سوزوكي فان 7 راكب خدمة لاعضاء المنتدى الكرام

[hosamsief]

الساده الاعضاء الكرام ....

يعلم الله مدى حبى و اعتزازى لكل الاعضاء الكرام ....

نظرا لظروف ما ... قد قمت ببيع سيارتى الملاكى و اشتريت سيارة سوزوكى فان موديل 2012 ما شاء الله ... بحاله الزيرو .. و اردت ان اضعها فى خدمه الاعضاء الكرام لمن يحتاج الى رحله او مشوار ..او توصيله

اخوكم حسام سيف بتاع الكوميديا بقى سواق ميكروباص ...

بس برضه معنديش مشكله ... طالما هوصل الاعضاء الكرام و هيطلعى سبوبه اكل منها انا و عيالى ..
بصوا بقى .. مزايا السواق : -
1- الالترام و الجديه فى المواعيد و الامانه الكامله ... اول صفه مش بمزاجى ده علشان عليها اقساط ..تاانى حاجه انتم هتحسوها بنفسكم..
2- تانى حاجه .. اللهم هيركب معايا . مش هيبطل ضحك .. كل رحله ليها موقف مختلف .. يعنى كانك دخلت فيلم كوميدى و ببلاش يا عم ...
3- اهم حاجه انى بمشى بالراحه و بحافظ على الناس و على العربيه ...
4- رابع حاجه انى بحبكم و الله .. لو معاك اجانب هتلاقى حد يتكلم معاهم انجليزى .. اصلى انا اداب انجليزى
5- خامس حاجه ... هتلاقينى اقل خمسه جنيه عن السوق برة ... و انت اولى بيهم ..

اول توصيله ببلاش لغايه اخر الشارع ...

ده تليفونى شغال 24 ساعه و انا مكانى فى السيدة عائشه ..

01001094217


بالاتفاق مع كريم منير

[SHNORY]

ربنا يكرمك ويفتحها عليك ويرزقك بالرزق الحلال ويعينك علي سداد ديونها
معلش بس ركبلها جي بي اس تراكر علشان لو شغلت سواق عليها تبقي عارف طريقه فين

[alaa74]

ربنا يبارك لك يا حسام باشا
ويرزقك الرزق الوفير
ويبعد عنك شر العين والحاسدين

[ganash]

ربنا يباركلك فيها يا استاذ حسام :)
ونشوفك فى قسم السوزوكى بقا ان شاء الله :d

[wesam_salom]

ربنا يوفقك يا حسام

[hosammoner]

ربنا يكرمك ويوسع رزقك

[friendship7897]

ربنا يبارك لك فيها ويكفيك شرها
جميل أوي إن حد آداب أنجليزي يسعى علشان بيته وأولاده ويضحي بسبب ظروف البلد والظروف لأقتصادية ويبيع عربيته الملاكي ويشتغل على فان
ما شاء الله عليك مش كل الشباب تقدر تعمل كدة
ربنا يرزقك رزق حلال طيب

[Karim_Monir]

ربنا يوفقك يا استاذ حسام
انا بحب جدا السعي على الرزق دون تكبر وباذن الرحمن ربنا هايفتحها عليك من وسع
هاغيرلك عنوان الموضوع للانسب
وليا سؤال وليا نصيحة
الاولي هي العربية مكيفة ولا لاء عشان هايكون طلب ناس كتير ولو مش مكيفة اسعي على التكييف بتاعها

ثانيا ادخل في شراكة مع ربنا وكل مبلغ يطلع منها طلع صدقة بسيطة التزم بيها مع ربنا بينك وبين نفسك وهاتلاقي مفعولها سحر باذن الله

[Samah AbdAllah]

يابخت اللى هيركب معاك يا ا.حسام
ربنا يباركلك يارب وتكون خير عليك

[hosamsief]

ربنا يكرمك ويفتحها عليك ويرزقك بالرزق الحلال ويعينك علي سداد ديونها
معلش بس ركبلها جي بي اس تراكر علشان لو شغلت سواق عليها تبقي عارف طريقه فين

ربنا يكرمك يا شنورى و يحفظك يا رب ... و يوسع علينا و عليك .. موضوع السواق ده مش مطروح حاليا .. انا تقريبا اللى هتشغل عليها .... و ان شاء المولى اول " فرده " هعملها لاسكندريه هطب عليك و مش هعتقك الا لما اكل سمك .. و انت بقى و حظك ..

ربنا يبارك لك يا حسام باشا
ويرزقك الرزق الوفير
ويبعد عنك شر العين والحاسدين

يا فندم ربنا يخليك .. و انا فى خدمتكم دائما ...

ربنا يباركلك فيها يا استاذ حسام :)
ونشوفك فى قسم السوزوكى بقا ان شاء الله :d

الله يحفظك و يكرمك .. و انا ان شاء المولى راشق فى القسم .. بس مواضيع الفان قليله اوى ..

ربنا يوفقك يا حسام

ربنا يكرمك ويوسع رزقك

احنا و انت يا رب
ربنا يبارك لك فيها ويكفيك شرها
جميل أوي إن حد آداب أنجليزي يسعى علشان بيته وأولاده ويضحي بسبب ظروف البلد والظروف لأقتصادية ويبيع عربيته الملاكي ويشتغل على فان
ما شاء الله عليك مش كل الشباب تقدر تعمل كدة
ربنا يرزقك رزق حلال طيب

و الله يا فندم انا تقريبا عشت الحياة بجميع ابعادها .. و كنت سافرت برة السعوديه .. لكن و الله انا معنديش مشكله اعمل ايه شيىء طالما بالحلال ... نعمل ايه بقى ... مش عندنا مسئوليات و بيت مفتوح و الله الجيران حواليا مستغربه لما شافونى راكبها و داخل بيها المنطقه و انا و الله عمال اضحك و انا راكبها ... يلا الحمد لله على كل شيىء ..

