ايها المهندسين افيدونى

[mostafa mahmod]

السلام عليكم و كل عام و انتم بخير و رمضان كريم
.
العبد لله و الحمد لله هتخرج خلاص السنه دى من هندسه نيو كايرو اكاديمى التجمع الخامس قسم مدنى
فكان ليا شويه استفسارات

اولهم الجيش
دلوقتى انا نص اول مواليد 92 و وحيد مليش اخوات اولاد و والدى معدى ال 60 سنه ربنا يديله الصحه
فعايز اعرف ايه الاوراق اللى مطلوبه منى و اجيبها منين و اوديها فين و امتى و الكلام ده :)

ثانيا : عايز اقدم على ماجستير فبصراحه تكاثرت الاقاويل فى المنطقه دهى و ناس بتقول طالما معهد عالى يبقى لازم دبلوم الاول و بعدها ماجستير - الكلام من لسان معيد فى جامعه عين شمس - و انا اعرف واحد خريج معهد عالى برضه اخد ماستر على طول بس فى جامعه القاهره

فلو افترضنا ان الكلامين صح هل انا محدد انى لازم اعمل الماجستير فى مكان معين - جامعتى تبع جامعه عين شمس - ولا ممكن اقدم فى اى مكان
و لو كده ايه اللى مطلوب منى فى التقديم و ايه نظام الدراسه يعنى بتبقى قد ايه و نظام الحضور و الامتحانات و كده

و ثالثا :
انا عمى شغال حاليا فى قطر و قالى علشان اسفرك و اجيبلك شغل كويس لازم يكون معاك شهاده خبره كويسه
فقالى اشتغل - فى مكان معروف و مشهور - علشان شهاده الخبره تبقى كويسه و اهو فى السنه او الاتنين بتوع الماجستير اكون اشتغلت و اتعلمت و اخدت خبره
.
اممممممممممم بس كده كفايه اساله كده انا عارف وجعتلكوا دماغكوا بس هسأل مين غير اهلى بقى
.
و شكرا مقدما للى هيرد

[#MAAM#]

بالنسبة لموضوع الماستر لو انت المعهد بتاعك معتمد من وزارة التعليم العالي يبقى ينفع تقدم على ماستر على طول لو التقدير بتاعك جيد او فيما فوق لو مقبول يبقى لازم دبلومة الاول ....... انا كنت جايب جيد جدا (( اكاديمية الشروق )) وقدمت على ماستر في جامعة القاهرة عادي

[mostafa mahmod]

طب تمام
انا تقديرى +c جيد مرتفع
طيب هى بتبقى مده الدراسه قد ايه و ايه نظام الحضور و الكلام ده و هل هى اسهل ولا القاهره

[hugan]

متابع

[#MAAM#]

انا معرفش مدني الصراحة انا كنت الكترونيات واتصالات بس الدنيا عندنا كانت صعبة جدا 5 ايام في الاسبوع كأنها دراسة عادية بالظبط مفيش مراعاة أن احنا عندنا شغل !! مش عارف الدنيا اتغيرت دلوقتي ولا لأ روح إسأل هناك افضل وربنا يوفقك

[mostafa mahmod]

الف شكر ليك منا فعلا هروح اسأل
.
بس قولت يمكن الناس تفيدنى علشان لما اروح ابقى فاهم الدنيا

[mostafa mahmod]

ايه يا جدعان محدش تانى يعرف ؟؟؟ :o

[AlGazar2]

انا خريج 2012 قسم عمارة مودرن اكاديمى تقدير جيد و قدمت فى جامعه حلوان عشان الماستر لان القاهره كانوا بيمطوحوا بتوع قسم عمارة عشان فى امتحان قبول الاول و مش بيقولوا على معاده على طول

النظام بيبقى الاول تمهيدى و تنجح فيه تخش على دراسة مواد الماستر تنجح تبدأ تعمل الرسالة بتاعتك

الدراسة بتبقى يوم او يومين على حسب المواد الى انت مختارها فى انى ايام فى الاسبوع على حسب عدد المواد الى هتاخدها و على حسب المواد دى فى ايام ايه

بالنسبة لاوراق الجيش و عشان انت وحيد
فهيبقوا عايزين صورة البطاقة و شهادة الميلاد مميكنة و شهادة التخرج المؤقته بتاعتك و صور ليك و فصيله الدم من مستشفى حكومى و مختومة بختم النسر و ختم المستشفى
و شهاده قيد عائلى مميكنة ( عشان انت وحيد )

و كل ورقة معاك و انت رايح تبقى مصورها 6 نسخ تقريبا و ربنا معاك فى اليوم ده

[mostafa mahmod]

الف شكر ليك يا هندسه