موقف صعب فيوم رخم اجمل مافيه كمين الشرطه !!!

[BESO516]

مساء الخير على جميع الأخوه
طبعا عنوان غريب لكن سبحان الله مغير الأحوال
من كام اسبوع عملت الموضوع ده وكنت مضايق اوى بسبب اللى حصل معايا فكمين شرطه وده لينك الموضوع

http://www.nilemotors.net/Nile/336594-a.html

وبالمره كمان كنت عامل موضوع فرأس السنه عن الكماين برضه واللى بيحصلى معاهم

http://www.nilemotors.net/Nile/327483-a-2.html

كل الرغى ده ليه وعلى ايه

ندخل فالموضوع
يوم الأتنين اللى فات كانت اجازتى من شغلى وكنت قاعد فالبيت فأمان الله ومقرر انى انزل التوكيل اعمل العربيه على الساعه 1 الظهر للصيانه

جالى تليفون الصبح الساعه 10 انى لازم انزل الشركه بأسرع مايكون وابعت فاكس بورق مهم معايا فمكتبى وقافل عليه (:

واول ماصحيت لقيت النور مقطوع :(
قولت عادى مفيش مشكله اضرب اى تيشيرت فأى بنطلون مع شويه الجيل وانزل وروح بالمره التوكيل واخلص من كل الحاجات دى وارجع كمل اجازتك وارتاح

ونزلت روحت التجمع لخامس وبالتحديد شارع التسعين ووصلت الشركه فأمان الله وانجزت المطلوب والحمدلله ولحد هنا كويس

نزلت على الساعه 12 وربع افاجىء انى نسيت المحفظه وفيها رخصه العربيه ورخصتى والبطاقه والفيزا والفلوس وكل مايتعلق بيا فالبيت

طبعا قولت خليها على الله ومعلش وسيبك من التوكيل وروح على البيت وخلاص

لفيت وماشى فشارع التسعين الاقى خير الله اما اجعله خير كمين وحملات كبيره قدام سيتى مول

وانا طبعا مفيم العربيه من كل اتجاه حتى الفوانيس ورا وقام وستاير ورا الفاميه والعربيه اصلا سودا والدنيا بلاك فبلاك

قولت ياواد خليها على الله وافتح الأربع شبابيك واستخبه ورا عربيه نقل او ميكروباص كبير وهتعدى ان شاء الله (:

وقد كان معدى ورا ميكروباص وواخد اليمين وعامل عبيط والاقى سياده النقيب بنفسه

بيقولى رخص بعد اذن حضرتك عملت طبعا انى بطلعهم وقولتله ممكن اركن على جنب قالى اتفضل وكان واقف معاه امين وظابط تانى مشيوا جنبى وقدامى لحدد ماركنت واتلمو عليا التلاته

قولتلوا بصراحه كده انا نسيت الرخص فالبيت
قالى رخصتك ورخصه العربيه قولتله صراحه اه
قالى طب بطاقتك قولتله نفس الكلام
قالى طب اى اثبات شخصيه اى حاجه يابنى
قولتله الفيزا بالبطاقه بكارنيه الجامعه بالفلوس بكل حاجه نسيتها بصراحه بقى

طبعا راح للعميد اللى كان واقف وقاله راح الباشا جايلى بنفسه قالى شغال فين وجاى منين ورايح فين وساكن فين وجاوبته وكل كلامهم معايا بأدب واحترام شديد جدا اول مره اشوفه من الداخليه بصراحه

بعد كده نادا على النقيب الأول وقاله اكشف على العربيه والأستاذ وقولى وفعلا حصل والعربيه طبعا طلعت نضيفه وانا نفس الكلام فاللحظه دى كلمت اخويا الصغير قولتله تعلالى بسرعه وهات المحفظه معااااك بسرعه

وبعد كده قالى اتصل بحد يجيبلك الحاجه بسرعه احسن ماتيجى معانا القسم وتضيع وقتك قولتله لا انا مع حضرتك حتى لو اتأخر اخويا مش مهم انا اللى غلطان ولازم اتحمل غلتطى دى محدش غيرى

فضلت ولقف بتاع نص ساعه وبصراحه مكنوش بيفوتو عربيه من اول مرسيديس وباسات وجيب متفيمين لحد النقل والربع نقل وكانوا فمنتهى الأحترام مع الجميع حتى سواقين الميكروباص وكل اللى عليه مخالفه سواء دفع او اتسحب رخصه بيمشى وهو راضى لأنه عارف انه غلط

