حد غيري بيتضايق لما واحد يرمي سيجاره من شباك العربيه؟

[Ahmed_Adham]

أنا بتخنق من التصرف ده قوي وخصوصا لو السيجاره جت في عربيتي وأنا ماشي وراه. وفيه ناس ساعات بتحدف كانزات أو ازايز ميه ولاحظت برضه ان نوع العربيه مش فارق يعني بتلاقيها من عربيه على قد حالها وعربيه فخمه يعني فيه ناس كتير بتحب تزبل وراها في كل حته من كل المستويات.

ايه رأيكو في الموضوع ده؟ برجاء التصويت (التصويت غير مرئي يعني باقي الاعضاء مش هيشوفو مين صوت بإيه)...

[Ahmed_Adham]

مره اتنين صحابي كانو على الطريق وواحد قدامهم رمى سيجاره عدت من جنبهم (أو هما فكرو كده) وبعد شويه شمو ريحه شياط وفكرو العربيه فيها حاجه وركنو على جنب واكتشفو ان السيجاره نزلت على الكنبه وراهم وبدأت تحرق في الفرش وطفوها والحمد جت على قد حرق جزء بسيط من فرش الكنبه بس لو لا قدر الله كانو مخدوش بالهم كمان شويه كانو هيلاقو حريقه مولعه في ضهرهم.

[Ahmed Nasser]

واحد صاحبى معاة عربية وبيدخن وهو ماشى ورمى السجارة الهوا رجعها علية تانى والسيجارة مسكت فى الهدوم
وولعت فيها وهو شامم ريحة الياط بس مطنش لغاية مالسجارة دخلت على جسمة ولسعتة
تقول اية بقى

[eslamrace]

والله الواحد اكتشف وعن تجربه ان الاجانب على استعداد يخللوا عربياتهم مزبله ويرموا كل ما تتخيله وميرموش فى الشارع و الواحد اتعلم منهم يعنى ايه ملكيه عامه مش من حقك تيجى عليها ولو بورقه منديل ويعنى ايه ملكيه خاصه تعمل فيها ما بدالك ومش من حق حد يسألك انت بتعمل ايه .
ومع ذلك فالحل بسيط نظام محترم يتطبق على الكبير قبل الصغير مع وجود عقوبات ماديه على المخالف وقبل كل ده نتعلم من تجربه ماليزيا فنبدأ بتعليم الاجيال الجديده فى المدارس النظام والنظافه فهما حيأثروا على اهاليهم لما الاهل يشوف الابن مبيرميش فى الشارع ويقول لابوه هو بيعمل كده ليه الاب حيتكسف وعمره ميعمل كده .
الحلول بسيطه بس الاداره الرشيده هى اللى مش موجوده .

[ramy87]

بصراحة سلوك غير حضاري و أسوء من إللي بيرمي زبالة من عربيته ....
ربنا يهدي الناس....

تحياتي :)

[Mohamed.Ramah]

لا دة غير البيرمى مبيراعيش ان فى ناس ماشية على رجليها فى الشارع وكانهم جرافيك او هو خبير فى الارصاد وعارف ان الهوا حيطير الحاجة زى ما هو منشن بالظبط او فاكر ان فى ناس ماشية وراة بتلم البيرمية اى حاجة بتترمى دلوقتى فى الشارع للاسف سلوكيات وصلت لازى الغير على الطريق ودة ربنا حيحاسبة عليها ومفيش حد او نادرا لما بلاقى مواطن مصرى يعطى الطريق حقة وبيلتزم لازم الاكشن وعنصر المغامرة يظهر باى تصرف عشوائى ربنا يهدى

[Ahmed_Adham]

والله الواحد اكتشف وعن تجربه ان الاجانب على استعداد يخللوا عربياتهم مزبله ويرموا كل ما تتخيله وميرموش فى الشارع و الواحد اتعلم منهم يعنى ايه ملكيه عامه مش من حقك تيجى عليها ولو بورقه منديل ويعنى ايه ملكيه خاصه تعمل فيها ما بدالك ومش من حق حد يسألك انت بتعمل ايه .
ومع ذلك فالحل بسيط نظام محترم يتطبق على الكبير قبل الصغير مع وجود عقوبات ماديه على المخالف وقبل كل ده نتعلم من تجربه ماليزيا فنبدأ بتعليم الاجيال الجديده فى المدارس النظام والنظافه فهما حيأثروا على اهاليهم لما الاهل يشوف الابن مبيرميش فى الشارع ويقول لابوه هو بيعمل كده ليه الاب حيتكسف وعمره ميعمل كده .
الحلول بسيطه بس الاداره الرشيده هى اللى مش موجوده .

