كلام ملوش لازمة

[samehafez]

كان الكاتب السخر احمد رجب ذكر في مقدمة اح كتبه ان الكلام نوعان كلام فارغ و كلام مليان ......................... كلام فارغ

مقدمه ملهاش لازمة بس لابد منها . ..لان كل الكلام اللي جاي ملوش لازمة

هي البلد رايحة علي فين ....

شوارع زبالة ... تخطيط ... يعني ايه تخطيط اساسا نظام المرور اي كلام ده لو كان فيه نظام اساسا .. قوانين بتطبق علي الغلابة انما لو ليك ضهر انسى ...

وفوق ده كله زودوا سعر البنزين و زودوا الضرائب و كمان عملوا قانون جديد للمرور ( للجباية ) كل ده مالوش لازمة .... ايه الهدف ..

يعني الشوارع اتسفلتت .. ابدا الاشارات نضفت .... بقي فيه نظام ؟؟ برده ابدا

ده حتى الناس .... كله بعبع بكلمتين و خلاص على كده .... محدش فاضي عشان يعترض ...و حتي لو حد اعترض فكلامه ملوش لازمة .

سوق العربيات .في مصر غريب عجيب ... عربيات بعد الضرائب و خلافة المفروض تتباع ب 40 الف بتتباع ب 65 الف .... يعني التوكيل كسبان فوق ال50% ..

العربيات بتتنفض قبل ما تخش البلد عشان سعرها يتظبط 60 % من الكماليات و عوامل الامان بتتشال من العربية والموتور بيتغير ووو عشان سعرها يبقى منافس في السوق .... و لو حد جه يتكلم .... الرد بسيط كلمني عن وسائل الامان اللي في ال 128 و بعد كده تعالي حاسبني اني شلت الاير باجز لما جيت استورد عربيتك ... كلام ملوش لازمة

فعلا المشكلة عندنا في المفهوم انا قصدي ان احنا لما بنشوف فوضي بنقول ده مابقاش مكان محترم ده بقى سوق فبالعقل كده ازاي ننتظر ان السوق يكون فيه نظام او قواعد

في التعامل مع التوكيلات ... فحدث ولا حرج ... التوكيل المحترم هو اللي يسرقك من غير ما يزعلك ...

احنا بقينا نرضي باقل القليل من حقوقنا ... وده طبعا كلام ملوش لازمة

لو هنتكلم عن طريق سواقتنا .... فغصب عننا واحيانا بمزاجنا بنتحول لكائنات تفتقر لاقل قدر من الزوق و التمييز

شريان حيوي زي الدائري بيقف ليه عشان حادثة مش ... قصدي الاتجاه اللي فيه الحادثة انا قصدي علي الاتجاه التاني عشان البهوات اللي بيهدوا عشان يتفرجوا .... بصراحة كلام ملوش لازمة

طيب فين الناس العاقلين اللي بيصلحوا و بينصحوا اختفوا .... و حتي اللي نفس ينصح ويصحح بقى يخاف يفتح بقه عشان محدش يسمعة كلمتين ملهمش لازمة ...

انا بصراحة مش عارف لحد امتى هنفضل كده بس انا اللي مطمني ان لكل حاجة حدود قصدي علي الرسم البياني احنا الكيرف بتاعنا نازل بس بالتاكيد فيه قاع و لازم هنوصل للقاع (ده لو مكناش وصلنا ) و بعد كده لازم الكيرف يرتفع تاني ....... طبعا كل دي احلام و توقعات يعني كلام ملوش لازمة

احنا بقينا شعب مستهتر .... و احنا بنعمل شغلانة بقول لزميلي عاوزين نعمل تقدير للمخاطر (risk assessment )... قاللي يا عم خليها على الله و لما حصل مشكلة قاللي عاوزين نعمل تقرير بالحادثة ( incident &near miss report)و متنساش تعمل تقدير المخاطر اللي كنت عاوز تعملة عشان ورقنا يبقى سليم .... طب ماهو لو كنا وقفنا 5 دقايق و فكرنا قبل ما نشتغل ما كنش حصل حاجة .....للاسف الاستهتار بتاعنا بننقله معانا في كل مكان في البيت في السواقة في الشغل

تخيلو معايا قبطان مصري داخل علي مركب تانيه بطريقة اقل ما يقال عنها انها متهورة الاخ بيخمس بالسبلاي طبعا هو فاكرها شطارة .... ده اسمه استهتار ... ده لما يكون بيضرب بكل قواعد السلامة عرض الحائط في شغله و هو مسؤول عن ممتلكات و ارواح .... ده و هو سايق مركب طولها 50 متر .... يا تري هيعمل ايه و هو سايق عربيته في الشارع ...... ملوش لازمة الكلام ( غيرت المرة دي )

انا كده خلصت الكلام اللي ملوش لازمة .....ملوش لازمة عشان كلنا عارفينة .... وهو مش الكلام اللي ملوش لازمة ده لسة فيه اطنان من الكلام اللي ملوش لازمة ....بس مالوش لازمة نكمل

طيب ايه بقى اللي له لازمة الحل ...و ايه اللي ليه لازمة اكتر الحل مع تطبيق مع نتيجة

فيها ايه لما تجيب اجنده و اكتب في كل يوم كده انت عملت ايه صح .... داوم عليه و عملت ايه غلط ابعد عنه

هيبقي عندك اخر السنة اجنده فيها كلام له لازمة .... احسن مليون مرة من الكلام اللي مالوش لازمة اللي انا كاتبه ده .

