اطلقها ولا اخاف علي مستقبل ابني

[محتاج النصيحه]

السلام عليكم و رحمة الله و بركاته

الحمد لله و الصلاة و السلام علي رسول الله و علي اله و صحبه اجميعن



هذا الحساب تم عمله فقط لعرض مشكله احتاج لمن يشاركني في التفكير فيها

اريد التفكير بعقلانيه دون تجريح في اي طرف او خوض في مواضيع جانبيه لان المشكلة كبيرة و سيتوقف عليها قرار بالطلاق و ضياع مستقبل طفل لم يكمل العام الاول من عمره للاسف


المشكلة تتلخص في ان : -

- زوجتي امرأه عنيدة لابعد الحدود

- عقلها صغير جدا و دائما سيئه الظن بكل الناس حتي انا زوجها و تأخذ الكلام علي معناه السيئ دائما
لدرجة انها قاطعت زوجة اخي بسبب ان زوجة اخلي قالت لها في يوم ما كانت بيني و بينها شجار " مالك يا فلانه انت ليه كل يوم و التاني بتعملوا مشاكل مع بعض كتير انتي مش ناقصك حاجة و كل حاجة عندك متوفرة .. اومال لو كان فلان (انا ) مقصر معاكي كنتي عملتي ايه "
هذا هو نص حوار بين زوجة اخي و بينها
و زوجتي فهمت الكلام علي انها تحسدها و باصالها في حياتها و منذ هذا اليوم و هي قاطعتها
كما انها تكرة ابنة اخي ذات الخمس سنوات بسبب انها متكلمة و شقيه بعض الشيء و هي تري انها قليلة الادب و ابوها و امها لم يربوها

- دائمة الشجار و النكد لاتفهة الاسباب كعادة كل الزوجات

- لا تستمع لكلام احد سواء انا او احد من اهلها .. فقط نفسها

- والدها متوفي منذ ان كانت صغيرة و تربت في بيت كله سيدات نظرا لان ليس لها اخوه رجال

- لها من الاخوات السيدات سبعة اخوات منهم 5 مطلقات و تزوجن زواجا ثانيا

- كبير العائلة هي الام و هي اميه ليست متعلمة و كذلك هي من الطبقة الشعبيه جدا



تلك هي مواصفات السيئه لزوجتي و ام طفلي



انا متزوج منها منذ اقل من عامين الان و تحدث بيننا مشاجرات كثيرة تكاد تكون كل اسبوع باسباب في نظري انها تافهة للغاية و لكنها تستطيع ان تجعل منها مشكلة كبيرة للغايه

و انا احوال ان التمس لها الاعاذار و بالفعل اسامحها دائما

المشكلة الكبري التي اريد ان اخذ رأيكم بها الان

حدثت مشاجرة بيني و بينها منذ شهر تقريبا و هذا هو الحوار بالنص كما حدث بيني و بينها

قبل هذا الشجار كان هناك شجار اخر قبلة بسبب ابنة اخي اني اضع صوره لها علي الموبايل و لكني لم اعطها اهتماما و نهرتها بشكل بسيط علي ان ما تفعلة يسبب لي الضيق


و ليكم نص الشجار

هي : انا هانزل اروح لفلانه اسلم عليها عشان رجعت من السفر

انا : ماشي هاتروحي امتي ؟

هي : لسة مش عارفه بس تعالي وصلني

انا : طيب اعرفي و قوليلي


و بعد فترة اتصل بي صديقي لكي اذهب معه بعد صلاة الجمعة علي طريق مصر اسكندرية الصحراوي حتي يجرب عربيته الجديدة و يفتح موتورها .. و اتفقت معهة اننا نذهب و نرجع قبل الساعة السابعة مساءا

ارتدت ملابسي و اتجهت الي باب النزول فقالت لي زوجتي

هي: رايح فين ؟

انا نازل مع واحد صاحبي عشان يفتح العربية بتاعتة و مش هاتأخر

هي : هو انت مش هاتوصلي

انا : ما انا هارجع علي 7

هي : لا انت قولتله هاتطلع علي مصر اسكندرية الصحراوي و انت كده هاتتأخر جدا .. انت دايما كده تبدي كل الناس عليا .. هو انا مش مهمة عندك للدرجة دي

