أرفع وسام أمريكي لعالم مصري .. وبوش يكرمه في البيت الأبيض

[wawoo]

عموما اشكرك على مداخلتك وان كنت مختلف معاك في الرأي لانك خلطت بين الشخصيه المصريه والحكومه المصريه والفرق كبير بين الاتنين ..
مصر لا يحيطها شخص او اشخاص او احزاب .. ومهما مر عليها من ايام سوده بترجع زي الست الفلاحه العفيه تصحى وتقوم من تاني من جديد .. وبلاش موضوع جلد الذات او الاحساس اننا ادنى من باقي البشر لاننا فعلا معدنا اصيل .. [/

الله ينور عليك بجد , انا كنت فاكر الناس اللى زيك انقرضو من زمان , لكن يظهر برغم كل اللى حاصل فى هذا البلد ان ليسة فى ناس عندها انتماء لهذا الوطن .
و مبروك للعالم المصرى , و هو بتأكيد فخر لكل مسلم و كل مصرى و كل عربى

و تحياتى للجميع و كل عام وانتم بخير

[wawoo]

أمريكا هي صاحبة الفضل -بعد الله- ولا يجب ان ننسب النجاح لـ((عالم مصري))

يا احمد باشا , محدش يقدر ينكر انة فعلا امريكا ليها فضل فى تهيئة المناخ لهذا العالم لكى يقدم فكرة و اكتشافة , بس مهما امريكا عملت مش حتقدر تعمل العقل المفكر نفسة , العقل نفسة "وارد من مصر " و هو فى النهاية عالم مصرى يحمل الجنسية المصرى و تربى و تعلم العلوم الاساسية فى مصر , و مش صحيح ان اى حد بياخد فرصة بيبدع بدليل انة اللى اخد الجائزة عالم مصرى مش عالم امركى برغم كل ما هوة متوفر للعالماء الامريكان , فى النهاية فى موهبة طبيعية من عند الله هى السبب فى تفوق هذا العالم .

كلنا عرفين ان المناخ الحالى فى مصر لا يسمح بنبوغ مثل هذة العقول , انما كمان مش لازم نلغى تمام الدور المصرى فى النهاية , لانة مواطن مصرى فى النهاية , لة جزور مصرية هى اللى اهلتة بالتاكيد للوصول لهذا الاكتشاف .

و بعدين فى نقطة تانية , يعنى عندك الان امريكا التى ترعى العلم و العلماء بتفعل كل دة لمصلحتها فى النهاية , يعنى امريكا نفسها اللى بترعى العلم و العلاماء داخل امريكا , اكيد ببتصرف بطريقة تانية خارج امركيا .
يعنى من مصلحة امركيا اننا نفضل متخلفين و تقضى على اى محولات جادة للنهضة العلمية , و الادلة كثيرة على هذا الموضوع يعنى عندك علماء مصريين كتير تم تصفيتهم لانة لم يكون يخدمو المصالح الامريكية .
و ابسط دليل ما تفعلة امريكا الان مع إيران اللتى تحاول امتلاك العلوم النووية , لماذا نصبت امريكا نفسها القاضى الذى يحكم بين الناس و يوزع العلم وقفة لمصلحتة .
يعنى اقصد ان اقول ان امريكا لها يد فى تظل مصر و ما على شكلتها من الدول فى طور التخلف حتى تجنى خيرة عقولها و علمائها و فى نفس الوقت تأمن نفسها من منافس جديد فى مجال العلوم .

[tutankhamoun]

برضه هانرجع نقول يا رجالة
إن حب البلد مش بالدفاع المستميت

أنا ليه أرقام

كام عالم مصري حصل على جوائز عالمية ؟؟؟
و كام منهم فاز بجوائز و هو في مصر ؟؟؟؟؟

مشكلتنا أن أحنا فاكرين أن أحنا أذكى خلق الله

و أنا بقول
أن كل البشر أذكياء
و كل البشر إذا توفر لهم المناخ المناسب للعلم هايكونوا منتجين للعلم

و الدليل إن مش أحنا لوحدينا إللي عملنا حضارة
الصين عملت حضارة
الهند عملت حضارة
الرومان عملوا حضارة
العراق عمل حضارة
حضارة الأغريق و اليونان
حضارة بلاد فارس
حضارات شرق أوروبا
حضارات أمريكا الجنوبية المنقرضة

ده غير الحضارة الإسلامية اللي شملت بلاد كثيرة و كان مصر جزء منها

و اﻵن
أوروبا الغربية
اليابان
شمال أمريكا ( كندا و الولايات المتحدة الأمريكية )



يبقى ازاي المصري اذكى انسان في العالم ؟
المصري ما هو إلا إنسان مثله مثل إي إنسان
و زاد عليه الإستنصاح و الفهلوة
و شكرا

[ams]

حتقولي دول اطفال .. حقوللك ماهو ده السن اللي بتكون العقليه فيه هي الاساس بعيدا عن اي عوامل خارجيه محفزه او اسريه او اجتماعيه .. يعني راجل لراجل زي ما بيقولوا :)

الكلام ده عن الذكاء الفطرى فقط
يعنى احنا بالفطرة كده من اذكى خلق الله
اما الذكاء الفطرى + المكتسب ( تربيه و تعليم و بيئه واستثمار) = الانسان الطبيعى
نبقى من ....... خلق الله
اكمل مكان النقط .

