مرتبات شركات القطاع الخاص

[mr_safwt]

السلام عليكم ورحمة الله وبركاته

اية رايكم يا جماعة فى مرتبات القطاع الخاص عشان جبت اخرى منه وشايف ان مرتبات الحكومة بقت افضل بكتير
مثال لشركة اللى انا شغال فيها شركة بتكسب ملايين الجنيهات شهريا مش سنويا ومفيش زيادة فى المرتبات ومفيش ارباح وان كان عاجب والشغل طحن ليل ونهار
والدولار يغلى هم بيغلوا ما حدش بيخسر حاجة والسبب كلة بسبب مكتب العمل اللى ليس ليه اى ثلاثين لزمة ولا يقدر يعمل حاجة

[beshomilan]

كلامك صح
دلوقتى الحكومه بديه مرتب 800 جنيه وشويه وتعلى تكون 900 ومكافأه شهر كل 3 شهور يعنى متوسط دخلك 1100 جنيه وتيجى 9 وتمشى 2 الضهر وتجيب الجورنال وتقرا فيه وقروض من البنوك بضمان الوظيفة وحاجه فل وولا حد يقدر يقولك امشى
انما قطاع خاص حاجه اخر قرف..ربنا يرحمنا منه يارب ومن استغلاله

[micromoud]

مهو عشان احنا مش طايلين قطار الميرى ... القطاع الخاص بيتحكم فى الموظف وبيعصره عصر وبياخد منه انتاج وفى المقابل بيديله رقم هزيل .... عشان كده ما تستعجبش لما تلاقى الدول العربيه بتيجى مصر وتاخد عماله عشان عارفين انها رخيصه ومنتجه وكذلك شركات الكول سنتر اللى بقت بتتبنى هنا فى مصر على حس العماله الرخيصه جيدة الاداء ...

[moody_687]

مين قال ان مرتبات الحكومة كلها بتبدأ من 800 ج
انا شغال ف هيئة حكومية ومرتبي اقل من 800 ج وهيئتي هيئة اقتصادية وبدخل فلوس للدولة بالرز وبالرغم من ذلك مرتباتها ضعيفة
احسن مرتبات الحكومة هى مصلحة الضرائب والجمارك والميناء والبنوك والكهرباء واللي شغالين ف الوزارة نفسها وبينما بقية المصالح مرتبات المعينين بعقود مؤقتة فيها بتكون مرتباتهم متدنية اقل من 800 ج

[walidzakzok]

فعلا القطاع الخاص اخر استهبال

[shaddadfalcon1]

كل القطاع الخاص كده طالما العمال راضيين ومفيش ذيادات والترقيات علي هواهم

[walidzakzok]

الناس دي مش فاهمة ان المرتبات مع ثباتها قلت قيمتها بسبب التضخم بس تقول ايه

[beshomilan]

مين قال ان مرتبات الحكومة كلها بتبدأ من 800 ج
انا شغال ف هيئة حكومية ومرتبي اقل من 800 ج وهيئتي هيئة اقتصادية وبدخل فلوس للدولة بالرز وبالرغم من ذلك مرتباتها ضعيفة
احسن مرتبات الحكومة هى مصلحة الضرائب والجمارك والميناء والبنوك والكهرباء واللي شغالين ف الوزارة نفسها وبينما بقية المصالح مرتبات المعينين بعقود مؤقتة فيها بتكون مرتباتهم متدنية اقل من 800 ج

انا اعرف حد شغال فى الكهرباء من سنه تقريبا وبدايه 700 جنيه
وحد تانى فى الماليه من كذا سنه ب 700 برضه
وكل ده مؤقت
بس انت تقصد ان اقل من 700 ده الاساسى؟؟بدون الحوافز والكلام ده ولا ايه؟

[moody_687]

ياباشا المرتب بالحوافز وكله اقل من 700 ج
المرتب الاساسي ف جميع المصالح الحكومية لاول تعيين 216 ج
طبعا اللي بيخلي المرتب ينط بحسب كل مصلحة حكومية هو الحوافز وبدل المخاطر وخلافه وطبعا بيدوا الضرائب والجمارك والكهرباء وكل ماذكرته مسبقا اعلى الحوافز قد تصل الى 500 % وبتلاقي المرتب بعد التثبيت يعدي الالفين ج

[mr_safwt]

يعنى من كلامكم مفيش امل ولا حكومة ولا قطاع خاص

[ahmed1981]

المسألة عرض وطلب
الوظائف المتاحة أقل بكثير من طالبي العمل

لذلك لابد الواحد يطور نفسه عشان يبقى متميز في حاجة يقدر بيها يحصل على وظيفة متميزة براتب متميز

القطاع الخاص المصري مش هيزودك إلا في حالات :ــ
ـــ*ـ جالك عرض من شركة منافسة براتب أعلى وبالتالي إنت تساومهم إنه يعطيك نفس المرتب أو تمشي تروح للمنافس.
ـــ*ـ طلب منك تعمل حاجة إضافية في شغلك غير المتفق عليها الطبيعية وبالتالي إنت بتساومه على زيادة المرتب.
ـــ*ـ طلبت زيادة المرتب وهو حس إنك تستحقها ومش عايز يخسرك.
ـــ*ـ آخر حاجة وأسوأ حاجة إنك طلبت زيادة وفي حال عدم الزيادة تقولهم إنك هتمشي وتسيبهم
وفي الحالة دي لازم تبقى قد كلمتك
يعني لو عاندوا معاك ومزودوكش يبقى تمشي ومتكسرش كلمتك وإلا مش هيبقى لكلامك قيمة معاهم تاني
وحتى لو زودوك في الغالب أو أحياناً عند بعض الشركات هيشيلو الحركة في قلبهم ولو جتلهم فرصة يرخموا عليك أو يمشوك مش هيتأخروا
-
-
-

[ahmedkhairy]

فعلا القطاع الخاص مفترى جدا

[mado83]

وبرضو فى فالقطاع الخاص شركات بتدى ارقام خزعبليه ب15 وال30 الف

[dede_dodo88]

هي الفكرة بس قطاع خاص من أنهي مستوى ؟!
يعني شركة صغيرة لسة بتبتدي وللا منشأة فردية و للا شركة كبيرة بس محلية و للا شركة كبيرة متعددة الجنسيات ؟!!
لأن المفروض في العادي يعني أنه القطاع الخاص هو البوب في المرتبات بس طبعاً على حسب مجال الشركة و حجمها..

[walidzakzok]

القطاع الخاص محتاجك يحترم نفسه معاك مش محتاجك يعاملك معاملة الكلاب