المهم فالنهايه طبعا اخويا اتأخر راح جايلى النقيب وقالى اتفضل امشى يااستاذ باسم بس تبقى خلى بالك بعد كده لأن كده ميصحش
قولتله لا والله لو حضرتك عايزنى لحد مايجى انا مش ورايا حاجه
قالى لا خلاص العربيه نضيفه وكله تمام عندك معادا الفاميه تبقى شيلو بس واتفضل مع السلامه


بصراحه مشيت وانا مكسوف من نفسى من الأدب والأحترام اللى الواحد اتعامل بيهم رغم انى غلطان واستاااهل معامله تانيه خااالص غير دى

بس امانه لازم تتقال زى ماالواحد بيرصد السلبيات لازم كمان نقول الأيجابيات والحاجات الجميله من الشرطه وكده ممكن نقول ان فى امل ان احنا نتعدل

واسف جدا على الأطاله

[youssef_u]

اللي لاحظته فعلا ان الظباط في الكماين بقو في منتهى الاحترام

[mohamed_e36]

يا مسهل والله شيئ جميل
مالو الادب والاحترام والله لو عملو كده وعاملو الناس باحترام وانهم بنيادمين مش عبيد هيكسبو الناس وتعاطفهم معاهم ويقدرو يسيطرو على البلد بدل ما يمشو البلد بالكرباج والناس تكرهم وتنفر منهم

[hossam_elwani]

احيييييييييك على ذكر ما حصل من ايجابيه

على فكره كل يوم بعد الساعه 12 على الزراعى اسكندريه القاهره فى نطاق البحيره بيكون فيه حملات كبيره للتفتيش وبالسلاح وبا بكل ذوق بيتعملو مع الناس

[tarekzein]

نفس الكمين فى نفس المكان بنفس اﻷحداث بالظبط

بس أنا نسيت كل حاجه فى شغلى فى التسعين برضه

وواحد زميلى جابلى المحفظه جريا على اﻷقدام حوالى 2 كيلو

المهم الباشا الظابط قاللى وهو بيضحك : طب هات وصل نور
أى حاجة أعتقك بيها من العميد
قولتله ﻷ ماأنا رايح أقعد جنبه

[S O P H O S]

يارب فكل حته يبقي كده
علشان ده شئ ايجابي

[shaddadfalcon1]

طيب شيل بقي الفاميه

[م. حاتم السباعي]

نهضة دي و لا مش نهضة يا متعلمين يا بتوع شارع التسعين هههههههه

الاخ الكريم الاستاذ بيسو

تسلم ايدك علي الموضوع الجميل ده و نصيحتي لك ان تنزع الفاميه فعلا حتي تكتمل الصورة الايجابية التي رسمتها لنا و لكي نكون نحن بالفعل مساهمين في التغيير في هذه البلد

تحياتي لك

[احمد نظمي]

الحمد لله يارب يبقا كل ظباط مصر بنفس الاحترام دا

[Akram]

شكرأ ليك لنقل الصورة الايجابية دي و يا ريت كل الضباط يبقوا بالشكل ده ,
يتعاملوا بأحترام و بروح القانون ,
و ليا تعليق صغير على الفاميه , لما بلاقي عربية قدامي مفيمة ببعد عنها لاني ببقى مش شايف الطريق كويس و ده خطر عليا مش على اللي مفييم لأنه ممكن تظهر حاجة فجأة و تضرني ,
يا ريت تشيل الفاميه لأنك ممكن تضر غيرك و يتعلق في رقبتك الضرر اللي تسببت ليه بشكل غير مباشر

[SHNORY]

الرتب الكبيره في الكماين بيكونوا قمه في الاحترام والادب
لانهم عندهم يقه بنفسهم ومش محتاجين يقلوا ادبهم علشان يطبقوا القانون
انا مرتين في حياتي اتقالي رخصك
مره من عميد علشان مكنتش رابط الحزام وكان قمه في الادب
ومره من نقيب علشان كنت ماشي بالارقام القديمه ورخصه العربيه منتهيه من سنتين
كان برضه قمه في الذوق والاخلاق وخفه الدم
بس عموما
امشي عدل يحتار عدوك فيك
حضرتك مفيم وبتخرق القانون
اتمني تشيل اي مخالفات من علي عربيتك

[BESO516]

اللى عرفته امبارح بقى ان الكمين ده بقى ثابت بس بغير مكانه
مابين شارع التسعين ومدخل القاهره الجديده
بس بصراحه عاملين شغل روعه وخصوصا مع سواقين الميكروباص