تقسط ولا تكيش

[محمد يوسف]

سلام عليكم ياشباب

كنت عايز أخد رأيكم فى موضوع بشكل عام

لو انت محتاج 4 حاجات ومعاك مبلغ مايكفيش.. وقدامك اختيارين : اما تشترى ال 4 حاجات تقسيط أو حاجة واحدة منهم كاش.. تقسط 4 ولا تكيش 1 ؟

[Ahmed_selmy]

على حسب نوع الحاجه واهميتها وظروف القسط , يعنى حيبقى اد ايه فى الشهر وعلى مدة اد ايه وغيره.
اعتقد حضرتك اللى المفروض تحدد وتوازن بين احياجاتك و ميزانيتك, يعنى القسط حياثر عليك جامد ولا لا , هل حينفع اصلا ال4 قسط معاك , هل المقدم لو اتقسم على 4 حيخلى مجمل الاقساط اد ايه ؟؟
فى اسئله كتير حضرتك اللى المفروض توزنها. وعموما انا راى الشخصى ان لو الحاجه مش ضروريه قوى قوى يبقى ممكن تستنى لحد ما فلوسها تيجى.
والله المستعان.

[أحمد كمال]

محتاج و لا عايز ؟ فرق كبير

[محمد يوسف]

على حسب نوع الحاجه واهميتها وظروف القسط , يعنى حيبقى اد ايه فى الشهر وعلى مدة اد ايه وغيره.
اعتقد حضرتك اللى المفروض تحدد وتوازن بين احياجاتك و ميزانيتك, يعنى القسط حياثر عليك جامد ولا لا , هل حينفع اصلا ال4 قسط معاك , هل المقدم لو اتقسم على 4 حيخلى مجمل الاقساط اد ايه ؟؟
فى اسئله كتير حضرتك اللى المفروض توزنها. وعموما انا راى الشخصى ان لو الحاجه مش ضروريه قوى قوى يبقى ممكن تستنى لحد ما فلوسها تيجى.
والله المستعان.

هو أنا باتكلم فى العموم ياباشا لأنى باشوف ناس كتير مدبسة روحها فى 100 قسط ومش عارف دول بيعيشوا ازاى..أنا شخصيا أفضل أشترى الحاجة كاش لو معايا فلوسها ..بس الناس مش زى بعضها عشان كده حابب أعرف رأى أكبر عدد من حبايبنا فى المنتدى

[محمد يوسف]

محتاج و لا عايز ؟ فرق كبير

فرق كبير وكلام كبير مايطلعش الا من الكبير

انا فاهم قصدك .. الاحتياج بيبقى ضرورة ملحة لكن عايز بتبقى رغبة قد تكون كمالية

لكن خد بالك هذا المقياس غير موحد عند الجميع.. يعنى أنا مثلا ليا واحد صاحبى حلم حياته يشترى أى فون 5 أبو 6000 جنيه وبيعمل شقلباظات عشان يشتريه ومحسسنى انه أمل حياته مع ان دى بالنسبة لى شخصيا حاجة أتفه من التفاهة وحرام أدفع 6000 جنيه فى أى تليفون مهما كان

[أحمد كمال]

فرق كبير وكلام كبير مايطلعش الا من الكبير

انا فاهم قصدك .. الاحتياج بيبقى ضرورة ملحة لكن عايز بتبقى رغبة قد تكون كمالية

لكن خد بالك هذا المقياس غير موحد عند الجميع.. يعنى أنا مثلا ليا واحد صاحبى حلم حياته يشترى أى فون 5 أبو 6000 جنيه وبيعمل شقلباظات عشان يشتريه ومحسسنى انه أمل حياته مع ان دى بالنسبة لى شخصيا حاجة أتفه من التفاهة وحرام أدفع 6000 جنيه فى أى تليفون مهما كان

مانا قصدي انت عايز الاربع حاجات و لا محتاجهم

يعني لو مثلا انت بتفرش بيت و بتتكلم في تلاجة و بوتاجاز و غسالة و تكييف يبقى انت محتاجهم .....

بس لو بتتكلم في Home theater و ايفون (زي ما انت قلت) و كده تبقى عايز .......

[ahmedteam]

بطبعى محبش الاقساط يبقى حاجه واحده كاش احسن

[mohamed_selim]

كاش او جمعيات بس مش تقسيط مع البنك
و طبعا عشان ازنق نفسى فى التزامات (جمعيات) لازم الحاجه تكون اساسيه (مش ايفون مثلا) و يكون لازم اجيبها دلوقتى لان لو استنت ممكن تغلا او ميبقاش ليها لازمه بالنسبالى

[dede_dodo88]

أنا مبحبش حوار التقسيط ده..
بس مبحبش أتعامل بالكاش برضه.. فمقضيها credit حتى لو معايا المبلغ كاش..

[eslamrace]

لو الموضوع فى شراء اصل او عقار او حاجه حيفرق سعرها بعد مخلص القسط موافق انى اقسط طالما بدون فوايد
لو رفاهيات يبقى هفكر كتييير وبعدين كاش لو قررت انى فى احتياج ليها

[mohammedabdallh]

كاش بكره حاجه اسمها قسط

[محمد يوسف]

أنا مبحبش حوار التقسيط ده..
بس مبحبش أتعامل بالكاش برضه.. فمقضيها credit حتى لو معايا المبلغ كاش..

طب ماهو الكريدت عبارة عن تقسيط مع البنك .. الا لو بتسحب من رصيدك يبقى كاش

[shaddadfalcon1]

الشعب المصري بتاع الزنقه او زي مابيوقول لييلة الأمتحات

انا دلوقتي دايما بزنق نفسي عشان اعمل حاجه واحوش ومببعذقش الفلوس

وبالتالي ممكن تقسط ويبقي عندك 4 حاجات بدل حاجه واحده بس تظبطها عشان متزنقش نفسك بعدين وتضطر تبيع حاجه منهم بخساره

[Abo Yasso]

أنا مبحبش حوار التقسيط ده..
بس مبحبش أتعامل بالكاش برضه.. فمقضيها credit حتى لو معايا المبلغ كاش..

+111111111

[dede_dodo88]

طب ماهو الكريدت عبارة عن تقسيط مع البنك .. الا لو بتسحب من رصيدك يبقى كاش

الكريدت غير التقسيط..
التقسيط أنت مجبر تدفع أقساط دورية كل شهر مثلاً و لو التقسيط بفايدة فمش كل اللي بتسدده ده بيقلل من قيمة أصل المبلغ عشان في جزء بيروح لسداد الفايدة..
و حتى لو ربنا فرجها و حبيت تسدد باقي المبلغ دفعة واحدة ففي الغالب بيبقى في غرامة..

الكريدت أنا بشتري دلوقتي و بدفع بعدين براحتي
و بيبقى ليا فترة سماح أسدد فيها المبلغ بدون فوايد و لو عديت الفترة دي بيتحسب عليا فايدة..
و في الغالب بسيبه يحسب عليا الفايدة.. lol
بس الفكرة هنا أني مش مجبر أسدد في وقت معين + كده يعتبر أن معاك فلوس زيادة بمعنى أن الكاش اللي في جيبك لسة معاك بالأضافة أن ليك credit limit تقدر تستخدمه في أي وقت..