هل كل الشركات فى مصر بيحصل فيها كده؟

[ahmed76]

تعيين اقارب ايا كان مستواهم العلمى سىء او كويس
عند حدوث استغناء لا يتم الاقتراب من الاقارب والمعارف
استئثار المديرين بالسفريات والماموريات اللى فيها سبوبه واللى قايم بالشغل يتحرق بجاز وسخ .
مجهودك يتاخد ويتنسب النجاح لغيرك والفشل ليك .
مجموعه تكون شايله الشغل ومجموعه بتتفرج وبتتحط فى السبوبات فقط
هو ده عادى يعنى اكمل شغل ولا اعترض ولا اسيب الشغل ولا يجيلى ضغط ولا مرض من اللى بيحصل ؟؟؟
مع العلم انى بشتغل من حوالى 15 سنه فى وشفت الكلام ده كذا مره فى كذا شركه
ارجو ان اكون فضفضت شويه علشان مايحصلش ليا حاجه

[mr_vampire]

للاسف بيحصل في كل مكان حتي الشركات المالتي ناشيونال لو الادارة فيها مصرية.

[yassin_samir]

امال الخير و النعمة اللى احنا فية دة من اية
طبعا علشان نفوسنا كويسة و و العدل اللى بنتميز بية دون عن اى جنسية تانية
و وو ولا بلاش خلينى ساكت
هانعيش و نموت و احنا كدة فى دمنا الكوسة و الالحقد و الطمع و طبعا فى ناس نادرا تبقى كويسة

[hossam_elwani]

ويقولك ثوره هههههههههه ههههههههههه ههههههههههه

ثوره بدون ثوره على النفس فى كل مكان وكل قطاع تبقى جعجه وهرتله ودمار على الفاضى

[Ahmed_selmy]

احنا الادارة عندنا اجنبيه وبردوا فى الشغل الزفت دا ......الخواجات بيتعلموا مننا .......للاسف

[Forever.Leo]

فتش عن middle level management .. هي دي الطبقة اللي بيبقى طالع منها كل البلاوي !

[al_manara]

اما تلاقي البلد اتغيرت . والانتاج والجودة موجودين .
تعرف ان الي انت بتقولة اتغير . ومبقاش في قرايب ولا واسطة .
بقي في الاكفأ .

تحياتي

[elpasha1]

يا ريت على الشركات بس
دا كمان القطاع الحكومى كدة
بس تاكد من حاجة واحدة وانت ترتاح
ان ربنا بيبارك فى الرزق اللى فية طعم وريحه العرق اكتر من اى قرش تانى
وشوف الناس اللى انت بتقول عليهم هتلاقى اغلبهم عندة مشاكل مش ساسة الى راسة
اللى ابنه بايظ -اللى ابنه كل سنه يسقط- اللى مطلق ومش مستقر فى الحياة الزوجية- اللى مش عارف يشوف ولادة - واللى عنده مشاكل صحية وغيرة وغيرة

[S O P H O S]

تقريبا كده
وبيحصل كل يوم ..

[aboomar22]

متحطش فى دماغك اخلص انت فعملك وتاكد ان ربنا هيكرمك ويبعتلك فرصتك لحد عندك

[MIVEC.A92]

انا سألت المدير البنكي لبنك ال cib سؤال مباشر "عندكوا ناس بتشتغل بالواسطة" رد عليا "مفيش مكان في مصر مفيهوش وسايط" قلتلوا "حتي بنك انترناشونال و كبير زيكوا؟" قالي "للأسف اه"

[pharohtemo]

لو الأب كويس العيال حتطلع متربية و لو المدير كويس الموظفين حيشتغلوا بضمير و غصب عنهم كمان لو مش عاجبهم !!!
السر فى الشخص المسئول . هو اللى بيظبط المكان و لو المكان بايظ هو اللى يقدر يغير و يصلح الأوضاع على قدر المستطاع و الكلام ده على كل المستويات وصولا لرئيس البلد ...

[Khaled Online]

لا حول ولا قوة إلا بالله العليّ العظيم. قلبت علينا المواجع. اللي يفقع إن معندهمش نية أبدا يرقوا الناس مهما كانوا أكفاء وملتزمين. بس معلش. إن ربك لبالمرصاد