انا اللى هعدل المايلة و الكلام ده..... هل فعلا كل فرد فينا ممكن المايلة بتصرفه الفردى؟ الاجابة اه طبعا ممكن لما انا اتصرف صح و اتكلم مع غيرى اوعيه يتصرف صح و هكذا لغاية لما التصرفات الصحيحة تبقى هى القاعدة فى سلوكيات الناس..... مش بس شطارتنا فى نشر الاشاعات و الاخبار السلبية لكن نيجى عند التصرفات اللى فيها فايدة علينا كلنا و تلاقى ام العشوائية تظهر : )

انا مثلا بأستخدم نستلة العبوة الكبيرة دى و عندى مكنة كنت شاريها منهم..... اول حاجة فكرت فيها لما عرفت خبر الزيادة هو ابداء اعتراضى للشركة على الزيادة الغير مبررة سواء بميل او بمكالمة لخدمة العملاء بل و هوضحلهم انى هقلل عن عمد من استهلاكى للمياه من انتاجهم بل و هلجأ لمنتجين بدلاء على نفس درجة الجودة بتاعتهم و اسعارهم اقل منهم (فى الشغل عندنا بنستخدم مكنة مياه و مياه ماسة من سنين و زى الفل زى نستلة).....

[شريف]

الانسان المصري محتاج يتربي من اول و جديد
حسبي اللة و نعم الوكيل في كل من افسد هذا الشعب بقصد او بغباء
عن النبي صلى الله عليه وسلم قال ألا كلكم راع وكلكم مسئول عن رعيته فالمسؤل الذي على الناس راع
الكلام مش هيخلص في الجزئية دي بس المحصلة للاسف صفر
عايزين 30 سنة كمان و جيل جديد كليا يظهر

[Imhotep]

الانسان المصري محتاج يتربي من اول و جديد
حسبي الله و نعم الوكيل في كل من افسد هذا الشعب بقصد او بغباء
عن النبي صلى الله عليه وسلم قال ألا كلكم راع وكلكم مسئول عن رعيته فالمسؤل الذي على الناس راع
الكلام مش هيخلص في الجزئية دي بس المحصلة للاسف صفر
عايزين 30 سنة كمان و جيل جديد كليا يظهر

لازم نستمر نحاول فيما هو كائن بدل ما نتكلم على ما يمكن ان يكون.... صدقنى انا اللى كتبته فى التعليقين اللى فاتوا انا مش بقوله كده و خلاص بل بحاول اخليه واقع بعيشه و كمان عودت مراتى عليه..... و انت عارف الحريم..... حمى الشراء بسبب و بدون سبب و اغراء العروض و افات الهدوم و الجزم و الشنط :) و غيره الكثير و الكثير...... لكن انا خلتها تتعود على حاجة بسيطة جدا من ساعة متجوزنا..... انها تقف ببساطة لحظات قليلة قبل ما تشترى حاجة سواء لها او للبيت..... و تسأل نفسها شوية اسئلة...... هل الحاجة دى انا محتاجاها فعلا؟ هل فى ليها بديل بحالة كويسة عندى؟ هل السعر مناسب ؟ هل السلعة اصلا تستاهل السعر ده؟ و شوية اسئلة من النوع ده..... طبعا لسه منجحتش معاها بنسبة 100% و احيانا بتتعقل و تتغلب على حمى الشراء و احيانا لا تنجح فى ذلك..... لكن احنا على الطريق و انا وراها و الزمن طويل :)

[Ahmed_Adham]

عايز أقولكو كلمتين ومحدش يزعل مني يا جماعه. الغلاء سنه الحياه ومفيش بلد الاسعار مش بتزيد فيها وخصوصا لما كل يوم اعتصامات لزياده المرتبات والاجور ماهو صاحب المصنع او الشركه مش هيقلل ربحه عشان يدفع اجور زياده فهيغلي الاسعار عشان يغطي زياده المرتبات وتلاقي الموضوع موصل ببعضه في حلقه ملهاش نهايه عشان كل ما المرتبات تزيد الاسعار هتغلى عشان تسدد فرق زياده المرتبات.

ده غير ان أزمه السولار بتخلي العربيات تقف أكتر ما بتمشي وبالتالي ده بيأثر على حجم المبيعات وفي الاخر الزبون اللي بيشيل لأن صاحب الشركة محدد لنفسه هامش ربح مش هيتنازل عنه.

وعلى فكره انا معنديش مصنع ولا بتاع بس بقيم الموضوع بشكل منصف من الجهتين.

