ايه اخبار طريق الغردقة؟

[الجنرال]

شباب السلام عليكم ورحمة الله

انا بفكر اسافر اجازة فى الغردقة وعايز اسافر بالعربية ..

اولا ايه اخبار الطريق؟؟ الدنيا تمام وامان ولا ايه؟؟

ثانيا الواحد المفروض يزبط ايه فى العربية قبل ما يسافر ويتأكد من ايه

وشكرا ليكو

[monamize4]

متابع ,,,,,,,,,,

و بعد اذن صاحب الموضوع
ياريت حد يقولى افضل طريق من اسيوط للغردقة

[3mr Farrag]

انا لسه راجع من كام يوم
الطريق كان عادي مفيش مشاكل
غير طبعا الحتع بتاعت الزعفرانه رخمه شويه
و احنا راجعين كان في هوا جامد جداا من بعد الجونه
و كانت العربيه بتحدف مع انها اوكتافيا و تعتبر جديده
فا لو عربيتك مش قد كده في الثبات بلاش تسافر بيها افضل

[الجنرال]

شكرا على عمرو على الرد .. بس ممكن تقولي ايه الحتت بتاعت الزعفرانة دي؟ انا اول مرة اكمل فى الطريق ده لحد الغردقة (اخري كان العين السخنة)

وشكرا

[الجنرال]

بالنسبة للعربية فهي ريو هاتشباك .. هيا طبقا مقارنة بالاوكتافيا فهي خفيفة .. ربنا يسهل

انا اهم حاجة بسأل عليها الامان وكده

[aliabutaleb]

راجع من هناك من أسبوع
الطريق زي الفل رايح جاي
خلي بالك في الحتة اللي من السخنة للزعفرانة عشان الطريق ضيق وشغال اتجاهين وبلاش سفر بالليل
ترجع بالسلامة

[3mr Farrag]

الزعفرانه اللي مكمل من بعد السخنه
الطريق اللي مافيهوش فاصل في النص
الطريق حوالي 70 كيلو
الترلات بتستغبي فيه
اما الطريق مافيهوش مشاكل ان شاء الله
بس سافر الصبح مش بليل
و اتاكد كويس من الاستبن وحاله الكاوتشات
لان مافيش استراحات كتير في بعض مناطق الطريق

[الجنرال]

اااه فهمت ما هي زي الحتة اللى عند العين السخنة طريق واحد ومفيش فاصل فى النص .. انا افتكرت الطريق نفسه فيه قلق يعنى ..

طيب تمام شكرا على الرد وربنا يسترها ان شاء الله

[حماده المصري]

انا سافرت في عز المعمعه كان الطريق زي الفل هو طويل شويه

اول مرحله طريق السخنه توصل الساحل بتاع البحر الاحمر تكمل علطول في اتجاه بورتو

المنطقه دي هي دي طريق الزعفرانه هو مش طويل اوي لكن صعب السرعات عاليه وفي ملفات وكده ف خلي بالك

بعد النقطه دي توصل ل الزعفرانه راس غارب وده طريق مش رايح جاي وكويس نوعا ما

بعد كده من راس غارب ل الغردقه نفس الكلام

بس الحقيقه في ناس سافرت من كام يوم قالولي الدنيا نايمه هناك شويه وفي فنادق قفلت اساسا

بس عموما هتلاقي هناك مصريين ومش كتييير

لو سافرت ولقيت الدنيا حلوه ياريت تقول انا ليا ليالي هناك عايز اخدهم الحقيقه بس مستني وقت حلو

[3mr Farrag]

لو عايز رأيي
بلاش الغردقه الصيف ده
فاضيه و مافيهاش روح و ما فيش سهر اوي
انا بفكر اطلع السخنه لاني ماستمتعتش اوي في الغردقه و اقرب في المسافه

[h_shahin]

أصدقائى اللى شغالين فى الغردقة رايحيين جايين على الطريق فى كل الأوقات مفيش مشاكل الحمد لله بس يفضل السفر أول النهار علشان فى حالة الأعطال لا قدر الله تقدر تتصرف فى النور و ما تضطرش تقف على الطريق بالليل فقط لا غير

[الجنرال]

خلاص تمام .. متشكر قوي يا شباب .. ربنا يكرمكوا

واول ما اوصل هقولكوا ايه الاخبار ان شاء الله