انبهرت بمصر النهارده

[hugan]

كان عندي مشوار في الزمالك بعد الفطار
قولت مش هاركب العربيه
بصراحه قلقان من المظاهرات وقطع الطرق خصوصا ان القاهره امس كان عندها شلل مؤقت
المهم توكلت علي الله وقلت اركب ميكروباص لحد المترو
وبعد كده اركب ميكروباص بولاق وانزل ابو الفدا
ركبت الميكروباص من عند البيت لحد مترو حلميه الزيتون
الواد سواق الميكروباص قام بالواجب وزياده قام بعمليه هضم للفطار
الحمد لله العربيه بتاعته كانت عباره عن مراجيح وهو قارص ومالوش دعوه باي حد ماشي غي الشارع
وكلن مشغل اوكا واورتيجا وحاجه اخر مزاج مع سيجاره البانجو

نزلت من الميكروباص وكانت المفاجاه
محطه الحلميه علي ما ذكر كان واقف اماهمها بياعين فاكهه
وكانوا بيوقفو بعيد عن المحطه بمقدار 10 متر علي الاقل
الكلام ده كان ايام الجامعه في التسعينات وحتي 2003 لان بعد كده ماركبتش المترو
كانت المفاجاءه البياعين احتلو المحطه بالكامل
ويعني سايبين ممر صغير للركاب كتر خيرهم


دخلت المحطه متشوهه من من رش الاسبراي بتاع جماعه 6 ابليس
وتمرد

ركبت المترو
كانت الصدمه بياعين داخل المترو
صواريخ
مناديل
مسدسات اطفال
ابر خياطه
كروت شحن
ايه ده احنا فين
مترو الانفاق فيه بياعين سريحه
اتاري البياعين داخل المترو امر هين


نزلت محطه الاسعاف

بياعين داخل المحطه مش في الشارع

طب ازاي مش عارف


طلعت شارع رمسيس
ايه ده انا فين والله العظيم تهت ودماغي لفت
فوجئت بشوارد وخيام للبياعين والعربيات الميكروباص قافله الشارع الواصل بين الجلا ء ورمسيس
ومفيش حتي طريق للناس تمشي فيه

ماستحملتش اكمل واركب ميكروباص
ركبت تاكسي للزمالك ودخل من الشارع بتاع الوكاله 26 يوليو
يدوبك طريق لعربيه واحده بالعافيه
وعلي الصفين استاندات بتاعت بياعين الوكاله

وفجئونا والتاكسي ماشي
براجل عجوز واقف في نص الشارع وماسم زجاجه بيبسي
وهوب راح حادفها علينا علي الزجاج الامامي
لاحول ولاقوه الا بالله
ايه اللي بيحصل
والعيال واقفه عمالين يضحكوا

ومفيش حد قدر يكلم الراجل العجوز
السواق اخد بعضه ومشي وهو بيحسبن
هايعمل ايه
ايه ياخونا اللي بيحصل في البلد
ايه الفوضي والانفلات اللي احنا عايشين فيها
مش ممكن تكون دي بلد متحضره
احنا ماحصلناش اقل بلد في افريقيا
المشكله الاكبر ان الوضع اتحول معاهم الي حق
فين الدوله وفين الشرطه

[mr_vampire]

ابشــــــــــــــــــــــــــــــــر.

انها مكتسبات هوجة 30-6 المجيدة.

البــــــــــــــــــــــــس ياشعب. وبالشفـــــــــــــــــــا.

[mohamed handy]

انا كان عندى مشوار فى القاهره من يومين وبجد شوفت يوم ياراجل انا حسيت انى مش عارف اتنفس من كتر الزحمه
ربنا يهدينا كلنا يارب

[YahiaAshraf]

يا باشا انت فى مصر ........توقع أى حاجه

[hugan]

اللي بيحصل ده يخلي ناس كتير تترحم علي ايام حبيب العادلي
للاسف الثوره 25 يناير طبعا
اظهرت اسواء ما في المصريين
لكن نتحول الي الفوضي
شيء مؤسف

[tota_ys]

ابشــــــــــــــــــــــــــــــــر.

انها مكتسبات هوجة 30-6 المجيدة.

البــــــــــــــــــــــــس ياشعب. وبالشفـــــــــــــــــــا.

