استفسار عن أفضل أنواع المراتب الجاهزة

[dodyam]

كنت بأستفسر عن أفضل أنواع المراتب الجاهزة

لان اللى عندى قطن عادى وتعبوا ضهرى جامد جدا وبتخلينى مش عارف أنام

و على الرغم من انى نجدت تانى و غيرت القطن كله وجبت أغلى قطن وجبت منجد شاطر ومفيش فايدة

آه مش زى الأول لكن هى كام شهر و المراتب بتهبط وتتعبنى برضه

فقلت أشوف موضوع المراتب الجاهزة بس خايف تكون بتتعب الضهر برضه

فلو حد يدلنى على ماركة كويسة و موديل معين

لان لما سألت لقيت مثلا فى ماركات هابيتات و يانسن أنواع كتير داخل الماركة تخلى الواحد يتوه

مثلا فى ارتفاعات مختلفة وفى سوست متصلة و أخرى منفصلة و فى حشو سفنج أو قطن و استخدام على وجه واحد أو وجهين ودعامات و عدد السوست فى المتر المربع وحاجات كتير

فيا ريت حد يفسر ايه الأفضل فى الحاجات دى

.

[raedegypt]

يانسن طبى اسفنج كلها بدون سوست اخر راحه ياباشا اسمها يمكن ماريوت 160*200 ب 1600ج . السوست كلها هاتوجع ظهرك مهما قالك البياع وعن تجارب مش تجربه

[canner]

سلامة ضهرك يا باشا بص انا جايب مرتية اينجلندر نوعها هانى مون هى غاليه شويه بس مريحة جدا جدا جدا

[mohammadrashee]

بص انا هقولك حاجه كل انسان بيحب حاجه معينه
يعني اللى بيحي يناو على حاجه ناشفه زي اﻷرض مثﻻ مينفعوش السوست و ده المرتبه الماريوت احسن ليه
واللي مبيعرفش ينام على اﻷرض السوست احسن هات اي ماركة بس تكون معروفه وكل ما غليت نوع المرتبه وزاد ارتفاعها هتكون اطري واصعب في البوظان

[salodas]

صدقنى كله شغال متحيرش نفسك .
أنا معايا هابيتات زى الفل .
جيب حاجة وسط لا غالى أوى ولا رخيص أوى .
وفى الأخر الكل بيديك 10 سنوات ضمان .
المهم بأه ... متغلطش غلطتى وتجيب المرتبة أصغر 5 سم من السرير ... هتكره المرتبة والسرير كمان .
جيب المرتبة على قد السرير بالضبط أو أكبر قليلا مش مشكلة .
خد الموضوع بجدية مش هزار

[mero100]

هات يانسن موديل ( كتراكت ) ... ممتازه ... و اديهم مقاس السرير بالظبط ... بالسنتيمتر ... عشان يعملوهالك علي اد السرير بالظبط .... المرتبه بها سوست الماني بقالي 5 سنوات بستعملها ... و لها وجهان فايبر للشتاء و قطن للصيف .
و بالتوفيق .

[hossam_elwani]

فور بد حاجه كده محترمه وانا خاصمت الام الضهر تمام بعد استخدمها

ومنها لله المراتب القطن اختراع فااااااااااشل مهما كان القطن كويس او المنجد محترف

[احمد المصرى]

هات يانسن موديل ( كتراكت ) ... ممتازه ... و اديهم مقاس السرير بالظبط ... بالسنتيمتر ... عشان يعملوهالك علي اد السرير بالظبط .... المرتبه بها سوست الماني بقالي 5 سنوات بستعملها ... و لها وجهان فايبر للشتاء و قطن للصيف .
و بالتوفيق .

بستخدمها بقالى 3 سنوات وممتازه فعلا ....... متعرفش سعرها كام حاليا

[D . a .\ AYMAN]

أنا كان عندي نفس مشكلتك بالضبط بسبب المراتب القطن لغاية ما جبت مرتبة سوست يانسن بس فعلا قوية جدا وبقالها دلوقتي داخلة في 12 سنة أو أقل وبنفس مستواها زي ما كانت جديدة برغم التطيط بتاع الأولاد عليها

وعندي كمان اسفنج بتاعة تاكي سمك 10 سم .. وبرضه كويسة ودي بالذات عمرها معدي الـ 25 سنة وبرضه اسفنجها زي الفل

والإثنين ما شاء الله عليهم قمة الراحة وإن كانت السوست بتاعة يانسن مريحة أكتر

عندي بقى واحدة سوست بتاعة تاكي عمرها دلوقتي داخل في 20 سنة برضه ولكن الهيكل السوست بتاعها خلاص جايب آخره ومش مريحة قوي في النوم عليها إلا لو كنت لوحدك ومافيش حد جنبك عليها


كل الحاجات دي مافيهاش الكلام الجديد بتاع دلوقتي اللى هو طبقة فايبر ولا نص قطن ونص فايبر وطبقة لباد والحاجات اللى طالعة دلوقتي ... واللى أكيد طبعا هاتكون أفضل وأريح من الكلام بتاع زمان

اللى عايز أقوله لحضرتك إن أي مرتبة جاهزة هاتكون أفضل وأريح لحضرتك من القطن مليون مرة سواء كانت سوست أو اسفنج ... وإن كنت أفضل السوست القوية زي يانسن ...

