اطلقها ولا اخاف علي مستقبل ابني

[bmw3m007]

بعد اذن صاحب الموضوع ..
انا عايز برده اقولك حاجه .. عشان ضميري ميأنبنيش
انا كنت عصبي و انا بكتبلك الردود السابقه بصراحه

عشان كده هرجع و اقول لحضرتك .. اقعد انت و مراتك لوحدكم و اتكلمو بهدوء
انت قولها الي بيضايقك و يزعلك .. و هي تقولك برده الي بيضايقها و يزعلها
( و يا ريت تتجنب اخواتها و تتفقو على كده )
اذا كان في اسطاعتكم ان كل واحد يتجنب الحجات الي بتضايق التاني فيبقى خير
و اتفقوا على كده و ربنا يصلح الحال

و فكرها في كلامك انكم بينكم طفل من مصلحته انه يتربى بينكم و مهما وفرتله هي لو عاش معاها او وفرتله انت لو عاش معاك ما هيطلع زي ما يتربى وسط اب و ام بيحترمو بعض و بيحبو بعض

و اتكلمو في اي مواقف سابقه عشان تصفوا نفوسكم

ده اذا شاء المولى عز و جل بالصلح

و ان محصلش اتفاق بعد ما تدوا لنفسكم انتوا الاتنين فرصه تفكروا

يبقى برده تتفقوا مع بعض ان زي ما دخلتو بالمعروف تخرجوا بالمعروف
و تتفقو على كل حاجه تخص الطلاق من مصاريف للولد لهتشوفه ازاي و كل حاجه و تتفق معاها انه من الافضل ان يبقى بينكم الاحترام حتى علشان خاطر الولد !


رغم اني مرت قدامي نفس تجربتك و بصراحه الي بالاخلاق دي مبينفعش معاهم اي حاجه الا اني قلت اقولك برده ايه اعمل الي عليك ,, بس لو مش هتتغير متيعش عمرك معاها نصيحه يعني و شوف مستقبلك مع الي تستاهلك ..
اذا حاولت تعمل الي قلتلك عليه بهدوء و لقيت نفس التصرفات الي حكيت عنها فيبقى انصحك بمشركاتي الاولى و الاعضاء الي من نفس رأيي و أمن نفسك بسرعه

و ربنا يوفقك لما فيه الخير لك

[bmw3m007]

وليه البنت المفروض عليها تسمع كلام ابوها واخوها ؟؟؟ في الحقيقه مش عارف ده سؤال يتسأل !!
حتي لو كلامهم غلط المفروض انها تسمع كلامهم ؟؟؟ طبعا لا .. لو كلامهم غلط تتناقش معاهم و ترفض بأدب الا اذا كان بيقولها تعالي اشغلك رقاصه مثلا !!!
حتي لو اهانوها برضوا تسمع كلامهم ؟؟؟ الاب الي يهين بنته يبقا مبيحبهاش كذلك الي يهين زوجته او امه او اخته او حتى اخوه او ابوه او حتى صاحبه !! و الاهانة عمرها ما هتولد طاعه طبعا .
مش من حقها ترد ؟؟؟ حتي لو علي اخوها ؟؟؟ ولا علشان اخوها ولد وهي بنت من حقها ترد طبعا
احترام وادب ايه اللي يخلي البنت تسمع كلام اخوها لمجرد انه راجل ؟؟؟ الاحترام و الادب يخلوها تسمع كلام اخوها و اختها و ابوها و امها .. انا احيانا باخد رأي اختي الصغيره و بحترم رأيها جدا
زينة الست الادب والاحترام اللي نابع عن قناعه داخلية مش عن قهر وخوف هما الابهات حضرتك شايفهم ماسكين الشوم لولادهم ! و من الطبيعي ان الاب في الغالب بيكون هو صح لزيادة خبرته في الحياه يعني و لازم نحترمه و نسمع كلامه .. يعني متجيش بنتي تقولي عايزة اتجوز فلان و يبقى فلان ده صايع او لا يناسبها بأي شكل من الاشكال و تيجي حضرتك تقولي هي حره مثلا ! و احب اطمنك كذلك الحال لو كان ولد مش بنت !!
والمثال اللي حضرتك بتقلي عليه مش مقياس دا علي فكرة اغلب حال بنات مصر مش بس البنت دي , والامثلة كتير بس للاسف الراجل معمي وميهموش غير انه يسمع كلمه حاضر ونعم من اخته او زوجته وبس . انا ممرش عليا بصراحه بنت مؤدبه و تعمل كده .. كون الاب مش واخد باله من بنته ده موضوع تاني .. بس الي اتربت كويس متعملش كده .. و ربنا يعافينا
انا لسه سامعها من بنت صغيرة في ثانوي واخوها قاعد معاها والحوار بهزار داير وبيقول فلانه ( اخته ) فين الجو بتاعها , راح هو رد وقال لا اختي ملهاش جو بضحكة , هي ردت وانا سمعتها خليه عايش فى الوهم . و ايه رأيك في البنت دي ؟ و لو كنت اخوها كنت هتعمل ايه ؟؟؟؟
ممكن تقولي لما تسمع اختق بتقول كده هتعمل ايه ؟ و على فكرة الي تعمل كده تبقى متربتش كويس
عاملوا اخواتكم وزواجاتكم بمنطق انهم بشر زيكم ومن حقهم يردوا ويتناقشوا واسمعوهم , بدل ما تدفنوا راسكم فى التراب .

