فكره انشاء قاعدة بيانات خدمية

[horas3000]

السلام عليكم جميعا و رمضان كريم

دلوقتي انا داخل علي سنتين في مصر اهو
و اكبر مشكله ما زالت تواجهني و تؤرق مضجعي هي التعامل مع الصنايعيه
و كلامي عن النجارين و السباكين و خلافه من مقدمي الخدمات

يا اما الاقيهم في البلالا و لا يفقه شيئ و ماشي بمبدا التجربه
او يبقي فاهم بس اسعاره خياليه او يطمع بعد الاتفاق زي ما حصل كتير معايا
و احيانا يبقي مش فاهم و اسعاره هبل برضه


ده غير التناكه و المواعيد الفلصو الكتير او انك تكلمه ميردش عليك و اكتر حاجه تغيظني و تحرق دمي انه يفتح شغل و ميعرفش يقفلوا او يسيبوا و افضل اجري وراه
و الاسوء من ده انه لما يطلع عيب في الشغل و تقعد تتحايل عليهم عشان يجوا يحلوا المشكله

انا بقالي 3 ايام دايخ علي سباك في العبور مكان شغلي و عندنا مشكله في المجاري و الدنيا مظروته اخر حاجه و مستني السباك اللي بنتعامل معاه يشرف مع اني مكلمه من 3 ايام عند حدوث المشكله لكن لا حياه لمن تنادي

فجاتلي فكره اني اعمل الموضوع ده و الناس تحط نمر الصنايعيه الكويسين و اللي بيتميزوا بالمهاره و الامانه و اهي تبقي قاعده بيانات تفيد الاعضاء و الصنايعيه دول

و يا ريت اللي يعرف حد يحط نمرته و المنطقه اللي شغال فيها

و كان نفسي ابتدي بنفسي بس للاسف معرفش حد و بعاني جدا مع اني ساكن في مدينه نصر و المفروض ان فيها صنايعيه كتير بس مقابلتش حد كويس
اما في العبور فشغلي فالحي الخامس و ده تقريبا صحرا و بجيب الصنايعيه معايا من مدينه نصر

[ahmedteam]

المشكله دى يتواجه كتيير مننا و اكيد كل واحد ليه تجاربه و مواقفه مع الصنايعيه

عن نفسى لسه مشطب شقتى جديد و كنت بتعامل مع مقاول محترم و ريحنى من القصه دى

و ان شاء الله قدامى وقت لغايه ما احتاج لحد و ربنا ما يحوجنى ليهم

[horas3000]

المشكله دى يتواجه كتيير مننا و اكيد كل واحد ليه تجاربه و مواقفه مع الصنايعيه

عن نفسى لسه مشطب شقتى جديد و كنت بتعامل مع مقاول محترم و ريحنى من القصه دى

و ان شاء الله قدامى وقت لغايه ما احتاج لحد و ربنا ما يحوجنى ليهم

هو انا مقلتلكش
انا متجوز شهر 8 اللي فات
و الشقه طبعا متشطبه قبلها بحاجه بسيطه
و عايز اقولك محتاجه شغل تاني لان في عيوب كتير ظهرت و خصوصا في الدهانات
بس طبعا بعد اللي شفته مش هدخل حد الشقه مش قبل سنه كمان الا للشديد القوي

[alking_2006]

مع الاسف قليل من الصنايعية اللى عندهم ضمير و بيفهموا و سعرهم مناسب و بيرعوا ربنا
مع الاسف مشكلتى نفس مشكلتك و معنديش نمر اضيفها

[Ahmed_Adham]

هو انا مقلتلكش
انا متجوز شهر 8 اللي فات
و الشقه طبعا متشطبه قبلها بحاجه بسيطه
و عايز اقولك محتاجه شغل تاني لان في عيوب كتير ظهرت و خصوصا في الدهانات
بس طبعا بعد اللي شفته مش هدخل حد الشقه مش قبل سنه كمان الا للشديد القوي

خليني أخمن. عندك شقوق رفيعه في الدهانات؟ طب في كل الشقه ولا أوض معينه؟

[dede_dodo88]

خليني أخمن. عندك شقوق رفيعه في الدهانات؟ طب في كل الشقه ولا أوض معينه؟

همممــ.. عندك الدهانات مش مستوى واحد و مناطق أعلى من مناطق؟ طب في الحيطان بس ولا السقف كمان ؟ lol

ده الطبيعي جداً لمستوى أغلبية الصنايعية, مقرفين في مواعيدهم و في العطلة اللي بيعملوها للواحد و في الأخر الشغل يطلع مليان عيوب..
هو بيبقى تمام أوي لما بتكون عارف واحد صنايعي شاطر متابع معاه فيظبطك كل ما تحتاج حاجة... بس مين اللي يلاقي بقي!!

