النقديم علي عمرة رمضان امتي؟

[shaddadfalcon1]

السلام عليكم ورحمة الله وبركاته

بقالي كذا سنه عايز اطلع عمرة رمضان وكل سنة ااجل وعايز ان شاء الله اطلع السنه دي

ياتري التقديم بيبقي امتي والاسعار اخبارها ايه ؟ وايه المطلوب ؟ وايه احسن الشركات اللي في الأسكندريه اللي بتطلعك عمره بخدمات كويسه؟

انا ياهسافر لوحدي او معايا زوجتي

[shaddadfalcon1]

ايه ياجدعان انتو فين

[korkor]

بص التقديم ابتدى من اليومين دول والاسعار فى من اول 4000 لغايه 15000 واكتر كمان حسب المده والاقامه بالنسبه شركات اسكندريه دى ماقدرش افيدك فيها

[mesaharaty]

ممكن حضرتك تقدم من دلوقتى
والاسعار بتبقى متفاوتة حسب الفندق ودرجته وبرضه حسب الطيران .
علما بأن أغلى عمرة هى اللى بتبقى فى رمضان لأن ده ذروة الموسم .
ربنا يتقبل ولو عاوز أى خدمة أو إستفسار لا تتردد

[shaddadfalcon1]

شكرا ليكم

طيب ايه احسن الفنادق هناك وهل احجز في فندق قريب غالي ولا بعيد وارخص ؟

وياتري لو رايح معايا زوجتي لمدة اسبوع واحد او 10 يام في اول رمضان يبقي بكام؟

دي اول مره ليا فمش عايز اتبهدل قوي يعني عايز استمتع بالعمره مش اقضيها زحمه فهل الأحسن في اول رمضان ولا نصه ولا اخره ولا ايه؟

وياريت الناس اللي من الأسكندريه يفيدونا في احسن الشركات

[mesaharaty]

جودة الفندق حتلاقيها منعكسة على سعر الرحلة
ولا يمكنك أن تضمن ذلك
والفنادق الحلوة كتير جدا فأنت بس اختار الرحلة المناسبة لك ماديا وبإذن الله تكون فنادق قريبة .
أنا عن نفسى ما بادقش كتير على الفنادق ... ليه ؟
أولا غالبا بيتم تغيير الفندق لفندق آخر بس بيكون فى نفس الدرجة وإن ماتغيرش برضه حضرتك حتنزل فيه وحتة بعيد وقريب دى حتتلاشى من أول يوم لأنك بتدخل فى مود تانى خالص .
ثانيا أنا رايح استمتع بالحرمين والفندق بالنسبة لى ليس إلا للراحة بعض الوقت وللحمام أما معظم الوقت إما الحرم أو السوق وكده كده لازم تمشى (لاحظ إن المشى فى هذه البقاع متعة)
طبعا حتلاقى الأسعار فى رمضان مقسمة 3 شرائح على 3 عشرات يعنى العشر الأوائل أرخص من اللى فى الوسط أرخص من العشر الأواخر اللى هى بتكون أغلى حاجة فى الموسم كله .
ومن حيث الزحمة فالزحمة بتكون منذ بداية الموسم وتصل إلى ذروتها فى رمضان فاعمل حسابك على كده من دلوقتى .

[ابو لؤى]

الافضل ان حضرتك تستنا شويه لان كل الشركات بتحط سعر متوقع للطيران انما الاسعار الفعليه لسه مانزلتش وبالتالى بيزودو بعد كده الاسعار يقولك الطيران رفع لو حضرتك حابب تعرف اى شركه فى محافظه كلمنى وانا هدل حضرتك الافضل فيهم لانى شغال فى الطيران الخاص وعمره مقبوله مقدما

[shaddadfalcon1]

الافضل ان حضرتك تستنا شويه لان كل الشركات بتحط سعر متوقع للطيران انما الاسعار الفعليه لسه مانزلتش وبالتالى بيزودو بعد كده الاسعار يقولك الطيران رفع لو حضرتك حابب تعرف اى شركه فى محافظه كلمنى وانا هدل حضرتك الافضل فيهم لانى شغال فى الطيران الخاص وعمره مقبوله مقدما

جزاك الله كل خير استاذ علي

لو حضرتك تبعت هنا او علي الخاص ايه احسن الشركات والمفروض استني قد ايه؟

ولو ده شغل حضرتك فحقك محفوظ طبعا

[MTAK]

عمره رمضان من العمرات اللى بتبقى مودحمه جدا و يقال انها مثل الحج فى زحمتها و خصوصا العشر الاواخر

طول عمرى كنت باحلم انى اعمل عمره مع نفسى بدون شركة سياحه حتى اختار وقت مش موسم زى ما بيقولوا