طبعا هما بشر زينا .. انا بحب المثل الي بيقول .. الي مجبت بنات يبقى مداقش الحلويات
مش عارف بقوله صح ولا لأ بس البنت نعمة و حاجه جميله و لا تقل عن الولد في شيء بل تزيد عنه في الحنان و الرقه و الحياء و الادب .. عشان كده في تصرفات كتير بتخرج من الراجل و تمر و لكن لا يمكن بأي شكل من الاشكال ان تخرج من بنت .. و انا فخور بمجتمعنا الشرقي و معاملته مع البنت بس تكون المعامله الصحيحه ,, الي على فكرة ملهاش علاقه تماما بالفكر الغربي الي البنت ممكن ترجعلك فيه البت حامل و البوي فريند بتاعها ممكن يبات معاكم في البت عادي

في آروبا و الدول المتقدمة بيحصل كده عادي
رغم انها دول متقدمه طبعا و متفوقين علينا

[bmw3m007]

ناهيتك ما انتهيت والطبع فيك غالب وديل الكلب عمروه ما ينعدل لو علقو فيه قالب
المثل ده مش موجه لحد معين بس هو جه على بالى و انا بقرأ الموضوع
انا مش هقولك اعمل كذا وكذا وكذا
انا هقول على اللى انا هعمله لو كنت مكانك:
1: هعمل محضر زى ما الرجل المحترم ده قال
2:مش هخليها تطول منى مليم احمر
وعفشى ودهبى يفضلو معايا اتجوز بيهم وحده غيرها
3:اتجوز عليها واحده تكون ظروفاها مناسبه لظروفى
4: اساومها بين حريتها و بين ابنى
و اخد ابنى منها غصب عنها
ــــــــــــــــــــــــــــــــــــــــــــــــــ ـــــــــــــــــــ
ولو ماعرفتش تاخد ابنك ماتخفش
ابنك له رب بيحميه وماتخليش دى نقطة ضعفك
ــــــــــــــــــــــــــــــــــــــــــــــــــ ــــــــــــــــــــ
لما قريت تبريرات بعض الاعضاء لمراتك ؛ ايقنت بأن ستات مصر ليهم الحق يتفرعنو اكتر ما هم متفرعنين طالما لقو اللى يبرر لهم تصرفاتهم الوقحة ويقف فى صفهم حتى وهم غلطانين
ــــــــــــــــــــــــــــــــــــــــــــــــــ ـــــــــــــــ
انت غلطان من الأول انك ناسبت ناس زى دول ودلوقتى لازم تدفع تمن غلطتك
ــــــــــــــــــــــــــــــــــــــــــــــــــ ـــــــــــــــــــــ
ابنك هايعيش و يتربى زى ما ربنا كاتبله انه يكون
خلى قلبك جامد وماتخليهمش يمسكوك من ايدك اللى بتوجعك
ــــــــــــــــــــــــــــــــــــــــــــــــــ ـــــــــــــــــــــــــــ
والرجل ده برضه كلامه عجبنى
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــ
انا عاوز اقول لك كلمه اخيرة بس متزعلش منى
انت تستحق اللى انت فيه دلوقتى
و لو كنتَ كويس ماكنش ده حصلك
شوف انت بتعمل ايه بيغضب ربنا وبطله
وصلح علاقتك بربك علشان حياتك تتزبط

اذا الحل الي بهدوء الي قلتهولك منفعش و لقيت نفس المعامله دي
يبقى هو ده الحل

[KemozTanta]

