حد عنده فكره عن تليفزيون توشيبا ال3d الجديد بدون نظاره

[Ahmed_Adham]

انا بفكر جديا فى الجهاز دة قريب ان شاء الله ياريت تدينا تقرير بسيط عن ال 3d مقارنة بال جى لو كنت جربت ال جى فى ال 3d

انا عارف ان نضارة سامسونج الجديدة حلوة وخفيفة اوى ومش متعبة زى الموديلات القديمة لكن انا عايز اسال على موضوع الزغلله والصداع والكلام دة لسة موجود ولا انتهى
واية رايك فى المباريات الكورة
هل فى تغبيش او تظليل بيحصل فى الشاشة فى الحركات السريعة ؟
ربنا يباركلك فيها شاشة تحفة بجد

+11111111111

ياريت تقرير وبالصور وبالمعلومات الممله كمان

ربنا يبارك لك فى الجهاز يارب

منتظرين ان شاء الله يا استاذ احمد

مش عارف أقولكو ايه يا جماعه. الجهاز ممتاز جدا وهوه أعلى جهاز في سامسونج بما ان مفيش فئه أعلى من ال 8 الا الفئه 9 اللي نزل منها جهاز واحد 75 بوصه وسعره فوق الخيال. أنا مجربتش 3d غيره بس أنا واخد قرار اني مشتريش أي تليفزيونات غير من سامسونج بعد ما كنت جايب قبل كده lcd من توشيبا ومعجبنيش في الاضائه بتاعته (كان توشيبا رجزا) وبعدين جبت سامسونج lcd سيرس 4 وعجبني جدا مع انه بنفس الفئه السعريه بتاع توشيبا رجزا بس فرق الصوره واضح.

جبت بقى سامسونج es8000 في شهر 7 اللي فات وعلى فكره مكنش شوفته عند حد قبل كده بس انا كنت لسه مجهز شقه وقلت مش هحس بالشقه الجديده الا بتليفزيون جديد فاديتها سيرش على أمازون

Amazon.com: Samsung UN46ES8000 46-Inch 1080p 240Hz 3D Slim LED HDTV (Silver): Electronics

هتلاقو في الصفحه دي تحت مقارنه بين فئات سامسونج من أول الفئه 4 لحد 8 وكل جهاز فيها وسامسونج عامله معيار غير التردد اللي بالهرتز (اللي بالمناسبه في التليفزيون ده 240 هرتزمش 120 زي اجهزه تانيه) والمعيار ده اسمه CMR وطبعا الفئه التامنه هيه اعلى درجه في المعيار ده 960.

الصوره ممتازه ومفيش فليكر في الصوره أبدا. أنا مش كييف كورش فمش بشوف فيه كوره خالص بس بلعب بلاي ستيشن ألعاب اكشن وشوتينج وبشوف أفلام أكشن ومفيش أي مشكله الصوره سريعه والاضاءه قويه والتليفزيون فيه أوبشنز بالعبط وصوته ممتاز جدا وممكن تحول صوره عاديه الى 3d بس مش بتبقى حلوه زي لما تكون الصوره 3d من الاساس وبنزل أفلام 3d من على النت وبتشتغل عليه عادي والترجمه العربي شغاله تمام وفيه تكبير للخط بتاع الترجمه وبرنامج الفلاشه حلو وممكن تشغل صور مع أغنيه slide show وتختار تأثيرات تتابع الصور.

بييجي معاه ريموتين. واحد عادي وواحد تتش بس أنا بستخدم العادي عشان كل استخدامنا للريموت هوه زرار الباور واحنا بنتفرج على التليفزيون الا لما بشغل الفلاشه بحتاج ريموت التليفزيون. الريموت التتش شبه مفيهوش زراير واستخدامه ليه طريقه غريبه شويه كنت لعبت بيه شويه أول ما جبت التليفزيون وبعدين ركنته.

بالنسبه للنت أنا مش عارف أشغله عشان معنديش الا usb بتاع فودافون وطالع عيني عشان أدخل dsl ومش عارف أركب خط أرضي عشان مفيش بوكس على البيت وده طبعا حارمني من امكانيات كتير في التليفزيون. التليفزيون فيه مكان يركب فيه واير نت وفيه وايرلس built in بدون الحاجه للدونجل وبالمناسبه الكاميرا مش بتشتغل الا لما يكون فيه شبكه نت وده تقريبا العيب الوحيد اللي أنا شايفه في التليفزيون غير كده التليفزيون ممتاز والموديل ده يعتبر البورش والفيراري بتاع التليفزيونات.

