المسلسلات التركية المدبلجة (مكنتش ناقصة مسلسل نور ده كمان)

[Bossy_Fadl]

انا يا جماعه عمري ما كنت باشوف المسلسل لحد من اربع ايام بالظبط

و طبعا كنت مستغربه جدا كمية الاعجاب و الهوس الشديد بالمسلسل

لاني عموما مش باحب الافورة في ردود الفعل

يعني اوكي مسلسل او فيلم عجبني خلاص مش هاعمل لصاحبه تمثال يعني

عمل ناجح و خلصنا مش مستاهله بقي هيصه كتير

بس انا لما شوفت المسلسل فهمت ليه الناس عامله عليه كل ده

لان المسلسل و صناعه عرفوا ازاي يجبروا المشاهد علي مشاهدته

بمنتهي البساطه بعدوا عن السياسه و العنف و الدم و الاكشن و الكوميديا الفارص بتاعه اللي ما يتسمي محمد سعد اللي خربها و قعد علي تلها

و ركزوا علي حاجة واحده بس بقت مفقودة في حياتنا للاسف

الرومانسيــــــــــــــــــــــــــة

لو الناس واخده انهم يتفرجو علي حاجات رومانسية و قصص حب بجد يقدرو يعيشوا معاها و يلاقو فيها متنفس طبيعي للهموم اللي الواحد بيقابلها كل يوم ماكانوش عملو كل الهوليله دي علي مسلسل تركي

بس الناس لقت في المسلسل ملجأ من العواصف اليومية بتاعه الغلا و كيلو البطاطس بقي بكام و السياسه و ياتري هو مجلس الشوري اتحرق لوحده و لا حد ولع فيه بجاز

انا شخصيا مش بشكر في المسلسل شكر فظيع و مش بادافع عنه و الحركات الاوفر دي

بس في منتهي البساطه انا محايده

يعني لقيت ان المسلسل فعلا مافيهوش حاجة زياده و لا خارجة عن اللي بيحصل في كل افلامنا و مسلسلاتنا

الابطال حوارهم محترم جدا و لبسهم عادي جدا

و القصه جميله و تشد بجد لانها رومانسية راقيه

يعني لو الواحد شاف الحلقه كل يوم كمتنفس عن ضغوط اليوم و في نفس الوقت عوض شوية من الرومانسية المفقودة في حياته و لو في صورة مسلسل فيبقي شيء مش عيب و لا غلط يعني

و خلونا نعترف ان الاتراك اذكيا و عرفو ازاي يستقطبو المشاهد العربي

هما دورو الخلل و النقص عندنا في الدراما بتاعتنا فين و عوضوه

بس

نقطه في صالحهم و من حقهم اننا نحييهم

مش لازم نهاجم لمجرد الهجوم

انا بعيد كلامي اني ضد كل ردود الفعل الاوفر و الحركات اللي مالهاش اي لازمة دي

و يعني يوم ما افكر احب فارس احلامي عمره ما هيكون مهند يعني

لحسن حد يفتكر اني كالعاده بدافع عن المسلسل عشان البطل( امور) و الكلام الغريب ده

_و الله مانا شايفاه امور و لا حاجة خالص_

بس في نفس الوقت المسلسل حلو و راقي

ارجو اكون قدرت اوضح وجهة نظري

ملحوظة: كيفانش تاتليتوغ مش شاذ

خطيبته تبقي ملكة جمال العالم

و صورهم مع بعض في كل المجلات

دي كانت مجرد اشاعات طلعت ضد المسلسل مش اكتر

للرد علي نجاح المسلسل

و برضه مش بدافع بس دي شهاده يعني

و الف شكر علي الموضوع

بوســـــي

[PRO-DRIVE]

والله ماجيبنا في داهيه غير الرومانسيه و الحب و الكلام دا كله :@

[Mido80]