انا : اهدي بس انا مش هاتأخر ولا حاجة ماتقلقيش و مافيش داعلي لكلامك ده الموضوع مش مستاهل

هي بصوت عالي : اهدي ايه انا متفقة مع صاحبتي و انت قايلي هاتوصلني اول ما يتصل بيك صاحبك تطلع تجري عليه و تنفزلة اللي هو عاوزه

انا : وطي صوتك و اتكلمي باسلوب كويس و قولتلك مش هاتأخر ماتعمليش خناقة من مفيش

هي : طيب و ان اتأخرت هاعمل انا ايه بقي ؟

انا : هابقي اكلمك و تبقي تاخدي تاكسي دي كلها اربع محطات يعني مش محتاجه

هي : لا انا مش هاركب تاكسيات مابقاش عندي عربيتي و تقولي اروح اركب تاكسي و انا قولتلك قبل كده تصلحلي عربيتي ( سيارتها تحتاج الي بطارية جديدة و نحن في اواخر الشهر )

انا : ما انتي عارفة مصلحتش عربيتك ليه بتدخلي في مواضيع فرعية ليه خلينا في موضوعنا

هي : ما انا لو كانت عربيتي سليمة ماكونتش هاتحوج ليك

انا : اتكلمي بأدب بقولك .. و انتي لو عربيتك سليمة و انا مش عاوزك تركبي عربيتك مش هاتركبيها

هي : ليه ان شاء الله انت متجوزني و انا معاياي عربيتي مش انت اللي جايبهالي عشان تمنعني منها

انا : خلاص اقفلي الموضوع بقي و اركبي تاكسي و لو مش عاوزة تركبي تاكسي ماتروحيش النهاردة خالص

و اتجهت الي الباب للنزول

هي بنظرة تحدي و عند : طيب ماشي هاركب تاكسي و هانزل

انا و الباب مفتوح : طيب انزلي

و قامت رازعة الباب في وجهي بشكل مستفز جدا و كان البواب في نفس اوقت يتكلم مع جاري في الشقة المقابلة لي و بالطبع لاحظوا

دخلت مرة اخري للشقة و قلت لها

انا بكل عصبيه : انتي بترزعي الباب في وشي ؟

هي : انا مرزعتش الباب انت اللي رزعته

انا : انا مالمستش الباب اساسا .. انتي بترزعي الباب في وشي بالطريقة دي ؟؟ طيب مافيش نزول اصلا النهارده

و خرجت و نزلت لصديقي و اتجهنا الي طريق مصر اسكندرية الصحراوي

و في الطريق قال لي صديقي من باب المداعبة ( ماتيجي نكمل علي اسكندرية و ناكل سمك ) فوافقته و بالفعل اتجهنا للاسكندريه

و في السادسة مساءا الق اتصالا علي الموبايل منها و رديت عليها

هي : انا نزلت و روحت عند اختي لو حابب اننا نتكلم مع بعض بشكل محترم تعالي عندها و نتكلم

انا : انتي نزلتي من البيت غصب عني ؟؟ طيب خليكي عندك بقي و ماترجعيش

و اغلقت الخط في وجهها

رجعنا من الاسكندرية انا و صديقي الساعة 12 مساءا

و المح في الجراج ان سيارتها قد تحركت من مكانها و مركونة في مكان اخر

دخلت البيت و لقيتها تبدل ملابسها فقلت لها بكل هدوء

انا : انتي خرجتي من البيت من غير اذني ؟؟

هي : اه خرجت و هاخرج كل مرة .. مش انا اللي يتقالي لو مش عاوز اركبك العربية مش هاركبهالك .. فوق من اللي انت فيه ده

انا بكل هدوء اتجهت الي الدولاب و جمعت اغراضي و ملابسي و تركت لها البيت و قبل ان انزل تركت لها مبلغ 1000 جنيه للمصاريف .. قالت لي

