تقرير عن Samsung Galaxy SII بعد استخدم اسبوع

[Hacker5]

السلام عليكم ورحمة الله وبركاته
من اسبوع تقريبا اشتريت Samsung Galaxy SII Gt 9100G بضمان يونيون جروبو دة اول سمارت فون ليا بنظام اندرويد و قبله كان معايا Nokia 5800 XpressMusic الموبايل دة اقدر اقول عليه انه من افضل ما انتجت نوكيا فى حياتها
استحمل كل حاجة معايا من سخونية و شغل كتير عليه و اتهبد كتير منى فى الارض و و كان سهل الاستخدام و التاتش بتاعه كان جميل جدا .. المهم نرجع لموضوعنا

اول نظرة الى الموبايل السامسونج حسيت انى ماكنش معايا موبايل اصلا
البروسيور 1,2 dual core قوى مع رام 1 جيجا
الشكل شيك جدا جدا و هادى و نحيف و خفيف
الحجم كبير و دة كان مضايقنى فى الاول لكن خلاص الموضوع بقى عادى جدا
الظهر صعب انه بتخدش لكن الفريم واضح انه ممكن يتمسح او يتخربش و دى حلها بجراب محترم
مع الضغط على زر الباور و بداية تشغيل الموبايل بتحس انك دخلت عالم تانى غير النوكيا سيمبيان العقيم اللى زى ماهو من ايام الـ 6600
الشاشة ولا اروع الوانها خلابة و فى منتهى النقاء لانها 16 مليون لون Super AMOLED Plus capacitive و حسيت ان شاشة الـ 5800 زباااااااااااااااااااااااااالة طبعا مافيش مقارنة لكن مثلا كان واحد راكب 128 و بعدين ركب bmw فطبعا هايحس بالتكونولجيا و التقدم
التاتش سلس جدا و رائع و سريع الاستجابة
واجهة الجهاز جميلة و فيها مميزات انك ممكن تحط shortcut لاى حاجة عندك برا و كمان معرفة حالة الطقس و درجات الحرارة و الاخبار و بحث جوجل بالاضافة للبحث الصوتى و فيس بوك و تويتر
صدار البلوتوث فيرجن رقم 3 عالي السرعة ، كما يوجد بالجهاز راديو
طبعا النظام اندرويد الغنى عن التعريف يعنى كل يوم فيه جديد و تطبيقات جديدة بافكار جديدة على عكس السيمبات لا يقدم اى جديد و نظام عقيم جدا لا يوجد به اى ميزة غير سهولة الاستخدام و ان كان الاندرويد سهل ايضا مع الممارسة فى استخدامه و استيعابه
الذاكرة 16 جيجا كافية جدا و اعتقد مش محتاجة لكارت ميمورى
حساس ضوء و حساس حركة
الكاميرا 8mp Full HD 1080p رائعة جدا فى التصوير الليلى حتى لو الضوء ضعيف و بها خاصية اكتشاف الوجه و الابتسامة و الضبط الذاتى عشان لو اللى ماسك التليفون ايديه بتتهز مع فلاش قوى و كاميرا أمامية بقوة 2 بيكسل للمكالمات المرئية
الهيدفون نقية جدا و صوتها عالى و مجسم
سريع الاستجابة فى الواى فاى سرعة التصفح والداونلود من الواى فاى سريعه جدا
الجهاز بيشغل جميع افلام الـ bluray بصورة خيالية و فى منتهى النقاء مع امكانية وضع ترجمة مع الفلم
تم تجربة العاب تلاثية الابعاد مثل gta vice city و dead space و subway surfers و fruits ninja و جميع الالعاب تعمل بدقة عالية و بدون اى تقطيع او بطء
و تم تجربة برامج مثل viber و zombie booth و shazam و مازلت استكشف الموبايل و لسة معرفتش كل حاجة فيه


العيوب :
البطاااااااااااارية اكبر مشكلة فى كل الـ smart phones
بتكمل يوم بالعافية فى الاستخدام التوسط لكن مع الاستخدام الكبير ممكن تتشحن مرتين فى اليوم
لكن ممكن توصل لاكتر من يومين فى الحالة الـ stand by
بياخد حوالى ساعة و نص شحن و الشاشة هى اكتر حاجة بتستهلك البطارية
مكان السماعة فى منتهى الغباء فى الاسفل من ناحية المكان اللى بتمسك منه الموبايل
صوتها نقى لكن كان المفروض يبقى صوتها اعلى من كدة
الفريم سهل التجريح او المسح و دى حلها زى ماقولنا بشراء جراب نضيف
قطع الغيار غالية
الموبايل مش حمل خبطة او وقعة لانه نحيف و ضعيف

[حماده المصري]

كلام جميل جدا بس برضو متقلقش ساسونج بتستحمل وقعات

[alrabeh]

مبروك التليفون

[رزق]

الموبايل مش حمل خبطة او وقعة لانه نحيف و ضعيف

لا متخفش الموبيل وقع مني أكتر من 20 أو 30 مرة منهم كذا مرة من أكتر من متر (مرة من أكتر من مترين على اسفلت - هزار رخم) و بينزل يتهبد 3 حتت

تحط البطارية و تقفل الغطى و يشتغل زي الفل

و من غير كفر

دي ميزة ل سامسونج بإستخدام بلاستيك خفيف

[beshomilan]

مبروك
بس انت ليه جايب النسخة ال g ؟؟مجبتش العاديه ليه

[S O P H O S]

مبرووك ومشكورر عالتقرير ..