[Imhotep]

عايز أقولكو كلمتين ومحدش يزعل مني يا جماعه. الغلاء سنه الحياه ومفيش بلد الاسعار مش بتزيد فيها وخصوصا لما كل يوم اعتصامات لزياده المرتبات والاجور ماهو صاحب المصنع او الشركه مش هيقلل ربحه عشان يدفع اجور زياده فهيغلي الاسعار عشان يغطي زياده المرتبات وتلاقي الموضوع موصل ببعضه في حلقه ملهاش نهايه عشان كل ما المرتبات تزيد الاسعار هتغلى عشان تسدد فرق زياده المرتبات.

ده غير ان أزمه السولار بتخلي العربيات تقف أكتر ما بتمشي وبالتالي ده بيأثر على حجم المبيعات وفي الاخر الزبون اللي بيشيل لأن صاحب الشركة محدد لنفسه هامش ربح مش هيتنازل عنه.

وعلى فكره انا معنديش مصنع ولا بتاع بس بقيم الموضوع بشكل منصف من الجهتين.

حتى لو العوامل دى لها وجود على ارض الواقع الا انك مؤكد تتفق على ان الزيادات اللى بتحصل عندنا لا علاقة لها بأسباب فعلية ولا زيادتها بتتناسب مع ما يحدث.... و لا فى رقابة على الاسواق من الحكومة و لا فى وعى من الناس...... و النتيجة عشوائية فى عشوائية من الكل و هو ما نعيش فيه و سنستمر الا اذا بدأ احد الاطراف ان يفيق لنفسه و تصرفاته..... و بما ان الحكومة ايدنا منها و الارض و كذلك التجار..... اذن يبقى الناس نفسهم اللى بترشيدهم للاستهلاك ممكن يخلوا الاسعار تنزل مش يتكالبوا على الشراء قوم السلع تغلى اكتر...... على رأى حمايا صحيح..... يغور العيل الغبى :)...... و على العموم اذا ما كانتش الناس هترشد استهلاكها بمزاجها و وعيها فالظروف اللى حاصلة هتجبرهم على كده لان اذا كان اللى بيعلى المرتبات هو الحكومة لان مرتباتها اصلا تعبانة فالقطاع الخاص لا يتفاهم و مبيفكرش اصلا فى زيادات بل و بيمشى ناس على طول

[Land_Cruiser]

كله بيستغل الازمه لتحقيق مكاسب

[Ahmed_Adham]

حتى لو العوامل دى لها وجود على ارض الواقع الا انك مؤكد تتفق على ان الزيادات اللى بتحصل عندنا لا علاقة لها بأسباب فعلية ولا زيادتها بتتناسب مع ما يحدث.... و لا فى رقابة على الاسواق من الحكومة و لا فى وعى من الناس...... و النتيجة عشوائية فى عشوائية من الكل و هو ما نعيش فيه و سنستمر الا اذا بدأ احد الاطراف ان يفيق لنفسه و تصرفاته..... و بما ان الحكومة ايدنا منها و الارض و كذلك التجار..... اذن يبقى الناس نفسهم اللى بترشيدهم للاستهلاك ممكن يخلوا الاسعار تنزل مش يتكالبوا على الشراء قوم السلع تغلى اكتر...... على رأى حمايا صحيح..... يغور العيل الغبى :)...... و على العموم اذا ما كانتش الناس هترشد استهلاكها بمزاجها و وعيها فالظروف اللى حاصلة هتجبرهم على كده لان اذا كان اللى بيعلى المرتبات هو الحكومة لان مرتباتها اصلا تعبانة فالقطاع الخاص لا يتفاهم و مبيفكرش اصلا فى زيادات بل و بيمشى ناس على طول

انا هختلف معاك في حاجه وهتفق معاك بشده في حاجه.

هختلف معاك في ان الرقابه الحكوميه تكون على الاسعار. ده مش ضروري يحصل لأن السعر خاضع للعرض والطلب والريموت في ايد الزبون في الاول وفي الاخر وهقولك ليه مينفعش الحكومه تعمل تحديد للاسعار. خلينا ناخد موبايل كمثال. فيه واحد هينزل يشتري موبايل من شارع عبد العزيز ب 5000 جنيه مثلا وواحد تاني يجيب نفس الموبايل من مول فخم ب 5300 مثلا. ده زبون وده زبون والمحل بتاع المول الكبير ايجاره عالي وزبونه مش هينزل يشتري من شارع عبد العزيز (هيعتبره شعبي) فبيدفع شويه زياده عشان بيشتري من سوق على مستوى معين والتاجر بيزود السعر شويه زياده عشان مصاريفه اعلى شويه (لو هنتكلم على الايجار اللي هوه اهم مصروف بالنسبه لأي محل) وعندك كمثال ايجار المحلات في مول العرب بالدولار في رينج 80-115 دولار للمتر شهريا حسب المساحه يعني كل ما تزيد المساحه ايجار المتر يقل فتخيل ان الايجار بيزيد اليومين دول أوتوماتيك مع زياده الدولار بالرغم من ان الايجار في العقد مزادش.