لانى ارى الحرم فى بعض الاوقات فاضى بشده مع اوقات الجو فيها بيكون تحفه

و لكنى للأسف لم استطيع ان انفذ هذا الحلم و لكن الحمد لله

رزقنى الله بعمره و كانت شهر 5 و كانت بفضل الله ممتعه جدا

الحرم فاضى بالليل و الظهر فاضى جدا (بس مقدرتش اروح الظهر)

الطواف كان حول الكعبه و يدى تلامسها طوال الوقت ( الا منطقه الحجر الاسود طبعا )

الحرم النبوى مش عاوز اقولك

كنت بلاقى طلبه سعوديين فارشين بالليل فى الروضه الشريفه و بيذاكروا ( من كتر ما كانت فاضيه و ممكن تدخل و تقعد فيها براحتك )

و كان معى الزوجه و الاولاد 8 سنوات و 4 سنوات

فخلى بالك من موضوع رمضان و انك مش عاوز زحمه :)

[mohamed_selim]

لو اول مره يبقى رتبها للسنه الجايه فى شهر 1 او 2 ... الجو معقول فهتقدر تبقى فى الحرم اغلب الوقت و مش موسم قوى
رمضان زحمه جدا و مش هتستمتع ... انا اول مره بالنسبالى كانت فى الحج و كنت طالع قرعه و حظى جه انى وصلت مكه قبل الحج باسبوعين ... اول اسبوع زحمه بس ماشى تانى اسبوع مشوفتش الكعبه من الزحام !

عملت عمره بعدها و طلعت فى شهر 3 .... تحفه

[shaddadfalcon1]

ناس كتيير قالولي لو اول مره وعايز تستمع متروحش في اي مواسم عشان تاخد راحتك

وخصوصا اني نفسي اخد زوجتي معايا عشان تبقي ذكري حوله كده وربنا يصلح الحال

[أحمد عبدالله]

السلام عليكم :

بالنسبة للشركات

انا ارشح لك ثلاثة

1-ترى جولى "لها فرع فى الاسكندرية ونزلت عروض رمضان-انا لماعملت عمرة لقيتها هناك وكانت عاملة شغل كويس
رابطها بتاع العروض برامج العمرة
(اختار الرحلات من مطار الاسكندرية )


2-ايجبشان نايل"دى انا جربته ممتازة بس ممكن تسالهم بيطلعوا من مطار اسكندريه ولا لا الرابط

https://www.facebook.com/ENT.NileMisr

3- الربيع: ناس اعرفهم جربوها كتير وبيشكروا فيها وده الرابط

https://www.facebook.com/RabieTours

اما بالنسبة للفنادق
مكة:على الساحة مباشرة 3 فنادق وكل فندق مقسم لاجزاء مطلة على الحرم واجزاء خلفية

1-ابراج زمزم:ده اللى فيه برج الساعة ومكون من سبع ابراج زى فيرمونت- سويس اوتيل(وده مدخله الرئيسى خلفى بس ممكن تخش من المدخل على الساحة وتدخل لجوه) -جراند زمزم

2-الصفوة:المطل اسمه اوركيد والخلفى اسمه رويال دار الايمان

3-ابراج مكة:وده مقسم لارقام اماميه وخلفيه

انا جربت ابراج مكة والصفوة كويسين

وفيه بعد كده فنادق وراهم زى الشهداء ايلاف الملتقى 4 و5 نجوم (وفنادق اخرى كتير جدا بس خليك علشان لا تتعب فى لبرامج 5 او 4 نجوم بعد كده شعبى وفيه 4 نجوم بس بعيد)

فى المدينة

- كل الفنادق كويسة وتصميمها غير مكة فى المنطقة الشمالية ودى أميز وفى المنطقة الشرقية ابعد شوية انا دايما كنت بنزل فى الشمالية
-الصف الاول:الاوبروى-اجنحة طيبة -موفنبيك-الايمان كونتبننتال
-الصف الثانى:الحرم الحارثية -هيلتون
-وفنادق كتير طبعا بس المدينة كل فنادقها كويسة وابعدها قريب غير مكة اهم حاجة فندق مكة وممكن تشوف كل الفنادق المذكورة على موقع ترى جولى

عمرة رمضان
اكيد زحمة تصاعدية من الاول للاخر خاصة مع التجديدات الموجودة حاليا مضيقة المكان بس عمرة رمضان كحجة مع النبى كما فى الحديث فلا تتركها الجو بيكون ممتع

موعد فاضى
شهر 5:امتحانات هنا وهناك

عمرة موفقة ان شاء الله ولو فى اى استفسار لاتتردد