هوه صنع مصر على فكره وسعره بره نفس سعر مصر بس لو هتجيبه من بره هتدفع جمارك وشحن فشراه من مصر احسن. فيه ميزه كمان فيه وهيه evolution kit ودي قطعه اضافيه في حجم راوتر كده بتركب ورا التليفزيون وكل سنه سامسونج هتنزل منها اصدار. فايدتها ايه؟ بتعمل تحديثات هاردوير للشاشه وده مختلف عن تحديث السوفتوير اللي ممكن تنزله من على النت. يعني لما سامسونج تعمل تكنولوجيا جديده في جوده الصوره مثلا بدل ما تجيب تليفزيون جديد تجيب الكيت دي وتبقى عملت أبجريد. فيه ناس جابتها بره مصر وبتقول انها ملهاش لازمه وفيه ناس بتقول انها حست بفرق بس أنا معتقدش ان هيبان جدواها الا لما يفوت كام سنه على التليفزيون يعني كمان 3 سنين الواحد ممكن يجيب أخر اصدار ليها وقتها وفي الغالب هيكون فيها جديد.

بالنسبه للنضارات وال 3d فمفيش زغلله الا لما يكون فيه اضاءه قويه يعني أحسن 3d لما يكون النور مطفي انما وهوه منور مش بيبقى فيه اندماج منك في الاحداث قوي. النضارات أنا مجربتش غيرها قبل كده بس هيه خفيفه ومش بتتعب خالص (انا مش بلبس نضاره نظر على فكره فلو كانت بتضايق كنت هحس بسرعه) بس مش بتتشحن ولكن شغاله بحجاره صغيره مبططه كده وبتيجي معاها. التليفزيون كان معاه 4 نضارات.

كنت جايب فيلم ........ary عن البحر والاسماك وكل ما نشغله بنتي تقف قدام التليفزيون وتمسك السمك في الهوا (وهيه لابسه النضاره) وفي فيلم سبايدر مان أخر واحد كان وهوه بيطير بتحس انه هينط في وشك وفيلم final destination 5 لما كان الكوبري بيقع كنت تحس ان سيخ الحديد هيدخل في عينك. لاء تليفزيون عيشه عيشه وأنصح أي حد عايز 3d محترم انه يجيبه.

عندي تحفظ بسيط. ممكن يكون فيه موديل تاني سواء من سامسونج او غيرها أقل شويه في السعر وبامكانيات قريبه الى حد ما فأنا مجربتش عشان احكم لكن لو هنتكلم عن es8000 بالتحديد فهيه دي كانت تجربتي.

ملحوظه أخيره: التليفزيون سعره نزل بره حوالي 400 دولار فمتوقع نزول سعره في مصر قريب بس هوه لحد 3 أسابيع بالظبط كان لسه على سعره 14 ألف بالنسبه لل 46 بوصه.

لو فيه أسئله عن حاجه مجتش في التقرير اسألوني.

[Ahmed_Adham]

نسيت أقول حاجه. هوه فيه تحكم بالتليفزيون من خلال الصوت او حركات الإيد كمان بس مش بستخدمهم عشان الواحد بيغير القنوات ويعلي ويوطي الصوت من الريسيفر وكل اللي بيحتاجه من التليفزيون زرار الباور بس ممكن تطفيه وتشغله بصوتك بدون الريموت تقوله tv power off أو tv power on.

تكنولوبيا...

[mohaakotb]

يا جماعة طب انا اشتريت سامسونج بلازما + e490 دلوقتي جربت اعرض عليه 3d ومش حاسس بفرق يعني نزلت lion king hbs و دمج الصورتين وبشغل النضارة والنغمشة بتروح بس مش حاسس بأي 3d غير لما كنت في الستور كان 3d زي الفل !!!!

[Ahmed_Adham]

يا جماعة طب انا اشتريت سامسونج بلازما + e490 دلوقتي جربت اعرض عليه 3d ومش حاسس بفرق يعني نزلت lion king hbs و دمج الصورتين وبشغل النضارة والنغمشة بتروح بس مش حاسس بأي 3d غير لما كنت في الستور كان 3d زي الفل !!!!