أعتقد والله أعلم ان فيه ماده في القانون فعلا للي يرمي مخلفات من العربيه بدفع غرامه بس احنا عندنا شرطه مرور أهم حاجه عندها الفيميه ومادام معندكش فيميه يبقى أي حاجه تانيه هينه.

ممكن نضم للقايمه برضه العربيات النقل والنص نقل اللي بيشيل حاجه زي الرمل والزلط والكسر والرتش ومتكونش الحموله متغطيه ويغرق بيها الطريق طول ماهو ماشي.

[reda elgohary]

تخيل بقا أنك لو سايق موتوسيكل وحد بيطفى السيجارة والرماد بتاعها ييجى فى عينك ، أو حد يبصق من الشباك والهو يجيب الآرف على اللى وراه(الموتوسيكل ) ،، والله أنا عندي عربية بس معنديش التناكة اللى فى الناس ديه ، حسبى الله ونعم الوكيل .

[فتح الباب]

اكتر ما يضايقنى هو ان يرمى سيجاره او كنز دون مراعاة ممن خلفه فهى ( جليطه ) اكتر منها تسبب مشاكل
ولذلك انا عن نفسى احرص على هذه النقطه وغالبا ما تكون الفوارغ فى الدواسه لحين العثور على اقرب مكان يجمع قمامه وثانيا احترامى لمن هو خلفى شعور طيب اتمنى ان اراه فى كثير من الناس وثالثا لعددم وقوع حريق لا قدر الله . على فكره انا بستعمل طفاية السجاير كطفايه للسجاير وهى الوظيفه الاساسيه لها مش المسامير والرفايع والرخص . تحياتى

[حسام ابو كرمة]

[frame="7 80"]قلة ادب
لما الاقى عربية و ازازها اتفتح و راح رامى كانزاية او كيس ساندوتش او غيره بيبقى نفسى اشيلهم من الارض و ارميهم جوا العربية تانى دى اخلاق بتطلع من البيت
و الله اعرف طفل من قبل ان يتم العشر سنين ممكن يرجع البيت و فى جيبه ورق بسكوت و اكياس شيبسى و شفاطة و علبة عصير ممكن تلاقى فى جيبه اى حاجة و يرميهم فى سلة المهملات فى البيت عشان اهله علموه ما يرميش حاجة فى الشارع
تربيــــــــــــــــــــــــــــــــــــــة
[/frame]

[shaddadfalcon1]

لما بلاقي حاجه كده بفضل ازمرله وارعشله نور يمكن يحس علي دمه

[Elawany13]

الأسبوع اللى فات كنت راكن العربية بجوار مدرسة كبيرة مفيهاش طلبة
ومليانة مدرسين علشان التصحيح ... وطبعا كتير منهم مدخنين شرهين
ومغطى العربية علشان أحافظ عليها من الشمس والخرابيش وغيره
المهم خلصت شغلى ونزلت بشيل الغطا فوجئت ان فيه عقب سيجارة مشتعلة على الكابوت
حرقت جزء من الغطاء القماشى وحرقت البوهيه بتاعت الكابوت تحتها
مش عارف لو كنت اتأخرت كان ممكن ايه اللى يحصل كمان

حسبى الله ونعم الوكيل
اللهم انتقم من اللى بيعمل كده
اللهم توب علينا من المتخلفين والأغبياء

[horas3000]

اتضايق !!!!
يا راجل انا ببقي نفسي انزل اشيلها و ارميها له في التنك بتاعه

[reda elgohary]

ربنا يسترها على اخلاق المصريين .

[طارق _عبد السلام]

لو كل واحد يبدأ بنفسه هنتغير بجد

انا كنت فى بلد اوروبيه فى الشارع ومش عارف ارمى السيجاره فين قعدت ادور وفى الاخر رميتها فى بلاعه مطر اخدت كام نظره اشمئزاز مش قادر انساهم للنهارده