هي : الفلوس دي مش هاتكفي حاجة هات فلوس تاني

لم ارد بكلمه و خرجت من البيت


مر حوالي اسبوع من هذا الشجار ثم جائني تليفون الساعة 12 بالليل من احد اصدقائي يقول لي ابنك سخن و زوجتك اخذته علي المستشفي الفلانيه و معها زوجتي و زوجة صديقنا الاخر

اتجهت بسرعة الي المستشفي و اتجهت علي الفور لابني الذي تحمله امه

مددت يدي لاخذ ابني و هي لفت ظهرها لي و اتجهت بعيدا عني لكي لا اخذه

اتجهت ورائها لاخذه بعصبيه منها فقالت لي بصوت مسموع من زوجات اصدقائي ( ابعد عنه لحسن اخلي منظرك وحش ادام الناس دي كلها )

انا : هاتي الواد بدل ما انا اضربك ادام الناس دي كلها

زوجات اصدقائي : سيبيه يا فلانة هو مش هايخطفة و بعدين ماتفرجوش الناس علينا في المستشفي

و اخذت ابني و حضنته و بالفعل كان درجة حرارتة 40

بعد دقائق جاءت اخت زوجتي الكبري و احدى صديقاتها لتطمئن علي ابني و قامت بمداعبته و انا احمله

و بعد دقائق قالت لي اخت زوجتي

اختي زوجتي : ياعيني دا عمال يبص لمامته .. هاته يا فلان خليها تشيلة شويه

زوجة صديقي : اديهولها يا فلان شويه

انا : لا لا لا لا لا الولد هايفضل معايا لحد ما امشي من هنا

اخت زوجتي بكل عصبيه و صوت مرتفع : ايه ده ايه ده ماينفعش اللي انت بتعمله ده .. ده انت غيرب اوي يا اخي

و اتجهت الي حيث تقف زوجتي ... ايه اللي بيعمله ده .. دا احرجني جدااا ..لا مايصحش اللي عمال يعمله ده ابدا .. بنفس الطريقة المستفزة و الصوت العالي لدرجة ان كل من في المستشفي ينظر الينا


اتجهت اليها و قلت لها :

انا : في ايه يا فلانه مالك ؟

اخت زوجتي بصوت اعلي و بطريقة مستفزة و شلق : انت اللي في ايه مالك ايه اللي انت بتعمله ده انت فاكر نفسك ايه انت احرجتني جدا و طريقتك وحشة جدا معايا

انا : اتكلمي باسلوب احسن من كده و وطي صوتك احنا في وسط ناس

هي : انت اللي تتكلم باسلوب كويس انت مش شايف نفسك كلمتني ازاي

انا : لو سمحتي ماتتكلميش بالطريقة دي او ماتتكلميش خالص

هي بصوت اعلي و اعلي : لو سمحتي ؟ لا الكلمة دي فات وقتها خلاص بعد الي انت قولته ده .. قال لالالا مش هاديها الواد .. دا انت اسولبك مستفز يا اخي

انا : و انت مالك اديها الواد ولا لأ انا حر فيه

هي : حر في مين دا انا خالته انت اتجننت ولا ايه

انا : احترمي نفسك و اتكلمي عدل بقولك و من الاخر كده انت مالكيش دعوة بالواد تاني ابني و انا حر فيه .. خلاص ؟

هي : خلصت روحك يا شيخ

زوجات اصدقائي : يا فلان ماتردش علي حد لو سمحت و ابعد دلوقتي

و انا انظر الي زوجتي و اري في عينها نظرة معناها ( تستاهل ) و هي تهز في راسها و جسمها

بالطبع كل المستشفي تفرجت و استمتعت بهذا الكم من عدم الاحترام و الفضائح و خصوصا انها مستشفي تبارك للاطفال المزدحمة دائما

اتجهت الي طرقة المستشفي بعد ان دفعني زوجات اصدقائي دفعا

جاء دورنا للدخول الي الدكتور و اتجهت اخت زوجتي الي باب العيادة لتدخل هي و صديقتها

