التعامل مع الاباء و الامهات

[yassin_samir]

لية ديما متسلطين و عايزين الواحد يمشى على رائيهم و انك تلغى عقلقك
لسة متخانق معاهم بسبب الموضوع دة
كل ما اعرض موضوع يسدوا فى وشى و يكرهونى فية مش عارف اعمل اية
انا تعبت الصراحة المهم انهم بيرفضوا من غير ما يشوفوا او يتحققوا
و مثال على كدة روحت شوفت عروسة من طرف واحد معرفتى انا
لما روحت بحكيلهم
كان الرد اكيد الراجل دة عايز يدبسك
الناس مش كويسة اللى انتا روحتلهم من غير ما يعرفوهم و دة لمجرد انهم من منطقة شعبية
طب ما احنا ساكنين فى منطقة زفت شعبية انتوا احسن من باقى الناس لية و قلبت بخناقة
و ابويا يقول ما تحضرش الجنازة و انا اكتب كدة فى الوصية و اى كلام
و يدعى عليا و خد من دا لغاية ما حرمت اعمل اى حاجة
جواز او شرا شقة او اى قرار
انتا بتقعد على القهوة لية
بتصرف فلوسك لية حوشها اى حاجة لازم يتدخلوا فيها
الصراحة انا مش لاقى غيركم افضفض معا لو حد عندة حل يقول علية

[yassin_samir]

اى عروسة من طرفى لازم تبقى وحشة علشان ماجيبى
و ان اهلها مش عارف اية و انهم هايزلوك وانا الصراحه لو ناوى على حاجة و حد كرهنى فيها بعبط و بدون دراية
خلاص بقفل حتى لو حلوة

[youssef_u]

يا باشا والدك و والدتك ( بعد الشر طبعا ) مش هيعيشوا معاك طول العمر استمتع بوقتك معاهم لان هيجي يوم و اللحظات دي تبقا ذكره و نفسك لو ترجع تاني ،،،، و بالنسبه لرأيهم و عايزين يمشوا كلامهم كلنا كده مش انتا بس ،،،

[Ahmed_Adham]

مشكله الاهل هنا في مصر انهم بيشيلو هم ولادهم من قبل ما يتولدو لحد ما يموتو ويفضلو يتدخلو في قراراتهم وحياتهم لحد اخر نفس. احنا "أسريين" زياده عن اللزوم. الابناء بيتخنقو من الموضوع ده لأنهم عايزين يجربو ومفيهاش حاجه لو غلط وخسر لأنه هياخد خبره عن اقتناع مش عن طريق نصيحه ممكن يكون مش مقتنع بيها. لكن الاهل بينفو دماغهم بغرض حمايه أبناءهم والخوف عليهم وأحيانا بيبالغو في ده لدرجه انهم يخربو بيت ابنهم وياخدوه للفشل.

عن نفسي أبويا دايما ينصحني وأنا بحب أسمع رأيه لكنه دايما معودني رأيه استشاري مش ملزم والحمد لله مفيش مشاكل بينا من أي نوع والطريقه دي شغاله معانا كويس. أوقات باخد برأيه وبعد شويه أتأكد انه كان رأي صائب وأوقات ماخدش برأيه ويتضح اني كان عندي حق بس المهم في الاخر ان العلاقه طيبه بدون أي صدامات.

طبعا فيه مدارس مختلفه في التربيه وأنا شايف ان مفيش مدرسه منهم صحيحه بشكل مطلق ولكن المفروض تتغير حسب طبيعه شخصيه الطرفين سواء الاباء أو الابناء يعني مثلا مينفعش يبقى عندي ابن ضعيف المهارات ومش مؤهل لاتخاذ قرارات مهمه زي الجواز وأسيبه ياخده بشكل منفرد وفي نفس الوقت مينفعش أبقى دايما متعنت مع ابني وألغي شخصيته وأحرمه من اكتساب الخبره بنفسه وأمنعه من الاحتكاك بالحياه لأني مش هعيشله العمر كله ومش هبقى معاه 24 ساعه أفكر معاه وأخد ابسط القرارات معاه.

نصيحتي ليك حاول تتفاهم مع أهلك لأن الصدام هيخلق مشاكل ومفيش حاجه في الدنيا تسوى انك تخسر أهلك ووجودهم حواليك لأن فيه ناس معندهاش أهل وبتحلم بأب أو أم يبقو جنبهم.

[manfromegy]

أسف جدا جدا جدا ياباشا بس نصيحة علشان ما تجيش تندم بعد سنين ( زي حالاتي) إسمع كلام والدك و والدتك حتي لو إنت شايف إنه مالوش لازمه و بالأخص في الجواز.نصيحة لو رجع بيا الزمان هابوس إيديهم و رجليهم و أسمع كلامهم من اللي شفته لما صممت علي رأيي.والله بيكون ليهم نظرة و بتكون صح.بصراحة يارتني كان أبويا و أمي منعوني بالعافيه من اللي شفته.جااااااااااي.نصيحة إسمع كلامهم بدل ماتندم بس ساعتها الندم هاييقي تمنه صحتك وراحة باللك و مش هاقولك الفلوس لأ الفلوس بتروح و تيجي

[samehkadous]

قال تعالى: (( وقضى ربك ألا تعبدو إلا إياه وبالوالدين إحسانا إما يبلغن عندك الكبر احدهما او كلاهما فلا تقل لهما اف ولا تنهرهما وقل لهما قولا كريما* واخفض لهما جناح الذل من الرحمة وقل ربي إرحمهما كما ربياني صغيرا ))

