استفسار بخصوص الجيش وارجو الرد

[بدر صقر]

السلام عليكم ورحمة الله وبركاته لو سمحتوا كان ليا كام سؤال كدة وياريت بعد اذنكوا تجوبونى فى حاجة كنت عايز افهمها محيرانى شوية القفل بتاع المخلة ده
هى المخلة دى مش عاملة زى الشوال كدة هتتقفل بقفل ازاى بس اصل الموضوع ده
نفسى افهمى يعنى معلشى هو سؤال ملوش لزمة انا عارف بس عايز افهم بس مش اكتر
اما بقى بالنسبة للاسئلة هى كتير انا عارف والله معلشى بتاسفلك لتانى مرة بس اكمنها اول مرة فعايز افهم بس لان الجيش فيه كلام كتير
1-هستسمحكوا بس تقولولى ايه الحاجات بس اللى هحتاجها وانا رايح مركز التدريب
اصل فى ناس بتقول خد ابرة وخيط وديتول وبدرة رجل وحاجات كدة فياريت معلشى
تقولولى باختصار شديد ايه اللى اخده معايا وهل الشنطة اللى بجيب فيها حاجتى
بيحطوها فى الامانات يعنى متدخلش معايا وهل اجيب معايا قلم ماركر علشان
اكتب على المخلة بتاعتى اسمى ولا ده ممنوع
2-وبالنسبة برضو للفلوس اخد كام معايا وهل ينفع اخد محفظة ولا هتتقلب هى
كمان متهيالى ان اللبس الملكى اللى انا هروح بيه الاول هحطه فى الدولاب
وهقفل عليه ولا ايه الدنيا دى برضو اصل فى ناس سمعتها بتقولى انهم حطوا
اللبس الملكى ده على السرير واللبس اتسرق فمعلشى ياريت توضحولى
الحتة دى بالذات احسن لو الفلوس واللبس راحوا انا كدة مش هروح
3-هل ممن اجيب كوتش غير الكوتشى اللى بيسلموه وياريت بقى تفيدنى فى السؤال
ده دلوقتى احنا هنسلم المخلة قبل منخرج طيب لو مثلا البيادة اتقطعت ولا
الكوتشى ده اتقطع هسلمه كدة ولاهشترى واحد اصل الحاجات دى مكملة معايا لاخر
الجيش فاكيد انها هتدوب يعنى
4-وبالنسبة بقى لاكل الميز هو فعلا سىء للغاية يعنى هعيش على الكانتين ولا ايه النظام
5-وياريت برضو لو تقولولى ايه نظام اليوم وهل فعلا الحمامات بمواعيد وكدة وهل
الحمامات نضيفة اصلا احسن الواحد حاسس انه هيتشل من الجيش ده والله
6-وياريت برضو لو تقولولى الاسلحة الكويسة فى الجيش يعنى شغل ادارة وكدة بدل الخدمة والقرف ده لو الواحد عرف يشوف حد يعنى
بتاسف والله للمرة المليون انا عارف ان الاسئلة كتير ومعظمهم ملوش معنى بس معلشى ياريت حد يفيدنى وشكرا

[hazoom2006]

المخلى بتتقفل ازاى ... بيكون فى زى قفيز او شنكل كدة بيلف فى فتحات المخلى من فوق شوفت انت كيس الفلوس صرة من الدنانير حاجةشبه دى كدة

تاخد معاك ادواتك الشخصية وغيارات بيضاء واهم حاجة معجون الاسنان ومكن حلاقة والابرة والخيط والديتول مزيل عرق واى حاجة بتسخدمها ممكن قصافة اظافر ادوية برد وانفلوانزا وكدة

الشنطة بتفضل معاك والهدوم المكلى ممكن تحطها فى الامانات بس ممكن ماتلاقيها او لما حد يجيلك زيارة اديهاله لو ميرى غير مسموحلك باالحجات دى بس كلةبيدخل بيها

بالنسبة للفلوس خد معاك من 300 ل 500 جنيه والزيارة ممكن حد يجيبلك فلوس لو بتدخن زود المبلغ

الكوتشى ممكن تججيب كوتشى بس نفس الشكل واللون بس فى الغالب هيتسرق منك او يقولك ممنوع


الاكل فى الميز اكيد سمعت عن اكل الجيش الاكل كلة بدون ملح وحاجة ماتتاكلش بس كل منه عادى والاكل فى الكانتين مش هيشبعك