انا كمان استغربت لما شفت ولاد اختي بيسهروا للصبح بيتفرجوا علي المسلسل دة مش عارف علي اية؟ انا عمري ما اتفرجت علي المسلسل ولا احب اشوفة لانة فية نفاهة وسفالة. فية اية اخينا دة عشان البنات والستات يقعوا في غرامة بالشكل دة. دة ان دل فانما يدل علي نقص الوازع الديني لدي الناس لان لو فية حد يستحق الاعجاب والتعلق بة بالشدة دي فهناك الكثير منهم وعلي راسهم الرسول الكريم سيدنا محمد.
علي فكرة دة مش اول مسلسل الاحظ ارتباط البنات بية بالشكل دة. لانة كان فية مسلسل اجنبي اتعرض في مصر زمان في التسعينات اسمة ( الجرئ والجميلات) بردة لاحظت اهتمام الناس بية اوي وعندك كمان مسلسل سوري اسمة باب الحارة اللي كان عامل قلق في البيوت في كل حتة

[khalid_adel]

ماهو ده ان دل بيدل عن نقص الوازع الديني وعدم الاحترام ونقص العقل
1- نقص الوازع الديني لان بكل بساطه الناس اللي بتقعد بالساعات قدام المسلسل وعاملينه انه حاجه يوميه ماينفعش تتفوت ابدا مهما طالت (معدي ال 120 حلقه ) طب هل هما عملو الاهتمام ده لحاجه في الدين بقرأة ورد لمده ساعه ولا قيام ليل يعني من الاخر عملو حساب كبير قوي واهتمام لمسلسل مش بيعملوه لربنا ودي حاجه تكسف والله ( ارأيتم من جعل اله هواه ) واعتقد ده نوع من عباده او تقديس للهوى النفسي
2- عدم احترام لان لو راجل قال لمراته انا نفسي تكوني زي نور ولا مش عارف اعمل ايه وتعملي زيها كده واحط صورها في كل حته ما ده اسمه قلة ادب وعدم احترام لمراتي واقل حاجه وده من حقها حتقول لو انا مش عاجباك طلقني طب تخيل العكس ان ده يحصل من واحده لجوزها وتخيل بقى الراجل دمه بيفور ازاي وممكن يعمل جنايه فيها او اقل حاجه خالص حيطلقها ويقولها روحي دوري على مهند ينفعك
3- نقص عقل لان ببساطه مفروض نحكم عقلنا ونعرف ان ده مبالغ فيه والحياه مش دلع كده ورومانسيه دايما ومش كل حاجه بتتعالج بالعواطف والرومانسيه لا ببتعالج بالعقل فقط اما الرومانسيه دي ليها وقتها ومش في كل حاجه لان في امور لازم فيها الحزم واتخاذ قرارات وتكون بعقل لكن اللي يصدق الكلام اللي بيتعرض في المسلسل ده والله تمثيل والحقيقه مش كده ابدا مهما كان وللاسف طبعا اغلب السيدات هما اللي بيصدقو الكلام ده وبيميلو ليه لانهم بتغلبهم العاطفه اكتر وده اللي حيأثر فيهم اكتر
على فكره اللي بيعمل مسلسل ولا اي انتاج بيبقى عارف مين اللي حيشوفه وحيأثر في مين وطبيعه التأثير ايه والناس دول فاهمين كويس هما بيعملو ايه وازاي مش بطاطا هيا
خلاصه الكلام الواحد لازم يتعرف على كل حاجه ويشوف ولكن انه يتعلق بحاجه قوي او زي ماشوفنا المبالغات اللي بتحصل من الناس دي اللي غلط وده حرام بجد ولازم نحكم ونشغل عقلنا اللي ربنا كرمنا بيه ومنخليش حاجه تسلب عقولنا وتسلب انفسنا معاها
اه على فكره انا ماشفتش ولا حلقه من المسلسل ده قبل كده ولا اعرف ابطاله بس قريت عنه كتير وشوفت مدي تأثر الناس بيه والكلام الكتير اللي كلنا بنسمعه عنه
واحد يقولي انت ماشفتش عشان تحكم اقوله انا محكمتش اصلا على المسلسل انا بقول رأي في الناس عامة واللي بيعملوه من ردود افعال ( ومش لازم احط ايدي في فيشه كهربه عشان اعرف انها بتكهرب والجواب بيبان من عنوانه برضه )
معلش طولت عليكو وربنا يهدينا اجمعين الي ما يحبه ويرضاه

