ايه افضل طريقة للادخار ، و الهروب من التضخم فى الجنيه؟؟ و ايه موضوع الاوعية ادخارية ؟

[Ladawy]

الســـلام عليكم و رحمة الله وبركاته

الاخوة الكرام

بقابل هنا موضوعات كتير بتتكلم عن الدهب ، و العملات ، و طرق حفظ قيمة المدخرات .... الخ

و انا محتار لإن معايا مبلغ صغير و عاوز بقدر الامكان احافظ على قيمته الشرائية
لو كان الوضع الاقتصادى و الحال فى البلد مستقر كنت سيبته مرمى فى البيت زى ما هو و ماشغلتش بالى

لكن القيمة بتقل ،، و الاسعار بتزيد ... و الفلوس دى المفروض هاتكون بداية الطريق لو الواحد دخل فى مشروع زواج و متطلباته :)


فى موضوع من المواضيع العضو المحترم Imhotep أوصى بما يسمى بالاوعية الادخارية

و انا ماعنديش اى فكرة عنها ،، و قولت ادور على النت و وجهت بحثى لبنك فيصل الاسلامى علشان الواحد يكون مطمئن إن فلوسه لن يشوبها ربا أو محرمات ... لكن الموقع بتاعهم عقيم و مافهمتش منه حاجة

قولت اتوجه اليكم بالاستفسار
و اتمنى تفيدونى

و شكــــــــــرا لكم

[Imhotep]

الاوعية الادخارية معناها ببساطة الطريقة الاستثمارية او الشكل الاستثمارى اللى البنك هيحط فيها فلوسك كمودع فى البنك. . . يعنى من الاخر البنك بيبيع منتجات استثمارية انت بتشترك فيها. . . اشهرها طبعا الودائع و الشهادات و حسابات التوفير بمددها المعروفة يومية او شهرية او ربع سنوية او سنوية و خلافه. . . البنك بقى بياخد فلوسك و اما بيمول بيها القروص التمويلية و ده المفروض هو الوظيفة الاستسية للبنوك انها تمول المشروعات الاقتصادية للافراد او الشركات. . . او البنوك بتعمل صناديق استثمارية مختلفة بيبقى ليها محافظ استثمار متنوعة الاصول تعمل فى البورصة مثلا او غيرها من المجالات الاستثمارية. . . و مادام المبلغ اللى معاك صغير و كمان ممكن تحتاجه قريب يبقى الافضل تخليه فى متناول ايدك من خلال اى وعاء ادخارى فى البنك اللى تستريحله لان فى حالتك استثمار طويل الاجل زى الدهب مش هيبقى مناسب ليك اوى. . . طبعا لو تقدر تبتدى اقساط شقة هيبقى انسب الحلول بالنسبة لك

[Ladawy]

اشكـــــــرك على سرعة ردك افادتك

سؤال : هل الاوعية الادخارية فى العموم افضل من الحسابات الجارية بالنسبة لـ نسبة الربح ؟

# ولا الحسابات الجارية دى تندرج تحت مسمى الاوعية الادخارية و انا اللى مافهمتش كويس :)
^^^
لو دا الكلام الصحيح ،، يبقى انا قصدى افاضل بين الحسابات الجارية و شهادة الـ 3 سنين مثلا بتاعت بنك فيصل

لإنى اثناء البحث لقيت ناس ان متوسط العائد 6% ، و توزيعه ربع سنوى لكن الـ 6% دى على السنة مش ربع سنة
يعنى لو 10 آلاف ، يبقى عائدهم 600 ج / 4 (ربع سنوى ) = 150 ج !