نظام اليوم بتصحى 5.30 تمام وجمع فى الناس لحد 7.30 وبعدين طابور لياقة للساعه 9 وبعدين الفطار والساعه 10 طابور تعليم اولى للساعه 2 وبعد كدة الغدا وبعدين طابور الهتاف فى النهاية اليوم بيخلص الساعه 6 المغرب والساعه 7.30 العشا الحمامات حسب مركز التدريب

والنوم الساعه 10 اقصى ميعاد سهر

ده فى مراكز التدريب
الاوقات دى تقريبيه يعنى ممكن نص ساعه تفرق فى ميعاد كدة


مش مهم السلاح قد مامهم الواسطةاللى هتخدمك فى المكان دة


بالتوفيق وربنا يعديهولك على خير

[بدر صقر]

الف شكر ياباشا على الاهتمام والرد ربنا يباركلك هو فيه نقطتين بس اللى انا فهمته فى حكاية اللبس الملكى هو انا هاخده معايا عادى واحطه مع المخلة صح كدة ولا ايه وبالنسبة بقى للكوتشى مثلا لو الكوتشى اللى هيسلمهولى اتقطع مثلا هل انا ملزم اجيب غيره ولا لأ علشان اعمل حسابى من الاول تبقى حاجتى وابوظ فيها براحتى ومتشكر مرة تانية ياباشا على الاهتمام والرد

[hazoom2006]

المخلى كلها بتتباع بحوالى 200 جنيه ظبط نفسك انت وبهدل فيها براحتك ولما يجى وقت التسليم هتسلم ماتخافش وممكن تروح الحجات اللى مش بتستخدمها البيت
انت ملزم تسلم المخلى كاملة زى ماستلمتها جديدة بقا مسروقة المهم يكون الافارول نضيف ومش متقطع الافضل تبقى تجيب مخلى وخلاص او متفكرش فى الموضوع ده وخلية ساعه التسليم هتتحل (ممكن يفتحلكو المخزن واللى ناقصة حاجة ياخدها ماتشغلش بالك انت)

الملكى بيطلبو منك تحطة فى الامانات بس ممكن ماتحطوش وفى اول زيارة تسلمه لحد من اهلك او اصحابك

[بدر صقر]

متشكر جدا ياباشا على الرد الف شكر ربنا يباركلك

[egyboy]

شوف الموضوع ده يا باشا هيفيدك كتير
وهتعرف تاخد ايه وكده

http://www.nilemotors.net/Nile/225536-a.html

ربنا يكرمك

[h_shahin]

السلام عليكم ورحمة الله وبركاته لو سمحتوا كان ليا كام سؤال كدة وياريت بعد اذنكوا تجوبونى فى حاجة كنت عايز افهمها محيرانى شوية القفل بتاع المخلة ده
هى المخلة دى مش عاملة زى الشوال كدة هتتقفل بقفل ازاى بس اصل الموضوع ده
نفسى افهمى يعنى معلشى هو سؤال ملوش لزمة انا عارف بس عايز افهم بس مش اكتر
اما بقى بالنسبة للاسئلة هى كتير انا عارف والله معلشى بتاسفلك لتانى مرة بس اكمنها اول مرة فعايز افهم بس لان الجيش فيه كلام كتير
1-هستسمحكوا بس تقولولى ايه الحاجات بس اللى هحتاجها وانا رايح مركز التدريب
اصل فى ناس بتقول خد ابرة وخيط وديتول وبدرة رجل وحاجات كدة فياريت معلشى
تقولولى باختصار شديد ايه اللى اخده معايا وهل الشنطة اللى بجيب فيها حاجتى
بيحطوها فى الامانات يعنى متدخلش معايا وهل اجيب معايا قلم ماركر علشان
اكتب على المخلة بتاعتى اسمى ولا ده ممنوع
2-وبالنسبة برضو للفلوس اخد كام معايا وهل ينفع اخد محفظة ولا هتتقلب هى
كمان متهيالى ان اللبس الملكى اللى انا هروح بيه الاول هحطه فى الدولاب
وهقفل عليه ولا ايه الدنيا دى برضو اصل فى ناس سمعتها بتقولى انهم حطوا
اللبس الملكى ده على السرير واللبس اتسرق فمعلشى ياريت توضحولى
الحتة دى بالذات احسن لو الفلوس واللبس راحوا انا كدة مش هروح
3-هل ممن اجيب كوتش غير الكوتشى اللى بيسلموه وياريت بقى تفيدنى فى السؤال
ده دلوقتى احنا هنسلم المخلة قبل منخرج طيب لو مثلا البيادة اتقطعت ولا
الكوتشى ده اتقطع هسلمه كدة ولاهشترى واحد اصل الحاجات دى مكملة معايا لاخر
الجيش فاكيد انها هتدوب يعنى
4-وبالنسبة بقى لاكل الميز هو فعلا سىء للغاية يعنى هعيش على الكانتين ولا ايه النظام
5-وياريت برضو لو تقولولى ايه نظام اليوم وهل فعلا الحمامات بمواعيد وكدة وهل
الحمامات نضيفة اصلا احسن الواحد حاسس انه هيتشل من الجيش ده والله
6-وياريت برضو لو تقولولى الاسلحة الكويسة فى الجيش يعنى شغل ادارة وكدة بدل الخدمة والقرف ده لو الواحد عرف يشوف حد يعنى
بتاسف والله للمرة المليون انا عارف ان الاسئلة كتير ومعظمهم ملوش معنى بس معلشى ياريت حد يفيدنى وشكرا