[tutankhamoun]

الكلام ده عن الذكاء الفطرى فقط
يعنى احنا بالفطرة كده من اذكى خلق الله
اما الذكاء الفطرى + المكتسب ( تربيه و تعليم و بيئه واستثمار) = الانسان الطبيعى
نبقى من ....... خلق الله
اكمل مكان النقط .

+10000000000000 تمام يا باشا

[Ahmed Samy]

((الطفل المصرى أذكى أطفال العالم وأن ما تحقق من تفوق وتميز يؤكد القدرة العقلية المصرية ، حيث سبق وأن فازت مصر بالمراكز الاولى فى مسابقات دولية مثل المسابقة العالمية للتفوق الذهنى والحساب العقلى والتى نظمتها أكاديمية (UC MAS) العالمية فى ماليزيا وحصل الطلاب المصريون على المراكز الاولى إلى جانب المسابقات التى تنظمها منظمة الصحة العاليمة))
حتقولي دول اطفال .. حقوللك ماهو ده السن اللي بتكون العقليه فيه هي الاساس بعيدا عن اي عوامل خارجيه محفزه او اسريه او اجتماعيه .. يعني راجل لراجل زي ما بيقولوا :)

العقل نفسة "وارد من مصر " و هو فى النهاية عالم مصرى يحمل الجنسية المصرى و تربى و تعلم العلوم الاساسية فى مصر , و مش صحيح ان اى حد بياخد فرصة بيبدع بدليل انة اللى اخد الجائزة عالم مصرى مش عالم امركى برغم كل ما هوة متوفر للعالماء الامريكان , فى النهاية فى موهبة طبيعية من عند الله هى السبب فى تفوق هذا العالم .

.

طيب يا جكاعة احنا مش مختلفين في النقطة دي

أنا ما بقولش احنا أغباء و هما أذكياء

أنا فقط مش عاجبني الصاق الخبر بالعالم المصري (اللي المفروض انه بيباشر علومه في بلد الجنسية)

وده جزء من كلامي للتوضيح

أنا ماعيبتش في العقل المصري أبدا
ولكن زي ما ما قولتو ...المناخ وأنا أعتقد أنه مهم زيه زي العقل تمام
علشان كده مش من العدل أبدا اننا ننسب العالم لمصر

الجايزة تدل على نجاح مشروع متكامل ..لم يقم على أرض مصر و لم يلق دعما منها ولا يعبر بأي شكل عن الحالة العلمية المتردية في مصر

وهو ما أغفله العنوان

[wawoo]

أنا فقط مش عاجبني الصاق الخبر بالعالم المصري (اللي المفروض انه بيباشر علومه في بلد الجنسية)

وده جزء من كلامي للتوضيح

مش شرط يا اخ احمد انة يباشر علومة فى بلدة , اذا كان تفوق بجنسيتة فى بلد اخر حينسب الفضل لبلد المنشاء , و عندى امثلة ممكن اقرب بيها الموضوع دة .
عندك مثلا الاعبين المصريين اللى بيحترفو فى الخارج , مثلا لما ميدو بيجيب جون فى نادى فى الخارج , هل معنى كدة انة وصلل لمستوى دة لمجرد انة احترف فى الخارج , ولا هوة اساسا عندة الموهبة و لهذا السبب تم الاستعانة بموهبة . و هل بيقال علية لاعب انجليزى او لاعب هولندى و لا لاعب مصرى ....

عندك مثل تانى , لما عمر الشريف ينجح فى هوليود و يتألق فى السنيما هناك , هل هوة وصل لهذا لمجدر انة موجود اساسا هناك و لا هوة اساسا يمتلك هذة الموهبة فى الوطن الام , و وجد فرصة افضل فى مكان اخر .

اللى عاوز اوصلة لك ان الواحد مش بيفقد وطنة لمجرد انة تفوق فى مكان اخر او وجد فرصة فى مكان اخر , احنا الان فى عالم مفتوح تستطيع عن طريق الانترنت ان تصل لاى مكان فى العالم , و ان تنشر ابحاثك و افكراك فى كل مكان فى العالم من اى مكان فى العالم .

اى مهندس و اى دكتور و اى متفوق مصرى فى اى مجال يعمل فى اى مكان فى العالم , هو فى النهاية مصرى , تعلم فى مصر و اكتشفة موهبة فى مصر , و مصر لها فضل بلا شك على اى انجاز يحققة فى اى مكان فى العالم , يبقى انت عاوز تنزع منة كلمة مصرى لية .

لو انت مهندس مثلا و نجحت كمهندس فى السعودية لانك اشترك فى مشروع كبير و لم تتاح لك فرصة مماثلة فى مصر , هل كدة انت اصبحت مهندس سعودى ..... ولا مهندس مصرى نجح فى السعودية .

اة نسيت جراح القلب "المصرى" مجدى يعقوب ...... يعنى الامثلة كثيرة

[Ahmed Samy]

ماشي يا عم واو

اقنعتني :)

[م. تيمور]

ملعوبه يا واو .. :)
تحيتي لكم جميعا وانا اولكم :) .. ههههههه
الحوار كان ممتع واختلاف الرأي كان على اعلى مستوى من الاحترافيه والاحترام
جمعنا الله واياكم في جنااااات النعيم .,

[wawoo]

امين ..ان شاء الله يا شباب
و يارب اشوفكم كدة بتحققو انجازات عالمية من مصر .
كل عام و انتم بخير , رمضان كريم