[hamdy]

ايه ده دا وانا بحط المقالة المنقولة دي تصورت اني انا اللي جبت التايهة اتاري ناس كتير قوي بتتفرج علي المسلسل

[sherif_m72]

كتير اوى كتير اوى
كتير يا جماعه اللى انتوا بتقولوه على المسلسل ده وحتى اذا كان بالنقد او بالدفاع
المفروض ان ده ميحصلشمن حد كاره او رافض المسلسل
لان معنى اللى بيحصل ده من نقد مستمر مهما كان هدفه
ملهوش غير معنى واحد من وجهه نظر النقاد الكبار او الراى العام وهو ان السلسل ده وجد طريقه للجمهور العربي
انا بالنسبه ليا حيادى مش رافض ولا قابل المسلسل بالعكس ده اصغر من انه يشغلنى لاته زيه زى اى حاجه تانيه -بيضيع وقت
انا انتقادى لشيء واحد وهو "عقدة الخواجه"
اى واحد من برة يبقى لازم يكون احسن مننا ونديله اهتمام كبير ونشهره كمان حتى لو كان منبوذ من مكانه ومش معروف
وافتكروا معايا ايام الفيلم الهندى (مارد)
برضه حصلت نفس الضجه وبقت مصر مشجعه اولى للافلام الهنديه
وكيدج فى الجريء والجميلات
ونوتس لاندينج
وغيرهم
ومسلسل حدائق الشيطان اللى كان قايم ببطولته الممثل السورى
وكان اولى ان يقوم بيه ممثل مصرى زى "ممدوح عبد العليم" وكان هيكون اقوى
بس لا لازم يدخل طرف اجنبى عشان هما خلاص عرفوا ازاى يجيبو الشعب المصري
لان عقدة الخواجه دى فينا كتير جدا جدا مش عارفين نتخلص منها

[TaoTao]

شاهدت حلقة واحدة فقط من هذا المسلسل على القناة الثانية للتليفزيون المصري (من باب حب الاستطلاع فقط ليس إلا :)) .. وإليكم بعض خواطري:
1- المستوى الفني للمسلسل ضعيف جدا على مستوى الأداء التمثيلي. ولا أدري ما سر كل هذه الضجة حوله.
2- المسلسل الهدف منه سياحي وترويجي بالدرجة الأولى وهذا ما نجح فيه صناع ومنتجو ومروجو المسلسل بالمنطقة العربية
3- المسلسل لا يوجد به أي منظر سيء !! مافيش شارع قذر مافيش هدوم مقطعة ولا حتى هدمة مش نضيفة ، كله بيبرق !! مافيش منظر سيء مافيش ناس بتتخانق ولا بتقول ألفاظ مش اللي هي .. مافيش واحد متخلف بيتهته بأي هلفطة وعامل نفسه كوميدي، مافيش أي إشارة إن فيه معدمين أو محرومين أو مجرمين في تركيا، مافيش سرقة في المحلات مافيش محل مش نضيف مافيش واحدة ست مش على آخر موضة (بالمقياس الأوروبي)، .. مافيش واحد ينادي لواحدة غير بكلمة "خانوم" أو "هانم" كما كان عندنا في الزمن الجميل!
كله بيبرق، إضافة لمناظر خلابة من الطبيعة التركية (هي دي العنصر الفني الجمالي الوحيد في هذا المسلسل)
4- نعكس النقطة اللي فاتت هانلاقي إن دي قوانين عمل منتج فني مصري .. ساقطات، شمامين، لغة عربجية، كوميديا متخلفة، شوارع قذرة، بيوت مفضوحة، سيدات شراشيح ورجال أجلاف ولغة منفرة، مناظر مقززة = فيلم مصري.
والحجة الجاهزة "الواقعية ومناقشة قضايا المجتمع" !!
5- النتيجة الطبيعية هي جذب والتفات جميع الأنظار لهذا العمل .. الوفود السياحية الخليجية غيرت وجهتها من مصر لتركيا .. حفلات أفراح في قصر "نور ومهند" .. صار مجرد ذكر بطلي المسلسل وسيلة للترويج السياحي .. وخللوا الواقعية وقضايا المجتمع تنفع المعتوهين اللي ابتلانا بيهم ربنا