للاسف في ردود ذكورية بحته لا تمت لاي عدل , الراجل الشرقي دايما شايف ان الست مهما حصل مترفعش صوتها عليه ومش من حقها تتنرفز انما من حقه هو يشخط وينطر ويتنطط علي كيفه ويديها بالجزمة كمان انما هي تنفعل لا مش من حقها .
وكأن الست دي مش انسانه ومخلوقه ليها مشاعر واحاسيس وليها حقوق زي الراجل المخلوق زيها بالظبط .
في الحالة بتاعة العضو هنا لو الزوج بجد مش بيعلي صوته ومش بيزعق وبيتعامل بهدوء ومحترم مع زوجته وهي اللي دايما بتتخانق وتزعق يبقي زي ما قلنا يحاول يعدلها منفعش يبقي الطلاق .
انما لو هو كمان بيزعق وبيشخط يبقي الاتنين متساويين مفيش حاجة اسمها انا الراجل وهي الست حتي لو شتمتها المفروض هي متردش عليه والكلام المتخلف دا .
الراجل مش بشخطه وزعيقه ولا بضربه بالجذمة لزوجته يا سادة الراجل بقدرته علي تحمل المسئولية وادارة حياته وحياة اسرته لبر الامان .

ياسلام
يعني لو زعقلها ، تقوم هي مزعقه فيه !
مد أيده وضربها قلم .. تتنرفز وتردهوله !!
الست بالصلاه ع النبي شغلتها في الحياة بعد عبادة ربنا هي راحة جوزها اللي بيشقي عشان يجيب لها تصرف .. راجل مين اللي يستحمل شغله ومشاكلة و مراته لو بالمواصفات دي
الزوجة لازم تمتص غضب زوجها حتي لو مش غلطانة .. لكن العند وحقي و الكلمة تترد بعشرة دي ملهاش علاقة بالمساواة دا أسمه نكد وعيشه تقصر عمر الراجل وأبن لما يطلع يلاقي امه بتعامل ابوه كدا هيبقي شخصية ورق ومش بعيد يقرفه ويوصل لمرحلة انه ميسمعلوش كلمه.

[KemozTanta]

انا رأي المتواضع ، ان الطلاق سهل لكن توابعة مع حد بالمواصفات اللي ذكرتها هي واهلها هتبقي غير مضمونه !
و لو كملت وهي بالمنظر دا هتخسر صحتك و أبنك لما يكبر ويشوفها بتعاملك بالاسلوب دا هيترد ليك وهتبقي أسود ايام حياتك لا قدر الله.
زوجتك من كلامك متربيه علي العند ومحدش يلوي دراعها والاسلوب الزباله في العصبيه وحرق الدم..
دي حد هتجيبلك السكر و الضغط وانت عندك 30 سنه و هتكمل حياتك نكد وهم وغم معاها وولادك الله اعلم بيهم بس صدقني اللي هي فيه دا لو متغيرش.. هيدمر مستقبلك ومستقبل اولادك وانت وهي مش حاسيين ، ألاولاد بيحسوا بكل تفصيلة في أسلوب حياتكم عليت صوتها عليك امتي .. بتتكلم في غيبتك ازاى .. بترد عليك ولا بتنفذ اللي بتطلبه منها .. كل تفصيله الاولاد هيلاحظوها وهتترد في معاملتهم معاك تاني ..
يعني تخيل لو مراتك مش بتسمع كلامك .. أبنك مش هيسمع كلامك .. مراتك لو بتهب فيك .. ابنك هيجي يوم ويهب فيك ..
وعالفكرة تغيير مراتك مش سهل خالص بس مش مستحيل .. وبعدين هي لو متغيرتش عشانك بعد ماتقولها اللي مش عجبك فيها يبقي بالسلامة مفيهاش كلام تاني.
وحل اخير قبل الطلاق ، انك تخليها تتمناه ، جرب معاها الوش التاني.. قله كلام و تعامل بحدود وحسسها انك خلاص مش طايقها بالمنظر دا.. وقولها لو صوتك علي عليا تاني هتلاقي أيدي علي وشك أسرع مما تتخيلي ، ولو مش عجبك هتجوز غيرك لانك مش هتسمح تضيع حياتك وصحتك ومستقبل اولادك بسبب عندها وعصبيتها وترد الكلمة بكلمة وتطاول اخواتها عليك.