عشان كدة نقي اللي تعجبك وسعرها في متناول إيدك وتكون ماركة كويسة زي تاكي أو يانسن أو هابيتات


... تاكي مصري ومنتج قوي وجميل عن تجربة 30 سنة وأكتر لأكثر من 10 مراتب في بيت والدي وعندي ... هابيتات تركي وبرضه كويسة على ما أسمع لأني ما جربتهاش خالص ... يانسن معرفش بلدها إيه ولكنها جيدة جدا لمدة 12 سنة عن تجربة مرتبة واحدة منها

وفي الآخر أنصح أي حد مقدم على الزواج أن يتجنب العادات والتقاليد العتيقة بأن المراتب لازم تكون قطن ... المرتبة القطن عبارة عن لعنة من اللعنات تقريبا قعدت سنة في أول الزواج مش عارف أنام بسببها ... وفاكر لغاية دلوقتي شعوري لما رجعت أنام تاني لأول مرة بعد سنة كاملة على المرتبة اليانسن

المخدة قطن ... الخددية قطن ... أي حاجة قطن إلا المرتبة ... حتى المخدات دلوقتي جبتها فايبر عشان القطن بقت ناشفة وعايزة تتنجد من الأول

[alrabeh]

أخى الفاضل مشكلتك انا عانيت منها قوى
وأعدت التنجيد حوالى ثلاث مرات
لحد ما جبت يانسن ارتفاع 25 سم كانت من اربع سنين ب 1300
بس برضه بتهبط شوية فبالتالى حتلاقى ظهرك وجعك لإن لو ظهرك مكانشى فى مستوى واحد وأخد شكل التقويس فلازم الظهر حيتعبك
طبعا انا جاتلى عقدة من المنجدين من كتر ما كل واحد فيهم يقول أحلى كلام على شغله وأقوله اننى بأعيد تنجيد علشان ظهرى واجعنى يقولى انسى كل تعبك ولو فيها حاجة بتاعتى
ويروح يجيبلى المرتبة ارتفاع جبل ولما تهبط تبدأ الحقيقة الصعبة وهى بالطبع سوء التنجيد ووجع الظهر هوة هوة
فى الحقيقة واحد قريبى سألته على منجد يعملى كسوة للصالون بس يكون كويس لإننى برضه كل ما أفصل طقم ألاقيه والعياذ بالله كأن طفل مفصله وطفل كمان لسه بيتعلم
فقالى عندى منجد كويس جدا وفعلا جالى أخذ مقاسات الصالون من الساعة التاسعة الى الساعة 12 ، ثلاث ساعات بياخد المقاسات وشكل الأويما بشكل جميل جدا ، تحس انه فعلا أستاذ بجد ، ولما جابلى الطقم بعد التفصيل لقيته أكثر من ممتاز بجد ربنا يباركله
وفتحت معاه موضوع التنجيد والمراتب وقاللى خلاصة الموضوع ان المنجدين بيستسهلوا وبيعملوا عدد غرز قليل وعلى واسع فى المرتبة فبالتالى القطن حيتحرك من مكانه وان علشان تعمل غرز أكثر وعلى ضيق مش على واسع بتاخد مجهود كبير وعلشان كده بيكون مصنعيتها أكبر
وقاللى لو عاوز أطلعلك مرتبة زى الصابونة ناشفة ومستوية حيطلعها زى ما أنا عاوز
أعتقد أن القطن لو اتعمل صح حيكون أفضل كتير جدا من السوست والإسفنج

[lonedoctor]

هابيتات جميلة ومريحة وبالذات الموديل العالى فيها 40 سم هتحس لما تنام عليها انك ضيعت عمرك اللى فات كله هدر

[dodyam]

متشكر جدا لكل السادة الأفاضل اللى ساعدونى

وواضح ان مشكلة القطن و التنجيد منتشرة

وأنا كنت جربت قبل كده تاكى سفنج وتعبتنى و جربت أنام حتى على الأرض مفيش فايدة

هانزل أروح كمفورت هوم كولكشن هما عندهم يانسن وماركات تانية و ربنا يسهل