سوق دوت كوم

[أبو إياد]

السلام عليكم ورحمة الله وبركاته

حصل معايا موقف من سوق دوت كوم بايخ جدا ومكنتش متخيل ان ممكن حاجه زى دى تحصل

الموضوع : انا ليا حساب على الموقع وقمت بتنفيذ عمليه شراء لاب توب والمفترض ان الشحنه بتم خلال 7 ايام عمل ( استثناء للاجازات والعطلات )
الجهاز سعره الاصلى 4200ج ونازل عليه عرض علشان يكون 3900ج الجهاز وصلنى عن طريق ارامكس بعد 26 يوم وطبعا خلال الفتره دى تليفونات وايملات وكان اخر مكالمه هو ان لو الجهاز لم يصلنى غدا ساقوم بالغاء العمليه ولم استلمه وبالفعل وصلنى تانى يوم

كل اللى حصل ده مسببش ليا اى مشاكل لكن لما اطلب جهاز ويجيلى جهاز بمواصفات مختلفه هنا هايسببلى مشكله
انا كنت طالب الجهاز انه i5 فوجئت انه i3

ياعنى تاخير وعدم التزام بالمواعيد وجهاز مختلف
طبعا اكتشفت الموضوع بعد ما دفعت الفلوس واستلمت الجهاز
فاتصلت بيهم وقلتلهم الوضع كذا كذا فطلب منى اقدم طلب استرجاع عن طريق الموقع وفعلا عملت كده وجالى مندوب ارامكس بعدها ب 5 ايام منهم يومين اجازه ياعنى بعد 3 ايام استلم الجهاز وانا استلمت ايصال بالمبلغ
فاتصلت علشان اعرف ايه اللى هايتم فوجئت انهم قالوا مش هايقدروا يعملوا اى حاجه الا لما ارامكس توصل الجهاز للمخازن الخاصه بسوق دوت كوم

هنا بقا اتجننت وقدمت شكوى على الموقع واتصلت بيهم وبلغتهم ان لو المشكله ماتحلتش هاقدم شكوى فى جهاز حمايه المستهلك
بعدها بيوم اتصلوا بيا وقالولى بمجرد وصول الجهاز المبلغ هايكون فى حسابى على الموقع فبلغتهم ان الغلط عندكم ولازم تحلوا المشكله اما استرداد المبلغ او الجهاز المطلوب

اتصلت بارامكس وعرفت ان لازم سوق هى اللى تطلب الجهاز منهم وانهم ماعملوش كده

فاتصلت بيهم تانى وعرفتهم انهم مابعتوش ياخدوا الجهاز لانهم كانوا بيتحججوا بارامكس
المهم اخر النهار لقيتهم كلمونى وقالولى ان المبلغ فى حسابى عل الموقع , دخلت على الموقع وفعلا لقيت المبلغ فقمت بعمليه تحويل بنكى لحسابى وانهيت التعامل معاهم بعد الموقف ده

[Secret-Man]

طبعا ده الطبيعى بتاع سوق

موقع سيى جدا جدا

[Eng.Mina]

معلش محدش بيتعلم ببلاش بصراحة انا بخاف اتعامل معاهم في الحاجات الغالية دي مش عن سابق تجربة ولا حاجة بس اخري معاهم حاجات في رينج 200 جنيه وعلي فكرة عايز اقول لحضرتك علي حاجة انا كنت عايز اشتري كاميرا نيكون l820 ودي سعرها معروف في المحلات ب 2400 جنيه فجأه لقيتهم في يوم عاملين عليها عرض ب 1999جنيه فطبعا كان عرض مغري جحا وفكرت جديا اجيبها بس في نفس اليوم قلت اكلم التوكيل أأكد علي السعر لقيت المفاجأة التوكيل بيقوللي سعرها نزل وبقي ب 1999 جنيه فطبعا اجيبها من عندهم ليه وانا ممكن اجيبها من التوكيل بنفس السعر وحستلمها في ساعتها مش افضل مستنيهم علي ما يشحنوها . اللي عايز اقوله لحضرتك حاول بعد كده تأكد علي سعر المنتج في المحلات ممكن تلاقيه بنفس السعر او بزيادة بسيطة

[MaZaGAngeE]

دي قلة ادب و سرقة
كويس انك نقلت تجربتك معاهم عشان محدش يقع في نفس المشكلة

[أبو إياد]