انا متفائل انك هتعمل حاجة لان من كلامك انا حسيت انك صادق و رافض الوضع دا والعيشه والمستوي اللي وصلت له وعارف الست ونظراتها الخبيثة و اسلوبها المايع واخواتها لما يكونوا كدا بتكون الحياة ازاى و حزنك علي شكل حياتك بيكون ازاى.
أتكل علي الله وربيها من اول وجديد ودماغها لو الحرمان و الوش التاني معدلهاش .. أكسرهالها " إضربها قصدي" ولو متغيرتش .. طلقها " بعد ماتأمن نفسك من قصص العفش والدهب والتبديد" والفلوس اللي هترميهالها هتبقي كسبان بيها صحتك.

[alexaway]

طبعا هما بشر زينا .. انا بحب المثل الي بيقول .. الي مجبت بنات يبقى مداقش الحلويات
مش عارف بقوله صح ولا لأ بس البنت نعمة و حاجه جميله و لا تقل عن الولد في شيء بل تزيد عنه في الحنان و الرقه و الحياء و الادب .. عشان كده في تصرفات كتير بتخرج من الراجل و تمر و لكن لا يمكن بأي شكل من الاشكال ان تخرج من بنت .. و انا فخور بمجتمعنا الشرقي و معاملته مع البنت بس تكون المعامله الصحيحه ,, الي على فكرة ملهاش علاقه تماما بالفكر الغربي الي البنت ممكن ترجعلك فيه البت حامل و البوي فريند بتاعها ممكن يبات معاكم في البت عادي

في آروبا و الدول المتقدمة بيحصل كده عادي
رغم انها دول متقدمه طبعا و متفوقين علينا

بخصوص تعليقك علي مشاركتي والاقتباس يبقي كدا احنا متفقين طالما مفيش اختلاف في معاملتك بين الولد والبنت وانك بتتخذ اسلوب النقاش وساعات بتاخد رأي اختك الصغيرة وهو دا الصح وهو دا مفهوم التربية الصحيح اللي انا بقول عليه , كدا احنا مختلفناش
اما بقي مفهومك للفكر الغربي ان البنت هناك بترجع بتها حامل والبوي فريند بتاعها بيبات معاها فدا مش قاعدة اساسية هناك او تربية ,واضح ان حضرتك بتتفرج علي افلام اجنبي كتير , انا ليا اصدقاء في الخارج كتير بحكم شغلي كمان علي الانترنت وفي بيوت عندها تقاليد وعادات وزي عندنا كمان هنا في مصر يعني مش زي ما انت فاكر .
وعلي فكرة هنا عندنا فى الشرق البنت عندها بوي فريند بس ابوها واخوها ميعرفوش
للاسف احنا دايما بندفن راسنا فى التراب , انت شايف المجتمع الغربي فاسد في حين انك عندك فساد اكتر منه ولكنه مداري .

[alexaway]

ياسلام
يعني لو زعقلها ، تقوم هي مزعقه فيه !
مد أيده وضربها قلم .. تتنرفز وتردهوله !!
الست بالصلاه ع النبي شغلتها في الحياة بعد عبادة ربنا هي راحة جوزها اللي بيشقي عشان يجيب لها تصرف .. راجل مين اللي يستحمل شغله ومشاكلة و مراته لو بالمواصفات دي
الزوجة لازم تمتص غضب زوجها حتي لو مش غلطانة .. لكن العند وحقي و الكلمة تترد بعشرة دي ملهاش علاقة بالمساواة دا أسمه نكد وعيشه تقصر عمر الراجل وأبن لما يطلع يلاقي امه بتعامل ابوه كدا هيبقي شخصية ورق ومش بعيد يقرفه ويوصل لمرحلة انه ميسمعلوش كلمه.

اه تصدق لو زعقلها تزعقله ولو ضربها تضربه
بالصلاة علي النبي يا استاذ هي مضربتكش علي ايدك علشان تصرف عليها وبعدين هو حضرتك بتعاير مراتك علشان بتصرف عليها والمفروض انها تاخد بالجذمة بقي طالما حضرتك بتأكها وبتشربها !!!
بالفرض بقي حضرتك حصلك حادثة ومبقتش عارف تشتغل يحق ليها بقي طالما بطلت تصرف عليها انها تصبحك بعلقه وتمسيك بعلقه ؟؟؟

وبعدين زي ما حضرتك عندك شغلك ومشاكلك هي كمان عندها شغلها مسئولية بيت وعيال وزي ما حضرتك بني ادم هي بني ادمه , هو انت من حقك تغضب وهي تستحملك وحضرتك مستحملهاش لو جات في يوم مضايقه بسبب ظرف عضوي او نفسي !!!
الراجل الورق في نظري انا بقي مش اللي يعامل مراته كابني ادمه وليها حقوق زيه ومن حقها ترد عليه , الراجل الورق اللي يهين مراته او اخته ويخليها تخاف منه بدل ما تحترمه وتحبه .
تحياتي