[Bossy_Fadl]

والله ماجيبنا في داهيه غير الرومانسيه و الحب و الكلام دا كله :@

انت شايف كده؟

عموما انا شايفه ان اللي جايبنا في داهيه هو قله الرومانسية و الحب

و برضه مش دفاع عن المسلسل

عموما اختلاف الاراء لا يفسد للود قضيه

[Bossy_Fadl]

ماهو ده ان دل بيدل عن نقص الوازع الديني وعدم الاحترام ونقص العقل
1- نقص الوازع الديني لان بكل بساطه الناس اللي بتقعد بالساعات قدام المسلسل وعاملينه انه حاجه يوميه ماينفعش تتفوت ابدا مهما طالت (معدي ال 120 حلقه ) طب هل هما عملو الاهتمام ده لحاجه في الدين بقرأة ورد لمده ساعه ولا قيام ليل يعني من الاخر عملو حساب كبير قوي واهتمام لمسلسل مش بيعملوه لربنا ودي حاجه تكسف والله ( ارأيتم من جعل اله هواه ) واعتقد ده نوع من عباده او تقديس للهوى النفسي

لا عباده و لا تقديس للمسلسل

انا بتفرج علي المسلسل

بس بصلي الفرض في وقته و باقول اذكار الصباح و المساء و باقوم الليل و باسبح في كل وقت و بقرا قرأن

دي مالهاش علاقه بدي

بس زي ما قلت المسلسل بيبعدنا عن جو المشاكل بتاع طول اليوم في الشارع و في الشغل و في كل حته

مسلسل رومانسي و راقي و خالي من اي اسفاف متفرجش عليه ليه طالما رد فعلي عليه عادي جدا و مش باقدسه يعني؟

و في نفس الوقت لا هو في ميعاد صلاة و لا بيعطل عن اي حاجة مهمة

2- عدم احترام لان لو راجل قال لمراته انا نفسي تكوني زي نور ولا مش عارف اعمل ايه وتعملي زيها كده واحط صورها في كل حته ما ده اسمه قلة ادب وعدم احترام لمراتي واقل حاجه وده من حقها حتقول لو انا مش عاجباك طلقني طب تخيل العكس ان ده يحصل من واحده لجوزها وتخيل بقى الراجل دمه بيفور ازاي وممكن يعمل جنايه فيها او اقل حاجه خالص حيطلقها ويقولها روحي دوري على مهند ينفعك

كلامك مظبوط 100 في ال 100

ده زي ما قلت يدخل في نطاق المبالغة في ردود الفعل

يعني انا بشوف المسلسل من خمس ايام

عمر مهند ما لفت انتباهي كراجل

لانه بعيد كل البعد عن مواصفات الجمال المصري بالنسبة لي

كل اللي لفت انتباهي رومانسيته في تعامله مع مراته و احترامه ليها

و ده مش عيب ابدا اني اتمناه في زوج المستقبل

الراجل او المرأة لما بيدورو علي النص التاني ليهم بيدورو علي صفات و طباع مش شكل

مينفعش نخلط دي بدي

اللي لفت انتباه الناس لنور و مهند هو تعاملهم مع بعض و حبهم لبعض

و مش عيب لو الناس اتفرجت علي المسلسل و حبت تطبق و لو جزء بسيط من نوعيه التعامل دي_طبعا بدون النظر لمهند و نور بشخصهم

