جاري خبطلي العربية

[حماده المصري]

معلش متزعلش

والله العماره الي فيها ما بيعديش شهر غير لما العربيه تتخبط وهي في الجراح من كتر الزحمه وحاجات تزعل

اهمال غريب ومفيش اعتذار ومره اتكسر الاكصدام والفانوس الخلفي وهي راكنه في الشارع من سواق تاكسي وطلع يجري

من فتره كنت في شارع متفرع من الهرم ولقيت لانوس راكنه في الشارع وشويه متشردين طالعين من المدرسه وبيشخبطوا على عربيه راكنه ومقضينها روحت نازل من العربيه ومتجه عليهم انت بتعمل ايه يلا انت وهو بزهيق كانها عربيتي كله طلع يجري وللاسف بهدلوا عربيه الواد

[mido01050]

شكرا ليكم بس نفسي الناس اخلاقها تتعدل
في واحد انهارده بيقولي حاجة عجيبة. بيقولي اغلي مية و اصبها على الاكصدام و ازقه من جوه .. حد جرب الموضوع ده

[A.Saad]

ممكن ترده بايدك من جوة الاكصدام

[SAMEH_FOUAD]

معلش الحمد لله اللى جت على قد كدة

امال تعمل اية بقى لو انت جوة عربيتك وجارك بيرجع بعربيتة وحك بردة العربية زى كدة , ولون العربية عندة مميز ( اخضر ) محدش لونة زية فى الشارع كلة , وانا اصلا كنت قاعد جوة العربية , لقيتها اتهزيت من الخبطة
ونزلت اقولة مش تخلى بالك , يقولى انا مخبطكش , ويحلف بالله , روحت متنرفز علية وقولتلة واقسم بالله خبطنى ومكان خبطتك اهوة فى عربيتك وعربيتى , وانا ماقولتكلش اعملهالى انا بس اللى نرفزنى منك انك خبطت ومافيش اى اعتذار قولتة , وخلاص كان فاضلى تكة واضربة اصلا عشان عمال يحلف بس
لقيتة بيقولى معلش مخدش بالى روحت قايلة حصل خير

وانا معايا ال polish روحت مطلعة والحمد لله مافيش أثر

ناس تحرق الدم الصراحة

[Macaronaa]

السلام عليكم
قمت الصبح لقيت الاكصدام الامامي بتاع الفيرنا مخبوط و داخل لجوة و عليه لون العربية اللي خبطاه لون عربية جاري ... بكلمه يقولي انا و الله مخرجت بالعربية امبارح رحت وريته الخبطة و لون عربته ورحت على عربته وريته مكان الخبطة عنده في الباب اللي ورا و برده بينكر بس اتقفل جدا لما شاف اللون عندي لان عربيته لونها مميز...المهم قلتله انا مش بكلمك عشان عايز منك حاجة بس من الزوق انك كنت كلمتني عرفتني و اتأسفت حتى و انت عارف اني عمري مهطلب منك حاجة .... اتقفل خالص ووطى وشه في الارض و سبته و مشيت

الادب والذوق اختفوا من على وجه الارض
لسه حاصل معانا موقف برده وجيراننا فى العماره اللى قدامنا والست اللى خبطتنا اول ما خبطتلنا العربيه قبل ما بابا ينزلها قالت للبواب متكفله بأى فلوس وهربت زى الفار بحجه انها تلحق شغلها المهم بقى انهم لما زهقوا من زننا على فلوسنا بقى راحوا قالبين على الوش العربجى ومش اى عربجى ده عربجى قذر

ده لينك الموضوع بتاعى هنا http://www.nilemotors.net/Nile/422004-a.html

القذاره وقله الادب بقت طبع خلاص المؤدبين دول بقوا منقرضين
وبالمناسبه الست دى برده كانت عايزه تهرب ومفكرتش تشوف دى عربيه مين لولا البواب قفشها وقالها اقفى هنا تكسرى للناس عربياتها وتهربى ؟

[Medicalist]

احنا يا جماعه محتاجين القانون وبقوة
احنا شعب جبان
لو تلاحظوا فى اغلب العربيات الاوروبيه بيبقى فيها كاميرات بتصور الى بيحصل ليك ولغيرك على الطريق
المفروض العربيات يبقى فيها كده ويتم تصوير كل شىء بيحصل حوالين العربيه
والى غلط فى حاجه يصلحها بالقانون من غير الروتينيات الى بتكره اى واحد انه يشتكى او يعمل بلاغ
زى دول الخليج كده
ساعتها والله هتلاقى كل واحد بيعمل حساب عربيه التانى