[KemozTanta]

اه تصدق لو زعقلها تزعقله ولو ضربها تضربه
بالصلاة علي النبي يا استاذ هي مضربتكش علي ايدك علشان تصرف عليها وبعدين هو حضرتك بتعاير مراتك علشان بتصرف عليها والمفروض انها تاخد بالجذمة بقي طالما حضرتك بتأكها وبتشربها !!!
بالفرض بقي حضرتك حصلك حادثة ومبقتش عارف تشتغل يحق ليها بقي طالما بطلت تصرف عليها انها تصبحك بعلقه وتمسيك بعلقه ؟؟؟

وبعدين زي ما حضرتك عندك شغلك ومشاكلك هي كمان عندها شغلها مسئولية بيت وعيال وزي ما حضرتك بني ادم هي بني ادمه , هو انت من حقك تغضب وهي تستحملك وحضرتك مستحملهاش لو جات في يوم مضايقه بسبب ظرف عضوي او نفسي !!!
الراجل الورق في نظري انا بقي مش اللي يعامل مراته كابني ادمه وليها حقوق زيه ومن حقها ترد عليه , الراجل الورق اللي يهين مراته او اخته ويخليها تخاف منه بدل ما تحترمه وتحبه .
تحياتي

ياصديقي انا كنت في فترة من الفترات زيك بالظبط ! أأقول الست مشاعر واحاسيس زي الراجل بالظبط وزيها زييه
بس حضرتك واضح انك مشوفتش واحدة عنيده بحق وحقيقي او واحدة ترد عليك و نظرات عينيها تحدي لو كلمتها مشيت في الآخر.
نسبة كبيرة من الستات في مجتمعنا الجميل للاسف متفهمش ربع الكلام اللي حضرتك كاتبه ، ولو تنازلت مرة واتنين وسكت مرة واتنين قصاد صوتها العالي و نرفزتها عليك .. هتبقي عادة عندها تعلي صوتها وتتنرفز وتتشنج وتتعصب.
الزوجة ليها مشاعر وبتحس وكل حاجة بس طاعة جوزها واجبه ولما يقولها متخرجش يبقي متخرجش ، مش تعملي محاضرة وتقولي انا زي زييك واخرج وقت مانا عايزة و تخرج من وراه زي ماصاحب الموضوع كاتب.
دا يبقي اسمه عدم احترام لجوزها و تحدي ليه و لو عدهالها انا اسف يبقي هتركب وتدلدل رجليها كمان و مع الوقت مش هيقدر يحكمها لا جوا البيت ولا برة البيت.
انا عارف وشوفت الفرق بين زوجة بتحترم جوزها يبص لها تسكت وبين واحدة لا تحترمه تسيب اختها تهب فيه قدامها.
البيت المظبوط يكون للزوج شخصيته اللي حرمة اللي علي اسمه تحترمها وتقدرها وتصونها.. غير كدا يبقي وضع مش سليم ، ولا عايز البيت يمشي بشخصية الزوجة والزوج وتبقي سلطة كل واحد بدماغة و في الاخر الاولاد تطلع معقدة مش عارفين مين كبير البيت !

[عصام غنايم]

طبعاٌ مفيش كلام تانى يتقال

كل الآراء اتقالت

من اقصى اليمين ( اضربها بالجزمه واعملها محضر )

الى أقصى اليسار ( مجراش حاجه واستحمل وهى كويسه وانت اللى وحش )

انت اختار اللى يناسبك واللى على هواك


رأيى الشخصى

بيتك متنزلش منه ابداٌ مهما حصل وبرده مراتك متنزلش منه

اطحنوا فى بعض جوه بيتكم انما حد يخرج بره لأ مرفوض

برده حد يتدخل بينكم من أهلك او أهلها صدقنى هتخسروا بعض والموضوع هيكبر ومش هتعرفوا تلموه
( اللى بين الراجل ومراته زى القبر وزنقاته ) محدش يعلم بيه الا اللى خلقهم وبس

انت أكيد لازم تبينلها زعلك بس برده متنقصش منها فلوس عشان متبقاش انك بتلوى دراعها بالفلوس وفى نفس الوقت متديهاش بزياده زى ما تكون بتكافئها ( الآساسيات يعنى )

عدى اسبوع على اقصى تقدير ( كتر البعد يعلم الجفاء )

