المفروض الواحد يكون مرتبه كام عشان ميفكرش فى السفر ؟؟

[ahmedfathi]

بغض النظر عن الاحداث اللى بتحصل فى مصر . المفروض يكون الواحد مرتبه كام عشان ميفكرش فى السفر خارج مصر . ولو سافرت المفروض يكون المرتب هناك كام عشان يكون حافز للسفر ؟

[saddam]

صديقي المواطن
كل مواطن وظروفه والسفر من مصر مش لمجرد الفلوس السفر من مصر له عشرات اﻷسباب منها أولا تحس بإنسانيتك وتحس بالنظافة وتحس بحياة حلوة وإن الدنيا كبيرة ومصر مش محور الكون وتحس بالصوت الواطي وتعرف ترتقي بنفسك وتشوف تجارب اﻵخرين ويقل خوفك من الناس باﻹحساس المستديم عند المواطن.المصري إن دايما فيه حد حينصب عليك وتشوف شوارع نظيفة وأكل نظيف وناس بتحترمك أكتر منته بتحترم نفسك طبعا فيه دول تشذ غن هذه القاعدة

المرتب المجزي في مصر المغني عن السفر هو 8 آلاف جنيه أما في الخارج فلو بتاخد أقل من 12 ألف جنيه فلا تسافر لو السبب مادي فقط

ملحوظة خلاصة.تجارب في سفري لدول كتير

ودمتم للنضال

[أبو آسر]

الأخ صدام جاب الخلاصة
اللي بيفكر يسافر دلوقتي مفروض يسافر عشان سبب واحد بس وهو إنه يشعر بإنسانيته وآدميته اللي افتقدها في مصر الأيام دي وإلى الله المشتكى
أما لو المسألة مادية فقط فأظن أن راتب 5000 جنيه كافي في مصر حاليا بس ده متوقف برده على المستوى الاجتماعي للشخص ده فممكن شخص يكون بيدفع ال5000 جنيه دول في إيجار شقة أو قسط عربية مثلا ! فده بيتوقف على مستواه الاجتماعي والمعيشي وممكن واحد تاني ال5000 دول يعيشوه عيشة مرتاحة وكويسة ويحوش منهم كمان
أما السفر فلا أظن أن الغربة تستاهل إلا لو تعدى المبلغ 10000 جنيه والله أعلم

[janagabr]

اده انت بتشتغل ( بسم الله ماشاء الله ) لا وكمان بتقبض ( اللهم صل علي النبي )
طاب ياعم ماهي بتلعب معاك اهه متنساناش في نفحه من نفحاتك طبعا بهزر معاك ربنا يبارك ويزيد اهم حاجة ان الله يبارك في الرزق فمهما كان قليل هيقضيك وفي ناس بتقبض الاف الالاف ومبيقضيهاش غير نقمه الله عليهم

[unl0veable]

صديقي المواطن
كل مواطن وظروفه والسفر من مصر مش لمجرد الفلوس السفر من مصر له عشرات اﻷسباب منها أولا تحس بإنسانيتك وتحس بالنظافة وتحس بحياة حلوة وإن الدنيا كبيرة ومصر مش محور الكون وتحس بالصوت الواطي وتعرف ترتقي بنفسك وتشوف تجارب اﻵخرين ويقل خوفك من الناس باﻹحساس المستديم عند المواطن.المصري إن دايما فيه حد حينصب عليك وتشوف شوارع نظيفة وأكل نظيف وناس بتحترمك أكتر منته بتحترم نفسك طبعا فيه دول تشذ غن هذه القاعدة

المرتب المجزي في مصر المغني عن السفر هو 8 آلاف جنيه أما في الخارج فلو بتاخد أقل من 12 ألف جنيه فلا تسافر لو السبب مادي فقط

ملحوظة خلاصة.تجارب في سفري لدول كتير

ودمتم للنضال

على الرغم من ان الاسم شاذ (الله يرحم صدام) بس بتعجبنى ردودك الصراحة - انت مناضل دبابة :018a1d~146:

[midoabdeen]

8000ج
والله حضرتك راجل محترم
انا اعرف زمايل ليا متجوزين وفاتحين بيت ب 950ج فى الشهر
على فكره قبل ما بتكلم فى الفلوس لازم بتكلم على بركه ربنا
و هو عايش مرتاح جدا على فكره ومرتبه بيكفيه
احنا فى بلد فعلا ما يعلم بيها الا ربنا
بتقبض 1000 زى 10000
صدقنى والله مادام ربنا بيبارك فى الفلوس هتلاقى الدنيا ماشيه معاك حلاوه
انا كنت فى شغلى القديم بقبض 1100 ج وكانوا بيكفوا ياعنى كنت يوم ما اجيب فطار ب 3 ج يبقى كتير
دلوقتى انا يوميا بصرف مش اقل من 30-40 ج فى شغلى الجديد

[الاستاذ]

عشان تعيش بنى ادم 10 الاف
عشان تعيش نص بنى ادم 5 الاف
عشان تعيش ربع بنى ادم 1000
عشان متعش خالص 900 جنية

[OilMan]

لكى تقرر السفر خارج البلاد يجب على الاقل ان تاخد 5 اضعاف ما تحصل عليه هنا
يعنى ان كنت بتاخد هنا الف يبقى بره خمسة الاف
ويجب ان تحسب دخلك السنوى وليس الشهرى وتقارن بين هنا وهناك

ده من خبرة سفر متعددة لدول الخليج واوروبا بس اوروبا كانت تدريب (بس كنت باسال وافهم متوسط المرتبات والمعيشه) والخليج عمل

[محمد يوسف]

