الوغد(واقع يستحق التفكير)

[RIDER 2050]

أيام الكلية ... وقصص الحب وخلافه ... كان فيه دايماً شعور إن قصة الحب مش هتنتهي بالزواج ... لإن البنت اللي في نفس سنك مش هتستنى ... والعريس الجاهز اللي فضل يتعب ويكدح علشان يكون نفسه ووصل لأواخر العشرينات أو أوائل التلاتينات هيخبط على الباب علشان ياخد العروسة ويمشي بينما إنت لسة مش عارف مصيرك وقدامك جيش والبحث عن وظيفة وشقة وخلافه ... مين بس هيستناك!

كنت بافكر وأقول إن العريس الجاهز ده هو " الوغد " اللي جاي يهدم قصص الحب ... البطل الشرير في الأفلام ... اللي أكيد محدش هيقدر يرفضه علشان فلوسه ومركزه ... بس بتبقى قليل الحيلة وقتها ومعندكش حل ... ممكن تسمع أغنيتين عاطفيتين وتتأثر شوية وبعد كدة تقوم وتكمل

مع الوقت ... ومع الانشغال بالأحلام والأهداف ... بتكتشف إن السنين فاتت ... وإنك لما فكرت إنك تتجوز ... فإنت بقيت خلاص زي البطل الشرير بتاع زمان ... بقيت إنت " الوغد " خلاص ... العريس الجاهز اللي محدش هيقدر يرفضه ... واللي هيحطم قلب شاب لسة قدامه رحلة الجيش والبحث عن الوظيفة والشقة وخلافه

وكل ما مستواك المادي يرتاح أكتر ... وكل ما مستواك الاجتماعي يزيد ... كل ما فرص رفضك بتقل ...

لما تلاقي نفسك بقيت مكان عدو الأمس ... يا إما بتحس إنك كدة صح ... وإن قصص الحب أيام الجامعة دي كلام فاضي ولعب عيال، وتقرر إنك تستمع بحياتك وتقتنع إن البنت اللي هتتجوزك بتحبك علشانك إنت مش علشان وضعك المادي والاجتماعي ... وممكن يكون ده حقيقي ومش بانكره طبعاً ... بل أتمناه جداً

يا إما بتحس بشعور مريب ... شعور إنك لما بتدق الباب على العروسة ... هتبص لك على إنك فرصة حلوة ... وهتوهم نفسها إنها بحبك حتى لو مش بتحبك ... ولو فيه شاب في سنها قلبه اتحطم فهي هترميه ورا ضهرها وتفكر في بكرة ... فيك ...

والجواز بالشكل ده بينجح كتير ... بس الفكرة في الهاجس اللي بيفضل مسيطر عليك ... علشان إنت حبيت زمان والوغد جه أخدها منك ... فإنت عندك نفس الشعور ده ... إنك الوغد اللي جاي ياخدها من حد تاني

علشان كدة، فيه شباب كتير أعرفهم جوازهم اتأخر ... علشان خايف من ده ... وبيحاول يدور على البنت اللي هتفهمه ... اللي هتحبه علشان شخصه هو ... توأم روحه اللي بتكمله مش اللي بتبص له على إنه فرصة كويسة ...
أول ما يلاقيها ... بيبقى مستعد يعمل أي حاجة علشان يكمل حياته معاها ... وياما ناس سافرت بلاد بعيدة علشان يقابلوا حبايبهم اللي عرفوهم من على النت ... وبيبقى سعيد لما يترفض من الأهل رغم وضعه ومركزه ويحاول معاهم تاني وتالت ورابع لحد ما يقنعهم ...

بيحس وقتها إنه مش الوغد اللي جاي يخطفها ... إنما بيحس إنه لسة الشاب الصغير العاشق بتاع زمان ...

ياريتكم كنتم عملتم بحديث النبي: إذا جاءكم من ترضون دينه وخلقه فزوجوه ... وحديثه: لا أرى للمتحابين إلا النكاح ... ياريتكم صدقتوا إن الزواج بيوسع الرزق وإن الشاب البسيط ده رزقه هيزيد لما يتجوز بنتكم ... لحديث النبي: التمسوا الرزق بالنكاح

ياريتكم خليتوا الشباب يتجوزوا وهم لسة في مستهل حياتهم بأقل التكاليف بعيداً عن كل الكلاكيع والتكاليف والبهرجة اللي بتمثل الضخرة اللي بتتكسر قلوب العشاق عليها ...