بعد كده جوه البيت والولد نايم ولوحدكم

هتقعد تتكلم معاه بكل هدوء وعقل

بداية الكلام

انا بحبك واتمنى اكمل عمرى معاكى بس عشان نقدر نكمل فى هنا لازم يبقى بينا إحترام متبادل ( كرامتى من كرامتك وكرامتك من كرامتى )
هل انتى تحبى تتجوزى راجل شخشيخه مهزء بدون شخصيه ؟
هل تحبى الناس تشوفك بتزعقى قصادى وتصغرينى قدامهم ؟
هل بكده تبقى مبسوطه ؟
هل لما تمشى كلامك عليا وتنزلى بدون إزن ده هيعلينى فى نظرك ولا هيقللنى فى نظرك ونظر الناس ؟
بلاش دى طيب لو شوفتى ست بتتعامل كده مع جوزها هتقولى عليها ايه ؟ وهتقولى عليه ايه ؟
يرضيكى الناس تقولى عليا انى مش راجل ؟
يرضيكى انزل من نظرك ؟
تحبى تكون دى شخصية جوزك ؟

بصى يا بنت الناس
على قد ما انا بحبك وبحب ابنى وبحب بيتى على قد ما انا بحب كرامتى
وصدقينى انا عندى استعداد اتنازل عن اى حاجه فى الدنيا ومتنازلش عن رجولتى واحترامى لنفسى

انا اللى عايزه منك بسيط اوى
1 صوتك يبقى واطى معايا مهما حصل
2 مفيش خلاف بينا يخرج بره البيت
3 كلامى يتسمع حتى لو مش مقتنعه بيه وفى بيتنا نبقى نتناقش
4 أهلك ناس محترمين وعلى دماغى بس كل واحد حر فى حياته محدش فيهم يتدخل فى حياتى او بينى وبينك

وليكى منى
1 اعيشك فى هنا
2 اهتم بيكى وابينلك حبى
3 احترمك واحطك فى عينايا

اللى حصل ده ( صوتك العالى ونزولك بدون إذن ) ميتكررش تانى باقى العمر
الصفحه دى هنطويها ونبدأ صفحه جديده

وتاخدها من ايدها وتتوضوا وتصلوا ركعتين لله

وتروح أخدها من ايدها واللى ربنا يقدرك عليه اعمله كانك بتتجوزها لأول مره

صدقنى بعدها لو حد من أهلها فكر يبصلك هى اللى هتخرمله عينه

وخلى بالك مفيش ست بدون عيوب
وبرده اول سنتين جواز كل واحد من الزوجين بيحاول يعمل راجل البيت ( واللى يقدر على التانى )

ربنا يوفقك الى ما فيه الخير لك فى الدنيا والآخره

اتمنى تتطمنى عليك وتعرفنا وصلت لأيه

تقبل سلامى

[محمود السيد]

واللهى ده عين العقل بس اهم حاجة انك ماتتطلقش لان الخاسر فى الاساس هو الطفل وبعد كدة هى الام والكلام ه عند تجربة ومازالت

[محمد يوسف]

أنا مش فاهم صاحب الموضوع فين.. وازاى مستحمل ان ناس تقول على مراته قليلة الأدب ومن بيت أخلاقه وحشة وتستاهل ضرب النار والضرب بأوسخ جزمة..الخ
بسم الله ماشاء الله كل العقد الشرقية الذكورية طلعت على زوجتك وانت قابل وساكت؟ ياأخى ده الواحد بيدعى على ابنه ويكره اللى يقول أمين..والله العظيم أنا دمى بيغلى وأنا باقرا الكلام الغير محترم اللى بيتقال على مراتك انت مش مراتى أنا واللى مش المفروض تقبله عليها حتى من أمك اللى ولدتك وربتك
كل واحد عامل عنتر شايل سيفه قدام الكيبورد وعمال يقول لك طلق واضرب واعمل محضر واتجوز ...الخ وهما مش حايخس عليهم حاجة لكن انت وابنك ومراتك اللى حايدفعوا التمن
يا أخى هو انتوا رجالة أكتر من سيدنا عمر اللى د/ حازم استشهد بيه؟ رجالة أكتر من النبى -استغفر الله العظيم - اللى كان بيلين جناحه لزوجاته أمهات المؤمنين وغيرتهم من بعض؟
يا أخى ده من كلامك اللى انت بتحكيه بالكلمة انت غلطان فى 75 % منه مش 60% بس زى ماعضو فاضل قال ..أمال بقى لو هيا حكت؟
اتقى الله واأصلح بيتك اللى حاتهده بعندك ونصايح الأعضاء الهدامة..وابقى سلم لى على السمك والجمبرى وفتح عربية صاحبك
نصيحة أخيرة : لو قبلت أى كلمة سيئة اتقالت على زوجتك حتى لو فى صورة نصيحة ومن شخص مايعرفهاش وماحستش جواك بوجع يبقى اسمح لى انت ماتستاهلش مراتك وابنك