معلش محدش بيتعلم ببلاش بصراحة انا بخاف اتعامل معاهم في الحاجات الغالية دي مش عن سابق تجربة ولا حاجة بس اخري معاهم حاجات في رينج 200 جنيه وعلي فكرة عايز اقول لحضرتك علي حاجة انا كنت عايز اشتري كاميرا نيكون l820 ودي سعرها معروف في المحلات ب 2400 جنيه فجأه لقيتهم في يوم عاملين عليها عرض ب 1999جنيه فطبعا كان عرض مغري جحا وفكرت جديا اجيبها بس في نفس اليوم قلت اكلم التوكيل أأكد علي السعر لقيت المفاجأة التوكيل بيقوللي سعرها نزل وبقي ب 1999 جنيه فطبعا اجيبها من عندهم ليه وانا ممكن اجيبها من التوكيل بنفس السعر وحستلمها في ساعتها مش افضل مستنيهم علي ما يشحنوها . اللي عايز اقوله لحضرتك حاول بعد كده تأكد علي سعر المنتج في المحلات ممكن تلاقيه بنفس السعر او بزيادة بسيطة

ما انا بعد الفيلم ده سالت على الجهاز عرفت ان سعره وصل الى 4350ج ياعنى زاد عن الاول وطبعا لو كانوا صارحونى ماكنش هايكون فى مشكله
ولما بعتلولى الجهاز بامكانيات مختلفه قلت انها غلطه غير مقصوده لكن بعد ما عرفت السعر فكده احتمال النصب وارد جدا
وممكن الموضوع يعدى على ناس كتير ومايخدوش بالهم

[mastr_n]

موقع أقل مايتقال عنة انة زباااااالة معلش فى اللفظ
عملت حساب علية واشتريت تابليت للأولاد وبالمرة جبت حاجتين للمدام عندى المهم هايوصل امتى قالولى 7 ايام قولت ماشى عدة اسبوع مافيش حاجة قولت اصبر شوية المهم فين وفين بعد حوالى 14 يوم جالى صنف واحد بس من الأصناف البسيطة عبارة عن علبة كريم ههههههههههههه طيب فين ياعم التابلت قالى احنا شركة شحن والاوردر اللى بيجيلنا بنوصلة .
وعلبة كريم عليها مصاريف شحن وحوارات المهم من نرفزتى كنسلت الدليفرى على اساس انهم هايبعتوا التابليت مرة تانية
وبعدين هما لما لقونى رجعت الكريم كنسلوا التابليت من غير حتى ما يتصلوا بيا يبلغونى
ودية كانت النهاية وبصراحة مانصحش حد يتعامل معاهم لأن دية وظيفة المنتدى اللى بيجرب بينصح الناس علشان مايقعوووش فى نفس المشكلة

[Eng.Mina]

ما انا بعد الفيلم ده سالت على الجهاز عرفت ان سعره وصل الى 4350ج ياعنى زاد عن الاول وطبعا لو كانوا صارحونى ماكنش هايكون فى مشكله
ولما بعتلولى الجهاز بامكانيات مختلفه قلت انها غلطه غير مقصوده لكن بعد ما عرفت السعر فكده احتمال النصب وارد جدا
وممكن الموضوع يعدى على ناس كتير ومايخدوش بالهم

طالما سعره زاد يبقي وارد جدا تكون الحركة دي مقصودة عموما بعد كده لو حضرتك ناوي تتعامل معاهم في حاجة ( مع اني شاكك في كده :) ) ممكن تبقي تفتح الباكدج قبل ماتدفع مليم واحد وتتأكد ان الكرتونة مقفولة والمواصفات مظبوطة وبعدين تدي الفلوس للمندوب ده الحل الوحيد ولو لقيت في اختلاف في المواصفات او الكرتونة مفتوحة مثلا امتنع عن الاستلام ويخبطوا دماغهم في الحيط طالما فلوسك في جيبك . انا شخصيا بعمل كده مع انها بتبقي حاجات مش غالية بس لازم اطمن علي كل حاجة والمندوب قدامي واهم حاجة قبل م الفلوس تتدفع

[iwantes350]

اسوأ موقع للشراء من النت
انا انصحكم ب Jumia افضل موقع بالرغم ان الاسعار عندهم عادية والسيلات مش ظريفة بس اهتمام كبير بالمشترى واحترام والتزام بالمواعيد

[mohaakotb]

طيب انا ليا تجربة مختلفة
انا اشتريت من عندهم جالاكسي جراند كان ارخص 400 ج عن المحلات ووصلني بعد 4 ايام وبضمان سكاي
واشتريت فلاشة 8 جيجا لما كان نازل عرض الواو كانت ب 20 ج والتوصيل مجاني ووصلتني تاني يوم ما طلبت واستغربت جدا ساعتها !!!