[Macaronaa]

احنا يا جماعه محتاجين القانون وبقوة
احنا شعب جبان
لو تلاحظوا فى اغلب العربيات الاوروبيه بيبقى فيها كاميرات بتصور الى بيحصل ليك ولغيرك على الطريق
المفروض العربيات يبقى فيها كده ويتم تصوير كل شىء بيحصل حوالين العربيه
والى غلط فى حاجه يصلحها بالقانون من غير الروتينيات الى بتكره اى واحد انه يشتكى او يعمل بلاغ
زى دول الخليج كده
ساعتها والله هتلاقى كل واحد بيعمل حساب عربيه التانى

بضم صوتى لصوتك وبشده
عشان كل يوم شوف كام حادثه بتحصل وفى الاخر محدش بياخد حقه وفيه ناس بتدفع بال20 الف جنيه اصلاحات والطرف التانى يعمل عبيط وخصوصا انه عارف انك مش هتوصل لحاجه فى الاخر والمحضر هيتقفل ومش هيتغرم ولا مليم اهو اللى بيعمل عبيط ده يستحق الحبس عشان يبقى يركز بقى فى سواقته او مايسوقش من اصله

تحياتى

[SAMEH_FOUAD]

طيب تعمل اية بقى لو حصل الاتى :

انا قاعد فى العربية مستنى واحد ينزل وواحد بيرجع بظهرة بعربية 127 وهو بيرجع لقيت عربيتى بتتهز , فببص فى المرايا لقيت الداير الفيبر الاسود اللى بيبقى على رفارف ال127 بيحك فى العربية عندى , وهو راجع ولا هو هنا ومكمل

نزلتلة , فبقولة اية ياعم انت مش شايف ولا اية

قالى خير

قولتلة انت حكيت العربية عندى

قالى والله ماجيت جنب حاجة

قولتلة نعم , طيب دية اية والبوية بتاعتى اهية معلمة عندك على زفت الرفرف

قالى معرفش وانا معملتش حاجة

روحت قايلة بقولك , اية اتكل على الله عشان مش ناقصة نرفزة على الصبح

روحت فاتح الشنطة ومطلع الكومبوند وشيلت الاثار الحمد لله

يعنى الواحد قاعد كمان فى العربية وبيستعموة , فما بالك بقى باللى بيخبط العربية ومحدش شايفة

[friendship7897]

دا مش انا لوحدي بأة
أنا تقريباً يومياً آلاقي عربيتي واخدة لون عربية جاري
وجاري ظابط ( مش ظابط الخبطة ) لأ هو ضابط مقدم
وأقول يا بيت هتتخنقي مع الحكومة ؟!
أسكتي وأعملي عبيطة وخلاص
وفي مرة واقفة في البلكونة بنشر وكالمعتاد وهو بيركن راح مسلم على العربية
نزل بص على عربيته ورفع عنيه فوق لاقني ولا أي إندهاش
بس بلغت مراته بإستهزاء :
وقولت لها هو جوزك بيشرب حاجة !!
كل يوم يخبط العربية ومش بيحس أنه خبطها ... لأنه مش بيعتذر
راحت قالت لي : هلفت نظره - ههههه
وواضح أنها لسة ما لفتت نظره

[Macaronaa]

دا مش انا لوحدي بأة
أنا تقريباً يومياً آلاقي عربيتي واخدة لون عربية جاري
وجاري ظابط ( مش ظابط الخبطة ) لأ هو ضابط مقدم
وأقول يا بيت هتتخنقي مع الحكومة ؟!
أسكتي وأعملي عبيطة وخلاص
وفي مرة واقفة في البلكونة بنشر وكالمعتاد وهو بيركن راح مسلم على العربية
نزل بص على عربيته ورفع عنيه فوق لاقني ولا أي إندهاش
بس بلغت مراته بإستهزاء :
وقولت لها هو جوزك بيشرب حاجة !!
كل يوم يخبط العربية ومش بيحس أنه خبطها ... لأنه مش بيعتذر
راحت قالت لي : هلفت نظره - ههههه
وواضح أنها لسة ما لفتت نظره

