Tweet
كله ثقافة وعلوم وفنون بيسلى تمام زى السيما التلفزيون التلفزيووووون
من شوية حوالى الساعة واحدة الضهر كنت بتفرج عالتلفزيون وانا بقلب وقفت على قناة طيبة (القناة التامنة سابقا) لقيتهم جايبين برنامج حوارى عالهوا وعلى الجنب شاشة صغيرة مكتوب تحتها "قنا الآن" على اساس انهم بينقلوا احداث مظاهرات 30/6 وكدة .. قلت اشوف الناس بتعمل ايه فى محافظة قنا واذ بى افاجأ بالآتى:
أولا: البث المباشر مش بث مباشر انما فيديو مسجل مدته 30 ثانية بيتكرر ويتكرر ويتكرر ويتكرر
ثانيا: الفيديو مش جايب ميدان او تجمع او حتى شوية ناس واقفين انما عبارة عن واحد راكب عربية او موتوسيكل بيلف فى شوارع قنا وبيصور جنب واحد من الشوارع والناس ماشية والدنيا زى الفل ومفيش اى مشاكل او مظاهر لشئ غير طبيعى يعنى يوم زى اى يوم عادى جدا
ثالثا: ودى المهزلة او زى ما ببقولوا شر البلية ما يضحك، الفيديو متسجل فى الشتااااااااء ايوة والله زمبؤلكم كدة هههه كل الناس لابسة جواكت تقيلة وبلوفرات وجلاليب صوف وشيلان وحاجة اخر انسجام
طبعا الدم غلى فى نفوخى وكان نفسى اشوف حد من بتوع ريادة الاعلام المصرى والسبعتلاف سنة حضارة عشان اروقه، المهم قررت مكونش سلبى قمت جايب نمرة المحطة من 140 دليل واتصلت بالقناة رد عليا السويتش قلتله حولنى على مسئول القناة قالى ايه المشكلة حكيتله .. قالى هحولك على (استوديو الهوا) قلت تمام، الووو ردت عليه واحدة ست بتقولى فيه ايه .. قلتها الامر كذا كذا كذا ومستنى ترد مفيش .. الو الو قفلت الخط
القناة مفتوحة قدامى ببص لقيتهم شالوا كلمة (قنا الآن) وبدلوها بـ (قنا منذ قليل) تييييييييت يا ولاد التييييييييت هو انا اقولكم الفيديو قديم وملوش علاقة بالاحداث تكتبوا تحته قنا منذ قليل !!!
قلت والله ما انا ساكت اتصلت تانى بنفس النمرة والمرة دى انا عارف طريقى كويس قلتله حولنى عالهوا لو سمحت حولنى فى ثانية .. ردت عليا نفس الست بقولها ممكن اعرف حضرتك مين قالتلى انا مخرجة البرنامج انت مين قلتلها مواطن مصرى وعايز اسأل سؤال واحد لو سمحتى: هى محافظة قنا تقع فى الاسكيمو؟؟؟؟؟
وبعد لحظات صمت كانت قد فهمت فيها الفولة وانى انا نفس الشخص اللى قفلت فى وشه السكة من شوية ردت وقالت انت عايز ايه؟ قلتلها تحترموا عقولنا وتشيلوا الفيديو المهزلة اللى انتو حطينوا عالشاشة .. احنا مش اطفال ولا معاقين ذهنيا عشان تشتغلونا بالطريقة الساذجة دى .. تصوروا ترد تقول ايه .... ؟؟
يا فندم فى فرق مش اقل من 4 ساعات بين اسوان وقنا ودرجات الحرارة بتختلف من محافظة للتانية (كان هيجيلى جلطة ساعتها) ثم ان الشرايط جاية كدة واحنا بنذيع ملناش دعوة .... (قلبى الضعيف لا يحتمل)
"اول مرة اعرف ان الصعيد الحرارة فيه بتختلف لدرجة ان ناس فيه بتصيف وناس لسة بتلبس صوف فى عز الصيف ! وكمان المخرج ملوش دعوة بالبرنامج هو بس بيقعد عالكرسى والناس التانيين يبعتولو الفيديوهات وهو يذيع ! "
قلتلها لو سمحتى حضرتك شيلى الفيديو المضلل ده .. قالتلى الفيديو مفهوش مشكلة .. قلتلها هبعت شكوى لوزير الاعلام يحقق فى التهريج ده .. قالتلى ابعت زى ما تحب وقفلت فى وشى السكة
مفيش دقيقة لقيت الفيديو اتشال نهائى والشاشة اصبحت كاملة الى ان انتهى البرنامج
دلوقت انا عايز اعرف .. الناس دى فاكرة نفسها بتعمل اذاعة مدرسية ولا بتشتغل لناس مجانين، ولا المشاهد عايش فى جو الستينات ولا ايه بالظبط ؟ وفين وزير الاعلام وجهات الرقابة على مستوى الاداء الاعلامى الهابط ده؟ وايه لزمة القنوات دى اصلا طالما مش بتقدم خدمة حقيقة او مبتعرفش تقدمها؟
على فكرة مذيعة حلقة انهاردة كانت بتقدم برنامج قبل الثورة اسمه (كاميرا ق8)
عارفين كانت بتقدمه ازاى؟ كانت بتقول:
اعزائى المشاهدين اهلا بكم فى برنامج كاميرا قاف تمنية
اه والله العظيم
البرنامج كان متذاع عالهوا فى فترة الظهيرة
تقديم هبة عثمان واخراج رشا كمالى
وتحياتى للريادة المصرية الاعلامية فى فضاء الفن والكلام الكبير ده
Comment