كشاف طوارئ

[swimmer25]

فيه كشافات ليد صغيره موجوده عند محلات الادوات الكهربائية , انا جايب كذا واحد 50 لمبة ليد و سعره 45 جنيه , اعتقد ده احسن من الكبير اللي ب140 عشان لو جبتي 3 مثلا ووزعتيهم على الشقه كلها هاتبقى احسن من تركيز الاضاءه في مكان واحد , وعلى فكره اضاءته قوية و كويسه

دي فكرة حلوة..بدل واحد كبير...أتنين صغيرين أحسن

[bobbozo4b]

تمنها كام؟

انا كنت جايبها من فترة طويله وكان سعرها 35 جنيه
ولسه سائل عليها وبرده ب 35 جنيه

[RAPID]

مهزلة قطع النور اصبح امر واقع للاسف !!
سد عالى ومحطات رياح ومحطات كهربا بانواعها وبرضه مش عارفين نحل الازمة
الله يكون فى عوننا

[A_H_M_A_D]

مهزلة قطع النور اصبح امر واقع للاسف !!
سد عالى ومحطات رياح ومحطات كهربا بانواعها وبرضه مش عارفين نحل الازمة
الله يكون فى عوننا

محطات الكهربا في مصر لو اشتغلت كلها بكامل طاقتها هاتكفي الاستهلاك و ممكن يفيض شوية للتصدير كمان

المشكلة مش في عدد المحطات , المشكلة ان مفيش وقود كافي لتشغيلها

[tarekzein]

الفيلبيس والإنريجيزرسعره 300 وأنت طالع

أفضل ماركتين فى السوق دلوقتى أمير وجنرال وفى منهم لمبات نيون وفيه ليدات

الأمير 90ليد بـ 180جنيه من أى محل فى وسط البلد

الجنرال نفس العدد بـ170 جنيه

بس الأمير توزيع إضاءته أفضل

الأتنين فيهم حمايه ضد الشحن الزائد

تعليمات إطالة عمر البطاريه :
أفرغ الشحنه بالكامل ثم أعد شحنها لمده 24 ساعه متواصل
ضع الجهاز فى وضع أفقى
فى حالة عدم إستخدام الكشاف لمده طويله يجب شحنه مره شهريا لمده 24:48 ساعه

وأخيرا الأنواع الصينى شغاله وزى الفل وفى ماركه إسمها qunba ليدات برضه عندى من السنه اللى فاتت وشغال زى الفل

المهم تحافظ عليه من الصدمات لأن توصيلاته ضعيفه جدا

[dedi]

فيه برضه فكرة تانية ظريفة وهى (لمبة الشحن) ودى عبارة عن لمبة الاضاءة فيها بنظام الليدات وبتبقى قلاووظ أو مسمار وبتتركب فى دواية اللمبة كهربائية العادية وتتوصل بالكهرباء ، ولما الكهرباء تقطع بتنور اوتوماتيك وتستمر 5 ساعات ، ولما الكهرباء تيجى بتشحن تانى اوتوماتيك ، ممكن وضع لمبة منها فى كل حجرة فتبقى حاجة ظريفة وثابتة وتنور الشقة اوتوماتيك عند قطع الكهرباء ، أنا جبت واحدة أجربها من مول على الزراعى اسمه العابد وكان تمنها 26 جنيه ، ودى صور لأشكال مختلفة منها :

فكرة لمبات الشحن اعتقد انها موش عملية و احد قريبى اشترى 3 وموش بينوروا اكتر من نصف ساعة

[Land_Cruiser]

فى محلات الأدوات الكهربائية الكبيرة
والانرجيزر ممكن تلاقيه برضه فى ماكرو أو كارفور.

كارفور مفيهوش يا باشا غير ماركه صيني كان فيها نوع ب ٢٠٩ و دي فيها لمبتين فلورسنت و موديل تاني ب ليدات ب ٢٢٩ و الراجل قاللي عليه ضمان سنه. كانوا جايبين كميه كبره و لاحظت ان كان في اكتر من تاجر بيملأ التروللي اللي معاه بيهم

[Egyzizo]

انرجيزر أنا لسه شايفه فى مول العابد ، على الطريق الزراعى (بين طوخ وبنها) ، وهناك برضه فيه أنواع صينى ، ولمبة الشحن موجودة.

[Abo Yasso]

عندى الامير النيون 2لمبه 60 سم
اكتر من سنتين وما شاء الله زى الفل
كنت جايبها من التوحيد والنور

[Egyzizo]

فكرة لمبات الشحن اعتقد انها موش عملية و احد قريبى اشترى 3 وموش بينوروا اكتر من نصف ساعة

هى مكتوب عليها 4 ساعات ..
على أى حال أنا لسه شاريها وهاجربها.

[A_H_M_A_D]

كارفور مفيهوش يا باشا غير ماركه صيني كان فيها نوع ب ٢٠٩ و دي فيها لمبتين فلورسنت و موديل تاني ب ليدات ب ٢٢٩ و الراجل قاللي عليه ضمان سنه. كانوا جايبين كميه كبره و لاحظت ان كان في اكتر من تاجر بيملأ التروللي اللي معاه بيهم

الاسعار دي كتير قوي على ماركات صيني , عموما التوحيد و النور فيه انواع صيني برضه وعندهم نوع اسمه more ده ب 140 جنيه و عليه ضمان سنه برضه

[Ahmed_Adham]

جبت من سنه واحد ليدات اسمه "جراند" وفيه أربع صفوف ليدات منهم نص صف فصل يادوب بعد شهر ولا اتنين ولأني كنت محتاج واحد كمان جبت المره دي انرجيزر لمبتين نيون وكان سعره 280 جنيه وبعد زياده الدولار جبته لأبويا ب 320 من سبينيس. عيبه انه وزنه تقيل شويه بس عشمي انه يكون عمره طويل خصوصا البطاريه.

[hossam_elwani]

كارفور مفيهوش يا باشا غير ماركه صيني كان فيها نوع ب ٢٠٩ و دي فيها لمبتين فلورسنت و موديل تاني ب ليدات ب ٢٢٩ و الراجل قاللي عليه ضمان سنه. كانوا جايبين كميه كبره و لاحظت ان كان في اكتر من تاجر بيملأ التروللي اللي معاه بيهم

تجاره مزدهره جداا اليومين دول للاسف

[chicobon]

سبحان الله انا بصراحة بفكر اجيب لمبة جاز من بريموس الي في العتبه بس مش عارف هل هلاقي جاز ولا ممكن بي السبيرتو حاجة تقرف رجعو البلد للسنين ورا

[Egyzizo]

طيب تصدق انى بافكر جدياً فعلاً فى لمبات الجاز دى ..
اضائتها رومانسية ومش مكلفة ومتعلقة على الحيطة فى مكان ثابت ، و5 لتر جاز يكفوك الصيف كله، والأهم من ده كله هيبقى تجديد .. تخيل شقتك كلها فى عز العتمة منورة بالمشاعل .. تفتكر على طول جو العصور الوسطى والدهاليز وقعقعة السيوف .. حاجة واووووو

حاجة تقرف رجعو البلد للسنين ورا

على فكرة ، مهم جداً من أجل الصحة النفسية وتفادى الضغط والسكر ، ان الواحد لما يقع فى مشكلة لا يد له فيها ، انه يحاول يبرمج نفسه انه يستمتع بالمشكلة ذات نفسيها اذا امكن ..

فكر فى جو العصور الوسطى وانت تدعي لى.