كل واحد يخلى باله من عربيتو

[hussein]

بقالى كام يوم مطحون فى الشغل بصحى كل يوم 7 صباحا وافضل واقف طو النهار فى الشمس لحد 7 مساءا لحد لما فضيت شويه و قلت انام براحتى يوم الخميس ولكن

يوم الخميس صحيت على تليفون من ابويا (ساكن تحتى) بيقولى فيه عربيتك اتسرقت و مسكو الحرامى !!!!

لبست بسرعة ونزلت لقيت واحد جارنا واقف مستنينى بعربيته و بيركبنى و بيقول انو شاف الحرامى شايل شنطة وبيبعد عن عربيتى و بيجرى راح بص على العربيه لقى الازاز مكسور و متقلبه من جوا

الغريبة انو لقى امين شرطة معدى فى الوقت دا على موتسيكل راح قايله الواد دا سرق العربيه امسكوووووو

الامين عاش فى دور جيمس بندق و طلع وراه وعلشان منطقتنا ملغمة شرطة (المعادى) لقى كام امين بيجرو معه و مسكوا الواد ومعه المسروقات متلبس

وصلنى جارى لحد عندهم قالولى دى حجتك قلتلهم اه فخدوه وطلعو على القسم وانا خدت العربيه و حصلتهم على القسم ( ربنا باءه مايوريكو اقسام الشرطة)

المهم لقيت اهتمام غير عادى الصراحة و ظباط وامناء شرطة فى منتهى الاحترام (انا من اكتر الناس اللى بكره الشرطة بس الحق لازم يتقال برضه)

المهم كشفو على الواد الحرامى طلع ايه باءه

تخيلوا كده

مسجل خطر جرائم نفس

قتل

ضرب

اغتصاب

وعليه 35 قضيه

وبعدين وهما بيفتشوا طلع معاه برشام

الغريبه باءه ايه ان مفيش حته فى جسمه سليمة

الواد جسمة متشرح من الخناقات اللى بيعملها

الاغرب باءه ان الواد انكر تماما انو سرق وقال انو كان ماشى فى الشارع و الامين مسكو !!!!!!!!!!!!!!!

راح الظابط عمل المحضر ان انا اللى شفتو (علشان جارى مايرحش القسم ولا النيابة)

ومش كده و بس لاء كتب كمان انى انا اللى جريت وراه ومسكتو بمساعدة الامناء اللى كانو فى الشارع !!!!!!!!!!!!!

وقالى لو كتبنا ان احنا اللى مسكناه وكيل النيابه هيقول ان احنا بنتبلى عليه و بنلزق التهمه فى اى حد !!!!!!!!!!!

المهم الكاسيت و السماعات و طفايه الحريق اتحرزو و راحو هما والواد على النيابة

النهارده بقى (السبت) الاقى انسان قمة فى الادب و الاحترام بيكلمنى بيقولى انا النقيب محمد من قسم المعادى و بيقولى مش هتيجى تاخد حاجتك وقلتله هاجى

قالى انت ساكن فين؟ راحت قايله على عنوانى قالى تحب ابعتلك الحاجة على البيت!!!!!!!!!

قلتله اذا مكنش فيه مانع وبقولو اخبار الحرامى ايه

قالى يا فندم !!!!! متخدكش شفقه بيهم دول ناس سيئه !!!!!(و الله قال سيئه مش ولاد ستين فى سبعين مثلا)

المهم جالى البيت اتنين امناء شرطه ومعاهم الحاجة و خدو صورة بطاقتى و مضونى على 3 ورقات و استلمت الحاجة

الموضوع ليه شقين بصراحة

1- ان الحراميه وقتلين القتله انتشرو و كل واحد يخلى باله من لغاليغو

2- ان لسه فى ناس محترمه فى الشرطه ولو انى اعتقد برضه انهم قلة و بردو علشان انا تبع قسم المعادى فيه احترام لكن فى اقسام تانيه بنت.....................