لما بتدوس على زرار 3d في ريموت التليفزيون بيطلع 3 اختيارات

أول واحد في اليمين صورتين تحت بعض
اللي في النص صورتين جنب بعض
اللي على الشمال مكتوب عليه 2d to 3d

لو منزل الفيلم من على النت اختار الاختيار اللي في النص
لو الفيلم أصلي أو اسطوانه بلاي ستيشن اختار الاختيار اللي على الشمال

[mohaakotb]

تمام مانا بعمل كده وزي ما قلت الصورة بتندمج فعلا !! بس مش حاسس بأي 3d
ممكن تقولي انت بتسغله ازاي من فلاسة ولا من اللاب علي طول ؟ وجايب الكابل منين ؟

[mido_soliman]

العيب من الفيلم بتاعك نزل حاجة فيها 3d قوى زى avengers او final distination 5 او saw5 او titanic او journey to the mysterious island 2 ونزل الفيلم باكبر حجم تقدر تنزلة وعيش :)

[mido_soliman]

وفى finding nemo كمان وهمى :)

[mohaakotb]

انت قصدك الاحجام ال 20 جيجا وكده ؟ ده انا اقعد سهرين انزل في فيلم :)
ومقولتليش بتشغل الفيلم ازاي من فلاشة ولا من اللاب

[Ahmed_Adham]

تمام مانا بعمل كده وزي ما قلت الصورة بتندمج فعلا !! بس مش حاسس بأي 3d
ممكن تقولي انت بتسغله ازاي من فلاسة ولا من اللاب علي طول ؟ وجايب الكابل منين ؟

انا بشغل الافلام من الفلاشه وبالنسبه للبلاي ستيشن عندي كابل Monster

[M.ABDOU]

يا ريت بقى حضرتك تقولنا على موقع افلام جامد 3d

[Ahmed_Adham]

يا ريت بقى حضرتك تقولنا على موقع افلام جامد 3d

ده الموقع
Browse Movie - YIFY Torrents

ودي الافلام ال 3d
Browse Movie - YIFY Torrents

[ahmedfathi]

ده الموقع
browse movie - yify torrents

ودي الافلام ال 3d
browse movie - yify torrents

هى الافلام دى مترجمه بالعربى ولا لا؟

[Ahmed_Adham]

هى الافلام دى مترجمه بالعربى ولا لا؟

نزل الترجمه من Subscene - Passionate about good subtitles

[windofchange]

شكرا جدا علي المشاركة ا احمد ادهم بس انت قلت "الصوره ممتازه ومفيش فليكر في الصوره أبدا. أنا مش كييف كورش فمش بشوف فيه كوره خالص بس بلعب بلاي ستيشن ألعاب اكشن وشوتينج وبشوف أفلام أكشن ومفيش أي مشكله الصوره سريعه والاضاءه قويه والتليفزيون فيه أوبشنز بالعبط وصوته ممتاز جدا وممكن تحول صوره عاديه الى 3d بس مش بتبقى حلوه زي لما تكون الصوره 3d من الاساس وبنزل أفلام 3d من على النت وبتشتغل عليه عادي والترجمه العربي شغاله تمام وفيه تكبير للخط بتاع الترجمه وبرنامج الفلاشه حلو وممكن تشغل صور مع أغنيه slide show وتختار تأثيرات تتابع الصور.
"
تكبير خط الترجمة من فيلم علي قناة فالدش ولا فيلم شغال من فلاشة ولا ايه بالظبط؟

[Ahmed_Adham]

شكرا جدا علي المشاركة ا احمد ادهم بس انت قلت "الصوره ممتازه ومفيش فليكر في الصوره أبدا. أنا مش كييف كورش فمش بشوف فيه كوره خالص بس بلعب بلاي ستيشن ألعاب اكشن وشوتينج وبشوف أفلام أكشن ومفيش أي مشكله الصوره سريعه والاضاءه قويه والتليفزيون فيه أوبشنز بالعبط وصوته ممتاز جدا وممكن تحول صوره عاديه الى 3d بس مش بتبقى حلوه زي لما تكون الصوره 3d من الاساس وبنزل أفلام 3d من على النت وبتشتغل عليه عادي والترجمه العربي شغاله تمام وفيه تكبير للخط بتاع الترجمه وبرنامج الفلاشه حلو وممكن تشغل صور مع أغنيه slide show وتختار تأثيرات تتابع الصور.
"
تكبير خط الترجمة من فيلم علي قناة فالدش ولا فيلم شغال من فلاشة ولا ايه بالظبط؟

من فيلم على الفلاشه وله فايل ترجمه منفصل عشان لو الترجمه مطبوعه في الفيلم (زي الافلام في الدش) التليفزيون مش هيعرف يغير فيها.