[محتاج النصيحه]

السلام عليكم و رحمة الله و بركاته

السادة الاعضاء المحترمين

اولا:

هذا الحساب اسمة محتاج النصيحه و هو ما اطلبة فقط لا غير . حيث انني في اقسي فترات حياتي و لجأت اليكم و بهذا الحساب الغامض لانني من النوع الكتوم جدا و لم احدث احدا في تلك المشكلة حتي اصدقائي الذين حضرت زوجاتهم تلك المشكله


و في بداية الموضوع طلبت منكم عدم التجريح و لكن جاء التجريح الذي لا اقبلة ابدا علي ام ابني و زوجتي مهما بلغت شدة الشجار و الخلاف بيننا

كل طلبي كان فقط النصيحة او الدعوة بظهر الغيب لان يقدم الله لي العون

و لكن ما سمعته علي ام ابني يؤسفني ان اسمعه من اعضاء منتدانا المحترم و يجعلني اندم علي طرح الموضوع للنقاش ان كان النقاش سيؤدي الي هذا التجريح

ارجو مرة اخري عدم التجريح في زوجتي فهي في كل الاحوال ستبقي ام ولدي و ارجو من كان لديه نصيحة او دعوة ان يكتبها فقط مع مراعاة حرمة البيت " الهزيل "


ثانيا:

لم اقلل من شأن اخوات زوجتي او اعيبهم حين قلت ان منهم 5 مطلقات و متزوجين زواجا ثانيا انا فقط كنت اوصف الحاله العامة لحياة زوجتي و ما قد يؤثر علي شخصيتها من عناد

ثالثا :

لم اقلل من شأن ام زوجتي او اعيب فيها حين قلت انها اميه و من الطبقة الشعبيه جدا .. كنت فقط اوصل معلومة ان الام لا تتمتع فقط برجاحة عقل كبيره نتيجة للاميه و الطبقة الشعبيه


رابعا :

زوجتي تتمتع بمميزات بالتأكيد اذكرها لها و استدعي تلك المميزات حين يشتد غضبي منها في كل مشكلة

و هي بالفعل لها عندي في نفسي جانب مازال مضيء بسبب مميزاتها و بسبب ابني علي الرغم من باقي الجوانب المظلمة او التي اظلمت نهائيا




كما ذكرت لكم ان حياة ابني هي ما تهمني و بالتالي اي قرار فيه مصحلة ابني سأتخذه لاني سأحاسب علي هذا القرار

و بالتالي اي محاولة لاصلاحها ان اصلحت او انهاء تلك المأساه التي اعيشها و سوف يعيشها ابني ان حدث الطلاق سوف اكون منحاذ لتلك المحاوله

اشكر كل عضو مهما كان رأيه سواء بالطلاق او بالصلح

و اشكر كل عضو بين لي مدي مساوئي و اخطائي حيث ان تلك الردود بمثابة المرآه التي اري فيها نفسي و تبين لي ما لا استطيع ان اراه في غضبي الشديد الذي انا فيه الان .. شكرا جزيلا

اشكر كل عضو اهتم بكرامتي و غضب لغضبي دون تجريح في ام ابني

ارجو منكم ان تستشعروا حالتي النفسية السيئة جدا التي اعيشها و ان تعينوني علي ان اتخطي تلك المرحلة سواء بالدعاء او بالنصائح العاقله

لمن رأى اني انا المخطئ ارجوك لا تتحامل علي كثيرا .. فانا رجل عصبي و كرامتي عندي فوق كل اعتبار و قد تحملت الكثير من اجل عدم هدم هذا البيت في المشكلات السابقة .. احمل في نفسي الكثير من التراكمات السلبية و قد يكون هذا ما اثر علي رد فعلي في تلك المشكلة الحالية .. ولا اجد اني اخطأت كثيرا حين غضبت عليها و قلت لها لا تخرجي من البيت و خرجت انا من البيت في قمة الغضب و بالتالي حين وجدت فرصة في ان اخرج من هذا الهم بالذهاب الي الاسكندريه توجهت بالفعل اليها لكي اخرج نفسي من هذه التعاسة و الغضب .. ليس لارفه نفسي و اتركها

