الجمال ولا النسب والعائله ..... ساعدونى !!!!

[Abo-Yousef]

السلام عليكم ورحمة الله وبركاته

انا عارف ان الرد جاى متأخر أوى ... بس كنت عاوز أقول معلومة زى ما باقى الأعضاء قالو وانا ذات نفسى اتحطيت فى الموقف ده فى يوم من الأيام ... لما تختار بين النسب ولا بين الجمال
اولا الجمال بعد الجواز هتلاقيه هيزول والطباع بتختلف وبتتغير وحلاوة الشكل والمظهر اللى كان قدام عينيك بعد الجواز والعشرة هتختفى اثاره بالعكس كمان هتلاقى اسلوب ومعاملة مختلفة عكس اللى كنت بتشوفها قبل الجواز وخدها منى نصيحة كأخ أكبر خد البنت اللى تحبك وابعد عن اللى انت تحبها بمعنى ان البنت اللى بتختارهالك والدتك بتبقى عارفه عنها كل حاجة واصلها وفصلها وعيله ونسب بيبقى يشرف لكن اللى انت هتختارها كشاب هتبص للمظاهر اللى شكلها حلو وبتلبس حلو ومتزوقه دايما ومش فى دماغها التدين ولا الصلاه ولا كل الكلام ده دى لا يؤتمن عليها فا من رأيي الشخصى خليك فى المتدينة وخليك مع النسب الكويس .. وده اهم كمان لان النسب هيأثر عليك نفسياً بعد الجواز وهتقول بعد كده يارتنى ما كنت وياريت اللى جرى ماكان وعاماً ربنا يكرمك ويكرم شبابنا المسلمين اجمعين

[casperinoo]

بص ياريس الشكل بيتنسي مع الوقت ..لو ملكة جمال لو طبعها وحش هتكرهها ..
والعكس صحيح لو شكلها عادي ومقبول بس روحها حلوه ودماغها كويسه يبقي هتعيش ملك ..

[Esam Mosaad]

والله راى الاخوه هنا تمام ومفيش عليه غبار
بس انا راى انك تصبر فتره مع نفسك عشان تعرف انت عاوز ايه
يعنى حاول انك تركز فى شغلك وتغير جو مثلا فى مكان مختلف

لحد متلاقى نفسك قادر تاخد القرار لان ده فى الاول والاخر هيبقى قرارك انت مش قرار حد تانى
وبعد كدا

حط فى دماغك انت شايف ان جوازك بعد كدا هيبقى جواز صالونات يعنى تبع الاهل
سعتها يبقى مش هتحتاج انك تستنى لان فى جواز الصالونات انت بدور على الاهل ولاخلاق والنسب وحسب كلامك ده متوفر فى البنت

لو انك عاوز قصه حب بقى بينك وبين واحده يبقى هتستنى لحد متقبلها فىشغلك او اى مكان عموما
وارجع واقول برضوا حتى لو صالونات الحب بيجى مع العشره

انا فى نفس موضوعك مع اختلاف انها متدينه واهلها بس كانت مشكلنا كتير
وبرضوا اهلى بيحولوا معايا بس انا تفكيرى كلوا فيها وبس وبمر بنفس حالتك
ولازم انى اخذ فتره لحد مفعلا اقدر انى انسى عشان مظلمش الى هتيجى بعد كدا معايا

وبعدين يا راجل انت بتقول انها اتخطبت ياريت انا البنت الى كنت خاطبها تتخطب سعتها مش هينفع افكر فيها تانى

قرب من ربنا وخذ قرارك لوحدك عشان مترجعش تقول انتوا الى ضغطوا عليه سواء من الاهل او الاصدقاء

[mody112]

