تصرفات ايجابيه: اللى عايز يشتغل بيتصرف ... شوف و احكم

[mohamed_selim]

النهارده الصبح على 10 كده ماشى فى مكرم عبيد رايح الشغل شفت واحد لابس اصفر (شبه اليونيفورم بتاع الكافيهات) و بيزق عربيه شبه بتاعى الجيلاتى بتاع زمان (جيلاتى مش ايس كريم :) ) و لونها اصفر و مكتوب عليها جبنه ... استغربت من المنظر قلت اقف اساله ايه ده .... لقيت معاه واحد تانى لابس يونيفورم برضه بس اسود و سالتهم قالولى بنعمل سندوتشات جبنه و حلاوه و لانشون و كده يعنى ... و عاملين منيو تختار اللى انت عايزه و الاسعار ... 2 شباب زى الفل ... بصراحه عجبتنى الفكره قلت انفعهم ععلى الرغم انى فطرت و معايا غدايا ... طلبت كزا ساندويتش و اتفرجت بيعملو ايه .. الاتنين بيشتغلو ... لبسو جوانتيات بلاستيك (مش اللاتكس بتاعة الدكاتره لأ التانيه اللى بتترمى اول ما تستخدم) ... العيش طلع من جوه العربيه عيش فينو عادى بس متقطع و مفتوح ... حطو الجبنه فى العيش و كل ساندويتش اتحط فى ورقه عاملينها (زى ما تكون ساندويتش من مؤمن ولا كوك دور) و ادانى الساندويتشات و بيعتذر انهم اتاخروا .... قلتله الله يباركلك و يا ريت الشباب الفاضيه تعمل زيكم ... العربيه معموله بامكانيات بسيطه جدا بس عمليه لغرض الساندويتشات ... نضيفه جدا و مشجعه انك متخفش تاكل ...

اللى عايز يشتغل بيتصرف و ربنا بيكرمه مبيستناش حد يشغله او يخلقله فرصه هو بيخلق فرصته لنفسه

[mohammedabdallh]

موجودين فى اماكن كتير وبالذات الى فيها شغل والمناطق الشعبيه اكتر
شباب زى الفل

[speed_magnum]

شباب يشرف

[mohamed_selim]

و الله يا شباب حاجه تفتح النفس على الصبح :)
ربنا يباركلهم و يوفقهم

[محمود السيد]

اللهم وفقنا ووفقهم لما تحب وترضا

[Amr_tika88]

هما كدا علشان دول شباب عندو امل

[friendship7897]

ربنا يوفقهم
مرة دكتور الإقتصاد في جامعة عين شمس ( د/ عبد المنعم راضي ) كان في لقاء تليفزيوني - وكانوا بيتكلموا عن البطالة - فقال إن الشباب خريجي الجامعات لو عايزة تتصرف هتتصرف - بس هما كساله ، فالمذيع قال له يعني هيعملوا أيه ! ، الدكتور عبد المنعم راضي قال يشتغلوا اي حاجة لو حتى يبيع بطيخ ، فرد عليه المذيع : يعني أنت ترضى إن إبنك خريج الجامعة يبيع بطيخ ؟
رد عليه الدكتور رد عجبني أوي وقال له :
طبعاً أوافق بس لازم يكون أكبر تاجر بطيخ في الشرق الأوسط بعد كام شهر - وهو دا الفرق اللي لازم يظهر بين التاجر الجاهل والتاجر المتعلم .
ربنا يوفق شبابنا للخير
وشكراً على نقل الصورة المشرفة

[tarekmomo]

ربنا يقويهم ويكرمهم

[youssef_u]

ربنا يكرمهم ،، شباب فاهم و واعي

[S O P H O S]

ما شاء الله
ربنا يوفقهم للخير

[nona_yaris]

مؤمن صاحب مطاعم مؤمن الشهيرة بدأ بفكرة بسيطة كدة وعربية وبعدين محل صغير
ودلوقت ماشاء الله من اكبر مطاعم الشرق الاوسط
اللي بيتعب ويخلص في عمله ربنا بيوفقه ويرزقه
واللي قاعد في بيتهم بيلعن حظه اكيد حظه بيلعنه هو كمان

[AlGazar2]

شباب مجتهد فعلا و يفرح ربنا يباركلهم ان شاء الله

[besso]

حقيقى شباب يفرح
فعلا اللى عنده هدف بيعرف يوصله ازاى حتى لو هايبيع مناديل فى الاشارات
معظم رجال الاعمال والناجحين فى العالم كانو فقراء ومش لاقيين شغل كمان بس علشان كان عندهم هدف عرفوا يوصلوا للى هما فيه دلوقتى

انا ليا واحد قريبى شغال فى الموبايلات ابتدى زمان بكام موبايل على قفص من بتاع الخضار ووقف فى شارع عبد العزيز بيهم وطفح الذل علشان يعرف يعيش وكان كل يوم فى القسم النهارده بسم الله ماشاء الله عليه بقى عنده محل واتنين وفى نفس الشارع كمان

[BESO516]

ربنا يوفقهم
مرة دكتور الإقتصاد في جامعة عين شمس ( د/ عبد المنعم راضي ) كان في لقاء تليفزيوني - وكانوا بيتكلموا عن البطالة - فقال إن الشباب خريجي الجامعات لو عايزة تتصرف هتتصرف - بس هما كساله ، فالمذيع قال له يعني هيعملوا أيه ! ، الدكتور عبد المنعم راضي قال يشتغلوا اي حاجة لو حتى يبيع بطيخ ، فرد عليه المذيع : يعني أنت ترضى إن إبنك خريج الجامعة يبيع بطيخ ؟
رد عليه الدكتور رد عجبني أوي وقال له :
طبعاً أوافق بس لازم يكون أكبر تاجر بطيخ في الشرق الأوسط بعد كام شهر - وهو دا الفرق اللي لازم يظهر بين التاجر الجاهل والتاجر المتعلم .
ربنا يوفق شبابنا للخير
وشكراً على نقل الصورة المشرفة

درسلى 3سنين الراجل ده
دماغه حلوه اوى بس السن له احكامه بقى

[friendship7897]

درسلى 3سنين الراجل ده
دماغه حلوه اوى بس السن له احكامه بقى

وأنا كمان
كان بيعرض المحاضرات بأسلوب فكاهي وكان محببنا في الإقتصاد
الله يرحمه لو كان مات
ويتولاه لو كان حي