واقع في مشكله

[نصرك يارب]

السلام عليكم بدايه انا بعتذر للاداره اني عملت عضويه تانيه بس عاوز افضفض معاكم براحتي وتقولولي اعمل ايه الموضوع اني خاطب وفي مشاكل هي كذا مره حاولت تقومني علي اهلي والطمع كمان يعني انا الحمد الله عندي شقتين تمليك هي برضه بتبص لناس تانيه تقولي الشقه بتاعه فلانه في مكان احسن واوسع مثلا ومش راضيه باي حاجه وتحصل مشكله بنا كبيره مثلا ونتخانق وتوصل لفسخ الخطوبه تفضل تعيط وتصوت لغايه ما نحل المشكله وترجع زي ماكانت تاني مجرد ما المشكله تتحل وعلي طول تقولي عاوزه عاوزه عاوزه عاوزه اتصرف وهات واكتشفت انها بتكدب عليا في حاجات كتير ودايما تحب اوي الناس تشاور عليها وتحب يبقي عندها اكتر من اي حد قلت هافسخ الخطوبه وكذا واحد من زميلي قالولي ممكن بعد الجواز تتغير وممكن لا انا مش عارف اعمل ايه بجد وفي حيره كتير اتكلمت معاها وهي ولا هنا واللي واقف بيني وبين القرار ان اللي بيني وبنها حب 5 سنين وهاقول علي حاجه بما اننا شباب وانتوا اخواتي بجد انا مش قادر اتخيل اشوفها مع واحد تاني انا عارف ان في ناس ممكن تنتقضني بس استحملوني انا لسه 24 سنه يعني ماليش خبره في الحياه اوي واسف علي الاطاله

[matrix_it]

على وصفك القرار صعب بس لا مفر منه ! هتتعبك بعد الجواز
اتعب دلوقتى و تعالى على نفسك او اتعب بعدييييييييين و حلنى
دة راى

[tarekmomo]

انا لومكامك هفض الخطوبة معلشى استحملنى فى الى هقولة الى زى دى عمر ما عنيها هتتملى حتى لو عملتلها اية هتفضل طوول عمرها تبص للناس والخصلة دى بتلازم الانسان مافيش حاجة اسمها هتتغير بعد الجواز

[Hooba17]

أخي العزيز
مع المشاكل إللي حضرتك بتقول عليها، أعتقد إن بنسبة 95% الجواز مش هيغيرها، بل بالعكس، هتزيد المشاكل دي بعد الجواز، إنتوا دلوقتي حتى لو بتشوفوا بعض كل يومين ولا حاجة مش زي لما تبقوا في بيت واحد ليل نهار مع بعض
بخلاف إن موضوع إن بينك وبينها حب 5 سنين، لازم مايكونش مؤثر على قرارك، لأن قرارك هيترتب عليه تعايش عمر طويل بإذن الله، ومش لازم تاخد قرار النهاردة وبعد كدة تعيش عمرك كله ندمان عليه
بعد الجواز فيه حاجات تانية غير الحب هتظهر على السطح، والمشاعر بتاخد جنب شوية، مش بقول مش هتحبوا بعض، لكن هيبقى في حياة وتعود بينك وبينها وضغوط الحياة وتصريف شئون البيت، والمشكلة إللي دلوقتي صغيرة، وإنتوا متجوزين هتبقى أكبر بكتير
لا أتمنى إنكوا تسيبوا بعض، لكن يجب وضع حل قاطع وإديها فرصة كمان وفهمها بوضوح وياريت يبقى أدام أهلها عشان يبقوا شاهدين على كدة، فهمها إن دي آخر فرصة هقبل فيها تصرفاتك، ولو اتكررت تاني يبقى إنتي من طريق وأنا من طريق، وفهم أهلها إنك مش بتقول كدة من الباب للطاق، لكن إنت استحملت تصرفاتها كتير وهي مش بتتغير فيها خالص
لازم تفهمها وتوضحلها إن رضاها بإنسان معناه رضاها بكل الأوضاع الخاصة به، وإنت الحمد لله ربنا أنعم عليك بحاجات مش عند غيرك، غيرها بتكون مخطوبة وبتتمنى تلاقي شقة 60 متر وإيجار جديد.
يعني لازم تفهم إنها في نعمة لازم تحمد ربنا عليها وماتبصش لحاجة عند حد، تبص بس لحياتها وحياتك المستقبلية مع بعض وتشوف هي هتعمل فيها إيه، وهتبنى البيت إزاي، وهتربي اولادكم إزي بعد كدة
أتمنى من الله أن يرزقك القرار السليم ويوفقك في حياتك
وقبل كل حاجة استخير ربنا طبعاً
تحيـــــــاتي

[bmya]

اهررررررررررررررررررب

[monamize4]

اشترى دماغك

[fares_311]

انا رأيي زي اللي الاخوه قالوه

[mohammed dodda]

