عسكرى الصراف الألى

[MaZaGAngeE]

عمري ما حصل معايا الموقف الغريب ده
بس لو حصل مش هديله اي حاجة
مش معنى ان مرتبه قليل اني اديله رشوة .... ايوة اسمها رشوة

عايز تعمل خير .... اعمله لواحد محتاج فعلا مش واحد بيشحت ...

[محمد يوسف]

العساكر دي بتكون غلابة جداً
ومرتبهم ميأكلش عيش حاف
وشايفين عرابيات شيك كتير خلال النهار والليل
ونازل منها ناس شيك وبرفانات مبتفوح من العربيات
وبيتسحب فلوس كتير أدامهم
فأنا في إعتقادي ( طباخ السم بيدوءه )
لأنهم هما اللي بيأمنوا المكان دا
يعنى أنا شخصياً بروح الماكينة لو ملأقتيش العسكري دا مش بصرف من الماكينة دي
وأروح ماكينة تانية يكون فيها الطباخ - أقصد العسكري
وأراضيه بأي حاجة وبكون مجهزها قبل ما أنزل أصلاً من العربية
وأسحب الفلوس وأحطها في شنطي والفلوس اللي مجهزها أنا اللي بروح له وأقول له : شايك .
"تصدقوا ولو بتمرة، فإنها تسد من الجائع، وتطفئ الخطيئة كما يطفئ الماء النار "
وربنا يبارك لك في فلوسك ويبعد عنك وعننا عيون المحتاجين

اللهم أمين..شكرا لدعائك الطيب ولكى مثله ان شاء الله

أناعارف انهم غلابة وماعنديش مشكلة وباديهم ساعات بنية الصدقة لكن اللى ضايقنى ان الموضوع زاد قوى وبقى بجاحة...يعنى أنا اديت لواحد يسكت لأ راح ناده لصاحبه عشان ييجى يصبح ع الباشا اللى هو أنا..ليه يعنى؟ ويروح فجأة يظهر الكناسين والشحاتين من تحت الأرض...والعسكرى اللى بص فى الفلوس قصف بركتها فى ثانية...طيب ده ممكن أديله ازاى بعد عينه الوحشة دى؟
فيه مليون محتاج بس عندهم عفة نفس...ماقابلنيش منهم غير واحد يتيم كان قاعد فى حاله ولا بص عليا وكنا فى أيام أعياد أو مولد حاجة كده ..رحت له لحد عنده واديت له اللى ربنا قسمه ليه وماكانش عايز ياخده وقعدت أتحايل عليه ..للأسف ماشفتوش تانى

[friendship7897]

أنا عارفة وفاهمة إن الغتاتة والبجاحة تخنق
طب هحكي لك عن موقف زي بتاعك بس مش عساكر
كنت في إشارة ولاقيت حد غلبان بيبع مناديل
فلاقيت نفسي بتلقائية بأدي له اللي فيه القسمة
راح منادي على ست واقفة بعيد معاه في نفس الرصيف ( تقريباً مراته )
حسيت أنهم هيشتغلوني وهينادوا بقيت العيلة لو أديتها
فقولت له : المبلغ اللي أنا أديتهولك لكم أنتم الإتنين
وسبتهم بيتخنقوا - ههههههه
سامحنى يارب

[amrrashed]

بص يا سيدى الحالة صعبة فى البلد اعتبر الموضوع صدقة لان العسكرى ده اغلب فئة فى مصر وافكر مقولتين شهيرتين ... احنا بنتشكك فى نوايا الشحاتين دايما بس بنروح للنصابين نديهم كل فبوسنا عن طيب خاطر ... و عندما تتصدق فانك ترسل فلوسك لكى تستخدمها فى زمن اخر

[AHMED12345678]

انا مبلقيش عسكرى اصلا فى فرع البنك الى بسحب من المكنة بتاعتة
شكل العساكر هاجرت

[hossam_elwani]

بياكلو مااااااال سحت ..

(لَا يَرْبُو لَحْمٌ نَبَتَ مِنْ سُحْتٍ إِلَّا كَانَتْ النَّارُ أَوْلَى بِهِ)

[egyptawy2010]

بياكلو مااااااال سحت ..