يعني مينفعش واحده تقول لجوزها نفسي تكون مهند مثلا

و لا راجل يقول لمراته نفسي تبقي زي نور

بس علي الاقل يتعاملو مع بعضهم بنفس نوعيه الاحترام و الحب

بتهيالي مافيهاش حاجة ابدا يعني بل بالعكس دول هيرضو ربنا بتعاملهم ده مع بعض


3- نقص عقل لان ببساطه مفروض نحكم عقلنا ونعرف ان ده مبالغ فيه والحياه مش دلع كده ورومانسيه دايما ومش كل حاجه بتتعالج بالعواطف والرومانسيه لا ببتعالج بالعقل فقط اما الرومانسيه دي ليها وقتها ومش في كل حاجه لان في امور لازم فيها الحزم واتخاذ قرارات وتكون بعقل لكن اللي يصدق الكلام اللي بيتعرض في المسلسل ده والله تمثيل والحقيقه مش كده ابدا مهما كان وللاسف طبعا اغلب السيدات هما اللي بيصدقو الكلام ده وبيميلو ليه لانهم بتغلبهم العاطفه اكتر وده اللي حيأثر فيهم اكتر
على فكره اللي بيعمل مسلسل ولا اي انتاج بيبقى عارف مين اللي حيشوفه وحيأثر في مين وطبيعه التأثير ايه والناس دول فاهمين كويس هما بيعملو ايه وازاي مش بطاطا هيا

حضرتك بتشوف المسلسل؟

اكيد لا طبعا

بدليل انك بتقول ان الحياة مش كلها حب و رومانسية

و هو حد قال غير كده؟

اساسا المسلسل كله مشاكل بين الابطال

واحد بيدور علي ابنه و واحده مشاكلها بينها و بين جوزها متتعدش برغم انهم بيحبو بعض و واحده بتنصب علي جوزها و واحده بتقنع جوزها انها حامل و مواويل كبيرة يعني

بس فيها ايه لما الحياة تبقي فيها ده و ده؟

هو لازم الحياة تبقي نكد و قرف و ملل و زهق عشان كده هي تبقي حياة زوجيه؟

مش فاهمه ليه دايما الناس شايفه الدنيا كده و ان المتجوزين لازم يبقو كده _لمجرد انهم متجوزين_فلازم نكد بقي و خناق طول اليوم

بلاش الصورة النمطيه دي عن الزواج لان ده مش صح

اكيد في مشاكل كتير بس انا شخصيا بشوف قدامي نماذج كتير اوي لازواج و الله في منتهي السعاده و الحب برغم المشاكل الكتير اللي بتقابلهم

بس هي دي سنة الحياة

كده شوية و كده شوية

مش لازم نكد في نكد

خلاصه الكلام الواحد لازم يتعرف على كل حاجه ويشوف ولكن انه يتعلق بحاجه قوي او زي ماشوفنا المبالغات اللي بتحصل من الناس دي اللي غلط وده حرام بجد ولازم نحكم ونشغل عقلنا اللي ربنا كرمنا بيه ومنخليش حاجه تسلب عقولنا وتسلب انفسنا معاها
اه على فكره انا ماشفتش ولا حلقه من المسلسل ده قبل كده ولا اعرف ابطاله بس قريت عنه كتير وشوفت مدي تأثر الناس بيه والكلام الكتير اللي كلنا بنسمعه عنه
واحد يقولي انت ماشفتش عشان تحكم اقوله انا محكمتش اصلا على المسلسل انا بقول رأي في الناس عامة واللي بيعملوه من ردود افعال ( ومش لازم احط ايدي في فيشه كهربه عشان اعرف انها بتكهرب والجواب بيبان من عنوانه برضه )
معلش طولت عليكو وربنا يهدينا اجمعين الي ما يحبه ويرضاه