[Ahmed_Adham]

همممــ.. عندك الدهانات مش مستوى واحد و مناطق أعلى من مناطق؟ طب في الحيطان بس ولا السقف كمان ؟ lol

مناطق اعلى من مناطق دي بتبان من الاول وبتفضل ثابته على حالها لكن الشقوق الاول مش بتكون موجوده ومع الوقت تظهر وممكن تزيد في الطول وفي عرض الشق كمان.

بس الشقوق الرفيعه (الشعره) مش مقلقه وبتبقى غالبا غلطه في خلطه المحاره بتكون ميبسه شويه أو لوجود جبس في المحاره خصوصا لو بزياده. انما لو شقوق كبيره تشوف منها النور تبقى دي اللي مقلقه لأن دي بتبقى في الطوب نفسه وليها أسباب كتيييييييير.

أما شقوق العواميد والقمرات دي اللي خط أحمر ومعناها خد ديلك في سنانك واخلع.

أنا مش مهندس وللأسف فهمت الحاجات دي بعد فوات الأوان.

[aser_007]

موضوع حلو جدا

[Shocky]

فكرة كويسة

وممكن كمان تتعمل على هيئة قاعدة بيانات فعلاً
بمعنى موقع على النت مربوط بقاعدة بيانات يكون فيها
1- التخصص
2- إسم الصنايعى
3- إسم المنطقة
4- إسم المدينة
5- إسم المحافظة
6- تليفون الصنايعى
7- إجمالى تقييم الزوار من 0 إلى 10

ودى تكون بيانات لكل صنايعى
بحيث إن يكون لكل صنايعى كود معين فى السايت من وخلالة لو عمل لحد شغل معين يدخل يعمل التقييم
ولو كل واحد أضاف صنايعى محترم بمعنى الكلمة وحط التقييم بتاعة هيبقى وفر على ناس كتير مجهود أكبر

وممكن كمان بسهولة يتعمل زى تاب فيها أفضل الصنايعية تقييماً فى منطقة ما .. أو أفضل الصنايعية تقييماً فى محافظة ما ..
ويكون الكلام دة عن طريق أكاونت يتعمل بسهولة زى الفيس بوك
مش هياخد وقت أكتر من دقيقة إن الواحد يدخل يسجل ويكتب بيانات صنايعى هو إتعامل معاه وحس إن عندة ضمير وإنة محترف فى شغلة

وهيكون مش بس مفيد لأعضاء نايل موتورز .. هيكون مفيد لمصر كلها
واللى يقدر يعمل الموقع بالشكل دة .. وهو مش صعب على فكرة .. يقدر يجيب إعلانات بعد فترة على السايت بحيث يغطى التكلفة.. خاصة إنها مش هتبقى تكلفة كبيرة .. مجرد دومين .. ومساحة تسمح بقاعدة بيانات وشكراً

[Shocky]

ولو حد مهتم بالفكرة دى .. انا مستعد إن شاء الله لعمل الداتابيز وهى بسيطة جداً بإذن الله
ويكون هو مثلاً مسئول عن التصميم

وما اعتقدش إن الفكرة دى موجودة بالشكل دة فى مصر لسة ..
بالإضافة لكل دة .. دلوقتى فى صنايعية بيعرفوا فى الكمبيوتر مش زى زمان .. ولما يدخل السايت ويلاقى إن لة تقييم وإن فى ناس مقدرة قيمة الإحتراف فى الشغل .. يمكن يكون دافع ولو بسيط إنة يحسن من نفسة وبكدة المستفيد هو العميل إن شاء الله

وطبعاً الكلام دة يشمل الفنيين فى مجالات كتير مش مجرد سباكة ونجارة و النقاشة .. لا ممكن يدخل فى مجالات تانية
وممكن كمان يتحط متوسط أجرة الصنايعى أدام كل واحد عشان تبقى عارف قبل ما تطلبة هو بيعمل إية وبكام وإية رأى الناس فية

ودة هيشجع ناس كتير من الصنايعية لتسجيل نفسهم لو بيعرفوا كمبيوتر أو لهم حد قريب منهم بيعرف كمبيوتر
وبالتالى هيكون مجال تسويق ويمكن يفتح له باب رزق بإذن الله تعالى
وبكدة الصنايعى مستفيد بتسويق مجانى لإسمة وتليفونة وصنعتية ...
وبكدة برضو العميل مستفيد بمرجع محترم فية كل التخصصات الشائعة