1- المخلة من فوق بيبقي فيها زي حلقات حديد علشان تضمهم علي بعض بالقفل
اول مرة هتروح بلبسك الملكي و شنطتك عادي و هيسمحولك بكدة و بعدين في اول اجازة تبقي ترجعهم البيت
خد معاك كل مستلزملتك الشخصية اليومية و كمان تاخد معاك حاجات تنفعك في الطوارئ
يعني تاخد ادوات الحلاقة و فرشة السنان و مشط و فرشة و معلقة للاكل و كلينكس للحمام و ابرة و فتلة
و راديو صغير لو بتحب تسمع الراديو او سماعات الموبايل لو هتسمع حاجات من موبايلك
كمان ممكن تاخد دوا للاسهال و البرد و الصداع و التسلخات و مزيل لرائحة العرق و صابونة

لازم تكتب اسمك عل المخلة بتاعتك و ده مش ممنوع2
2- الفلوس لو انت مدخن فعلا يبقي تعمل حسابك علي تكلفة سجايرك لمدة شهر . طبعا ممكن ما تقعدش شهر و لا حاجة لكن احتياطي كمان هتشتري حاجات من الكنتين يوميا زي البسكوت و الشاي و الحاجة الساقعة و احيانا سندوتشات لو موجود فدي تعمل حسابها كمان
و لازم تعمل حسابك تشيل مصاريف مواصلات المرواح علي جنب و متقربش منها ابدا
حاجاتك الشخصية انت و حظك ممكن مكان اقامتك يبقي فيه دواليب فتحط لبسك و فلوسك في الدولاب او حظك مش قوي فيبقي دولابك هو مخلتك هتحط لبسك الملكي في المخلة لغاية ما تروحه. الافضل انك تروح الجيش بلبس اي كلام لان اكيد هيتبهدل

3- الظباط بس هي اللي ممكن تلبس كوتشي او تريننج ملكي لكن العساكر الغلابة لازم يلتزموا باللبس الميري و بالتالي ممنوع تستخدم اي كوتشي ملكي و ما تخافش كل مكونات المخلة بتتباع في رمسيس و العباسية فلو حاجة باظت منك ممكن تشتري غيرها و كمان فيه عساكر بتبيع او تبدل صرفياتها ممكن تبدل معاهم بس ده بعد مرحلة مركز التدريب
4- اكل الجيش لا شكل و لا طعم و لا ريحة لكن فيه ناس بتتقبله عادي و فيه ناس و دي الاغلبية و ناس ما تلمسوش و دول اللي بيبقو عايشين علي الكانتين عموما الجبنة و الحلاوة و المربي و البيض في الفطار و العشا مفيهمش مشكلة انما في الغدا هي دي المشكلة في البذنجان و السبانخ
5- النظام الاخوة شرحوه و بالنسبة للحمامات فاحيانا. بتتقفل بالليل و الناس بتضطر تقضي حاجتها في الهواء الطلق
6- الاسلحة الكويسة ابعد عن الاسلحة اللي بتبدأ بحرف الميم. مشاه. مدفعية.مدرعات يبقي فاضل دفاع جوي.بحرية.طيران لكن برضه الاماكن داخل السلاح الواحد بتفرق يعني البعد عن الجبل و الصحرا افضل يعني ابعد عن الوحدات القتالية الافضل اماكن القيادة و الادارة و الخدمات زي النوادي و الفنادق. عموما الموضوع ده نصيب و ربنا يوفقك
و ما تخافش من الجيش و لا تحبط لإن ملاين قبلك دخلو الجيش و خلصت مدتهم علي خير فمهما كانت الايام سودا هتعدي ان شاء الله

Sent from my MZ601 using Forum Runner

[بدر صقر]

والله ياجماعة مش عارف اشكركم ازاى ربنا يباركلكم ويكرمكم والف الف الف شكر