استفسار عن بلاور ..

[smsm2015]

حد جرب البلاور ده يا جماعة يقولنا رايه فيه :
بلاور شفط وطرد للاتربة في مصر, الإسكندرية, القاهرة | سوق

ولو فيه ماركة ثانيه افضل يا ريت تقولنا عليها فى حدود السعر ده ..

[rotanamasoud]

كل البلورات بيبقى شكلها واحد المهم الخامات انا عندى واحد صينى من زمان من 5 سنين او اكتر مش فاكر وشغال كويس المهم انه ميبقاش مضروب لان فى بلاورات صينى كويسه وفى مضروبه
اهم حاجه ميستغلش متواصل اخرك 5 دقائق عشان يعيش يعنى دفعات دقيقه شغل ودقيقه يبطل

[أبو آسر]

أولا نصيحة بلاش تشتريه من موقع سوق بالذات أو من على النت عموما لأنه بيتباع في كل حتة وهتلاقيه أرخص من كده لأن موقع سوق بياخد عمولة على المبيعات من البائعين فهما بيزودوا العمولة دي على المشتري زائد انك هتتحمل مصاريف الشحن أو لو البائع هو اللي بيدفعها فبرده هيحملهالك وبالتالي ممكن تجيبه في حدود 50 - 60 جنيه على ما أعتقد لو نفس الماركة المعروضة أو لو أغلى شوية هتلاقيه حاجة أنضف من اللي معروض وهتلاقيه في محلات أدوات العدد الكهربائية ومحلات الكمبيوتر والمولات ...
ثانيا هو صيني وكل اللي في السوق صيني تقريبا بس في صيني كويس وصيني تعبان ودي مقدرش أفيدك فيها لأني مش عارف أسماء ماركات لكن لو لقيت حاجة ماركتها معروفة حتى لو صيني هاته حتى لو غالي شوية عشان الحاجات دي لو مضروبة فمش هتقعد معاك سنة وهتضطر تجيب واحد تاني يبقى أما تزود 20 - 30 جنيه وتجيب حاجة نضيفة شوية تقعد معاك سنتين تلاتة يبقى انت كده وفرت
وأهم حاجة تشوف الوات بتاعه كام وهات الأعلى وإن كان موضوع الوات ده ممكن يكون فيه لعب فخلي بالك
يارب أكون أفدتك

[amr011111]

طيب يا جماعه فيه بلاور شفط اتربه بالشحن ( اقصد شحن كهربائى ) والواحد يخده معاه وميحتاجش وصلة كهرباء

ولو فيه بكام

[smsm2015]

شكرا يا جماعة على اهتمامكم وردكم جزاءاكم الله كل خير ...

بس كان لى استفسار ايه الوات المناسب انا هنضف بيه الكمبيوتر و اللاب توب و المجره بتاعة الشبابيك والابواب الالمونيوم ..

[mr_green]

هات ماركة
apt
عن تجربة و كمان فنى التكييفات إللى بتعامل معاه بيستخدمها من زمان
هاته من محلات العدد مش فاكر أنا شاريه من كام سنة بحوالى 145 تقريبا

[smsm2015]

طيب معلش يا جماعة انا لاقيت منه نوعين فيه سرعة واحده وفيه سرعات مختلفة هل سرعة واحدة كفاية ولا اجيب السرعات المختلفة واستخدامه منزلى ان شاء الله ..

[أبو آسر]

طيب معلش يا جماعة انا لاقيت منه نوعين فيه سرعة واحده وفيه سرعات مختلفة هل سرعة واحدة كفاية ولا اجيب السرعات المختلفة واستخدامه منزلى ان شاء الله ..

سرعة واحدة كافية أوي للاستخدام المنزلي على ما أظن

[smsm2015]

شكرا جزيلا يا جماعه وان شاء الله هجيب اللى هو سرعه واحده ...

[abokoko]

حضرتك اشتريت اى نوع و بكام
.؟؟
وتقييمك له ايه
؟

[dedi]

اعتقد موضوع السرعات دة هم بيتحكموا فية عن طريق الزرارر يعنى انت لو دست دوسة خفيفة على الزرار هى نفس فكرة السرعات وطبعا بتذود السرعة لما تدوس على الاخر