انا متحدثا الي صديقتها : محدش هايدخل غيري انا و ام الولد بس

اخت زوجتي بصوت هيستيري : هااااااااااااااااادخل غصب عنك

انا بصوت اعلي منها و بعصبة شديدة جدا : ابقي وريني هاتدخلي ازاي

هي : وحياة رحمة ابويا لاااااااااااادخل غصب عنك .. دا مجنون دا ولا ايه .. دا ناسي نفسه


و بفضل هذا الصوت الجهوري يخرج الدكتور من العيادة و يقول لنا

الدكتور : ايه ده يا جماعة ايه الصوت ده .. مش معقول كده احنا في مستشفي ....... م كمية من التهزيق الغير مباشر

تأسفت من الدكتور علي هذا الهراء و اتجهت مرة اخري لطرقة المستشفي حتي يخرج من في العيادة

خج من في العيادة و اتجهت للعيداة و عند دخولي قالت لي اخت زوجتي

هي : عشان خاطر مراتك بس مش هادخل

اطمئنيت علي ابني ثم اتجهت الي الخروج من المستشفي

و من قمة عصبيتي نسيت ان اسأل زوجات اصدقائي اوصلهم لبيوتهم او لأ

انتهي الموقف منذ شهر تقريبا

و اطمئن فقط علي ابني من زوجات اصدقائي اتصل بهم و يطئنوني علي ابني

اخر اخبارهم انها تبحث عن عمل و ستضع ابني في حضانه

طلاقي من زوجتي اصبح وشيكا الان بعد طول فترة تفكير لم اجد اني مرتاح ابدا للرجوع

ولا اجد ان لها فرصة في الاصلاح

و لا استطيع ان اسامحها علي خروجها من البيت و علي سكوتها علي سوء ادب اختها معي


ما تقييمكم للموقف ككل .. موقفي و موقفها

ما نصيحتكم لي

ابني هو ما يهمني .. حياتة الان علي المحك بسبب عناد امه معي




اسف علي طول الموضوع ول كني اردت ان انقلة لكم كما حدث بالنص

[abdulkhaleq]

- لها من الاخوات السيدات سبعة اخوات منهم 5 مطلقات و تزوجن زواجا ثانيا

طيب مش انت عارف من الأول ؟؟

- كبير العائلة هي الام و هي اميه ليست متعلمة و كذلك هي من الطبقة الشعبيه جدا

مع احترامي ليك, لما بتحصل مشكله في اي حته بيبدأ الكلام اللي زي ده يطلع
ووقته فات

الصح
حكم (راجل) من أهلك وزيه من أهلها
وتتحط خطوط عريضه تمشوا عليها انتوا الاتنين
مشي الحال كان بها, ماممشيش ربنا يوفق كل واحد

وربنا يوفقك للي فيه الخير ان شاء الله

[buddha]

السلام عليكم
كان الله فى العون.

خلى مراتك عند اهلها مدة شهر ولا حتى اطول.... لازم تبعدوا عن بعض شوية عشان تتفض المشاحنات
وبعدين ابقى اطمن عليها وعلى ابنك باستمرار بالتليفون دون الدخول فى نقاش يخص الموضوع


لازم تبعتلها مصروف هى وابنك وتسائل عما ا>ا كان فى حاجة هى عايزها ولا لا
متخليش حد يدخل فى الموضوع نهائى فى الفترة دى

(البعد والايام هى ال هتقرر ما هو التالى"تكملة او انفصال")

[mohbasyouni]

بعد كل اللى حصل دة الطلاق فورا لو استمريت معاها هتعيش حياة تعيسة كئيبة و بعد ما تخلف طفل او اتنين كمان هتقول ياربيتنى كنت طلقت من زمان بس هيكون فات المعاد و ادبست معاها بقية حياتك

[mostafa3000]

احيانا بيكون الطلاق وسيلة اصلاح وبيفوق الزوجة العنيدة ويكسرها

[alynubira]

انا طبعا ما سمعتش من لطرف التانى
بس بصراحه انت اللى غلطان فى دخولك البيت من الاول
يبقى تتطلقها اوفر احسن ما تخلف بنت منها

[mado83]