[AutoTycoon]

بقى النوكيا 5800 من احسن ما انتجت نوكيا :( انا رأيي انه كان بداية فشل نوكيا

[ramy_gamal]

الف مبروك على التليفون

[ramymechanics]

أولا يا باشا ألف مبروووووووك وربنا يجعله وش الخير عليك انشاء الله .... بس انت موهوم بال اس 2 امال لو استعملت النوت 2 هتقول ايه ... ولو حضرتك محتاج استفسار فى الموبايل انا تحت امرك

[M!SHO]

هو أنا الوحيد اللى شايف أنه موبايل معفن

برغم انه معايا بقاله 3 شهور

[ramymechanics]

هو أنا الوحيد اللى شايف أنه موبايل معفن

برغم انه معايا بقاله 3 شهور

معفن؟؟ حضرتك قصدك من انهى ناحية؟؟

[M!SHO]

تقريباً من كل ناحيه :((

خامات وبطاريه ونظام واستجابه ودعم :((((

انا معايا النسخه العالميه مش ال g

[ramymechanics]

تقريباً من كل ناحيه :((

خامات وبطاريه ونظام واستجابه ودعم :((((

انا معايا النسخه العالميه مش ال g

أنا متفق معاك فى نقطة واحدة بس اللى هى سرعة الأستجابة بس دى اتحلت فى أس 3 ونوت 2 ... لكن اعتمادية ممتازة .. بطارية زيه زى أى سمارت فون ويعتمد على استهلاك حضرتك ... الدعم .. مفيش أسهل من الأندرويد فى الدنيا

وفيه ميزة مهمة جدا ليا بالذات (أنا معايا نوت على فكرة) انه بيستحمل الخبط والهبد انا بيترزع منى عالأرض كل رزعة والتانية وعلى وشه والله ومن غير جراب ومش بيتخدش ... أنا أعرف واحد معاه آى فون وقع منه فى الجنينه على الزرع اتكسر وواحد تانى معاه آى باد وقع عالترابيزة الشاشة سرطنت ... خش عاليوتيوب وأكتب
Drop test iphone vs galaxy وأتفرج

[MohammedAladel]

الموبايل معايا .. من امبارح

تقريبا مكنش معايا موبايلات قبل كدا ههههه عشان أقارن ... الموبايل أول ما مسكته عادى جدا منبهرتش

كله بلاستيك من برا الفريم بتاعه من السهل جدا يتخدش وأنا مش من النوع اللى بحب ألبس موبايلى جرابات وكلام من دا

من ورا الغطاء بتاعه حتة بلاستيك عادى جدا
الموبايل كاميرته بالليل مش ولا بد بصراحة ومش قد كدا

أحلى ما فيه الغوريلا جلاس اللى بيحمى الشاشة .... الموبايل كان عايز تقفيل من برا أعلى من كدا

أى خبطة هتأثر على الموبايل مش عشان نحيف دا 8.6 مللى يعنى متوسط ... لكن عشان بلاستيك

اتعاملت معاه ساعتين مش أكتر زهقت منه وقرفت منه بصراحة بس رزق وربنا بعتهولى والحمد لله

كفاءة الموبايل هتقل لو حاطط الشاحن فيه

مكان كارت الميمورى غبى جدا ... شوفوا غباء التصنيع بس حاطين الشريحة برا وحاطين كارت الميمورى قدام البطارية يعنى ممكن تطلع الشريحة من غير ما تطلع البطارية

لكن عشان تطلع الكارت لازم تفك البطارية

الكاميرا الأمامية ملهاش لازمة .... لما الكاميرا الخلفية مش عاجبانى معقول هتبقى الكاميرا الأمامية حلوة يعنى !!!!!

دا رأيى بصراحة سامسونج مقلب وسعر غالى على الفاضى

[MohammedAladel]

هو أنا الوحيد اللى شايف أنه موبايل معفن

برغم انه معايا بقاله 3 شهور

+1

هو حضرتك لما تيجى تصور بتلاقى زرار للكاميرا !!!!!

مش عارف أزاى ينسوا يحطوا زرار للكاميرا عشان أصور ولا يمكن عشان ينسوا الناس إن كاميرته مش قد كدا بالليل عشان أيدك ما تاخدش ع الزرار كل شوية وتشغل الكاميرا وتزهق من قرفها بالليل