(لَا يَرْبُو لَحْمٌ نَبَتَ مِنْ سُحْتٍ إِلَّا كَانَتْ النَّارُ أَوْلَى بِهِ)

على فكرة دول ناس غلابة جدا ومرتباتهم لا تكفى شىء

اسلوبهم سيىء بصراحة ولكن يجب ان نتكافل

[zangry]

الاخ بتاع رشوة .. هى اية الرشوة في كده؟؟ دى ناس غلابة !! ده انت المفروض تديهم من نفسك !! مرتب اية انت بتسمي ده مرتب !! امال اسلام اية وشريعة اية اللى انت ماسكهالنا من صباحة ربنا ؟؟

[محمد يوسف]

على فكرة دول ناس غلابة جدا ومرتباتهم لا تكفى شىء

اسلوبهم سيىء بصراحة ولكن يجب ان نتكافل

غلابة أه ونتكافل أه..لكن مش بالعافية

"ما أخذ بسيف الحياء فهو حرام" صدق رسول الله

[محمد يوسف]

الاخ بتاع رشوة .. هى اية الرشوة في كده؟؟ دى ناس غلابة !! ده انت المفروض تديهم من نفسك !! مرتب اية انت بتسمي ده مرتب !! امال اسلام اية وشريعة اية اللى انت ماسكهالنا من صباحة ربنا ؟؟

لأ مش مفروض حد يديهم من نفسه ولا حاجة

ورجاء عدم الشخصنة و الدخول فى أحاديث خارج الموضوع

[dede_dodo88]

الواحد بجد بيتأزم نفسياً جداً بسبب الفئة دي من الناس.. سواء كان مثال العسكري ده أو أي حد بيتسول أو بيستعطف الناس عشان الفلوس خصوصاً الناس الكبيرة في السن..
مببقاش عارف قدامهم أعمل أيه!!.. هو أكيد الأسلوب اللي بيتبعه ده غلط.. بس برجع أفكر و أقول لنفسي أن ربنا هو اللي مديني نعمة أني أكون في وضع مادي أفضل منه فليه أنا أكون بخيل مع حد أقل مني حظاً في الحياة.. و بفكر تفكير تاني من ناحية قيمة الفلوس بالنسبالي و بالنسباله.. يعني أنا بستهلك فلوس كتير في حاجات يمكن تكون تافهة أو كمالية لكن هو ممكن يكون محتاجها عشان ياكل أو يجيب علاج...
يعني أفكار كتير بتيجي في دماغي لما بشوف حد كده لدرجة أني ممكن أفضل لفترة زعلان من نفسي..
همممـ..مش عارف!!

[zangry]

لأ مش مفروض حد يديهم من نفسه ولا حاجة

ورجاء عدم الشخصنة و الدخول فى أحاديث خارج الموضوع

لا المفروض عشان في ناس كتير غلابة !! انا لا بشخصن ولا بتكلم في حاجة انا كل اللى بقوله ان دى ملهاش علاقة بالرشوة ! بس كده

[محمد يوسف]

لا المفروض عشان في ناس كتير غلابة !! انا لا بشخصن ولا بتكلم في حاجة انا كل اللى بقوله ان دى ملهاش علاقة بالرشوة ! بس كده

يافندم مش مفروض خالص

وفعلا انت لما تشجعه على مد ايده للناس بحجة انه غلبان حايبق سهل عليه يمدها وياخد مبالغ أكبر للتساهل فى شغله أو الرشوة...ومن حوالى سنة كان فيه عسكرى حراسة فى hsbc الهرم خد فلوس عشان يسهل سرقة البنك

[zangry]

يافندم مش مفروض خالص

وفعلا انت لما تشجعه على مد ايده للناس بحجة انه غلبان حايبق سهل عليه يمدها وياخد مبالغ أكبر للتساهل فى شغله أو الرشوة...ومن حوالى سنة كان فيه عسكرى حراسة فى hsbc الهرم خد فلوس عشان يسهل سرقة البنك

ماشي مش مفروض انا معاك بس اية اللى هيحصل لو كل مناسبة اديتله حاجة مش هى دى اللى هتشجعه .. حتى لو هو مد ايده واخد رشوة يبقي حسابه مع ربنا .. انا بتكلم على الناس الغلابة عموما مش شرط العساكر بتوع البنك بس ..

[pro_samir]

هو انتو كلكم عندكم عربيات و فيزا و فلوس في البنك

يا بختكم

مش حسد خالص ده حد كان معدي وبيقر بس مفيش أي حاجه :))