و لكن حديثك بالفعل جعلني اشعر اني مقصر لاني من النوع الذي لا يحب ان يجد له الاخرون خطأ و ابحث دائما عن الكمال و الكمال لله وحده .. و لكن علي كل حال قد يكون الشيطان غلبني .. اللهم اني استعيذ بك من الشيطان الرجيم




من خلال الردود المحترمة التي جائتني سواء بالطلاق او بالاصلاح

اميل اكثر الي الاصلاح و اعجبتني اسباب من اتجه الي هذا الحل و لكني لا استطيع ان اقنع نفسي بان تلك المرة هي نهاية المشكلات فقد اقنعت نفسي كثيرا و اجبرت نفسي علي الصلح و لم تنتهي المشكلات بل زادت الي هذا الحد



دعواتكم قد تكون هي افضل حل

و اسامح كل من قام بالتجريح بدون قصد و ادعو الله ان يسامحكم


و منتظر نصائحكم

[mando800]

اكرر تاني

سيبك من النصائح العنتريه الهدامه
و تذكر مميزات زوجتك كما ذكرت عيوبها
و تذكر ابنك
و تذكر قوله تعالى : (وَعَاشِرُوهُنَّ بِالْمَعْرُوفِ فَإِنْ كَرِهْتُمُوهُنَّ فَعَسَى أَنْ تَكْرَهُوا شَيْئًا وَيَجْعَلَ اللَّهُ فِيهِ خَيْرًا كَثِيراً )
==========
نرجو منك الانتباه :
1. أمر الله تعالى الأزواجَ بمعاشرة زوجاتهم بالمعروف ، وبيَّن لهم تعالى أنه قد يقع منهم كراهية لهذه الزوجة ، فليس عليه أن يباشر بتطليقها ، بل يصبر عليها ويمسكها ؛ لسببين :
الأول : أنه إن كرهَ منها خلُقاً فقد يكون لها أخلاقاً أخرى مرضيَّة ، وهكذا يقال لمن كانت عنده امرأة جميلة لا يُعجبه خَلْقها أن نقول له : فارض بخُلُقِها ، واجعل هذه الأخلاق سبباً في إمساكها والصبر عليها ، فإنها التي تصلح لحفظ عرضك ومالِك ، وهي التي تصلح لتربي لك أولادك .
والثاني : أن الله تعالى قد يجعل في صبره وتحمله له خيراً كثيراً في الدنيا والآخرة ، في الدنيا مثل الولد الصالح منها ، وفي الآخرة كالثواب الجزيل على صبره وتحمله .
2-اعلم أن الله تعالى قد سمَّى ما بين الزوجين " مودة " و " رحمة " ولم يسمِّه حبّاً ، قال تعالى : ( وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجاً لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآياتٍ لِقَوْمٍ يَتَفَكَّرُونَ )

[hobiko]

ربنا يكرمك و يوفقك و يصلح ذات بينكم انت و زوجتك

ان شاء الله اروح عمرة قريب و أدعيلكم بظهر الغيب ان ربنا يصلح بيتكم و زواجكم

[محمود السيد]

اللهم وفقهم لما تحب وترضا
كنت حابب اضيف شيئ عند تحديد القرار بالنسبة لحضرتك الى هو انشاء الله هيكون خير
المهم انك تجيب ورقة بيضا وقلم وتبداء تكتب عن تقييمك لزوجة حضرتك من مساوء وعيوب واخيرا محاسن من اخلاق وحسن عشرة الخخخخخخخخخخخخ وبعدين تستنتج فى حالة الانفصال لا قدر الله النتائج هتكون ايه وتكتبها وفى حالة الاستمرار النتائج هتكون ايه
بعد ما تنتهى من كتابة كلى الى فى نفسك حدد النتيجة النهائية سؤا كانت النتيجة
واثناء كتابة التققيم تذكر فى كل كلمة شيئين هما
الامانة فى التقييم العادل والصادق لان الناتج سوف يعود على شخص واحد هو ابنك
هل السلبيات الموجودة يمكن التعايش معها وايجاد حلول مع بذل المجهود شوية
وياريت كل الرجالة تعيد تفكير فى معنة الرجولة شوية هى مش فرض رائ او اصدار قرارت وكرامة الخخخخخخخخخخخخخخخ
ياريت نقتدى بسيدنا رسول الله من معاملة زوجاته
اللهم وفقهم لصلح ذات البين اللهم امين يا رب العالمين