[tamora80]

طبعا انا لسه جديد في المنتدي و بصراحة شايف ان كل كلمه هنا مفيدة بشكل او باخر
و بصراحة كلام حضرتك يا استاذ سامح مش كلام فارغ بس اسمح لي هو فاتح علي مواضيع كتير و بصراحة انا شاكك اني اعرف حضرتك لاني اذكر اني قرات موضوع بنفس العنوان و المعني علي جهاز واحد صاحبي كان بتوقيع محمد سامح و لو حضرتك شغال في مجال البترول يبقي بالتاكيد حضرتك
في النهاية موضوع ممتاز و خاصة الجزء الاخير فكرة ممتازة

[samehafez]

همم انا هو الشخص اللي حضرتك قصدك عليه ...( هبعتلك رسالة علي الخاص )
طبعا انا اختصرت من الموضوع الاصلي عشان مينفعشي يتحط كله في المنتدي ...فعشان كده تحس انه ناقص و مش واضح بس اهو كله كلام فارغ ..
انا قصدي طبعا كنت موضحه في الموضوع الاصلي اللي حضرتك قريته ...ان اي كلام بدون فعل هو مجرد كلام فارغ .... قصدي ان اي حد ممكن يقعد يوعظ للصبح بس هيكون لكلامه معنى لما الناس تبتدي تتحرك و الاهم ان هو شخصيا يبتدي يتحرك ..
و اهلا بيك يا باشا

[AhmedGen2]

Be a positive role model, Be the change you want to see in the world

كلمات بسيطة قالها غاندى ، لو عايز تغير مجتمعك للأحسن يبقى لازم تبدأ بنفسك ، هو دة الحل فعلا ً ، الحل مش فى نقد حال المجتمع ليل نهار ، بل لابد من تغيير جذرى لسلوك الفرد اللى من شأنه تغيير حال المجتمع ككل.

Sometimes our work feels small and insignificant, But remember, a small ripple can gain momentum and build a current that is insurmountable

فيه حاجة اسمها دائرة التأثير ودى تحتوى على مجموع الأفعال اللى أنت تقدر تأثر فيها بشكل مباشر ، زى الإلتزام بآداب القيادة/المذاكرة/إتقان العمل/ .. الخ ، أى قضية خارج دائرة التأثير زى إصدار الحكومة قوانين مرور جديدة ، ارتفاع أسعار البنزين .. الخ لا داعى للخوض فيها ، لأنه تضييع وقت ، الأولى إن كل واحد يولى دائرة تأثيره قدر أكبر من الإهتمام وعدم الإنشغال بالتفاهات.

والله سبحانه وتعالى يقول إن الله لا يغير ما بقوم حتى يغيروا ما بأنفسهم ، يعنى الأصل هو تغيير سلوكياتنا وأخلاقنا.

[samehafez]

فيه حاجة اسمها دائرة التأثير ودى تحتوى على مجموع الأفعال اللى أنت تقدر تأثر فيها بشكل مباشر ، زى الإلتزام بآداب القيادة/المذاكرة/إتقان العمل/ .. الخ ، أى قضية خارج دائرة التأثير زى إصدار الحكومة قوانين مرور جديدة ، ارتفاع أسعار البنزين .. الخ لا داعى للخوض فيها ، لأنه تضييع وقت ، الأولى إن كل واحد يولى دائرة تأثيره قدر أكبر من الإهتمام وعدم الإنشغال بالتفاهات.

والله سبحانه وتعالى يقول إن الله لا يغير ما بقوم حتى يغيروا ما بأنفسهم ، يعنى الأصل هو تغيير سلوكياتنا وأخلاقنا.

اولا يا اسلام باشا احييك علي انك قدرت تفهم انا قصدي ايه ...
علي الرغم ان الموضوع مهلل شوية ... نتيجة الاختصار ...
بس عشان اوضح الموضوع اكتر ..
1- تاثيرات سلبية من المجتمع اللي حوالينا ظروف و اشخاص
2-احنا فينا حاجات كتير غلط ..... احيانا بنكون عارفين انها غلط ...ليه منصلحشي نفسنا
3- الكلام ملهوش تاثير من غير فعل
4- تاثيرك علي المجتمع بيبتدي من تصحيح تصرفاتك