مع ان القرار هيكون مرير عليك ولكن الافضل الانفصال الان لانك دلوقتى عندك عيل واحد وبعد كده ممكن يبقو اتنين والمشكله هتكبر وتقول هستحمل علشان العيال
بس انته كنت فين من زمان دانتا كده جاى متأخر اوى
لو نفع تاخد الواد وتتجوز تانى يبقى احسن



على فكره ماحدش هيعرف ياخد قرار غيرك لان ممكن واحد زيى انا عصبى يقولك طلق وواحد هادئ الطباع يقولك استحمل علشان الواد
فأنته اسلوب حياتك ماحدش هيعرفه غيرك هل ممكن تماين وتعديلها ولا لا
ممكن واحد تانى يقولك طالما مراتى مابتعملش الغلط يبقى خلاص
وواحد تانى بياخد كل حاجه على كرامته
ربنا يلهمك الصواب

[ابو لؤى]

لو مافيش طفل كنت قولت لحضرتك طلق فووراااا انما انا ماقدرش اقولها لان فى طفل حتى لو جوايا نفسى انطقها لانى حطيت نفسى مكانك الله يكون فى عونك ويصبرك يارب

[maka]

لو عندك قدرة مالية اتجوز تانى ميكسرش الست الا الست , معندكش وصلها انك نويت تتجوز تانى و هى هتتعدل , متعدلتش يبقى تطلق و انت عندك عيل احسن ما تطلق و انت عندك 2 ولا 3

[mesaharaty]

والله أنا شايف الطلاق أريح للطرفين .
من تحليلى لشخصية زوجتك حسب وصف حضرتك كالآتى :

النشأة والتربية النسائية تختلف جوهريا عما لو كان فى الأسرة رجل يقوم بدور تقويمى أولا بأول وبالتالى فإن ((نسونة)) التربية مش صح لأن شعور الست أو البنت بإن مافيش حد يردعها عن الخطأ بيفتح المجال لأخطاء أكتر وأكتر وبالتالى بنوصل لمرحلة اللاعودة وهى دى المرحلة اللى حضرتك موجود فيها دلوقتى .
الست مع جوزها لازم تشعره باحترامها ليه وتقديرها وعطفها تجاهه وإلا فقدت مقومات الإستمرارية السوية فى العيشة مع جوزها .
صديقى العزيز ... هناك شخصيات نسائية تهوى وتعشق وتنكش على النكد بمنكاش زى ما المثل البلدى بيقول ، وهى فى سبيلها لكده تحب أن تشعر بإنها مضطهدة وحقها مهضوم ومكروهة من اللى حواليها وعلى الأخص جوزها (لأن هو ده اللى بتتمحور حياتها كلها حواليه) وبالتالى هو ده اللى دايما تصب غضبها ونكدها عليه من باب (حبيبك يبلع لك الزلط) ولكن أنا لحد إمتى حافضل أبلع لك الزلط ؟؟ أنا إنسان فى الأول وفى الآخر .
النقطة التانية اللى أحب أتكلم فيها هى نقطة إن خمسة من إخواتها مطلقات ... ألم يلفت إنتباهك مثل هذا الموضوع ؟ أعتقد إن ده دليل على إن التأثير السلبى للتربية النسائية للبنات امتد ليشمل الأسرة كلها وليس زوجة حضرتك فقط .وبالتالى حضرتك ساهمت منذ البداية فى هذا الإفساد لحياتك قبل أن تبدأ وده لأنك لم تفطن للجو اللى حواليك من (بيئة حريمى ) فيها لت وعجن وقيل وقال وغيرة و.... إلخ .
أرجو إن حضرتك ما تزعلش من كلامى ولابد أن تواجه نفسك بصراحة .
إستمرارك بالشكل ده إما يؤدى إلى حالة إكتئاب مستمرة تفقد معها شعورك بحلاوة الحياة وتكون فيها متنازلا عن كل شىء وخاضع للظروف اللى حواليك . ، وإما تتحرر وتبدأ من جديد .
(أحب أن ألفت نظرك إن فى حالة الطلاق لن يكون الأمر سهلا بالنسبة لك لأن واضح من سردك للقصة إن زوجة حضرتك صعبة ولا يرضيها شىء وبالتالى ستكون تجربة الطلاق عسيرة وبها بعض المشكلات )

مرة تانية تقبل إعتذارى إن كان فى تعليقى أى شىء يستوجب الإعتذار .