ربنا يسترها معانا يارب

[Ahmad Allawy]

الحم دلله ان حاجتك رجعت بالسلامة,,
المعادي بس.. عشان مكان كله سفارات.. و سفراء.. و ناس واصلة..
لكن لو مكان تاني.. انسي يا عمرو..
ولا الهوا..الواد كطان هيفلت بالحاجة و خلاص علي كده..
عموما.. الحمد لله انها جت علي قد كده..

[شاهين - بنز]

الحمد لله إنها جت سليمة والحاجات كلها رجعت
والصراحة أنا أشهد برضه بحسن معاملة الشرطة للناس إللي مش حرامية لإن مره خبطت واحدة ورحت القسم والنيابة والصراحة ووالله كانوا بيتعاملوا معايا بمنتهى الإحترام وخصوصا وكيل النيابة
والموضوع ده كان في قسم مصر الجديدة ومجمع محاكم مصر الجديدة إللي كان فيه وكيل النيابة

[Ahmed Samy]

والله خير

مصر فيها ناس كويسة

بيمسكوا الحرامي و يرجعوا الكاسيت لاصحابه

انا كنت افتكرت خلاص بح

[actronx]

ايه الي بيحصل بزبط ؟؟ انا نزلت النهارده الصبح لقيت زجاج الباب الخلفي الي على شكل مثلث ده مكسور برضه اظاهر برده الحراامي ملحقش بس الحمدلله جت سليمة

[wawoo]

[RIGHT][COLOR=#000000][FONT=Times New Roman]

2- ان لسه فى ناس محترمه فى الشرطه ولو انى اعتقد برضه انهم قلة و بردو علشان انا تبع قسم المعادى فيه احترام لكن فى اقسام تانيه بنت.....................

ربنا يسترها معانا يارب

الحقيقة يا اخ حسين , فى ضباط شرطة كتير محترمين جدا , هى بس قلة قليلة بتسيء للضباط كلهم , والحقيقة ان كل مهنة فيها قلة سيئة ,
لكن انا اعتقد ان كل واحد يقدر يجبر الى امامة انة يحترمة مهما كان و مهما كانت وظيفتة , و انا الحقيقة باشفق فعلا على ضباط الشرطة و تعاملهم اليومى مع المجرمين و مع السوابق , و دة غير انهم بيعرضو اروحهم للخطر فى سبيل اننا نعيش فى امان , و الامثلة كتير .
و لكن اذا حدث اى تجاوز من اى ضابط او سؤ استخدام للسلطة فى الحالة دى فى اجهزة رقابية ممكن اللجؤ ليها لمتابعت الامر .
المشكلة بقى فى ضباط المرور اللى بيخدو اتوات من استغلال قانون المرور الجديد , دول محتاجين معاملة تانية .

[shshshsh]

ان بقي لي تجربه اقسمت من يومها ما ادخل قسم
يوم نزلت مالقتش كاسيت السياره الاصلي بصراحه اتغظت جدا وقلت اتصرف بشكل ايجابي وابلغ واعمل محضر وفعلا ذهبت للقسم هو جنب المعادي بشويه
في مدينه المنصوره وفعلا لقيت كل احترام وعملت المحضر المتين وسبت رقم تليفوني ومشيت وتاني يوم لاقيت ظابط بيتصل وبيكلمني بكل احترام اني اروح اخد الكاسيت لأنهم مسكوا الحرامي قلت في نفسي ما البلد حلوه اهي ورحت القسم ويارتني مارحت وسألت ع الظابط ورحتله مكتبه عرفته بنفسي قالي اهلا وسهلا وكانت وراه كومه مسروقات وقالي اتفضل خد الكاسيت بصيت كويس ع المسروقات مالقيتش فيها الكاسيت بتاعي قلتله للاسف هو مش موجود وهنا كان التحول الكبير وكأن شخصا اخر او كأني شتمته وقالي ما انا عارف انه مش موجود ما تاخد اي واحدطبعا مع تغير نبره الصوت ونظرات العين قلتله اسف مش هاخد غير حاجتي قالي اكيد واحد تاني اخد حاجتك قلتله كل واحد مسؤل عن تصرفاته قالي وبلهجه اشد حده انا عندي محضر ولازم يتقفل ماشيييي وقفلتله المحضر ومشيت وقلت لنفسي لوكل يوم اتسرق مني كاسيت مش هبلغ اهون ما اخد حاجه حد تاني وعلي رأي المثل الداخل مفقود والخارج مولود

