اعمل ايه ؟؟؟..............فى شويه كلاب .!!!!!

[hosamsief]

العنوان يشد صح ... بس اللى يشدك اكتر الموقف اللعين اللى شوفته بعينى ..
و اليكم التفاصيل ...
الزمان ... الساعه 3 عصرا .....قبل شم النسيم بيوم ...
المكان : فى الشركه عندى .... ...
انا : قاعد على النت بشوف اخطار اكل الفسيخ و الرنجه و مشاكل التسمم لا قدر الله .....


الحدث : يرن جرس الهاتف الخلوى بنغمه رتيبه ممله و تظهر على شاشته عبارة تحمل اسم صاحب الشركه بحركه بندوليه ممله ... اتوقع بعدنا اننى على وشك مهمه صعبه ...
ارد و انا اتململ ... الو .. ايوه يا باشمهندس .....
هو: بص يا حسام فى شنطه هتجيلك مع البواب هتروح توديها انت شخصيا للراجل اللى هديلك رقمه دلوقتى كلمه و رتب معاه و ادهاله .. عاوزك تروحله انت بنفسك .. ها ده راجل مهم ...
انا : ماشى .. حاضر فين الرقم .. و انا بكتب الرقم ....
المهم كلمت الراجل قالى .. هتقابلى فى الزمالك فى شارع البتنجان المخلل .. جنب معمل الطرشى ...
المهم البواب جالى و جايبلى شنطه كبيرة ملفوفه فى ورق و تقيله .. و فيها حاجات طريه..

اخدت الشنطه و حطيتها فى شنطه العربيه و طرت بيها على الزمالك و بيتصل بالراجل علشان يبعت حد ياخد الشنطه علشان الشارع ضيق و مفيش مكان اركن .. المهم الراجل العشم كان قتله اوى و قالى لا معلش خش بالعربية الجراج و اطلعى الدور الرابع ..... هتلاقيتى مستنيك على الباب .....
المهم ركنت صف تانى كده اى حاجه و رحت داخل العمارة ... و اخدت السلم جرى عاوز اخلص و طالع ... و فعلا فى الدور الرابع لاقيت باب مفتوح .. و لسه بنادى و بقول السلام عليكم ...... و خد عندك بقى ...
انا طولى تقريبا 185 سم ... و عمال انهج من السلم .. الا و الاقى ... جوز كلاب ولاد ستين كلب ، اول كلب راسه عند رقبتى ... والتانى جاى وراة من نفس العينه ... كلاب كلاب يعنى .. متوحشه ... و هو هو هو هو ... و صوتهم مسمع قدام الباب ... صدى الصوت لوحدة يخليك تبل بنطلونك ... انا اتشيلت مكانى مش عارف اروح فين ... انا كنت مركز على الكلب الاولانى ... التانى بقى عمل حركه ... حط راسه فى الشنطه ... و بعدها جاله انهيار عصبى و ذبحه صدريه ...و صوته كان جايب اخر الشارع .. اتارى الشنطه كان فيها فسيخ ... شفتوا الخيبه ... فسيخ يا حضرات ... قمت حادف الشنطه لفوق و نطيت بضهرى على السلم .. منا خايف اديهم ضهرى و مش عارف اتصرف ازاى ...
فى الدوشه ده خرج الراجل بيقولى اتفضل خش .. متخفش .. .. بعد ما كنت نزلت لاخر السلم ... قولتله خلى بالك الشنطه مع الكلب ..... معرفش انا روحت البيت ازاى .. بس الحمد لله .... لقيت البنطلون مش مبلول قوى .....
و عرفت بعديها ان فى اخطار اخرى للفسيخ مكنتش اعرفها ....

[beshomilan]

هههههههههههههههههههههههههههههههههههههه
انت تحفة بجد
ضحكتنى جدا

قولتله خلى بالك الشنطه مع الكلب

[مصطفى-حسن]

انت عارف احلى حاجة فيك اية...؟؟؟؟؟؟؟
ان مواضيعك الكوميدية كلها بتيجى فى وقت بكون قرفان فية وتطلعنى من المود دة
وطريقك فى السرد رائعة

بقولك اية ....
ما تكتب قصص قصيرة فى اى مجلة او جورنال
وتبقى زى عم جلال عامر اللة يرحمة
اصل خلى بالك دى بتبقى هبة من ربنا

[Amr.Fathy]

هههههههههههههههههههههههههههههههههههههه
انت تحفة بجد
ضحكتنى جدا

+111111

[dedi]

رائع

[speed_magnum]

تسلم
موضوع عسلللل

[emad_2020]

هههههههههههههههههههههه جامد يا باشا
وبعد كدا احترس من الكلاب

[houseiny]

انت موتني من الضحك ، انا بقالي يجي نص ساعة عمال اضحك بدون انقطاع ، الله يسامحك يا أخي ، انا كمان بنطلوني كان هيتبل من كتر الضحك

[ديمو]

+111111

[midof4ever]

انا اول مرة اعمل كومنت في المنتدى الاجتماعي بسببك , بجد دمك خفيف , وتنفع مؤلف قصص بوليسية

[koshary]

هههههههه فظيعه بجد

[shaddadfalcon1]

يعني صاحب الشغل منزلك من بيتك عشان توصل فسيخ لواحد صاحبه ؟؟؟؟؟؟

[No Comment]

صدى الصوت لوحدة يخليك تبل بنطلونك
حط راسه فى الشنطه ... و بعدها جاله انهيار عصبى و ذبحه صدريه
قولتله خلى بالك الشنطه مع الكلب
بس الحمد لله .... لقيت البنطلون مش مبلول قوى

ههههههههههههههههههههههههههههههههههههه

تسلملى يا حسام بيه ... فعلاً وعدت ووفيت
مع انى مستنى من الصبح ... وقلت اكيد نسيت ولا حاجة

بالله عليك ما تبقى تقطع مواضيع

[حاتم سليم]

بقولك اية ....
ما تكتب قصص قصيرة فى اى مجلة او جورنال
وتبقى زى عم جلال عامر الله يرحمة
اصل خلى بالك دى بتبقى هبة من ربنا

و نعمَ الرأى فأنت موهوب يا حسام بك

و سيبك من المدير على الفسيخ على الهو هو

عالكل كليله ...

[miceg]

هههههههههههههههههه
مالكش حل