# لو دا صحيح يبقى ايه سر شهرة بنك فيصل !! دا البوسطة عائدها فى الحساب الجارى 10% تقريبا

[Imhotep]

الاوعية الادخارية دى مسمى عام تطلقه البنوك على منتجاتها فمتشغلش بالك بيه. . . اللى محتاج تفاضل بينه هو الوسيلة اللى تعطيك افضل عائد. . . و حاليا مفيش افضل من الشهادات اللى مدتها 3 سنين بعائد 12.5%. . . الحسابات الجارية غالبا لا تعطى فايدة مع ان فى بعض البنوك بتدى عليها فايدة بس مش كبيرة اوى . . . حسابات التوفير العادية السنوية نسبتها تدور حول7%. . . بس ميزتها انها مش بتلزمك انك تحط الفلوس لمدة معينة و متسحبهاش خلالها و الا هتخسر زى ما بتعمل الشهادات اللى مدتها 3 سنين

[h_shahin]

الحساب الجارى فى أغلب البنوك عبارة عن خدمة للحفاظ على الفلوس من السرقة و تقليل تكاليف تداولها
يعنى لو واحد عنده مليون جنيه بيتاجر بيهم
إيه الأفضل ليه ؟
إنه يحطهم فى خزنة عنده فى الشركة و يعمل إحتياطات أمنية مكلفة علشان ما تتسرقش
أو إنه يحطهم فى البنك بمصاريف بسيطة البنك يحافظ عليهم و يحميهم و فى نفس الوقت يقدر يصرف منهم فى أى وقت و بمرونه أكبر عن طريق الشيكات إللى هى وسيلة أأمن من الكاش فى الدفع

و الحساب الجارى فى أغلب البنوك مفيش عليه عائد هى مجرد خدمة البنك بيقدمها فى مقابل مصروفات سنوية بياخدها البنك

الحساب الجارى بيستخدم للى عنده إلتزامات يومية أو أسبوعية و على طول بيصرف أو بيودع فلوس فى الحساب

لكن فى البنوك الإسلامية و بعض البنوك الأخرى و لجذب العملاء بيعملوا فوايد على أرصدة الحسابات الجارية لكن الفوايد دى بتبقى بسعر قليل قوى

أما الودائع و الشهادات و الصكوك فدى عبارة عن وعاء إستثمارى يعنى بتدى فلوسك للبنك لفترة محددة علشان يشغلهالك نظير فائدة ثابتة أو متغيرة حسب نوع الوديعة ميزتها إن عائدها أكبر و عيبها إن الفلوس بتفضل متجمدة طول فترة الوديعة أو الشهادة ما تقدرش تصرف منها ولا تضيف عليه و لو حبيت تصرف الفلوس قبل ما تنتهى فترة الوديعة بيتخصم من الفلوس جزء نظير عدم الإلتزام بالفترة المحددة للوديعة

الودائع تفيد إللى معاه مبلغ زائد عن حاجته لفترة طويلة نسبيا (سنة كاملة مثلا) و عايز يستفيد بالفلوس دى

فيه نوع ثالث و هو حساب الإدخار
و ده بيجمع ما بين مرونة الحساب الجارى و عائد الوديعة
و حساب التوفير معمول للى عايز يحوش فى مكان آمن و فى نفس الوقت مش بيفكر يسحب إلا على فترات متباعدة يعنى مش كل يوم أو كل أسبوع و كمان مش كل شهر
حساب الإدخار عيبه إنه ما بيديش إمكانية لإستخدام الشيكات فى الصرف منه

دى أهم تلات أشكال للحسابات البنكية

باقى بس الفرق بين البنوك الإسلامية و غير الإسلامية
البنوك غير الإسلامية بتدى أرباح ثابتة على الودائع مهما كان حال البنك (خسارن أو كسبان بأقل من نسبة الربح أو أكتر من نسبة الربح)
البنوك الإسلامية بتدى أرباح على الودائع حسب نسبة المكسب اللى تحققت من إستثمار الفلوس و ممكن كمان تتحقق خسارة و يتحملها العميل و لو إن ده عمره ما حصل (بمعنى إن صاحب الوديعة بيتحمل الربح أو الخسارة بدون تحدييد سعر ثابت للربح أو الخسارة)

[Ladawy]

كدا تمام وصلت الفكرة

جــــــــــزاكم الله خيرا على الافادة

و يا رب ييسرلى الطريق لاتخاذ القرار السليم فى الموضوع ده :)