[أبو صلاح]

ياباشا انت كانك بتتلكم عني بالزبط
نفس اللي انت بتحكيه ده مع موضوع العرائس حصل معايا
الموقف ده حصل مرتين
اول مرة زي قالولي نفس الكلام وكانت برضه بنت قريبة مرات واحد زميلي في العمل
تاني مرة بقى دي اللي كانت مشكلة كبيرة جدا
كانت اخت واحد صديق عمري وابويا وامي كانو بيحبوه جدا ومعجبين بشخصيته قوي وكل شوية يقعدوا يقارنوا بيني وبينه
وساعة لما قلتلهم اني شفت البنت وعجبتني سمعت كلام اعجب من الخيال وساعتها والله كانت مشكلة كبيرة جداااااااااا امتدت يمكن اكتر من سنة
واحرجت من صاحبي جدا واختلقت معاه مشكلة وكبرتها علشان اقطع علاقتي تماما بيه
لدرجة انه حس باللي بفكر فيه واصر علي بشدة اني لازم انا اللي ازف اخته واحضر الفرح

وبعد كده تقريبا الاهل هما اللي اختارو وانا وافقت على اختيارهم
والحمد لله اختيارهم كان موفق بفضل الله
وبقول اني عمري ما كنت هلاي زوجة زي زوجتي

نصيحتي ليك حاول تعدي الموضوع واصبر وارضى بنصيبك

[أبو صلاح]

ياباشا انت كانك بتتلكم عني بالزبط
نفس اللي انت بتحكيه ده مع موضوع العرائس حصل معايا
الموقف ده حصل مرتين
اول مرة زي قالولي نفس الكلام وكانت برضه بنت قريبة مرات واحد زميلي في العمل
تاني مرة بقى دي اللي كانت مشكلة كبيرة جدا
كانت اخت واحد صديق عمري وابويا وامي كانو بيحبوه جدا ومعجبين بشخصيته قوي وكل شوية يقعدوا يقارنوا بيني وبينه
وساعة لما قلتلهم اني شفت البنت وعجبتني سمعت كلام اعجب من الخيال وساعتها والله كانت مشكلة كبيرة جداااااااااا امتدت يمكن اكتر من سنة
واحرجت من صاحبي جدا واختلقت معاه مشكلة وكبرتها علشان اقطع علاقتي تماما بيه
لدرجة انه حس باللي بفكر فيه واصر علي بشدة اني لازم انا اللي ازف اخته واحضر الفرح

وبعد كده تقريبا الاهل هما اللي اختارو وانا وافقت على اختيارهم
والحمد لله اختيارهم كان موفق بفضل الله
وبقول اني عمري ما كنت هلاي زوجة زي زوجتي

نصيحتي ليك حاول تعدي الموضوع واصبر وارضى بنصيبك

[memohamada]

لست وحدك
نصيحتى ليك اعقلها و توكل ... بر الوالدين شئ و تدخلهم فى قرارت هتحدد مصير حياتك بالكامل شئ تانى ... انت الى هتعيش مش والدك او والدتك مع احترمنا ليهم ، يعنى لازم تكون مقتنع بكل خطوة فحياتك و متحمل تبعتها سواء جواز او شغل او سفر . على الاقل عشان متلومش الا نفسك

[yassin_samir]

والله يا جماعه انا معسكر جدا
ليكود الواحد مش عارف يعمل اية
الله يخرب بيت بتاع التلفزيون
كل شوية امي تتصل عليا
و تقولي انتا فين
تعالي اتفرج وتمسكوا الناس و يعزبوهم
في معسكرات الامن
اوعي تتاخر و علي هذا الحال

[yassin_samir]

كل شويه واحد يطلع في برنامج
اتعزب و التاني لموا الناس من علي القهوة و خدوهم عزبوهم
اي هري بدون دليل

[AlGazar2]

كلنا كده و كل الاهل كده بس اتعود و كبر و عدى عادى جدا و لا كأن حاجة حصلت
بس بنسبه كبيره بيكون رأيهم صح و خصوصا فى موضوع الجواز و بالاخص رأى الام طبعا

[M.ABDOU]

قبل كل حاجه عاوز ااقولك انك مش لوحدك

اكترنا تعرض من اهله لمواقف شبيه بكده

والله ويمكن اكتر منك بس زى ما عضو فاضل قالك هنا ان الحكايات دى حتبقى ذكرى قدااام وربنا يديلك طول عمر لوالديك وتستمتع بيهم

انت كده كده ماشى من البيت وحتتجوز ان شاء الله ويبقى ليك حياه مستقله سواء رضيوا او لا لكن نصيحتى ليك حاول بقدر المستطاع متخسرش واللديك وخليهم يدعولك صدقنى بتفرق اوى اوى اوى

ااقعد مع نفسك شوفلك سياسه معينه للتعامل فى البيت تتعامل معاهم بدون ما يبقى فى مصادمات وحط فى راسك ميكونش من ضمن السياسه دى انك تغير من طباعهم لان ده شبه مستحيل

[S O P H O S]

يا باشا كل ده حب وخوف
مفيش حد فالدنيا دي من اولها لحد اخرها هيكون بيخاف عليك او بيحبك بدون مقابل غير الاب والام
اتمني تفكر تاني ومتزعلش منهم
ربنا يكتبلك الخبر ..