السلام عليكم
يمكن يكون ردى متاخر ولكنى لسه شايف الموضوع ويمكن يكون فى حاجة فى كلامى تفيدك
اولا عليك بصلاة الاستخارة
ثانيا اذكرك بحديث رسول الله صلى الله عليه وسلم ( تنكح المراة لاربع لمالها ولجمالها ولحسبها ولدينها فاظفر بذات الدين تربت يداك ) والحديث معناه انه من اسباب الزواج من امراة اربع صفات المال والجمال والعائلة والدين ثم ينهى الرسول صلى الله عليه وسلم حديثه قائلا ان من فاز بامراة لها دين فهى افضل ممن لها باقى الصفات وبلا دين .
ثالثا الجمال يا اخى العزيز شىء مهم وكن الاهم منه هو المودة والرحمة فما الفائدة من ان تتزوج امراة جميلة ولكنها تكدر عليك حياتك وتحملك ما لا تطيق وانت تقول انك وقبل الزواج منها كرهت النساء وانت تراها متجملة وعلى سنجة عشرة فما بالك بعد الزواج هتخليك تكره حياتك وتتمنى لو انك لم تتزوجها ولكن بعد فوات الاوان .
رابعا انت بتقول ان ربنا وفقك لانسانة متربية ومحترمة ومتدينة ومن عائلة كريمة وابويك مرحبين بها وانت لك قبول من ناحيتهم ولكن هى ليست جميلة فهل انت تقيس جمالها على جمال خطيبتك الاولى ام الجمال بصفة عامة فانت قد ذكرت ان خطيبتك الاولى كانت جميلة جدا فلا يصح ان تقارن بها هذه الانسانة حتى لا تظلمها ولا تظلم نفسك .واعلم جيدا ان الجمال يزول ولكن ما يبقى هو المودة والرحمة والدين والاخلاق واعلم ايضا انه وبعد فترة من الزواج لن يفرق معك جمال زوجتك بقدر ما يفرق معك حسن معاملتها معك وخصوصا انك تقول ان خطيبتك الاولى معاملتها سيئة فسوف يزول الجمال سريعا ويبقى النكد .
واخيرا نصيحة من اخ اكبر مرت عليه تجارب كتير تزوج من تحبك ومن تعاملك المعاملة الحسنة ولا تتزمج من تحبها وانت مغرم بجمالها ولا تجعل الجمال هو اول شىء يجذبك للمراة حتى تتعرف عليها اكثر فيمكن ان يكون هذا الجمال يخفى وراءه اشاء اقبح بكثير .

[MOK3336]

انا هنصحك نصيحه لوجه الله فصورة نقاط
بص ياباشا
1- ولدتك ليها نظرة غيرك خالص وبدالوالدته موافقه عليها يبقي خلاص توكل علي الله وسيبك من دى حياتي و انا حر و الكلام ده والدتك هي اكتر واحده عارفه مصلحتك و بالذات في المواضيع دي
2- الجمال مش كل حاجة ممكن تكون جميله وفيها صفات كتير مش كويسة بغض النظر عن المسوى الإجتماعي
وده مش معناه ان مفيش وحده تكون حلوة و كويسة لأ طبعا ممكن تكون جميلة و كويسة جدا بس أكيد فيها حاجة مش موجوده ( لأن ربنا بيوزع رزقة علي العباد بالتساوى ) ممكن تكون وحده جميلة و محترمة بس مش بتخلف أو جمبلة و محترمة و بتخلف و أهلها يطلعوا عينك و هكذا و ممكن وحده تكون متوسطة الجمال أو مش جميلة بس فيها كل الصفات الحلوة
3- ودى أهم نقطة في الموضوع أن أنت بعد الجواز هتلاقي نفسك نظرتك اتغيرت خااالص عن نظرتك قبل الجواز
يعني مش هتبص علي جملها قد ما هتبص علي طبعها معاملتها لأهلك معاملتها معاك خوفها عليك و ممكن كمان تعجب بوحده أقل منها في الجمال لمجرد طريقه تعاملها
فموضوع الجمال ده الله يكرمك أخر حاجة تفكر فيها و توكل علي الله و ياريت تغير نمرتك عشام ايلي كنت انت خاطبها متتصلش بيك و انسي الموضوع الأولاني ده خاااالص

