تعمل ايه لو كنت مكاني

[Amr96]

السلام عليكم
انا ححكيلككم موقف حصل معايا وقولي تعمل ايه لو كنت مكاني
كنت راكب تاكسي ورايح درس ولما وصلت ونزلت بدي للسواق الآجرة ( اللى كل اسبوع بدفعها لأى سواق وهي نفس المسافة اللى بروحها ) ..فلقيته بيقولى ببرود سواقين التاكسيات
الآجرة ناقصة
قلتله انا كل يوم بركب نفس المسافة وبدفع نفس الفلوس وعمر ماحد اتكلم
قالى لا كدة ناقص فلوس
قلتله الحتة دي صغيرة وانا متعود اركبها بنفس الفلوس ده
راح قالى الكلمة اللى صدمتني "طب غور من هنا"

انا بصراحة اتصدمت .. اللى ضايقني من نفسى جداً انى مشيت وسبته للأسف ولما روحت اتضايقت جدا من نفسى ..
اه للعلم السواق جسمه أكبر مني وشكله مش تمام ... وانا عندي 17 سنة وللأسف جسمه وحجمه اكبر مني ..


لو مكاني ايه الرد المناسب ؟

[amr011111]

انت ابقى اركب التاكسى الابيض اللى فيه عداد احسن
ومتزعلش نفسك الناس البيئه بقوا كتير الا من رحم ربى

[JAM]

قالوا قديماً فى الأمثال... الجرى نص الجدعنة
بس مقالوش النص التانى
وانا بقولهولك
إشتم وإنتا بتجرى

[Imhotep]

متلومش نفسك على انك مشيت و سيبته بعد الكلمة اللى مش تمام اللى قالهالك لكن اتعلم من الموقف..... و بعد كده ابقى اركب تاكسى ابيض من ابو عداد و بيبان عليه الاجرة اللى هتدفعها..... معلش كلنا و احنا فى سنك كنا بنتعلم لسه الاخد و الرد مع الدنيا كلها و انواع الناس المختلفة و هى دى خبرة الحياة..... و ثق فى نفسك و تأكد انك هتوصل بعد كده انك تقول للسواق الحرامى انت حرامى فى وشه بدون خوف لما تبقى على حق..... متضايقش من البنى ادم الزبالة ده و زى ما قلتلك اتعود تتعلم من المواقف و تستفيد منها

[alexaway]

بص الاشكال دي انت اللي خسران معاها ,فالافضل انك تحافظ علي احترامك ومتردش عليه ,لو قدرت تدفع زيادة علشان متسمعش كلمة تحرق دمك اوك مقدرتش فكبر دماغك ومتحاولش تدخل معاه فى خناق لانك انت اللي خسران مهما كانت النتيجة , هو مش حتفرق معاة لو انضرب انما انت لو التيشرت بتاعك اتقطع حتفرق معاك كتير .

[المنسي]

من رايى اركب التاكسى الابيض ابو عداد احسن لك

[shaddadfalcon1]

لو رديت عليه هتنزل لمستواه وان شاء الله الشتيمه دي هتاخدها من حسناته يوم القيامه

[Sehsss]

لو مكانك كنت جيبته من الشباك.. وعلمتها مع واحد قبل كده شتمني برضه

[monamize4]

ما شاء الله كل الردود كلها ف منتهى الحكمة و هو دا فعلا اللى المفروض تعمله

ماعدا الرد الاخير لان مش دلوقتى وقته بالنسبة لسنك و اعتبارات تانية كتير بس وقته جاى جاى

[KarimAbulEla]

شوف ، اللى قالك العبارة ديه ، سواق التاكسى عبارة عن بلطجى و بيدور على اى حد يرمى عليه بلاه ـ فيه سواقين اخرين يختلفون كثيرا عنه ، وعموما فعلا التاكسى الابيض سائقيه اكثر احتراما ، و لكنها ليست قاعدة

كونك انك تمشى و تسيبه ، ده افضل كثيرا و يكاد يكون الحل الوحيد ، الدخول فى مشاجرة مع سائق بلطجى فى حد ذاتها امر غير مقبول و نتائجه ممكن تكون كارثية ـ فى ظل مجتمع فوضوى جدا جدا جدا - انت كان ممكن تشتمه و تختفى من المشهد سريعا ـ بس اللى عملته ده افضل ، انا كثيرا كنت بافضل الدخول فى مشاجرات فى مواقف تختلف عن الاخرى مع كل ابناء الشعب البيئة دول بس صدقنى النتيجة لن تكون فى كل الاحوال فى مصلحتك حتى لو انت الكسبان ، اما لما كان ربنا بيهدينى للصواب و بابتعد عن المشهد دون رد فعل منى ، بعدها الموضوع بانساه تماما و كانه لم يكن على الشريط من أساسه ، على عكس المواقف الاخرى اللى كنت باحب انه تتطور لمشاجرة

صدقنى اى انسان محترم ، تقدر تشبهه بانه لابس قميص ابيض ، و الاخرين ولاد التيت دول بيبقى بالظبط كانهم لابسين قميص مليان شحم ، يستحيل الاول يخرج من المشهد نظيف و اما الثانى فمهما اتسخ ، لن تفرق معه و لن يظهر عليه اى فرق قبل او بعد الاتساخ

ارجو ان يكون فى كلامى شىء تستفيد منه انت و انا ايضا !!!!!!!!!!!

[youssef_u]

مش لازم تدخل في خناقة بسبب ٢ جنيه او ٣ جنيه زياده ، واللي انتا عملته برده صح

[Sehsss]

ما شاء الله كل الردود كلها ف منتهى الحكمة و هو دا فعلا اللى المفروض تعمله

ماعدا الرد الاخير لان مش دلوقتى وقته بالنسبة لسنك و اعتبارات تانية كتير بس وقته جاى جاى

كل واحد ليه وجهة نظر ورأي وهو حر فيها، ويقدر الوقت والظروف كما يتراءى له

[dedi]

افضل شئ سيبة و امشى و انك تحترم نفسك كرامتك اسف سوف تتبهدل مع واحد تيت مايسويش
يا صديقى لو معاك زوجتك او اختك و طلب ضعف الاجرة سوف تدفعها صونا لكرامتك و من معك دى اشكال بلطجية و مافيش قانون

[alexaway]

لو مكانك كنت جيبته من الشباك.. وعلمتها مع واحد قبل كده شتمني برضه

متزعلش مني بس شفت بعيني واحد زي حضرتك كدا وشبط مع سواق والسواق نشه بمطوه في وشه فلقه نصين ,وكان الشاب اللي واقف ادام السواق جته مش قليل يعني ومع ذلك السواق شوه وشه بالسلاح .

وقريت قبل كدا فى اليوم السابع حادثة سواق ميكروباص قتل زبون علشان اختلاف علي ربع جنية .

احمد ربنا ان السواق اللي انت مسكت فيه دا غلبان مش بلطجي زي اغلب السواقين .

[ehabpopo]

كويس انك عملت كده ... الاشكال اللى بتدور على الخناق دى احسنلك تسيبهم وتمشى ... وماتزعلش من نفسك انك سيبتة ...