ربنا يوفقك يا استاذ حسام
انا بحب جدا السعي على الرزق دون تكبر وباذن الرحمن ربنا هايفتحها عليك من وسع
هاغيرلك عنوان الموضوع للانسب
وليا سؤال وليا نصيحة
الاولي هي العربية مكيفة ولا لاء عشان هايكون طلب ناس كتير ولو مش مكيفة اسعي على التكييف بتاعها

ثانيا ادخل في شراكة مع ربنا وكل مبلغ يطلع منها طلع صدقة بسيطة التزم بيها مع ربنا بينك وبين نفسك وهاتلاقي مفعولها سحر باذن الله

استاذ كريم ..لم و لن تسعفنى الكلمات لكى انزلك مقدارك بالرغم من اننى لم يحالفنى الحظ ان اراك من قبل او اتحدث معك .. شعرت خلال كلامى معك بالامس انى اتحدث مع اخ فاضل لا يتوانى فى تقديم اى مساعدة لاى احد .. بارك الله فيك و جعله فى ميزان حسناتك .. و تفاعل الاعضاء معى ولو حتى بدعوه خالصه لوجه الله .. قد فاق كل توقعاتى ...

بالنسبه للعربيه هى للاسف غير مكيفه .. لانها 1000 سى سى فبريكه بتنزل كده بس معمول ليها سروجيه بشكل جيد و فرش ارضيه و شكلها من الخارج جديد ... و مش عارف ممكن يركب ليها تكييف او لا ..

بالنسبه للطلب التانى .. هحكيك موقف غريب و الله لسه حاصل امبارح ...سبحان الله ....
انا من المفترض ان الشركه عندى هتصفى فى نهايه الشهر ده .. و يستحق اول قسط للعربيه فى اول اغسطس .. انا بقى قلت اروح بيها الشغل كام يوم كده لغايه ما انزل اشتغل بيها بشكل فعلى من اول الشهر .. وانا مروح فى طريقى للبيت لاقيت ناس بتشاورلى ..قولت يا واد طالما فى طريقك خدهم معاك .. المهم الناس دول ركبوا للسيده عيشه و بعدين قالولى متطلع بينا على المنيب يا اسطى .. قلت ماشى ربنا الرزاق .. المهم روحت البيت و انا معايا مبلغ و شويه فكه شايلهم زى اللب كده .. و دخلت البيت .. و المدام قالتلى انها طلعت مبلغ لله علشان العربيه .. و الله العظيم تلاته زى ما بقولت بالظبط .. لاقيت ايراد العربيه كان ضعف المبلغ اللى هى طلعته فى الساعتين دول و انا اصلا كنت رايح على البيت .. فقولت سبحان الله .. ربك كبير و كريم ..
مَن ذَا الَّذِي يُقْرِضُ اللَّهَ قَرْضاً حَسَناً فَيُضَاعِفَهُ لَهُ وَلَهُ أَجْرٌ كَرِيمٌ

[مصطفى-حسن]

ربنا يعينك يا حسام
وعلى فكرة مفيش احسن من العمل الحر
بس هقولك على كام نصيحة صغيرة كدا

1 - متتطلعش الاماكن المحدوفة بعيد واللى بتبقى على اطراف المدينة
2 - متطلعش مع ركاب متكونش مرتاح لشكلهم او لتصرفاتهم
3 - اعمل اى ابتكار او زرار فصل فى مكان متدارى وجنب ايدك تفصل منة كهربة العربية فى لحظة من غير ما حد ياخد بالة عشان لقدر الله الحالات الطارئة وعشان الامان لما تبيت العربية بالليل
4 - اى مشوار يجيلك مع حد متعرفوش ويقولك - هديلك اللى انت عايزة - اعرف ان الموضوع فية انه
5 - اسئل بفسك فى الشركات على اى وردية (هتظبط معاك اخر الشهر) وابحث عن الموضوع دة باهتمام
6 - لو جالك زباين سوريين اتفق معاهم قبل ما تطلع عشان دول ما بيهونش عليهم الجنية

النصائح دى كلها اللى قالى عليها واحد صاحبى معاة فيرنا ملاكى وشغال بيها عندنا فى العاشر من رمضان

بس اوعى تبطل تكتب القصص الكوميدية بتاعتك
والا اقولك
اليوم اللى تروح فية بدرى وتلاقى نفسك فايق
ابقى احكى لنا على النوادر بتاعة الركاب

[ابو لؤى]

ربنا يباركلك فيها ويكفيك شرها ويغنيك بالحلال امين استاذنا بيكون فى ناس طالبه فان بالسواق لحضانه او حاجه زى كده ديما اقرأها فى الوسيط شوف هتلاقى طلبات زى دى كتير اوى وربنا يوفقك

[Ahmed_Ramadan]

ربنا يكرمك و ويوسعلك رزقك و أشوفك صاحب أسطول

[w-m-a]

ربنا يكرمك ويوسع رزقك ويعطيك خيرها ويكفيك شرها

[mohammedabdallh]

ربنا يكرمك ويرزقك خيرها ويبعد عنك شرها
اهم حاجه الامان بليل بيتها فى جراج
وركب فيه اى جهاز تتبع
دى غلطتى وللاسف العربيه اتسرقت ومرجعتشى
فاتعلم من اخطاء الغير