ربنا يوفقك

[أحمد كمال]

طلقها ........ مفيش فايدة و هي مش هتتغير و لو انت استحملتها يوم مش هتستحملها التاني

[inspiron]

غلطت لما دخلت بيت بالمواصفات دي.الطلاق بهدوء هو الحل.

[alexaway]

مش علي طول كدا طلاق
اللي زي دي لازم تتكسر علشان تعرف تعيش واغلب البنات علي فكرة متربية علي كدا ومعندهاش حاجة اسمها لاء ودا للاسف حال اغلب بنات مصر .
قبل الطلاق
ابعتها عند اهلها وقلها لو متصلحتيش كل واحد يروح لحالة وسبها ومتسألش فيها وابقي اطمن علي ابنك من بعيد لبعيد واوعي تتصل تطمن علي ابنك بشكل مباشر لانهم عارفين ان ابنك هو نقطة ضعفك .
سبها كدا معلقة وفي الاول لو اتصلوا بيك متردش عليهم ولا تعبرهم وتفهمهم انك بايع وخلاص اتخنقت ومش عايز كمان الولد .

وعايز اقلك علي حاجة اول سنة جواز دي لازم لازم لازم في مشاكل بين الازواج لاختلاف العادات والتربية بين الطرفين ولازم يبقي في تنازل من الطرفين ولو الست متنزلتش يبقي لازم تتكسر علشان تتنازل غصب عنها علشان البيت يمشي

[محمد يوسف]

أولا ربنا معاك ويعينك

ثانيا : القرار لا تأخذه من أحد غريب عنك وعن زوجتك ولا تعرف عقليته أو نشأته أو تفكيره..القرار تأخذه بنفسك بعد أن تفعل ما أمرك الله به "فابعثوا حكما من أهله وحكما من أهلها ان يريدا اصلاحا يوفق الله بينهما"

ثالثا : ان تعذر الاصلاح يا أخى الفاضل فامساك بمعروف أو تسريح باحسان..فاتق الله يا أخى ولا تفضح زوجتك بنشر تفاصيل دقيقة لماحدث من مشاكل بينكما هكذا أمام أعين الناس..ان الله ائتمنك عليها بكلمة منه فماذا ستستفيد بالصاق كل نقيصة بها هى وأهلها بهذا الشكل وانهم حوش وشلق..الخ... هل تزوجتها دون أن تعرفها وتعرفهم؟ هل سيرضيك أن يكتب أى عضو تعليق ينال من كرامة زوجتك أو عرضها؟ هل ستفرح مثلا اذا قيل لك انك راجل محترم وهيا ست مش تمام؟ انها أم ابنك وستظل طول عمرها كذلك حتى لو طلقتها..فاستعذ بالله واحذف موضوعك هذا الذى يعين الشيطان عليك..اترك العباد والجأ بمكنون صدرك وضائقتك الى رب العباد وحده
وأكرر دعائى لك ولها بالهداية والرشاد واصلاح ذات البين

[hobiko]

مع كامل احترامى لشخص حضرتك الكريم

فيه حاجة هنا اتكسرت مستحييييييييييييييييييل تتصلح تانى

ممكن الراجل يتخانق مع مراته ............................. جوه البيت

بينهم و بين بعض

و حتى برة البيت ............... و يسكتوا لحد مايروحوا البيت و يتقفل عليهم باب واحد و يولعوا فى بعض

عادى جدا .............. مفيش مشاكل ............. ممكن يرجعوا يتصالحوا تانى




لكن ان الموضوع يوصل انه يبقى قدام الناس بالمنظر ده و ناس تانية تغلط فيك قدامها و هى عاجبها


بأوسخ جزمة عندك و فى ستيييييييييين مليون داهية و تجوز ست ست ست ست ست ستها كمان