صدقنى مالهاش مقياس أبدا..أنا أعرف ناس فاتحة بيوت ومستورة بألف جنيه فى الشهر ..وأعرف ناس دخلها 15 ألف جنيه فى الشهر ومديونة وراكبها الهم.... الموضوع حسب احتياجاتك ونظام حياتك وقبل كل شىء بركة ربنا فى اللى بتاخده

[eslamrace]

انت عارف ده بيتوقف على الشخص نفسه مصروفه كام وطموحاته ايه ومتجوز ولا عازب ولو متجوز مراته ايه متطلباتها ولو قادر يسيطر على متطلبات مراته فعنده كام عيل وسنهم كام .
الموضوع نسبي للغايه متقدرش تقول عايز كام علشان تعيش كويس ممكن واحد عازب وملهوش متطلبات وقاعد مع والده ووالدته وتلاقيه بيقبض 1000 جنيه بيحوش اكتر من نصهم وبالباقى عايش ملك زمانه شويه بنزين ومصروف قليل فى جيبه وعايش .
وممكن واحد يكون متجوز وعنده 4 عيال فى مراحل الدراسه ويكون مرتبه 10000 جنيه ولما تكلمه تحس انك لازم تطلع 15 جنيه تقوله خللى دول معاك هههههههههههههه فالموضوع لا يمكن قياسه الا بالمتطلبات الشخصيه .
بالنسبه لبره فلك ان تتخيل ان العيشه فى مصر ممكن تعتبرها رخيصه جدا فعندك البنزين فى مصر مدعوم دول اوروبا وامريكا ايام مكنت هناك كان اللتر "ب3 دولار وشويه " والاكل غالى برضه عندنا فى تموين ودعم على شويه سلع وهكذا وبعدين فى مصر عندك مستويات كتير يعنى ممكن تنزل السوق تشترى شويه حاجات ب 30-40 جنيه وتدخل هايبر تجيب زيهم ب 100-120 جنيه وده ليه اللى بيشتريه وده ليه اللى بيشتريه بره فى الغالب الاسعار قريبه من بعض وعاليه اما الدول العربيه مقدرش افيدك .

من الاخر تقدر تقول لو على فلوس ممكن تتصرف هنا وتجيب فلوس من شغل او استثمار ولو عيشه بره انضف من هنا بس بره مفيش علاقات اجتماعيه يعنى لو تعبت انت لوحدك ولو حصلك حاجه مش حتلاقى صاحب تقعد معاه على القهوه تشتكيله وهو يفك عنك فالموضوع شخصي جدا ياما ناس اتغربت ومستحملتش وقالت العيشه فى مصر احسن وياما ناس خرجت بره مصر وقالك وربنا منا راجع اعيش شحات بره ولا اعيش فى مصر .
تحياتى.

[eng wael]

بصراحه ردود الاعضاء ماشاء الله ربنا يبارك لكم
بالنسبه للاخ صاحب الموضوع
لكل مجتهد نصيب وان الله لا يضيع اجر من احسن عملا
مشكله كل الناس انها بتدور على المكسب قبل العمل والاجتهاد
اتعب واجتهد وفى يوم من الايام هتلاقى ربنا كرمك ووسع عليك اليوم ده امتى لا تنتظرة واعلم ان الرزق ليس وحده فى المال فربما يعطيك الله كثيرا من المال ويعطيك زوجه تنكد عليك حياتك او ولد عاصى يبيعك اللى وراك واللى قدامك
الحياه غاليه والاسعار نار ولكن البركه والرضا وراحه المال لاتقدر بكنوز الدنيا
ودائما وابدا اسأل الله العظيم من فضله ولن يخزيك ابدا

[dr.hazem]

كقاعدة... صاحب العمل اللي بييجي من السعوديه هيديك راتبك مضروب في 2-2.5 مش اكتر من كده الا في حالات نادرة....


تحياتي

Sent from my Xperia Arc S using Forum Runner

[aliabutaleb]

من ملاحظاتي إن كل ما كان الدخل اكبر في مصر كل ما كان الدافع أكبر للسفر!
دخل كويس، مفيش مشاكل مادية فالواحد بيبتدي يفتقدفي الأمن والمعاملة الآدمية وحاجات كدة مش موجودة عندنا في مصر دلوقتي

[CryptonX]

ملحوظة
المرتب طبعا بيرفق بين الشخص و الثاني.

بس برده لازم تبقى عارف ان كل شغلانة ليه متوسط .. وممكن تعرفوا عن طريق مواقع كثير .


فلو لقيتك نفسك مابين 10-15% اعلى او اقل من متوسط دخل وظيفتك في مصر او غيرها ... يبقى انت كدة في السليم (مبدئيا كموظف)


لقيت نفسك اقل بكتيير ... طبعا فكر في السفر او في تغيير الشركة .
لفيت نفسك ازيد بكتيير ... ماتقولش لحاد :).


كسفر ... لازم يبقى على الاقل 4 مرات الي بتاخده هنا لسبب مع توفير السكن.

[mohamed_selim]

شوف انت هنا بتقبض كام و بعد ما تسدد مسئولياتك (اقساط او مصاريف او حتى مصاريف اكلك و شربك و فسحك و عيلتك) بتحوش كام ... احسب لما تسافر هتعيش بكام (العقد فى سكن و عربيه ولا لأ هتحسب حسابهم) و تاكل و تشرب و تتفسح (بحدود طبعا بس عشان تكون عايش عيشه طبيعيه) و تشوف هتحوش كام بعد كل ده (فى ناس بتزود مقابل للغربه فى المعادله دى قبل ما تحسب هتحوش كام) و من كل ده تشوف هل السفر مفيد ولا القعده احسن