نداء الى الاخوه الاسكندرانيه

[mohamed_selim]

بكره احتمال اطلع اسكندريه يوم صد رد مع المدام
بفكر اوصل الصبح بدرى على القلعه عشان سمعت انها بقت تمام بعد ما اتجددت
و كنت عايز اروح متحف المجوهرات الملكيه .... يا ترى شغال ولا مقفول؟ و مكانه فين بالظبط؟

بعدين هطلع على المنتزه نقعد شويه ....

فى ايه تانى ممكن يتعمل؟
و لو عايز سمك كويس للغدا اروح الانفوشى زى ما كنت بعمل زمان ولا فى اقتراحات افضل

شكرا لتعاونكم :)

[mohamed_selim]

كل دى معلومات ... ايه يا جماعه الاسكندرانيه فين؟

[مزمار وحيد]

بسم الله الرحمن الرحيم

ان شاء الله رحله جميلة
وخصوصا أكيد بتكون كل كام سنه خصوصا مع المدام وعلشان نشاركك هذا الحدث التاريخي كان لازم أرد

أخوك مش اسكندراني بس خبرة معقوله شوف يا أستاذ الخطة بتاعتك رائعه جدا القلعة اكثر من رائعه وخصوصا فى الصور التذكاريه بس العيب الوحيد انها فسحه مرهقه وخصوصا فى الحر علشان تتفرج على القلعة كلها لازم تتطلع سلالم وتنزل وتتمشى شويه كتير بس أنصحك متفوتش الفسحة ديه وبخصوص متحف المجوهرات للاسف لا أعرف عنه أي معلومات غير ان كان فيه ناس أشرار بتسرق منه المجوهرات

وبخصوص موضوع السمك طبعا الانفوشي فيها محلات كتير أشهرهم حسني وده أول فرع الاصلي موجود في الانفوشى وفيه أمامه محل مشهور برده بس غالي ومعجبنيش مستواه وطبعا القلعة موجوده في بحري يعني جنب الانفوشى على طول

وفيه عندك راقوده على البحر بعد المكتبة بشويه المنظر رائع والاكل ممتاز والاسعار ممكن نقول عاليه شويه بس مش قوى

اما وانت رايح علي المنتزة عندك قرية بلبع فى الداون تاون ممكن فيها سمك ممتاز بس مش متخصصين والاسعار عاليه شوية وبعد كده فيه عندك فى شارع 45 ميامي من على الكورنيش بعد شارع خالد ابن الوليد موجود محل الكاتعه مشهور والاكل ممتاز والاسعار يعني معقوله وده طبعا قبل المنتزة على طول

ونصيحة سيبك من شعبان فى المنشية أو حوده جندل علشان دول ممكن ينفعو فى رحله رجالي بس

إن شاء الله طريق السلامة

[mohamed_selim]

ربنا يباركلك
انا عارف حسنى و قدامه جزيرة الملكه للسمك
بلبع بروحله المحل الاصلى اللى قريب من الكورنيش و ماكلش من عنده سمك
حوده و شعبان نبقى نعملها سوا ان شاء الله :)

يبقى نتوكل على الله و نرتجل و كله هيمشى تمام .... لسه فى رادار على الكورنيش؟