لا ده بقى العادى واهو ظباط الشرطه دول بالذات الفساد كله (مش كلهم بس اغلبهم)
انا نفسى افهم ازاى يدافعلى عن حقى وهو فى حياته بلطجى وعربجى وكل قله الادب اللى فى الدنيا
اسكتى اسكتى ده انا محروق دمى من ظابط (حكومه) برده
فى حادثه عربيه (عربيتنا يعنى ) وبلطج ومادفعش ولا مليم اصل المحروسه اخته هى اللى خبطتنا ربنا ينتقم منه
ربنا يعوض علينا ويخلصنا من الكائنات دى

[friendship7897]

لا ده بقى العادى واهو ظباط الشرطه دول بالذات الفساد كله (مش كلهم بس اغلبهم)
انا نفسى افهم ازاى يدافعلى عن حقى وهو فى حياته بلطجى

والله عندك حق
وواضح أنها عدوى
من كتر من أحتكوا بالبلطجية أصبحوا بلطجية هما كمان
وربنا يستر لأن أغلبية الشعب أصبح بلطجي ( أو ) إرهابي
بس بجد ثقافاتنا لازم تتغير
أحنا بقالنا سنين عايشين في وسط فاسدين ، وهما اللي بينجحوا ويتطوروا
وأصبح اللي صوته عالي واللي ليه ضهر من هؤلاء الفاسدين هو اللي بياخد حقه
علشان كدة لازم نتغير ، وإلا ( بالبلدي كدة ) البلد دي لا يقوم لها قومه
((إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ))

[Macaronaa]

والله عندك حق
وواضح أنها عدوى
من كتر من أحتكوا بالبلطجية أصبحوا بلطجية هما كمان
وربنا يستر لأن أغلبية الشعب أصبح بلطجي ( أو ) إرهابي
بس بجد ثقافاتنا لازم تتغير
أحنا بقالنا سنين عايشين في وسط فاسدين ، وهما اللي بينجحوا ويتطوروا
وأصبح اللي صوته عالي واللي ليه ضهر من هؤلاء الفاسدين هو اللي بياخد حقه
علشان كدة لازم نتغير ، وإلا ( بالبلدي كدة ) البلد دي لا يقوم لها قومه
((إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ))

ايوه والله ده اللى بقوله دايما انهم من كتر ما احتكوا بالبلطجيه بقوا بلطجيه
وبعدين الناس عموما بقت بجحه يعنى مايغظنيش قد اللى غلطان وبجح
وكلمه اسف دى الناس بتتعامل معاها كانها عيب تتقال
ياسيدى حتى خدنى على قد عقلى وقولى اسف وريحنى
بس محدش بقى بيقولها
هو يغلط وينزل يعلى صوته وخصوصا لو لقى اللى قدامه محترم وشكله مش بتاع مشاكل ويعمل هلوله
وفالاخر يقولك مش دافع

وياااااارب نتغير وتبقى البلد بلد قانون وخصوصا فى مشاكل العربيات دى اللى بتحصل فى شوارع مصر فى كل فيمتو ثانيه و بتمشى بالبلطجه وقله الادب والمحقوق مياخدش حقه

[drcobra]

ههههههههههههههههههههه
فكرتونى بواحد ضرب واحد تانى بالشلوت قام اللى انضرب بص وراه وقالوا لية بتضربنى؟
قاله والله ما ضربتك
هههههههههههههههههههههههههههههههه

كان المفروض يطلعلوا البوية بتاعة جزمتة من على البنطلون
او كان طلعلوا حاجة تانية خالص ههههه

[amr100]

على حكاية الادب واحد صاحبي وهو طالع بالعربية خبط او خدش عربية في جراج او شارع مش فاكر بالضبط وهو ميعرفش صاحب العربية راح سايب على العربية رقم الموبايل بتاعه وقال له انه هو اللي خبط العربية ومستعد لاي مبلغ خاص بتصليح العربية والله راجل راح اتصل بيه علشان يشكره بس على اهتمامه وعدم اللامبالاة

[Macaronaa]

على حكاية الادب واحد صاحبي وهو طالع بالعربية خبط او خدش عربية في جراج او شارع مش فاكر بالضبط وهو ميعرفش صاحب العربية راح سايب على العربية رقم الموبايل بتاعه وقال له انه هو اللي خبط العربية ومستعد لاي مبلغ خاص بتصليح العربية والله راجل راح اتصل بيه علشان يشكره بس على اهتمامه وعدم اللامبالاة

الحمد لله انه لسه فيه ناس جميله كده
أصل دول انقرضوا فى الزمن الاسود ده