يبقى الكل إستفاد وتبقى محاولة لتحسين أى حاجة وإيجابية

[Shocky]

تكملة للفكرة

بكدة تكون بيانات كل صنايعى فى قاعدة البيانات كالاتى

- كود الصنايعى
- إسم الصنايعى
- تليفونة
- تخصصة
- الحاجات اللى هو متميز فيها (نبذة عن شغلة)
- المنطقة
- المدينة أو الحى
- المحافظة
- التقييم
- تاريخ تسجيل الصنايعى

إلخ

زى ما يكون شغل Freelancer ولة تقييم وبيانات .. إلخ

[horas3000]

طب كويس ان الفكره عجبت الناس
انا كنت متخيل انها مش هتنجح قوي (و لحد دلوقتي ههههه)
و طبعا كل المقترحات و الاضافات مرحب بها
المهم ال data نفسها بقي

خليني أخمن. عندك شقوق رفيعه في الدهانات؟ طب في كل الشقه ولا أوض معينه؟

لا خالص
انا اصلا المحار اللي كان عامل الشقة كان مرتكب افظع الجرائم في شغله
و مكانش في عمود او زاويه نازلين عدل كله معجوع و مموج و الحاله كرب
و ده ارهق النقاش جدا و استخدمت كميات مهوله من المعجون في محاوله لاصلاح العيوب
و العيب اللي ظهر ان في كام حيطه في الطرق تحديدا ابتدي الدهان يقشر من عليهم و لما جبت نقاش تاني قالي دي رطوبه في الحيطه مع انها لا فيها مواسير و لا اي حاجه
و قالي سيبها فتره عشان تضمن انها تنشف تماما و بعدين هعيد دهانهم بالكامل

ده غير حيطان عندي عليها ورق حائط ابتدي يفك
و حاجات صغيره كتير بقي

[Ahmed_Adham]

طب كويس ان الفكره عجبت الناس
انا كنت متخيل انها مش هتنجح قوي (و لحد دلوقتي ههههه)
و طبعا كل المقترحات و الاضافات مرحب بها
المهم ال data نفسها بقي




لا خالص
انا اصلا المحار اللي كان عامل الشقة كان مرتكب افظع الجرائم في شغله
و مكانش في عمود او زاويه نازلين عدل كله معجوع و مموج و الحاله كرب
و ده ارهق النقاش جدا و استخدمت كميات مهوله من المعجون في محاوله لاصلاح العيوب
و العيب اللي ظهر ان في كام حيطه في الطرق تحديدا ابتدي الدهان يقشر من عليهم و لما جبت نقاش تاني قالي دي رطوبه في الحيطه مع انها لا فيها مواسير و لا اي حاجه
و قالي سيبها فتره عشان تضمن انها تنشف تماما و بعدين هعيد دهانهم بالكامل

ده غير حيطان عندي عليها ورق حائط ابتدي يفك
و حاجات صغيره كتير بقي

الرطوبه بيبقى سببها الاول ان المحاره منشفتش كويس قبل ما تبدأ شغل المعجون والدهانات وبتبان أكتر في أخر الحيطه من تحت فوق وزره السيراميك. والرطوبه كده سبب تقير ورق الحائط برضه شكلك كنت مستعجل في التشطيب.

[horas3000]

الرطوبه بيبقى سببها الاول ان المحاره منشفتش كويس قبل ما تبدأ شغل المعجون والدهانات وبتبان أكتر في أخر الحيطه من تحت فوق وزره السيراميك. والرطوبه كده سبب تقير ورق الحائط برضه شكلك كنت مستعجل في التشطيب.

خالص انا مشكب في اكتر من 8 شهور
و انا مستلم الشقه علي المحاره اصلا
بس زي ما قلت الي عملها كان عبقري

[Ahmed_Adham]

خالص انا مشكب في اكتر من 8 شهور
و انا مستلم الشقه علي المحاره اصلا
بس زي ما قلت الي عملها كان عبقري

واحد قالي المحاره اللي بتبقى موجوده وقت الاستلام دي لازم تتفور ويتعمل غيرها لأنها بتبقى شغل أي كلام بس ده كان بعد ما شطبت وسكنت. المفروض يبقى فيه حمايه مستهلك للعقارات! يلا الشقه الجايه بقى هههههههههههه