[Mohamed_Hamid]

حبيب قلبى. خد النصيحة من اخوك الكبير... متربية وبتصلى واهلها ناس محترمين... اللى يطلب اكثر من كدة يبقى بيهرج...الجمال مطلوب لكنه شئ نسبى واوعى تفكر فى الواحدة الجميلة اوى.. يكفى انك بتبصلها تبقى مرتاح هو ده الجمال مش انها تبقى شبه انجلينا جولى او غيرها.
طبعا البنت الأولانية دى... معلش مع احترامى دى تمسحها بأستيكة لأن اللى يبيعك تبيعه.. ودى ملهاش عازة وانت شوفت بعينك.
بالتوفيف ان شاء الله وربنا يرزقك الزوجة الصالحة

[BESO516]

انا شاكر جدا ليكو ياجماعه
انا اتفاجئت ان الموضوع اتفتح تااانى النهارده
وشكرا جدا لكل اللى قدموا النصيحه اللى فعلا ساعدتنى وفادتنى كتييييييييييييييييييييير اوووى

انا الحمدلله خطبت يوم الجمعه 6/28 وربنا يكملها على خير ان شاء الله

[#MAAM#]

انا شاكر جدا ليكو ياجماعه
انا اتفاجئت ان الموضوع اتفتح تااانى النهارده
وشكرا جدا لكل اللى قدموا النصيحه اللى فعلا ساعدتنى وفادتنى كتييييييييييييييييييييير اوووى

انا الحمدلله خطبت يوم الجمعه 6/28 وربنا يكملها على خير ان شاء الله

الف الف مبروووووووووووووك وربنا يتمملك على خير

[Mohamed_Hamid]

الف مبروك وربنا يتمم بخير :)

[Abo-Yousef]

الف مبرووك يا معلم وربنا يتمملك على خير .. حد جديد ولا اللى والدتك اختارتهالك ؟؟؟

[BESO516]

الف مبرووك يا معلم وربنا يتمملك على خير .. حد جديد ولا اللى والدتك اختارتهالك ؟؟؟

لا هى
خلالالاص قفلنا على الجديد والقديم (:

[Abo-Yousef]

لا هى
خلالالاص قفلنا على الجديد والقديم (:

الحمد لله ... الف الف مبرووووووووووك ... وربنا يتمملك على خييير

[mody112]

الف مبروك يا معلم وربنا يتمم لك بخير
بس متنساناش فى الليلة الكبيرة

[chicobon]

حضرتك مش شرط تخطب الانسة ديه ادي لنفسك فرصة لتعارف ببنات غيرها يعني لو مش مرتاح للبنت ديه اكيد في فرصة لتعارف علي بنات عائلات غيرها اما الي كانت خطيبتك الي يفضل انك تقطع علاقتك خالص بيها لانها مش موثوق بيها و مش تفكر بيها خالص ده الي اقدر اقوله

[Al-Farooq]

انت بتهرج ، واخدة مخطوبة وبتكلمك ، دي يا معلم بتلعب على ان اذا خاطيبها متجوزهاش يبقي انت الاستبن بتاعها ، يعني ممكن لو خطيبها خلع منها انت تلبسها ، ومش بعيد تبقي عارفه كام واحد تاني أحتياطي!

بقولك ايه ، انت شكلك مش هتريح بنت الناس اللى قابلتها فى النادى ، لو هتستندل وتستعيل وتقول بحب ومش بحب وشكلها واصلي وفصلي ، مصلحتك تبعد عن الاثنين ، وبلاش تبهدل البنت التانية معاك لو مش هتكون محترم معاها وتلعب بديلك بعد ما تتجوز او تفكر فى واحدة تانية وانت متجوزها او تطلع عقدك عليها ، بلاش معيله.

ومعلش على الحديه فى الكلام.