يمكن مكانش يبقى في حياتنا كل الهموم دي

منقول

[RIDER 2050]

اصعب حاجة ف الموضوع ان الواحد يبقى وغد ههههههههههههههههههه

[Terrible_DaRsH]

جت على الجرح :(

[AlGazar2]

فى الغالب الوغد فى الموضوع ده بيبقى الاهل ( او البنت ) قبل العريس الجاهز الوغد الاصلى فى الموضوع

[speed_magnum]

آآآآه يامّا آآآآه

[dr.hazem]

فى الغالب الوغد فى الموضوع ده بيبقى الاهل ( او البنت ) قبل العريس الجاهز الوغد الاصلى فى الموضوع

فعلا بس غالبا البنت وبعدين الاهل....
هههههههههه

Sent from my SE Arc S using Forum Runner

[عصام غنايم]

المشكله اننا كلنا مظلومين وكلنا اوغاد

فعلاٌ الحياه دى غريبه

[RIDER 2050]

جت على الجرح :(

آآآآه يامّا آآآآه

مكنتش عايز اقلب المواجع ع حد بس لازم ناخد بالنا بردو ان احنا بردو بنعمل نفس اللى اتعمل فينا ووجعنا
سنه الحياه بقى

[RIDER 2050]

فى الغالب الوغد فى الموضوع ده بيبقى الاهل ( او البنت ) قبل العريس الجاهز الوغد الاصلى فى الموضوع

بعيدا عن انى مش مقتنع بموضوع الارتباط ايام الجامعه
بس اانا شايف ان الشاب لو فعلا جاد لازم يبقى مقدر المسؤليه وعنده الاستعدادات الماديه والعقليه
لكن هو عايز يرتبط لمجرد الارتباط او حتى بيحبها وهو لسه مخدش اى خطوة خالص بالعكس كمان ده لسه مخلصش دراسه فهو بيظلم نفسه
وااهل البنت حقهم ميرضوش بيه

[S O P H O S]

موضوع جميل ..

[Khaled Online]

كأني ماسك بريد الجمعة لعبد الوهاب مطاوع الله يرحمه
أحييك

[ahmedteam]

موضوع ممتاز احييك عليه

[tarekmomo]

موضوع جامد وبيحصل كتييييييييييييييييير

[friendship7897]

حب أيه اللي أنت جي تقول عليه
الجملة دي : اللي بقولها لأبني اللي في الجامعة
يعني يحب ويتجوز وياخد مصروفه وخطبيته وهما راحين الجامعة أو حتى بعد الجامعة مباشرة
ودايماً أنصحه ( وبالبلدي كدة ) وأنصح كل اللي زيه
لو ممعكش مايلزمكش
والجواز مش لعبة لو مش قادر تتجوز يبقى أوعى تفكر في الحب والجواز وتعلق بنت الناس وتتعلق أنت كمان
ولازم تكون أكبر وأقوى وأغنى من حبيبة حياتك ... علشان متكونش صغير في نظرها وتفضل طول عمرها حاسة بنقص وأنت جنبها وتتمنى الأفضل منك ، لأن كل زوج لازم ينفق على أهله ويسعي في طلب الرزق - كما قال الله تعالي في سورة النساء بقوله : ( بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنْفَقُوا مِنْ أَمْوَالِهِمْ ) فهذا تفضيل قضاه الله عز وجل وحكم به .
وقال أيضا - يقول سبحانه وتعالى : "الرجال قوامون على النساء" أي الرجل قيم على المرأة ، أي هو رئيسها وكبيرها والحاكم عليها ومؤدبها إذا اعوجت
أأدبها إزاي وأنا مش لاقي أصرف عليها !
وربنا يصلح حال كل الشباب الصالحين والصالحات

[تامر.محمد]

انت جبت الحل , الاهل ما يحبكوهاش اوي عالمصاريف و الفلوس
هاقول ايه ؟ واحد اعرفه معاه عربية قديمة شوية (موديل 79) , الراجل اللي هو متقدم لبنته في وسط الكلام بيقول له (و عربيتك قديمة اوي ابقى حط في حساباتك انك تغيرها ان شاء الله) , انا و هو بيحكي لي كنت عايز اخد بعضي و اروح ادي للراجل ده بالقديمة , تخيل احساسه هو

بالنسبة للي كبر شوية مش مشكلة , يتجوز واحدة اكبر في السن شوية , 25 سنة مثلا :)