مع احترامى لحضرتك الكلام دااااااااااااااااا من ايام ثورة 25 يناير والبلد اتخربت وبقت زى سويقه
يعنى عندنا فى شبرا ماكنش فى حاجة اسمها تكتوك دلوقتى خلاص فى كل حته وفى كل مكان
وماتقدرش تتكلم مع اى حد فيهم لان فى اى لحظة ممكن يضربك بمطوه علشان اكترهم مبرشمين
انا كنت بنزل قبل الثورة زمان بالليل فى اى مكان واى حته مطمن دلوقتى اقسم بالله فى شوارع عندنا بخاف امشى فيها بعد 9 بالليل

[mr_vampire]

مع احترامى لحضرتك الكلام دااااااااااااااااا من ايام ثورة 25 يناير والبلد اتخربت وبقت زى سويقه
يعنى عندنا فى شبرا ماكنش فى حاجة اسمها تكتوك دلوقتى خلاص فى كل حته وفى كل مكان
وماتقدرش تتكلم مع اى حد فيهم لان فى اى لحظة ممكن يضربك بمطوه علشان اكترهم مبرشمين
انا كنت بنزل قبل الثورة زمان بالليل فى اى مكان واى حته مطمن دلوقتى اقسم بالله فى شوارع عندنا بخاف امشى فيها بعد 9 بالليل:10d5c8w1107:

عارف يافندم . انها ثقافة شعب

بس لااااااااااااااااااازم نعلق كل حاجة عالرئيس والثوار والسي سي .

زي ماكانو بيعملو مع مرسي.

لو واحد اتزنق وعايز يدخل الحمام . يقول منك لله يامرسي.

[تامر.محمد]

طبيعي
داخلية مش موجودة بقى لها سنتين و نص
تتوقع الشارع هايبقى شكله ايه

عادي دي من مكتسبات ثورة يونيو , حل سوء التفاهم مع الداخلية

[ehab]

الوضع الي حضرتك بتحكي عنه في وسط البلد دا موجود من بعد ثورة يناير
و طوال الفترة دي لم يتغير

[فتح الباب]

ربنا يسترها

[al_manara]

فين الدوله وفين الشرطه

[lordnykon]

عارف يافندم . انها ثقافة شعب

بس لااااااااااااااااااازم نعلق كل حاجة عالرئيس والثوار والسي سي .

زي ماكانو بيعملو مع مرسي.

لو واحد اتزنق وعايز يدخل الحمام . يقول منك لله يامرسي.

عارف مين اللي دائماً يغلط في مصر كشعب ؟؟
عارف مين اللي دائماً يكذب و يرجع يناقض نفسه في نفس الموقف ؟؟
عارف مين اللي بيشوف الغلط فينقده و بعدين يعمله و يحلله لنفسه ؟؟
عارف مين اللي بيتكلم و يعمل نفسه فاهم و ألفاظه تفضح جهله ؟؟
إجابة السؤال : الإخوان.
كل ده واضح في كلامك، اقرأه تاني.

[Y a r i s]

لا يافندم بعد ثورة يناير العيال كل واحد مسك جردل بوية وابتدى يدهن حتى الرصيف وشباب زي الورد ابتدت تكنس الطرق وتلم الزبالة ... حتى في بولاء ابو العلى لاحظ عواميد الكبري اتدهنت بالوان علم مصررر

بس هو الموضوع ملهوش علاقة لا بمرسي ولا بالسيسي وانا قلت كده عشرين مليون مرررره. ... حسني مبارك علشان يطلع برائة. لازم الناس تترحم على اياموا وعلشان الناس تترحم على اياموا لازم البلد تبقى بالمنظر الي احنا شايفينوا ده.... علشان الناس تقول يااااااه فين ايامك ياريس ...( احنا اسفين يا صلالاح ...)

[Survival]

الموضوع وصل انى لما بقول للناس - حرام اللى بيحصل فى ناس بتموت كل يوم - يردوا عليا يستاهلوا الاخوان
طيب انا مش اخوانى و لا انتمي لاى حزب سياسي لكن حزين على الانسان اللى بيموت لانى عارف اهله بيحسوا بايه.
لكن دلوقتى الشماتة فى الموت بقت علنى.
لما اذكر الاحداث كلها ارى ان قادة الجيش هم اللى بوظوا ثورة يناير و ثورة يونيو و لولا تدخل الجيش فى السطلة و الحكم فى يناير و تدخله الغريب فى يونيو كانت هتبقى من اجمل الثورات لكن ازاى !!!!!!.

[mgheam]

مفيش حد استفاد من ثورة يناير وغياب الشرطة
الا
الاخوان والبلطجية
الاخوان حالياً خسروا اللى كسبوه
عقبال البلطجية مايتلموا