[Amr_MO]

نفس الموضوع ليا تجربة سيئة معاهم بنفس تفاصيل صاحب الموضوع

كانوا عاملين عرض على جهاز ايبود الجيل الخامس وعملت الاوردر يوم الخميس لاقيت بتاع ارامكس جاي يوم السبت، دفعتله تمن الشحنة 2500 جنيه وبفتح الكيس لاقيتهم باعتنلي ايبود الجيل الرابع ميسواش تمنه دلوقتي 1000 جنيه، طبعا العفاريت اتنططت في وشي بزيادة لما لاقيتم لازقين ستيكر عليه يداري المكتوب على ضهر علبة الجهاز ان ده ايبود الجيل الرابع والاستيكر عاملينه جيل خامس يعني نصب وسرقة، اتصلت بيهم مسحت بيهم الارض وعملت طلب ارجاع السلعة مرة تانيةـ يومين وبتاع ارامكس شرف اديته الجهاز وقعدوا فترة على ما الموقع طلب استرداد الشحنة من ارامكس وقعدت اسبوعين بحالهم تهزيق في التليفون علشان يحولولي الفلوس على حسابي في الموقع وبعدها عملت سحب للمبلغ على حسابي في البنك

موقع سوق اخره تشتري منه حاجة من ام بلاش زي فلاشات وما شابهها لكن الحاجات الغالية اشتريها من موقعين ملهومش تالت، موقع نفسك.كوم وموقع جوميا بصراحة الاتنين محترمين جدا جدا وموثوقين والحاجة بتستملها منهم متغلفة بشكل محترم وذوق جدا في التعامل وموقع نفسك برضه مضمون لأنه بيتعامل مع اتصالات وسيتي بنك فمضمون برضه ومنصحش اي حد بموقع سوق ده بتاتا

[dedi]

كويس بنستفاد من تجارب بعض
اشتريت منهم كاميرا جات بعد 21 يوم تقريبا بعد 100 اتصال و حرق دم
اخى اشترى منهم تليفزيون سامسونج مفروض انة led وصل موديل موش عارف اسمة بس مواصفاتة هو رفيع جدا فى الجوانب ولكن من الخلف نفس سمك lcd
واضح انهم شركة غير محترمة بالمرة وتوبة من الشراء منهم

[Ahmed_selmy]

انا بصراحه بقلق اوى من موضوع الشراء من على النت ......احب كدا انزل افللى فى الحاجه اللى حخودها قبل ما ادفع فيها .

[dr.hazem]

انا اشتريت منهم كذا حاجه والحقيقه مكنش عندي اي مشاكل معهم...
حتى فمرز اشتريت سماعة بلوتوث وبعدين اكتشفت زر مش شغال عملت استرجاع وجم خدوها والفلوس نزلت فحسابي واشتريتها من حد تاني ارخص واهي عندي من سنتين وما شاء الله شغاله....
تحياتي

Sent from my Xperia Arc S using Forum Runner

[h_shahin]

أعتقد مشكلة سوق إن الضغط عندهم كبير جدا و خدمة العملاء عندهم أضعف من الضخط ده
بالإضافة لإنهم بيسمحوا للأفراد العاديين ببيع منتجات و سلع على موقعهم نظير عمولة بدون رقابة منهم على المواصفات و الحودة بالنسبة للبائعين الخارجيين
و ده سمح لإنتشار السلع المغشوشة و المقلدة على موقع سوق
يعنى كل السلع الصينى الرخيصة و السيئة هتلاقيها على سوق كمان كل الماركات المغشوشة و المقلدة هتلاقيها على سوق زى نظارات الشمس و الساعات و التابلت و غيرها
ميزة مواقع نفسك و جوميا إنهم ما بيبيعوش غير المنتجات الأصلية فقط و بمعرفتهم فقط و بالتالى فيه كنترول أكبر على مستوى المعروضات
كمان فيه موقع كويس بس أقل شهرة إسمة e3050 محترم برضه

و إن كان الأمر لا يخلوا مشاكل و شكاوى برضه بالنسبة للموقعين دول كمان و بعضها منشور على صفحاتهم فى الفيس بوك
عموما الشراء من الإنترنت مفيد فقط فى حالة العروض أو عدم وجود السلعة فى السوق العادى أو فى حالة عدم توافر وقت للتسوق (بتحصل و الله ساعات)

[Al-Farooq]

اتعاملت معاهم كذا مرة شايفهم كويسين بس المشكلة فى التأخير فعلا احيانا بتكون الخدمة سريعة بس مش علطول.