[meza]

2- ان لسه فى ناس محترمه فى الشرطه ولو انى اعتقد برضه انهم قلة و بردو علشان انا تبع قسم المعادى فيه احترام لكن فى اقسام تانيه بنت.....................

أنا أعتقد إن العكس هو الصحيح ..... القلة هما اللى بيسيئوا لجهاز الشرطة ... لكن للأسف ريحتهم الوحشة بتغطى على ناس تانية كتير كويسة ... و متهيألى كلنا بنشوف كم الظباط اللى بيفقدوا حياتهم و هما بيواجهوا الجريمة .. و لا أظن إنهم كانوا بيجروا ورا ترقية مثلاً.

أنا كل معاملاتى مع الظباط حتى الآن كلها إحترام كامل لم أعهده من قبل مع أى أحد ... حتى بشوف قدامى الظباط بيتعاملوا بمنتهى الإحترام مع الناس ... ما دام إنتا مش غلطان مفيش داعى تقلق ... نسبة إنك تقع فى إيد ظابط سىء متتعداش 5 % على ما أظن ... و حتى لو حظك وحش إنتا ممكن تتجنب التعامل الظباط معدومى الضمير دول.

لكن مع ده كله ... وجود فساد و لو بسيط بالنسبة للحجم الكبير لجهاز الشرطة فى مصر ... يسىء للجهاز و قياداته ككل .... و أول واحد يلقى اللوم عليه بعد أى واقعة وزير الداخلية لو تاخدوا بالكم.

المهم ... الجهاز ده خطر جداً وحساس جداً ... لأنك بتدى سلطات لبشر على بشر تانيين بقوة القانون ... و سوء إستغلال السلطات ينشر الفساد فى الجهاز.

الحل من وجهة نظرى تشديد الرقابة على كل من بيده سلطة سواء عميد أو عقيد أو حتى وزير الداخلية .. لازم رقابة مستمرة و حازمة و المراقبين يبقى ليهم سلطات واسعة أكبر من الوزير نفسه ... لكن فى نفس الوقت سلطتهم تكون محددة على جهاز الشرطة فقط ... و مفيش مجال إننا نعتمد على الضمير فى مسألة عدم الإستغلال السىء للسلطة دى.

[badblood]

الحمد لله جت سليمة بس ومان الحرامي اكل علقة تمام

[amir]

http://www.nilemotors.net/Nile/showthread.php?t=37526

[MoToRiZeR]

الحقيقة فيه ناس من الشرطة محترمين حقيقي و مبيتأخروش

صاحبي قبل كدة برضه كان ماشي علي رجليه ناحية دار الفؤاد في أكتوبر و ناس طلعوا عليه ضربوه و خدوا فلوسه و موبايله كلمني و جيتله و جري بالعربية علي القسم .. في خمس دقايق كان معانا اتنين ضباط و قالولي سيب العربية هنا و طلعنا في ميكروباص مدني نعمل مسح للمنطقة دي يمكن نلاقي الناس دي و طلع أمر بعمل كمين عند ميدان جهينة و تحت الكوبري اللي كان بيقف عنده كمين الرادار عالمحور زمان .. و صحيح ملقيناش الناس دول و مفيش حاجة رجعت بس الواحد حس إن لسة فيه ناس محترمة

و كل ده من غير ما نكلم حد يوصي علينا ولا حاجة

الروتين كله بقي كان اما رجعنا و قال يعمل بدل فاقد للبطاقة !! يا لهوي !! و في نفس القسم