دور الرقابه في ايه بقى؟ هقولك على نقطتين مهمين جدا

1- منع الاحتكار وتوفير فرص المنافسه عشان لما تاجر يعلي السعر يقدر المستهلك يلاقي بديل يعني فيه مثلا قول 20 ماركه زيت طعام في السوق لكن لو فيه واحده أو اتنين بس هيبقى الاختيار صعب وسهل قوي انهم يتفقو ويتحكمو في الاسعار لكن لما يكون فيه بديل برينج أسعار متفاوته يقدر كل مشتري يجيب اللي يناسب ميزانيته من غير ما يجهد نفسه.

2- جوده السلعه وتوفير الضمان. يعني يحميني لو اتنصب عليا واشتريت حاجه طلعت بايظه أو سلعه وعدتني بحاجه معينه في الدعايه بتاعتها لكن الحاجه دي مش متوفره في المنتج يعني لما يقولي ضمان سنتين يبقى هوه ملزم ان خلال السنتين يبقى معايا منتج شغال 100% بدون أي مصاريف غير سعر الشراء ميجيش لما أروحله بحاجه بايظه في الضمان يقولي الضمان بيغطي قطع الغيار بس لكن انت هتدفع مصنعيه التصليح وتلاقيه قام مدخل فيها سعر قطعه الغيار أو جزء كبير منه وتقولي ده ضمان. وعشان تعرف برضه ان فيه مستويات تانيه من الضمان هقولك على مثال

في الكويت لما تشتريتليفزيون مثلا ويبوظ وهوه في الضمان تتصل بالشركه يقومو يبعتو عربيتهم ويحاولو يصلحوه عندك لو العطل بسيط ولو العطل يحتاج الورشه هياخدوه بعربيتهم الورشه ويتصلو بيك بعد الفحص يعرفوك ايه اللي في الجهاز وامتى هتقدر تستلمه ولما يتصلح يجيبوهولك على البيت.

طب لو العيب مش هيتصلح؟ هيديك جهاز جديد بدون أي مقابل.

طب لو الموديل خلص من السوق؟ هيديك كوبون بنفس قيمه الجهاز من الفاتوره اللي انت اشتريته بيها تقدر تشتري بالكوبون ده أي حاجه من نفس الشركه خلال فتره معينه زي شهر أو اسبوعين مثلا. يعني مثلا تكون جايب جهاز LCD ويبوظ في الضمان متلاقيش نفس الموديل يقوم مديك كوبون يكون سعر ال LED بقى بنفس سعر ال LCD وقت ما انت اشتريته تبقى كده غيرت جهازك القديم بالموديل الجديد بدون مقابل.

هوه ده الضمان المحترم اللي يديك حقك بدون شد وجذب ومقاومه لكن هنا انت بتاخد الحاجه البايظه على كتفك وتروح المكان اللي اشتريت منه وانت متحفز لخناقه لأنك عارف انك هتلاقي مقاومه و100 حجه منهم عشان ميتحملوش مسؤوليتهم في التصليح أو الاستبدال.

الحاجه بقى اللي هتفق معاك فيها بشده ان العيب في الاخر على المستهلك اللي بيرضى يجيب حاجه منخفضه الكفاءه بسعر مبالغ فيه واننا بنتعامل مع كماليات كتير على انها اساسيات وكأننا مش هنعرف نعيش من غيرها وفي الاخر بنقول على نفسنا اننا شعب غلبان وفقير بس احنا معذورين برضه عشان الواحد مش بيعرف المستوى اللي هوه فيه الا لما يشوف الاحسن يعني الناس كانت راضيه لفتره كبيره بالتليفزيونات العاديه بتاعت زمان ولما بقت بريموت كنا طايرين بيها السما لكن دلوقتي بقى لازم LCD أو LED ويا سلام لو 3D وممكن ناس تقسط وتضغط على نفسها عشان يبقى عندها أخر تكنولوجيا مع ان ظروفه متسمحش.

أنا كتبت كتير قوي بس انت جيت على الجرح فكان لازم أفضفض