عايز موبايل ومش عارف اجيب ايه

[A.Saad]

عايز اشترى موبايل فكرت فى السامسونج بس مش عايز الاحجام الكبيرة ويكون استخدام شاق جدا مكالمات ورسايل كتير ايميلات ويستحمل خبطات وخرابيش كمان وياريت حاجة تكون بناتى شوية للمدام واختى عايزة جهاز يكون حديث بس مش touch زراير افضل فى حدود ٨٠٠ يعنى كدة بتكلم على ٣ ترشيحاات منكم

[Imhotep]

سلسلة ال Galaxy Y كويسة و فى منها Duos و فى الحدود السعرية اللى انت كاتبها

[A.Saad]

انا مش عارف الفرق ايه بين ال GALAXY وال DUOS
الy اعرف انه للشباب اكتر فهل هيستحمل

[Imhotep]

هو عموما اجهزة سامسونج ديليكا شوية و عايزة محافظة عليها ..... ال Y امكانياته كويسة بالمقارنة بسعره..... ال duos هو ابو شريحتين و ده موجود برضه Y duos..... بس بالنسبة لتليفون الخدمة الشاقة اعتقد هيبقى مناسب اكتر النوكيا اللى بحس ان خاماته اقوى من سامسونج و فى نوكيا عندك ال asha series كويسة فى الرينج السعرى اللى انت محدده

[محمد يوسف]

حضرتك عايز استخدام شاق جدا ماتفكرش فى سامسونج..عليك وعلى البلاك بيرى أو Sony xperia
بالنسبة للمدام والأخت فى حدود السعر أنصحك ب Nokia Asha series

والموقع ده حايفيدك

GSMArena.com - GSM phone reviews, news, opinions, votes, manuals and more...

[itsonlyme]

بما أنك مش عايز شاشة كبيرة وعايز موبايل يستحمل البهدلة يبقى الـ Xperia Go مناسب لك.

موبايل ضد الخدش و التراب والمية كمان. سعره في حدود 1800 على ما أظن.

شوف الفيديو ده.

بالنسبة للموبايل التاني اللي في حدود 800، بنصح بموبايل من سلسلة الـ Nokia Asha زي ما الأخوة نصحو.

[itsonlyme]

لسه شايف سعر الـ Xperia Go على موقع موبايل شوب لقيته بقى بـ 2275 جنيه!

الموبايل ده كان سعره 1800 من كام شهر!

لأول مرة في التاريخ الموبايلات سعرها تزيد رغم ان موديلاتها بتقدم وكله بسبب ارتفاع الدولار.

[A.Saad]

Xperiaهلاقى له بطاريات واكسسوارات بعد كدة ؟؟؟؟؟؟؟؟؟؟؟
لان ليا تجربة مع سيمنس والكاتيل
اجهزة جميلة بس اى اكسسوار مفيش
بطاريات مفيش ولو لقيت بتمن جهاز جديد

[koshary]

xperiaهلاقى له بطاريات واكسسوارات بعد كدة ؟؟؟؟؟؟؟؟؟؟؟
لان ليا تجربة مع سيمنس والكاتيل
اجهزة جميلة بس اى اكسسوار مفيش
بطاريات مفيش ولو لقيت بتمن جهاز جديد

انا معايا اكسبريا ميرو كنت جايبه ب 1375 اخر مره شوفته كان ب 1450 ومش موجود وبطاريته موجوده فى وسط البلد والاكسسوارات كلها موجوده وال تاتش سكرين بتاعته موجووده وفى منها الفيميه كمان واسعار حلوه يعنى البطاريه صينى ب20 و هاى كوبى ب 45 واوريجنال ب 90 جنيه والتاتش سكرين ب 10 جنيه والفيميه منها ب 15 والجرابات ب 20 جميع الالوان وناس كتير بتصلحه فى عبد العزيز مع انه لسه جديد وليه ضمان سنه انا جبته من موبايل شوب وسالت عليه لابن خالى من اسبوع مكانش موجد فى كل الفروع لان عليه طلب كتيير ...

[swimmer25]

لو عايز سامسونج تاتش هات أي حاجة فيها جوريلا جلاس
يعني من اول سامسونج s