موقف مع امين شرطة

[wahba87]

السلام عليكم

كنت راجع من امبابة الى رمسيس , فكرت ارجع من كوبرى امبابة من باب التغيير , انا نادرا جدا لما ارجع منه

المهم نزلت عند الكورنيش عند نايل سيتى , نزلت من نفق كده و لقيت ملف , لفيت منه , طلعلى امين شرطة معرفش منين , و قالى انت لفيت عكس , عليك مخالفة عكس اتجاه ب 1200 جنيه !!

طبعا انا اتعصبت جدا و قولته مين قال ان الملف ده عكس !! , قاللى كل الناس عارفة !!!!!!! , قولتله مفيش يافطة بتقول ممنوع الدوران , قالى مش شغلى , عليك مخالفة ب 1200 جنيه , الملف ده اتجاه واحد , على العموم انا هعمل معاك واجب و احسبهالك مخالفة عادية (طبعا انا ركبنى العفريت زيادة ما هو راكبنى) , انا مصمم انى معملتش اى حاجة غلط و مش دافع حاجة

فى الاخر قالى اللى تشوفه يا باشا , انا هزودلك رقم على النمرة و يبقى كده شلتهالك خالص !!!! و بدأ يدور وشه

سبته و مشيت طبعا و مفيش على لسانى غير حسبى الله و نعم الوكيل

[ahmedhilmy]

هما زي ما هما حسبي الله و نعم الوكيل

[Ahmed_selmy]

انا مش شايف اى اختلاف قبل الثورة زى بعد الثورة .....كله زى ما هو بل بالعكس بقت ظمبليطه على الاخر دا طبعا غير عدم الامان والبلطجه والتثبيت اللى على ودنه وفى كل حته وبقى الصبح كمان.

[S O P H O S]

مفيش تغير
والشعب اساسا مش مستحمل والله ..

[samehafez]

نفس المكان و نفس امين الشرطة ... بس من من 3 شهور ....و علي فكرة امين الشرطة ده اصلا مش مرور ده حراسات و بيسترزق

[beshomilan]

المهم نزلت عند الكورنيش عند نايل سيتى , نزلت من نفق كده و لقيت ملف , لفيت منه ,

هو للامانه الملف ده عكس فعلا
الملف الصح بعد ده بكام متر

[abogogo]

هو الشعب اتغير عشان الشرطة تتغير ...!!!
الثورة غيرت نظام لكن لم تغير شعب للأسف كما قال عنه الشيخ الشعراوي رحمة الله عليه ( سلبي ...!!! )

[wahba87]

هو للامانه الملف ده عكس فعلا
الملف الصح بعد ده بكام متر

طب انا اعرف منين , لازم يكون فى علامة

[shaddadfalcon1]

طالما مفيش يافطه كنت هددته او خدت اسمه او عملت اي حاجه تخوفه بيها

[Imhotep]

طب انا اعرف منين , لازم يكون فى علامة

هقولك العلامة. . . مفيش ملف واحد يبنفع تعدى منه العربيات فى التجاهين المتعاكسين، صح؟ الملف ده بقى معمول للى داخل شارع مسرة من الكورنيش. . . الملف اللى بعده ببتاع 20 متر هو ملفك الصح اللى يطلعك على فردة الكورنيش اللى بتودى على مطلع كوبرى مايو و على التحرير

[Ahmed_Adham]

الدورانات (اليوتيرن) كلها بتبقى على شكل هلال (في نهايه الرصيف الفاصل بينك وبين الطريق العكسي) فلو فتحه الهلال اللي في وشك ناحيتك يبقى الدوران بتاعك ولو مش ناحيتك يبقى بتاع الاتجاه التاني. فيه دورانات بتبقى للاتجاهين ودي بتبقى على شكل هلالين عكس بعض.

[Nistelrooy]

بس اية زوود رقم علي النمرة يعني لبسها لحد تاني !!

[wahba87]

الدورانات (اليوتيرن) كلها بتبقى على شكل هلال (في نهايه الرصيف الفاصل بينك وبين الطريق العكسي) فلو فتحه الهلال اللي في وشك ناحيتك يبقى الدوران بتاعك ولو مش ناحيتك يبقى بتاع الاتجاه التاني. فيه دورانات بتبقى للاتجاهين ودي بتبقى على شكل هلالين عكس بعض.

الدوران ده كان هلالين عكس بعض , علشان كده انا كنت بقول ان مفيش اى حاجة توضح انه ممنوع ليا

[abogogo]

بس اية زوود رقم علي النمرة يعني لبسها لحد تاني !!

فكرتني انا كنت هسأل إزاي زود رقم ...!! يعني المعروف ان النمرة ارقام وحروف ومثلاً القاهرة 3 ارقام و3 حروف .. الجيزة 4 ارقام وحرفين بقسة المحافظات 4 ارقام و3 حروف فلو انت من القاهرة يعني نمرتك 3 ارقام و3 حروف لو زود رقم اصبحت 4 ارقام و3 حروف يعني محافظة اخرى ...!!!

[wahba87]

انا نمرتى جيزة اصلا , حرفين و 4 ارقام

يعنى لو زود رقم يبقى باظت خالص , الله أعلم هو عمل ايه