اللى مالكش فيه .... احشر نفسك فيه ....

[hosamsief]

مش كده ... ولا ايه .....


مشكلتنا الازلية ... فعلا هى الفهلوة ... يعنى لو حاجه عطلت عندك فى البيت ... دايما بتقول لنفسك .. يعنى ايه ... هى كيميا ... اقرب فكرة تنط فى دماغك انك تروح تجيب المفك ... و العده و تفضل تنخور فى ام الجهاز لغايه متخليه 600 حته و غالبا متعرفش اصلا ترجعة تانى و بيقى مصيرة الزباله ...زى اسماعيل ياسين لما طلع معاش الطيارة و خلاها خرده و بعدين قام رايح كاتب رقم الطيارة على واحدة سليمه ...دماغه شغاله برضه ..


طيب افرض بقى معندكش طيارة تانيه زى اسماعيل ياسين ... بلاش ده .... افرض بقى ان اللى بايظ هو كوفريه الكهرباء اللى قدام باب الشقه ....تعمل ايه بقى . نشوف بقى عم سعيد عمل ايه



عم سعيد نسيبى ... راجل سكرة ... بيفهم فى كل حاجه ... خبرة ما شاء الله .. عربيات تلاقى .. تلاجات بوتاجازات غسالات .. حوارات ... بس مهارا ته المرادى مختلفه شويه ... كنت معزوم عنده من كام يوم ... و احنا قاعدين فى امان الله ... النور قطع .. تمام .. دى العادى بتاعنا .. لكن انه يقطع من الدور بتاعنا بس .. اهو ده اللى مش ممكن ابدا ......


العطل الفنى ده استفز كبرياء و شموخ المهارة العبقريه لعم سعيد .. راح قايم و فتح باب الشقه وهو حافى ... و نور كشاف الموبايل .. و بص بأحتقار كده للكوفرية بتاع الكهرباء .... و بصلى بكل عنطزة و قالى هاتلى عصاية المقشه ده .... طبعا اول ما قالى كده قمت موطى على ايدة علشان ابوسها .. و قولتلوا بلاش و النبى ده كهربا ... قام رادد بنفس النبرة الواثقه كانه عم اديسون .. وسع يا عم ... قام ساحب عصايه المقشه .... هى قصه يعنى ؟؟.... انا عارف السيستم بتاعه



و قام واخد الشبب و طالع على الكرسى و قالى امسكلى بقى الكشاف ده ... ايوة .....نورلى هنا شويه ...


انا طبعا عارف اللى هيحصل .. قعد ينخس فى السلك كده كانه بليعب بلياردو .... بس كان فى ريحه شياط ..اتارى الكابل اللى طالع ساح فى الحيط و انقطع جوة الماسورة .... مع الدوشه ده بقى خرج واحدة جارة برضه عندة نفس المشكله و قعد يسخن فى عم سعيد بقى علشان يخلع من اجرة اى حد كهربائى نجيبه .....و عمال يقوله انت بس زق الكابل ده شويه ... هليمس و هينور ... عمك سعيد بقى مكدبش خبر ... و شويه شويه ياخد ثقه فى نفسه لغاية ما طلع على الكرسى ودخل عصايه المقشه فى ماسورة الكهربا و كانه بيسلك ماسورة مجارى و عمال يتشنج و كل ما العصايا تنحشر اكتر كل ما هو يتشنج اكتر ....


فى الدور التانى بقى ساكن واحد عندة قهوة متشرد و مراته بتنزل تقعد فى القهوة ده بليل تلم المارك ... متشرده هى كمان صوتها لوحدة مشكله ... عمله زى الستات بتوع المدبح و دايما باب شقتهم مفتوح ... و صوتها يتسمع من على اول الشارع ..


طبعا انا اديت التليفون ابو كشاف للجار " الاور " ده و قولتله اطلع انت بقى جنب عم سعيد نورله شويه و دخلت و قعدت اراقب الانفجار اللى كنت متوقعه ...



و فى احدى صولات و جولات عم سعيد مع ماسورة الكهربا ... و عمك سعيد شغال الله ينور ... بيسلك ماسورة الكهرباء و بووووووووووووووووووووووووووووم ... و شرار فى السقف ...ومشفتش حاجه بعد كده .. بس سمعت حاجه هبدت على الارض .. زى شكارتين اسمنت .. طبعا جريت على جوة .. لما استجمعت شجاعتى خرجت لقيت الموبايل الكشاف ضارب فى الحيطه .. و حد بيقول اةةةةةةةةةةةةةةةةةة و مشفتش جارة ده تانى ...

بعد لحظه الانفجار ..... لقيت الست مرجانه ... بتاعت المدبح بتقول :: ايييييييييييييييييييييييييييييييييييه د ة ؟؟؟ النور يخرب بيت ابوكو... عمك سعيد قام جرى و قام مدينى عصايه المقشه و قالى قولها كنا بنصلح الكهرباء!!!!!!!!!!!!!!!!!!

[windofchange]

هههههههههههههههه مشكلة وايه اخبار عم سعيد

[fares_311]

حلوه
هههههههههههههه

[S O P H O S]

هههههههههههه هو بخير
مدام قال قول كنا بنصلح الكهرباء واداله الموبيل

[Y a r i s]

ههههههههههههههه
ايه ده انتو كمان عندكم عم سعيد زي عم سعيد بتعنااا ههههههه.

[Habd]

اصلا مش بعيد تلاقى الصنايعى اللى هاتيجيبوه يبقى زى عم سعيد :)

[mahmoudysf]

ههههههههههههههههههههههههههه
يخربيت كده
انا هموت من الضحك

[dr.hazem]

متعووووووووووووده دااااايما....
هههههههههههههههه

[omaroof]

فعلا عم سعيد ده منتشر من زماااااااااااااااااااااااااان

[hugan]

هههههههههههههههه
جامده جدا
راجل زي العسل

[Sehsss]

ههههههه، أهم حاجة جاره راح فين، يعني مين اللي أكل الجبنة ؟؟؟

[hossam_elwani]

فهلو مصرى ههههههههه طيب لو كان مات يبقى ازى الحال

[mahmoudysf]

و فى احدى صولات و جولات عم سعيد مع ماسورة الكهربا ... و عمك سعيد شغال الله ينور ... بيسلك ماسورة الكهرباء و بووووووووووووووووووووووووووووم ... و شرار فى السقف ...ومشفتش حاجه بعد كده .. بس سمعت حاجه هبدت على الارض .. زى شكارتين اسمنت .. طبعا جريت على جوة .. لما استجمعت شجاعتى خرجت لقيت الموبايل الكشاف ضارب فى الحيطه .. و حد بيقول اةةةةةةةةةةةةةةةةةة و مشفتش جارة ده تانى ...

بعد لحظه الانفجار ..... لقيت الست مرجانه ... بتاعت المدبح بتقول :: ايييييييييييييييييييييييييييييييييييه د ة ؟؟؟ النور يخرب بيت ابوكو... عمك سعيد قام جرى و قام مدينى عصايه المقشه و قالى قولها كنا بنصلح الكهرباء!!!!!!!!!!!!!!!!!!

ايه الحتة دي في القصة
لو اتعملت في فيلم هتلم فلوس كتير اوووي
ههههههههههههههههههههه
كل ما اقراها ابقى كده ههههههههههههههههههههه

[alfath8]

ههههههههههه
فطست من الضحك بجد

[youssef_u]

ههههههههههههههه قولها كنا بنصلح الكهرباء ههههههههههههه