Tweet
I think life is about ay Batikh !!!
السلام عليكم و رحمة الله و بركاته
أحبائى فى الله موضوع جه فبالى كده و حبيت أنقله ليكم و أناقشه معاكم
لما تبص حوليك فى الدنيا و تلاقى فى ناس كتير فى الغرب و الديانات الأخرى بشكل عام ملهاش هدف فى الحياة و عايشة طول حياتها ضايعة و تايهة و بتبحث عن أى حاجة تحط تركزها فيها و تلاقى ده واضح فى برامجهم الإجتماعية و الوثائقية و المتابع لوثائقيات ناشيونال جيوجرافيك هيفهم قصدى.
و كل واحد من دول يعملوا عليه حلقة و يطلع يتفلحس و يقولك I think life is about ay batikh.
فمثلا تلاقى واحد كل هدفه فى الحياة إنه يتشعلق أى منحدر صخرى من غير أدوات و يقوم ناطط فى المية !!!
أو واحدة كل هدفها فى الحياة إنها تبقى شبة باربى فتفضل تعمل فى عمليات تجميل لحد ما تبقى شبة المعلم رشدان بتاع النينجا ترترز
أو راهب فى الهند قاعد فى معبد يربى فى فيران و يعبدها !!!
أو واحد كل هدفه فى حياته مين أحسن ريال مدريد و لا البارسا و مضيع فلوسه كلها على صور اللعيبة و التشيرتات و حضور الماتشات و شتمية الفريق المنافس و مشجعية بشكل أقرب للهوس!!!
لما تشوف كل الحاجات دى ساعتها تعرف أد أية الإسلام دين عظيم
لإنك بيه عارف إنت عايش لية و عارف هتعيش إزاى و عارف هتموت لية ورايح على فين.
فمن أفضل نعم الله عليك أنه رزقك الإسلام الصحيح...الحمد لله على نعمة الإسلام و كفى بها نعمة.
فإنت عايش علشان تعبد الله حق عبادته و تعمر الأرض و تنشر الدين و العدل بين الناس.
و عارف هتعيش أزى من خلال إتباع سنة الحبيب و القرأن الكريم و اللى مسبوش أى تفصيلة مهما كانت صغيرة إلا لما وصلولك ازاى تتصرف فيها.
و عارف إن الدنيا دى مجرد إمتحان و وقته هيخلص بموتك.
و عارف إنك يا رايح يا جنة يا نار و عارف تعمل أية علشان تروح ديه أو ديه.
اللهم ثبتنا على دين الحق.
لكن إحنا عندنا مشكلة حقيقية ظاهرة جدا فى ايامنا دى...و هى إن فى قلة من المسلميين بعدوا عن الإسلام لدرجة إنهم أصبحوا تايهين بردو و ميعرفوش حاجة عن الإسلام إلا الشهادة و شوية جمل بيستخدموها فى حياتهم الإجتماعية زى إنت عامل إيه ...أنا الحمد لله و يخافوا من الحسد يقول قول ما شاء الله و ربنا يستر و شكرا على كده و تلاقيه بعد كده عمال طول النهار يسب و يلعن فى الناس علشان البارسا خسر من الريال و لا الأهلى إتعادل مع الزمالك و يعلو وجه سعادة عجيبة لما فريقه يكسب
مش معنى كده أنك متعملش حاجة فى حياتك و تفضل نايم فى الجامع بس أدى حق ربنا و عيش بالمعروف و عيش وسطى ده حتى ربنا بيفهمنا الوسطية فى القرأن حتى فى الطاعات و الخير.
الإسراء - الآية 29...وَلَا تَجْعَلْ يَدَكَ مَغْلُولَةً إِلَىٰ عُنُقِكَ وَلَا تَبْسُطْهَا كُلَّ الْبَسْطِ فَتَقْعُدَ مَلُومًا مَّحْسُورًا
تفسير إبن كثير:ومن كان ذا مال فيبخل بماله على قومه يستغن عنه ويذمم ومتى بسطت يدك فوق طاقتك قعدت بلا شيء تنفقه فتكون كالحسير وهو الدابة التي قد عجزت عن السير فوقفت ضعفا وعجزا فإنها تسمى الحسير
دعوة إلى كل زى عقل أنه يبدأ بالتفكر فى دينه و عظمته و سهولته و يسره قبل ما يجى الوقت اللى لا ينفع فيه الندم عيش حياتك بالمعروف و أدى الطاعات المطلوبة و حاول دايما تعمل الخير و لو بسيط و خلى ربنا و الأخرة دايما فى بالك و خلي ده ينعكس على حياتك صدقنى دى الحاجة الوحيدة اللى هتعيشك مرتاح نفسيا و تخليك تقدر تتخطى مصائب الدنيا.
و كما فى دعاء ختم القرأن اللهم أقسم لنا من اليقين ما تهون بيه علينا مصائب الدنيا.
و صدق عبد الوهاب حينما غنى الحياة حلوة و لكن مع إضافة فى طاعة الله
و دمتم فى طاعة الله و أمنه.
و دمتم فى طاعة الله و أمنه.
Comment