طبعا احييك علي رايك و هي دي اهم نقطه في الموضوع

اللي سبب الجدل ده كله علي المسلسل هي المبالغات الفظيعه دي في الاعجاب بالمسلسل و ابطاله

انا عن نفسي بشوفه في حياديه تامة و لو فاتتني حلقه عادي جدا يعني الدنيا مخربتش

انشالله يفوت اسبوع

عادي

هي مجرد حاجة بتكسر روتين اليوم و مش بتاخدني لا عن صلاة و لا عن فرض و لا عن اي حاجة تانية و في نفس الوقت بتخلي الواحد ينسي الهم شوية

اهي احسن من لما اقعد اتفرج علي فيلم كوميدي خنيق و مسف من بتوع محمد سعد

و لا اقعد اتفرج علي فيلم عربي قديم فيه 35 رقاصه و خناقه في بار و في الاخر البطله بتموت بالسل و تقول لواحد انا عمري ما حبيت غيرك يا محسن

يارب تكون وجهة نظري وصلت حضرتك يا استاذ خالد

و طبعا دي كلها وجهات نظر و في الاخر رأيي صواب يحتمل الخطأ و رأي غيري خطأ يحتمل الصواب

و اعتذر عن رغيي الكتير ده

[Bossy_Fadl]

شاهدت حلقة واحدة فقط من هذا المسلسل على القناة الثانية للتليفزيون المصري (من باب حب الاستطلاع فقط ليس إلا :)) .. وإليكم بعض خواطري:
1- المستوى الفني للمسلسل ضعيف جدا على مستوى الأداء التمثيلي. ولا أدري ما سر كل هذه الضجة حوله.
2- المسلسل الهدف منه سياحي وترويجي بالدرجة الأولى وهذا ما نجح فيه صناع ومنتجو ومروجو المسلسل بالمنطقة العربية
3- المسلسل لا يوجد به أي منظر سيء !! مافيش شارع قذر مافيش هدوم مقطعة ولا حتى هدمة مش نضيفة ، كله بيبرق !! مافيش منظر سيء مافيش ناس بتتخانق ولا بتقول ألفاظ مش اللي هي .. مافيش واحد متخلف بيتهته بأي هلفطة وعامل نفسه كوميدي، مافيش أي إشارة إن فيه معدمين أو محرومين أو مجرمين في تركيا، مافيش سرقة في المحلات مافيش محل مش نضيف مافيش واحدة ست مش على آخر موضة (بالمقياس الأوروبي)، .. مافيش واحد ينادي لواحدة غير بكلمة "خانوم" أو "هانم" كما كان عندنا في الزمن الجميل!
كله بيبرق، إضافة لمناظر خلابة من الطبيعة التركية (هي دي العنصر الفني الجمالي الوحيد في هذا المسلسل)
4- نعكس النقطة اللي فاتت هانلاقي إن دي قوانين عمل منتج فني مصري .. ساقطات، شمامين، لغة عربجية، كوميديا متخلفة، شوارع قذرة، بيوت مفضوحة، سيدات شراشيح ورجال أجلاف ولغة منفرة، مناظر مقززة = فيلم مصري.
والحجة الجاهزة "الواقعية ومناقشة قضايا المجتمع" !!
5- النتيجة الطبيعية هي جذب والتفات جميع الأنظار لهذا العمل .. الوفود السياحية الخليجية غيرت وجهتها من مصر لتركيا .. حفلات أفراح في قصر "نور ومهند" .. صار مجرد ذكر بطلي المسلسل وسيلة للترويج السياحي .. وخللوا الواقعية وقضايا المجتمع تنفع المعتوهين اللي ابتلانا بيهم ربنا

اشكرك و احييك

+100000000000000000000

[OlaOsman]

