هوا أنا ممكن أقلب غرفة عادية لغرفة جاكوزي ؟

[ESO101]

قررت أشتري سكن فرُحت أدور على بيت أو دوبلاكس لقيت الأسعار مرتفعة جدًا
يعني توصل لمليون و300 ألف للدبلوكس والفيلا توصل 2 مليون
فقررت أشتري شقة لإن أسعارها أنسب شوية
لكن الشقق بيكون تصميمها مش على مزاجي أوي
يعني حمامتها صغيرة ونفسي يكون عندي جاكوزي
المهم وقع الإختيار على شقة متردد لإن فيها نفس المشكلة الحمامات صغيرة
هيا مساحتها معقولة بس كل المساحة في الغرف والصالة
المهم فيه أوضة لازق فيها حمام
أنا بفكر أعمل الأوضة دي جاكوزي وبخار مساحتها 4 × 4 عايز الجاكوزي يكفي شخصين
هل ينفع أقلبها جاكوزي ؟ وأستفيد من التصريف اللي فالحمام ؟
ولا إيه ؟
عايزها زي التصميم دا



إيه السلبيات اللي ممكن تواجهني لو عملت كدا ؟
وهوا ينفع أصلًا أحول الأوضة لكدا ؟
وإيه تكاليف الموضوع دا ؟

[أحمد كمال]

بغض النظر ينفع و لا لأ ...... و للاسف مش هاقدر افيدك ....... بس انا بس داخل اقول لك

و الله انت استاذ

[mr_vampire]

وانا داخل اقول والله انتا راجل صاحب مزاج عالي وانا بقدر الراجل ابو مزاج عالي.

حاجة فخيمة مفيش كلام.

لو عرفت بقي ياريت تعرفنا.

[Bassem Youssef]

متابع لاني اريد عمل فكره مشابهه

تحياتي

[amr011111]

كل شىء ينفع خاصة لو الاوضه على منور او واجهه جانبيه
انت بس هتجيب سباك يعملك صرف الاوضه على الحمام

[A.Saad]

وعزل للارضية

[eng.octooo]

اة طبعا ينفع - انا عاملها كدة عندى فى البيت فى الدور الارضى

عندك فى كليوباترا احواض جاكوزى مستقلة يعنى جاهزة بكل حاجة مش بيتبنى ليها ولا حاجة

بتحطها مكان ما انت عايز وتمد مواسير تغذية وصرف منها وليها وعلى اقرب حمام ودة الى عندك

والباقى سهل ..

بس مع الوقت هاتزهق منها وهاتنساها :(

[WalidAdel]

في السلاب في كذا شكل و كذا نوع لأحواض الجاكوزي و مساحات مختلفه و علي حسب امكانياتك تحط عدد المواتير اللي انت عايزها في الحوض او البانيوا او مغطس كمان لو عايز و كله بالفلوس و عدد المواتير و التركيب عليهم و افتكر في عقود صيانه كمان للحاجات دي
السلاب اللي في مكرم عبيد انزل الدور اللي تحت الارض ده هتلاقي عارض كل الاشكال و الانواع اللي ممن تتخيلها و كل شكل ليه عدد المواتير و المضخات بتاعته و كل حاجه و احجام مختلفه "فرد - فردين - ثلاث افراد"بس الارقام عاليه تتراوح من 18-20-25 ألف وانت طالع الكلام ده كان من سنه ماعرفش بقي دلوقتي ايه الكلام
و بقيت الشغل اللي هو الاضاءه و الخشب اللي حوالين الجاكوزي سهل يعني و لازم يكون خش سهل الفك علشان تعرف توصل للجاكوزي من مرا علشان اعمال الصيانه بتاعته و كده

[Secret-Man]

المساحه ديه تعمل فيها غرفه ساونا كمان وكرسى مساج مستورد كهرباء

لو عايز الكلام ده بروفيشنال سيرش على الشركات المتخصصه لتركيب الانظمه ديه لانها مش مجرد حوض وصرف

ده سيستم كامل وليه كنترول يونيت كمان

[ESO101]

جزاكم الله خيرًا جميعًا بارك الله فيكم
أفكار حلوة وإقتراحات هسأل عن إمكانية عملها
ياريت لو حد يعرف أسماء شركات بتعمل كدا في السعودية والأسعار لإني معرفتش أوصل لحد يقلب أوضة جاكوزي
اللي بيبيعوا الأحواض بيقولوا مهمتنا نركب الحوض في توصيلات الحمام لكن مسألة أوضة عادية مش هنقدر
حاولت أصور مخطط الشقة
شوروا عليا أفضل موقع للجاكوزي في الشقة
هل هوا أوضة النوم أو أوضة الخادمة ( اللي عليهم نقط حمراء )