أنت من جواك عارف اللى المفروض تعمله بس بتضحك على نفسك!! أقولك على حاجة ياصديقى؟ روح اتجوزها عشان تتعظ من اللى هيحصلك....انا اسف من حدة كلامى بس انت اخويا وانا عايزلك الخير

[نصرك يارب]

والله ياجماعه انا مش بفضفض غير معاكم انتوا زي اخواتي بالظيط وهاتستحملوني انا عارف اني في لحظه ضعف بين كل العيوب دي وبين الحب اللي بيني وبنها وانها الانسانه اللي اخترتها وعقلي بيقولي خلاص خلاص خلاص لكن زي ماقلت الحب هو السبب ومافيش حد يقولي مافيش راجل بيضعف كل واحد ليه نقطه ضعف

[نصرك يارب]

ويمكن دي كانت مشكله فيا اني عمري ماعرفت بنات غيرها اللي عرفتهم كانوا اصحاب الجامعه بس ماتعدش الحدود مع اي واحده

[ramyhekal]

لا هى مش هاتتغير بعد الجواز بالعكس لو كانت طلباتها دلوقتى اسمها طلب بعد الجواز هاتبقى امر وانت هاتبقى مش عارف تكفى احتياجات بيتك انا رأيي كل شىء نصيب او تستحمل

[AhMeD MeTwAlY]

افسخ وانت قلبك جامد مفيش واحده بتتعدل بعد الجواز عمرك سمعت عن حاجه سعرها ارتفع ورجع نزل تاني
وبعدين بيقولك ديل ....... لزو علقو فيه قالب

[أحمد كمال]

اللي ما شبعش في بيت ابوه مش هيشبع طول عمره

و مات الكلام

[nodey]

للاسف بنات اليومين دوووول الطمع مالي عيونهم قبل قلوبهم وبعدين حب ايه اللي انت بتتكلم عليه دي اذا كانت بتحبك فعلا مكنتش قرفتك في عيشتك وزهقتك كدا امال اذا تزوجتها وخلفت منها اولاد هتعمل ايه هتورثك وانت عايش
معلش يا صاحبي الحريم مشكلة العصر \انت لما تسيبها وتعنس هتحس بالنعمة اللي كانت معاها
وتخطب واحدة من بيت اصل وبنت ناس طييبين اهم حاجة طيبة الاهل
هتحس بالفرق وبعدين الحب بيتولد من جديد مع من ترتاح معها
الله يتب الي فيه الخير لك
صلي استخارة قبل اي قرار

[أحمد كمال]

هي كذا مره حاولت تقومني علي اهلي

أهلك لا نهلك ...... اللي ربوك و عملوا منك انسان محنرم .....

والطمع كمان يعني انا الحمد الله عندي شقتين تمليك هي برضه بتبص لناس تانيه تقولي الشقه بتاعه فلانه في مكان احسن واوسع مثلا

هو حد لاقي شقق و انت ما شاء الله عندك 2 ..... و النظر للي عند الغير ده طبع دنئ

غير انك لو جبتلها نجمة من السما هتبص تلاقي حد جاب نجمة احسن لمراته و تقرفك

مفيش شكر و لا تقدير

ومش راضيه باي حاجه

لا تعليق

تفضل تعيط وتصوت لغايه ما نحل المشكله وترجع زي ماكانت تاني مجرد ما المشكله تتحل

شغل الهيستيريا و التمثيليات و اتمسكن لحد ما تتمكن

وعلي طول تقولي عاوزه عاوزه عاوزه عاوزه اتصرف وهات

و لا فيه مراعاة للظروف ....... اتصرف و هات ...... ما انت بنك الحظ

طيب و لو لا قدر الله ظروفك بعد الزواج اتأثرت بأي مشكلة هتعمل ايه؟؟؟؟

اكتشفت انها بتكدب عليا في حاجات كتير

و كمان كذابة ...... طيب انا مش عارف حضرتك اصلا داخل تسالنا ليه !!!

ودايما تحب اوي الناس تشاور عليها وتحب يبقي عندها اكتر من اي حد

شخصية مظهرية استعراضية

قلت هافسخ الخطوبه وكذا واحد من زميلي قالولي ممكن بعد الجواز تتغير وممكن لا

هي فعلا ممكن تتغير ....... للأسوأ

و بعدين انت تخاطر ليه

و صدقني لو طلقت هتقلعك هدومك لانها شخصية مادية !!

انا مش عارف اعمل ايه بجد وفي حيره كتير

لا انت عارف بس بتشتغل نفسك

واللي واقف بيني وبين القرار ان اللي بيني وبنها حب 5 سنين

الحب لوحده ما ينجحش جواز ....

وهاقول علي حاجه بما اننا شباب وانتوا اخواتي بجد انا مش قادر اتخيل اشوفها مع واحد تاني انا

بكرة تعقل ما تقلقش ...... صدقني بكرة هتشوفها مع واحد تاني و تقول عليه "العبيط اهوه" ههههههههههه