الموضوع شكله كبر فعلا. شوفوا الخبر ده:

نجوم الفن المصري يهاجمون مسلسل (نور) التركي ويطالبون بوقف عرضة 8/23/2008 800 PM




رشا لطفي-خاص - فتح عدد من نجوم الفن المصري النار علي المسلسل التركي "نور" والذي يقوم التليفزيون المصري بإذاعته حاليا علي قناته الثانية بعد الانتشار الكبير الذي حققه منذ عرضه علي قناة "ام بى سى" حتي أصبح ظاهرة واتهموا المسلسل بإفساد العلاقات الزوجية مطالبين بوقف عرضه فورا لدوره الهدام بعد ان وصل الولع به لدرجة لا يمكن تخيلها رغم عدم تمتع أبطاله بأي شهرة داخل بلدهم الأصلية تركيا .
وقد هاجم النجوم الفنان التركي (Kivanc Tatlitug) الذي قام بدور "مهند" بسبب ما تردد حول ظهوره عاريا علي أغلفة مجلات "البورنو" وتسألوا كيف نجعل شخص كهذا قدوة أمام الشباب وحلم للفتيات مما يؤدي إلى تحطيم النخوة العربية، فيتعجب الفنان صلاح السعدني من الاهتمام العربي بشراء مسلسل بطله عضو في جماعة تدعو للشذوذ الجنسي ويظهر على أغلفة مجلاتهم، فماذا سنري بعد ذلك؟ أين الدراما التي تبعث علي النخوة والشهامة حتي نعممها بين فئات المجتمعات العربية؟
ويضيف قائلا " يجب على القنوات أن تدرس المسلسلات الأجنبية التي تعرضها لأن بها معاني سيئة للغاية يجب إبعادها عن أبنائنا."
أما الفنان صلاح عبدالله فقد أعلن مقاطعته للمسلسل لأنه عمل يسئ الي من يشاهده كما ان المشاهد العربي ليس في حاجة اليه خاصة في ظل توافر دراما تليفزيونية جيدة تخاطب مجتمعاتنا العربية متسائلا كيف ينتشر مسلسل بطله نجم أغلفة مجلات الشواذ؟ هل يرغبون في تعميم هذا النموذج إنه تضليل لشبابنا يجب كشفه حتي لا تختلط الأمور لدي الصغار.
أما الفنان أحمد بدير فيحذر من مشاهدة المسلسل الذي كان سبباً في بعض حالات الطلاق في العالم العربي مؤكده انه سمع كثيرا علي المسلسل وأصابه الذهول مما يقرأه يوميا من حالات الطلاق والشغف الرهيب بهذا الممثل التركي وهو ما يؤكد وجود حاجة غلط في مجتمعاتنا العربية وسوف يتكرر ما حدث مع الممثل الهندي “أميتاب باتشان” عند زيارته مصر، وارتمت الفتيات أمامه في حالة بكاء شديد لأنهن صدقن تمثيله فتحول الأداء إلى آثار عكسية على المتلقي.
بينما نصحت الفنانة صابرين الفتيات بالفصل بين الرومانسية الخيالية والواقعية التي نعيشها مشيرة الي ان الفتيات وجدن في شخصية “مهند” نموذج فارس الأحلام الذي يحضر إليهن بحصانه الأبيض، وتمردت الزوجات بسبب فقدانهن الرومانسية التي يرينها بالمسلسل ويطالبن بمعاملة مماثلة كما يفعل مهند مع نور مؤكدة ان مثل هذه النوعية من المسلسلات لها أضرار على المجتمعات التي تعاني من فقدان الاستقرار العاطفي لأننا نعيش حياة “لاهثة” وراء لقمة العيش ومن الصعب تحقيق المعادلة الصعبة بالوضع الاقتصادي الجيد والرومانسية الحالمة.
وقد عبرت الفنانة غادة عادل عن استيائها من حدوث حالات طلاق بسبب المسلسل التركي مؤكدة ان من حق النساء المتزوجات تغيير أمور حياتهن وأن يعشن الرومانسية لكن بالشكل الذي يتلاءم مع حياتنا وتقاليدنا في ظل الضغوط التي نمر بها.

[blazer]

بلاا نور بلاا مهند بلاا mbc

[emycasso]

اللي قبلي قالوا كلام كتير اوي فيه منه السلبي والايجابي

بس ايه ظاهرة جديدة نزلت والدنيا مقامتش وقعدت عليها ؟؟؟؟

بدأت بالافلام الهندية زمان واعترضوا على نهاياتها الرومانسية والغير منطقية .. وبعدها المسلسلات المكسيكية واعترضوا على طول حلقاتها .. حتى المسلسلات السورية اللي محدش يقدر يقول فيها نص كلمة اعترضوا عليها وقالوا السوري يتعرض في بلدنا ليه هو احنا معندناش مسلسلات مصرية تنافس .. ؟؟!!!

يعني اصبح الموضوع مجرد اعتراض وخلاص ..! من غير رأي منطقي وموضوعي وقايم على ادلة منطقية .. ؟!!

كام واحد من اللي هاجموا المسلسل اتفرجوا عليه .. ؟؟!!!
طب كام واحد شاف بعينه الاباحية اللي بيقولوا عليه والازياء اللي بتدعوا للرزيلة (( علما بإن المشاهد كلها مقطوعة مقطوووووعة ومحدش يقدر يقول غير كده )) حتى الازياء في منتهى الاناقة والشياكة ومنتهى الادب كمان (( ببساطة لإن المسلسل بالكامل اتصور في فصل الشتاء وكل الي بنشوفه منهم كوفيات وبلاطي وفريرات )) ..

ثانيا لو هنتكلم عن العادات ..
ليه محدش اتكلم عن لمة العيلة كلها على ترابيزة واحدة وقت الفطار والغدا والعشا والقعدات العائلية الجميلة اللي انقرضت تمااااااااااااااما في مجتمعنا ؟؟؟

ليه محدش اتكلم عن احترام كلمة الجد الكبير اللي بتمشي علي الكبير قبل الصغير وكأنها سيف على رقبتهم ؟؟؟

ليه محدش اتكلم عن غيرة مهند على زوجته نور من مديرها في الشغل واللي طلعت في محلها ؟؟؟

بصراحة ومن الاخر ..
يمكن لو دورنا عن السبب الرئيسي للإنتشار الرهيب للمسلسل ده عندنا في مصر على الاقل .. هيكون السبب هو الارتقاء الرهيب بمستوى المشاهد المصري من مسلسلات مصرية هابطة كل اللي فيها جوازات عرفي وشباب بتاع مخدرات وحشيش وستات مطنشة اجوازها .. لمستوى تاني خالص وهدف وفكر مختلف تماما بعيد عن الاسفاف والتكرار ..

[Mido80]

لحد دلوقتي باسمع عنه بس و ماشفتش منه و لا حلقة و ماحاولتش.. بس الهوس ده مش غريب علينا.. مين فاكر أميتاب باتشان لما جه مصر في التسعينات المهازل اللي حصلت من بنات مصر؟ هونفسه أيامها استغرب من الشعبية الجارفة دي ليه في مصر وماكانش يعرف ان الناس مهووسة بيه للدرجة دي

سخافة وتفاهة وسفالة بعيد عنك يا علا. انا مش عارف هو الناس جري لها اية والبنات والستات اتجننوا ولا اية. علي فكرة السينما والتليفزيون بيظهروا الفنان او الفنانة بشكل مختلف تماما عن الحقيقة وهي دي الكارثة الكبري

[Goodle]

أحمد الله أني لا أشاهد التليفزيون أساسا
مكسل اصلح الديش
ومستمتع ببوظانه
اللهم بلغنا رمضان